| སློབ་དཔོན་ཡོན་ཏན་འོད་ཀྱིས་ཅི་གདའ་ཞུས་པས།རྒྱུ་མཚན་འདྲ་གདའ་ཡ་གསུང༌། དེ་ནས་སི་ཏུ་བྱང་རྒྱལ་གྱིས་ཡར་ཀླུངས་སྣེ་གདོང་དུ་སྤྱན་དྲངས་ཏེ།གུས་པ་ཆེན་པོས་བསྙེན་བཀུར་ཞིང་མཆོད་པའི་ཁྱད་པར་མང་པོས་ཞབས་ཏོག་བྱས་ཏེ་གཙུག་གི་ནོར་བུ་ལྟར་བཟུང་ནས་ཆོས་སྟོན་པར་གསོལ་བ་བཏབ་པ་ན་བདག་ཉིད་ཆེན་པོ་འདིས་སྣེ་གདོང་དང༌། ཁྲ་འབྲུག་དང༌། རྩེས་ཐང་ལ་སོགས་པ་རྣམས་སུ་དགེ་འདུན་དང་སྐྱེ་བོའི་ཚོགས་ཆེན་པོ་རྣམས་ལ་ཆོས་གསུངས་པའི་དུས་སུ། ལྷའི་མེ་ཏོག་ཆར་བཞིན་དུ་བབས་པས་ཐམས་ཅད་རང་དབང་མེད་པར་དད་པར་བྱས་ནས་འགྲོ་བ་དཔག་ཏུ་མེད་པའི་དོན་མཛད་ཅིང༌། འཆི་ངེས་པའི་མི་མང་པོའི་སྲོག་ཡང་ཐར་བར་བྱས་ནས་ཟླ་བ་ལྔ་པ་ལ་ལྷ་སར་བྱོན་ཏེ་ཇོ་བོ་རིན་པོ་ཆེའི་དྲུང་དུ་གསེར་ཆབ་གསོལ། དཀར་མེ་ཕུལ། བསྟན་པ་དང་སེམས་ཅན་གྱི་དོན་དུ་གསོལ་བ་རྒྱ་ཆེན་པོ་བཏབ་སྟེ། ལྷ་སར་ཕྱོགས་ཐམས་ཅད་ནས་དགེ་བའི་བཤེས་གཉེན་ངུར་སྨྲིག་གི་རྒྱལ་མཚན་འཛིན་པ་གནམ་གྱི་སྐར་མ་ཙམ་འདུས་པ་དང༌། སྐྱེ་བོའི་ཚོགས་ཆེན་པོ་འདུས་པ་རྣམས་ལ་ཐུགས་བསྐྱེད་ལ་སོགས་པ་གསུངས་པའི་ཚེ། ལྷའི་མེ་ཏོག་ཆར་བཞིན་དུ་བབས་པས་ཐམས་ཅད་དད་པར་བྱས་ཤིང་འགྲོ་བ་དཔག་ཏུ་མེད་པ་སྨིན་གྲོལ་ལ་བཀོད་ནས་གུང་ཐང་དང༌། གསང་བདེ་དང༌། ཟུལ་སྐོར་དང༌། སྙེ་ཐང་ལ་སོགས་པ་ཆོས་གར་གསུངས་ཐམས་ཅད་དུ་མེ་ཏོག་གི་ཆར་བབས་པས། ཐམས་ཅད་དད་པར་བྱས་ནས་ཕན་བདེ་ལ་བཀོད་པ་ཀུན་ལ་ཐུན་མོང་དུ་གྲུབ་བོ། །སེམས་དཔའ་ཆེན་པོའི་དྲུང་དུ། མཚུར་སྟོན་རིན་ཡེས་གསང་ཕུ་དང་གཞན་དུ་ཆོས་གསུང་དུས་མེ་ཏོག་གི་ཆར་བབས་པ་ལས་ཀྱང༌། ལྷ་ས་རུ་ཆོས་གསུངས་དུས་མེ་ཏོག་གི་ཆར་འབབ་ཕུལ་ཆེ་བ་འདུག་ཞུས་པས། གནས་ཀྱི་ཁྱད་པར་ཡིན་མཆི་གསུང༌། དེ་ནས་ཡང་སི་ཏུ་བྱང་རྒྱལ་བས་ཡར་ཀླུངས་སུ་གདན་དྲངས་ཏེ།དང་ཤི་དབང་ཕྱུག་གིས་བང་ཁང་ནོར་དང་བཅས་པ་ཕུལ་ནས།བསམ་གཏན་གླིང་དུ་སི་ཏུ་བ་འཁོར་དང་བཅས་པས། ཞབས་ཏོག་རྒྱ་ཆེན་པོ་བསྒྲུབས་ཏེ། རྩེས་ཐང་བ་ལ་སོགས་པའི་དགེ་བའི་བཤེས་གཉེན་དུ་མ་དང་སྐྱེ་བོའི་ཚོགས་དཔག་ཏུ་མེད་པ་ལ་ཆོས་ཀྱི་འཁོར་ལོ་བསྐོར་ཞིང༌། དེའི་དུས་སི་ཏུ་བ་ལ་སེམས་དཔའ་ཆེན་པོས།ངེད་ལ་དངོས་པོའི་འབུལ་བ་ཅི་ཡང་མི་དགོས་་བཙུན་པ་རྣམས་ལ་ཁྲལ་དམག་འུ་ལག་འགེལ་བ་འདི་བསྟན་པ་ལ་གནོད་པས་མི་མཛད་པར་ཞུ་གསུང་ཞེས་གྲག་གོ། །དེ་ནས་གདན་ས་མཐིལ་དང་བསམ་ཡས་ལ་སོགས་པ་རྣམས་སུ་ཡང་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བ་ལ་མེ་ཏོག་གི་ཆར་སྔར་བཞིན་བབས་པས་ཐམས་ཅད་དད་པར་བྱས་ནས་ཕན་བདེ་ལ་བཀོད་ཅིང༌། སི་ཏུ་བས་འབུལ་བ་རྒྱ་ཆེན་པོ་བསྒྲུབས་པ་རྣམས་དང༌། གཞན་ཡང་དབུས་ཕྱོགས་ནས་བྱུང་བའི་ཕྱག་རྫས་རྣམས་ས་སྐྱས་ཐོག་དྲངས་པའི་དགོན་སྡེ་རྣམས་སུ་ཇ་སྐོལ་བཏང་ཞིང༌། བཤད་ཉན་དང་སྒོམ་སྒྲུབ་ལ་བརྩོན་པ་རྣམས་དང༌། ཁྱད་པར་དུ་འཚོ་བས་ཕོངས་པ་རྣམས་ལ་གནང་ཞིང་ཐམས་ཅད་ཆོས་དང་ཟང་ཟིང་གི་སྦྱིན་པས་ཚིམ་པར་མཛད་དོ། །དེ་ནས་ཡང་ཚལ་པས་གདན་དྲངས་ཏེ། སི་ཏུ་དགེ་ལེགས་བཟང་པོ་ཡབ་སྲས་ཀྱིས་སྦྱིན་བདག་མཛད་ནས་དགེ་བའི་བཤེས་གཉེན་དང་སྐྱེ་བོའི་ཚོགས་ཆེན་པོ་ལ་ཆོས་ཀྱི་འཁོར་ལོ་བསྐོར་ནས། དེ་དུས་རིམས་ནད་ཆེན་པོ་བྱུང་བ་ཡང་རྒྱུན་ཆད་ཅིང༌། བཙོན་མང་པོ་ཡང་ཐར་བར་མཛད་ཅེས་གྲག་གོ། །མདོར་ན་དབུས་ཀྱི་ཆོས་དོན་དུ་གཉེར་བའི་དགེ་བའི་བཤེས་གཉེན་དང༌། སྐྱེ་བོའི་ཚོགས་ཐམས་ཅད་སྦྱིན་པས་ཚིམ་པར་མཛད་ནས་ལྷ་སར་ཇོ་བོ་རིན་པོ་ཆེའི་དྲུང་དུ་དཀར་མེ་ཕུལ། གསེར་ཆབ་གསོལ། བསྟན་པ་དང་སེམས་ཅན་གྱི་དོན་དུ་གསོལ་བ་རྒྱ་ཆེན་པོ་བཏབ་ནས། སི་ཏུ་བྱང་རྒྱལ་བ་ལ་སོགས་པ་ཐམས་ཅད་ཀྱིས་དབུས་ཕྱོགས་སུ་བཞུགས་པར་ཞུ་བ་ནན་ཆེན་པོ་བྱས་ཀྱང་མ་བཞུགས་པར་གཙང་ཕྱོགས་ལ་བྱོན་ཏེ། ཡར་ལམ་སྟག་ཚང་དུ་སྤྱན་དྲངས་ཏེ་བླ་མ་ཁྱུང་པོ་བ་དང༌། བླ་མ་དབང་གིས་ཐོག་དྲངས་པའི་དགེ་འདུན་དང་སྐྱེ་བོའི་ཚོགས་ཆེན་པོ་ལ་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཞིང༌། ལར་ནི་ལམ་ན་ཡོད་པའི་སྒོམ་གྲྭ་བཤད་གྲྭ་གྲོང་ཁྱེར་ལ་སོགས་པ་ཐམས་ཅད་དུ་ཆོས་ཀྱི་སྦྱིན་པ་རྒྱ་ཆེན་པོ་བཏང་སྟེ། མདོར་ན་ད་རེས་དབུས་གཙང་གཉིས་ཀར་ཆོས་དང་ཟང་ཟིང་དང༌། མི་འཇིགས་པའི་སྤྱིན་པས་ཚིམ་པར་མཛད་ནས། ཡོས་ལོ་ཟླ་བ་བཅུ་པའི་ཚེས་གཅིག་ལ་གྲུ་འཛིན་དངུལ་ཆུ་ཆོས་རྫོང་དུ་ཕེབས་སོ། །བདག་ཉིད་ཆེན་པོ་འདིས་སོ་སོ་ཐར་པའི་སྒོར་ཞུགས་ནས་བསླབ་པ་ཉིས་བརྒྱ་ལྔ་བཅུ་རྩ་གསུམ་ལ་ཉེས་ལྟུང་དྲི་མོའི་སྐྱོན་གྱིས་མ་གོས། སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས་རང་བདེ་འདོད་པའི་རྣམ་པར་རྟོག་པ་ཐམས་ཅད་སྤངས་ནས་སྒོ་གསུམ་གཞན་དོན་འབའ་ཞིག་བསྒྲུབས། རྡོ་རྗེ་ཐེག་པའི་སྒོར་ཞུགས་ནས་མ་དག་པའི་རྣམ་རྟོག་སྤངས་ཏེ། སྣོད་བཅུད་དག་པའི་འཁོར་ལོར་གཟིགས་པས་སྐུ་ལ་ཚུལ་ཁྲིམས་ཀྱི་དྲི་ཞིམ་པོ་ལྡང་སྟེ། གཟིམ་ཁང་གི་ནང་ཐམས་ཅད་ཀྱང་དྲི་ཞིམ་པོས་ཁྱབ་པ་ཡོད་ཅིང༌། གསོལ་འཕྲོ་ན་བཟའ་དང་དབུ་ཞྭ་ལ་སོགས་གཞན་ལ་གནང་བ་རྣམས་ཀྱི་དྲི་ཞིམ་པོ་ཡང་ཟླ་རེ་ཙམ་གྱི་བར་དུ་མི་ཡལ་བར་ཡོད།དགུང་ལོ་ལྔ་བཅུ་རྩ་བདུན་པའི་བར་དུ་ཤ་ཡང་གཏན་ནས་མི་གསོལ་བ་ལ། དེ་ལོ་བླ་མ་དབང་གྲགས་པ་རྒྱལ་མཚན་དང༌། བླ་མ་དཀོན་རྒྱལ་བ་གཉིས་ལ་ལུང་མང་པོ་མཛད་པའི་དུས་སུ་སྐུ་ཁམས་ཟི་བ་བྱུང་བས། ཁོང་རྣམ་གཉིས་ཀྱིས་ཤ་གསོལ་བར་ནན་ཆེན་པོ་ཞུས་པས། དེ་ཕྱིན་ཆད་སེམས་ཅན་ལ་ཕན་པར་དགོངས་ཏེ་བག་རེ་གསོལ། བདག་ཉིད་ཆེན་པོ་འདི་ཉིན་ཞག་ཕྲུགས་གཅིག་ལ་ཆོས་སྤྱོད་ཀྱི་རིམ་པ་འདི་ལྟར་མཛད་དོ། ནང་ཕྱོགས་བཞེངས་ནས་སྐུ་ཁྲུས་མཛད་དེ། ཕྱག་བརྒྱ་རྩ་རེ་དང་སྤྲགས་ཡན་ལག་བདུན་པ་རྒྱས་པ་མཛད་ནས་སྨོན་འཇུག་གི་སེམས་བསྐྱེད་བསྡུས་པ་རེ་ལེན་ཞིང༌། གཏོར་མའི་རིམ་པ་ཚ་གོང་དུ་དཀར་གཏོར་ཆ་བཞི།ཚ་བ་གསོལ་ནས་བརྒྱ་རྩ། མི་གཡོ་བ། དབྱུ་གུ།བྲུལ་གཏོར།བར་དོའི་གཏོར་མ་ལ་སོགས་པ་རྣམས་མཛད་ནས། ཡང་སྨོན་འཇུག་གིས་སེམས་བསྐྱེད་བསྡུས་པ་རེ་བླངས་ནས་བསྐོར་བ་བརྒྱ་རྩ་རེ་མཛད། 17/23 མདུན་ངོས། 上一页 15 16 17 18 19 20 下一页 尾页 |
