ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་དང་པོ། ཕྱི་རོལ་པའི་ལུགས་ཀྱི་གྲུ
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
           
༢ ཚངས་པ་བ་དགག་པ།
གཉིས་པ་ཚངས་པ་པ་དགག་པ་ལ། འདོད་པ་བརྗོད་པ་དང༌། དེ་དགག་པའོ། །དང་པོ་ལ།སྟོན་པ་ནི་ཚངས་པ་ཡིན་པར་སྨྲ་ཞིང༌། མིང་གི་རྣམ་གྲངས་ལ་བྲམ་ཟེ་པ་དང༌། ཚངས་པ་པ་དང༌། རིག་བྱེད་པ་ཞེས་ཟེར་ཞིང༌། བརྡའ་སྤྲོད་པ་དང༌། རིག་བྱེད་མཐའ་བ་དང༌། གསང་བ་པ་རྣམས་ཀྱང་འདིའི་ནང་གསེས་ཀྱི་དབྱེ་པའོ།   །འདོད་ཚུལ་ནི། ཚངས་པ་པས་འཇིག་རྟེན་འདི་ཞིག་པའི་དུས་སུ་ཕྱོགས་ཀྱི་ཆ་མེད་པའི་ས་ཆུ་མེ་རླུང་གི་རྡུལ་ཕྲ་རབ་རྟག་པ་དག་སོ་སོར་འཁོད་པ་ལ་ནམ་ཞིག་གི་ཚེ་ལྷ་དབང་ཕྱུག་ཆེན་པོས་སྣོད་བཅུད་འབྱིན་པར་འདོད་པ་དང་སེམས་ཅན་གྱི་ལས་ཀྱི་མཐུས་དང་པོ་རྡུལ་ཕྲ་རབ་གཉིས་སྦྱར་ཞིང༌། དེ་ནས་ཡང་རྡུལ་ཕྲ་རབ་གསུམ་པ་ཞིག་དེ་ལ་སྦྱར་བས་རྡུལ་ཕྲ་མོ་གཅིག་ཏུ་གྱུར་ཞིང་དེ་ནས་སེ་གོལ་ཏོག་པ་ཙམ་གྱིས་རྡུལ་ཕྲ་རབ་རྣམས་འཕྲད་དེ་ཚོགས་ནས་རླུང་གི་དཀྱིལ་འཁོར་ཆེན་པོ་རྩོམ་པ་གྲུབ་སྟེ། རིམ་པ་དེས་ཆུ་དང་ས་དང་མེའི་དཀྱིལ་འཁོར་གྲུབ་པར་གྱུར་ཞིང་དེའི་དབུས་སུ་ཚངས་པའི་སྒོ་ང་ཆེན་པོ་འོད་འབར་ཞིང་གསལ་བ་ཞིག་གནས་པ་དེ་སྨིན་ཅིང་བརྡོལ་བ་ལས་འཇིག་རྟེན་་་་གྱི་མེས་པོ་ཚངས་པ་ཆེན་པོ་པདྨའི་མངལ་ནས་བྱུང་བ་པདྨ་ལ་འདུག་པ་གདོང་བཞི་པ་ཞིག་བྱུང་སྟེ་དེས་འཇིག་རྟེན་ཐམས་ཅད་སྤྲུལ་པས་དེ་ལ་འཇིག་རྟེན་མེས་པོ་ཞེས་ཟེར་ཏེ། ཡང་ཁྱབ་འཇུག་གི་ལྟེ་བའི་པདྨོ་དང་དབང་ཕྱུག་གི་བློས་སྤྲུལ་པའི་སྒོ་ང་ལས་སྐྱེས་པའི་ཚུལ་ཀྱང་བཤད་དོ།   ། དེ་ལ་བསྐལ་པ་བདུན་དུ་མིང་བདུན་བྱུང་བར་གྲགས་ཏེ། རིམ་པ་བཞིན་དུ་རང་བྱུང༌། ཚངས་པ། སྐྱེ་དགུའི་བདག་པོ། པདྨའི་སྐྱེས་གནས་ཅན། གདོང་བཞི་པ། མེས་པོ། གསེར་གྱི་སྙིང་པོ་ཅན་ཞེས་བྱའོ། །དེས་འཇིག་རྟེན་གྱི་མ་བརྒྱད་བསྐྱེད་དེ། ཉི་མའི་མས་ལྷ་དང༌། སྦྱིན་བྱེད་མའི་མས་ལྷ་མིན་དང༌། ཀླུའི་མས་ཀླུ། ནམ་མཁའ་ལྡིང་གི་མས་ནམ་མཁའ་ལྡིང༌། ཚངས་པའི་ཁ་ནས་བྲམ་ཟེ། དཔུང་བ་ལས་རྒྱལ་རིགས། བརླ་ལས་རྗེ་རིགས། རྐང་པའི་མཐིལ་ལས་དམངས་རིགས་རྣམས་བསྐྱེད་དོ་ཞེས་ཟེར་རོ།   །ཡང་ལུགས་གཅིག་ལ་ཚངས་པའི་ཁ་ལས་སྐྱེ་དགུའི་བདག་པོ་སྐྱེས། དེས་མཆོད་སྦྱིན་བྱེད་པར་ཚངས་པ་སྤྱན་འདྲེན་པའི་བསུ་བར་རང་གི་བུ་མོ་བཏང་བས་དེ་ལ་ཚངས་པ་ཆགས་ཏེ། ཁུ་བ་ཤོར་བ་བླུགས་གཟར་གྱིས་བླངས་ཏེ་མེར་བསྲེགས་པའི་དབུས་སུ་དྲང་སྲོང་ངན་སྤོང་དང་ཨམ་གི་ར་སྐྱེས།   ལྷག་མ་དུར་བའི་ནང་དུ་ལུས་པ་ལས་དྲང་སྲོང་ཨ་ཏི་བྱུང༌།   དེས་སྙན་དངགས་དང་སྲིད་བསྲུང་གི་རིག་བྱེད་བརྩམས། དྲང་སྲོང་གཞན་གཉིས་ཀྱིས་མཆོད་སྦྱིན་དང་ངེས་བརྗོད་བྱས་པས་ཚངས་པའི་བུ་བཞིས་བྱས་པ་ལ་ཚངས་པས་བྱས་པར་གྲགས་ཞེས་ཟེར་བ་དང༌། ཁ་ཅིག་གིས་དྲང་སྲོང་དེ་དག་གིས་བཏོན་པ་ཙམ་ཡིན་གྱི་བརྩམས་པ་མིན་ཟེར་བ་དང༌། འདི་དག་ཕལ་ཆེ་བ་ཞིག་གིས་རིག་བྱེད་ནི་སུས་ཀྱང་མ་བྱས་པའི་ཆ་མེད་རྟག་པ་རང་བྱུང་ནམ་མཁའ་ལྟ་བུ་ཡིན་ཞེས་ཀྱང་ཟེར་ལ། ལུགས་འདི་དག་གིས་རིག་བྱེད་ཁོ་ན་ཚད་མར་འདོད་དོ།   །རིག་བྱེད་ཀྱི་སྒྲ་རྣམས་ནི་རང་གི་བརྗོད་བྱ་དོན་ངེས་པ་ཅན་ཡིན་གྱི་འདོད་པའི་དབང་གིས་དོན་གང་ཡང་རུང་བ་ལ་འཇུག་པ་ནི་མ་ཡིན་ཏེ། ཨགྣིཧོ་ཏྲཱཾཛུ་ཧོ།   ཞེས་པའི་རིག་བྱེད་ཀྱི་ཚིག་དེ་ཉིད་མེ་ལ་སྔགས་ཀྱིས་སྦྱངས་པའི་མར་ལྡུགས་པ་ཁོ་ན་ལ་འཇུག་གི་ཁྱི་ཤ་ཟ་བ་སོགས་གཞན་ལ་འདོད་པའི་དབང་གིས་མི་འཇུག་པ་ལྟ་བུའོ། །དེའི་ཕྱིར། རིག་བྱེད་ཀྱི་སྒྲ་རྣམས་ནི་དོན་བདེན་པ་ཁོ་ན་སྟོན་པ་ཡིན་ཏེ། སྐྱེས་བུས་མ་བྱས་པའི་ངག་ཡིན་པའི་ཕྱིར་རོ། །ཞེས་ཟེར་རོ། །                      
མཐོ་རིས་དང་ཚངས་པ་བསྒྲུབ་པའི་ཐབས་ནི་རིག་བྱེད་ཀྱི་གཞུང་ལས་བཤད་པའི་རྟའི་མཆོད་སྦྱིན་དུ་འདོད་དོ།   །བརྡའ་སྤྲོད་པ་དག་ནི་སྣོད་བཅུད་སྣ་ཚོགས་པ་སྐྱེས་པའི་གཞི་དང༌། དེ་དག་གི་བདག་ཉིད་དུ་གྱུར་པའི་སྒྲའི་ཚངས་པ་ཡི་གེ་ཨོཾ་ཞེས་བྱ་བ་སྐྱེ་འཇིག་མེད་པས་རྟག་པ།   ཕྱོགས་དང་དུས་ཀྱི་ཆ་ཤས་མེད་པ། ཕྱི་ནང་གི་ཡུལ་ལ་བདེན་པར་འཇུག་པ། གཅིག་པུའི་རང་བཞིན་དོན་དམ་པར་གནས་པ་ཞིག་ཡོད་དེ། མ་རིག་པས་བསླད་པ་རྣམས་ལ་གཟུང་འཛིན་སྣ་ཚོགས་སུ་སྣང་བ་ཡིན་ཞེས་ཟེར་ཞིང༌།ཐར་པ་འཐོབ་བྱེད་ཀྱི་ལམ་ནི་ཕྱིའི་ཕྱུགས་ཀྱི་མཆོད་སྦྱིན་གྱི་སྦྱིན་བསྲེགས་དང་ནང་བུད་མེད་ཀྱི་བྷ་གའི་ཐབ་ཏུ་ཁམས་འཛག་པའི་སྦྱིན་བསྲེགས་བྱེད་པ་ལ་འདོད་ཅིང་ཐར་པ་ནི་དེའི་དུས་ཀྱི་སྟོང་སངས་དང་བདེ་བ་ལ་འདོད་དོ། །རིག་བྱེད་མཐའ་བའམ་བྲམ་ཟེ་མཆོག་རྣམས་ནི། འདི་ལྟར་སྨྲ་སྟེ། གང་ཞིག་རིག་བྱེད་ལས་མི་སྨྲ། །གང་ཞིག་རིག་བྱེད་ལས་མི་སྣང༌། །ཐམས་ཅད་མེད་པར་བརྗོད་བྱ་སྟེ།    །རིག་བྱེད་འདྲ་བའི་ཐོས་པ་མེད།   །ཞེས་པའི་བསྔགས་པ་དང་ལྡན་ཞིང་ཚད་མར་གྱུར་པའི་རིག་བྱེད་ལས་བཤད་པའི་སྐྱེས་བུ་ཞེས་བྱ་བ་གཅིག་པུ་བ། ནམ་ཡང་མི་ཉམས་པས་རྟག་པ།   མྱ་ངན་ལས་འདས་པས་ཚངས་པ། སྐྱེ་དགུ་ཐམས་ཅད་ལ་ཁྱབ་པ། ཐོག་མཐའ་མེད་པས་འཆི་བ་མེད་པ། ཉི་མའི་མདོག་ཅན། མུན་པའི་དཀྱིལ་འཁོར་ལས་འདས་པ། ཆེན་པོར་གྱུར་པ། གཉིད་ལོག་པ་ལས་གཞན་ཡིན་པའི་ཕྱིར་སྐྱེས་བུ་ཞེས་བྱ་བ་ཞིག་ཡོད་དེ། ལྷ་ཐམས་ཅད་ཀྱི་བདག་ཉིད་ཡིན་པ་དང༌། དབང་ཕྱུག་ཆེན་པོའི་ངོ་བོ་ཡང་འདི་ཡིན་ནོ་ཞེས་ཏེ། མུན་པ་ལས་གཞན་སྐྱེས་བུ་ནི། །ཆེན་པོར་གྱུར་པ་ཉི་མའི་འོད། །དབང་ཕྱུག་ཆེན་པོ་བདག་དེ་ཉིད། །མཁས་པས་ཤེས་ན་འཆི་མེད་འགྱུར། །ཞེས་སོ།   །སྐྱེས་བུ་དེ་ཁོ་ནས་ཁམས་གསུམ་ཐམས་ཅད་དང་བདེ་བ་དང་སྡུག་བསྔལ་དང་འཆིང་བ་དང་གྲོལ་བ་རྣམས་བྱེད་པ་ཡིན་ཏེ། འོན་ཀྱང་རང་གི་ངོ་བོ་འགྱུར་བ་མེད་ཅིང་ཟད་པ་མེད་དོ་ཞེས་ཟེར་ཏེ། སྲིད་པ་སྣ་ཚོགས་དེ་ལས་སྐྱེས། །དར་གྱི་སྲིན་བུས་སྐུད་པ་བཞིན།    །ཞེས་སོ། །དུས་ནམ་ཞིག་གི་ཚེ་བསམ་གཏན་ལ་བརྟེན་ནས་ལྷའི་མིག་གིས་སྐྱེས་བུ་དེ་ལ་བལྟས་པ་ན་སྐྱེས་བུ་དེ་ཉིད་གསེར་གྱི་མདོག་ཅན་དུ་མཐོང་བ་ན་དགེ་སྡིག་འཁོར་འདས་མཉམ་པ་ཉིད་དུ་གྱུར་ནས་གྲོལ་བར་འགྱུར་ཏེ། སྐྱེས་བུ་དྲང་སྲོང་ཆེན་པོ་ཉི་མའི་མདོག ། མུན་པ་ལས་གཞན་གྱུར་པ་དེ་རིག་ན། །འཆི་བ་མེད་པར་འགྱུར་ཏེ་བདག་གིས་རྟོགས། །སྐྱེ་མེད་གནས་འགྲོ་བ་ལས་ལམ་གཞན་མེད། །ཞེས་དང༌། བྱེད་པོ་དབང་ཕྱུག་གསེར་མདོག་ཏུ། །གང་གིས་མཐོང་ཞིང་ལྟ་བ་དེ། ། སྡིག་དང་བསོད་ནམས་ལས་འདས་ནས།   །མཆོག་ཏུ་ཞི་བ་འཐོབ་པར་འགྱུར། །ཞེས་སོ། །ལུགས་འདི་འོག་ཏུ་འབྱུང་བའི་དཔྱོད་པ་པ་དང་མི་གཅིག་ཀྱང་རྟོག་གེ་འབར་བ་དང་མཁས་གྲུབ་ཐམས་ཅད་མཁྱེན་པའི་ཊིཀ་ཆེན་སོགས་སུ་དཔྱོད་པ་པ་ཞེས་ཀྱང་འབྱུང་ངོ༌། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号