ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་དང་པོ། ཕྱི་རོལ་པའི་ལུགས་ཀྱི་གྲུ
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
གསང་བ་པ་རྣམས་ནི་བདུད་རྩི་ཐིག་ལུང་ཞེས་བྱ་བའི་རིག་བྱེད་ལ་བརྟེན་ནས་བདག་ཤེས་རིག་རྟག་པ་ཆ་མེད་གཅིག་ཡོད་པར་འདོད་དེ། ཕལ་ཆེར་སྔར་གྱི་དེ་རྣམས་དང་མཚུངས་ལ་ལུགས་སྔ་མ་དང་དོན་གཅིག་ཏུ་བཤད་པ་ཡང་ཡོད་དོ།   །གཉིས་པ་དེ་དགག་པ་ལ། ཕྱོགས་སྔ་མས། རིག་བྱེད་ནི་བདེན་པའི་དོན་ཅན་ཡིན་ཏེ།   སྐྱེས་བུས་མ་བྱས་པའི་ཕྱིར།   ཞེས་པའི་སྒྲུབ་བྱེད་བཀོད་པ་དགག་པ་ནི།རིག་བྱེད་ཀྱི་ངག་ཆོས་ཅན། ལོག་པའི་དོན་ཅན་ཡིན་པར་ཐལ། སྐྱེས་བུས་མ་བྱས་པའི་ཕྱིར། ཁྱབ་པ་ཡོད་དེ། དོན་བདེན་པ་སྟོན་པའི་རྒྱུ་ཤེས་རབ་དང་བརྩེ་བ་ལ་སོགས་པའི་ཡོན་ཏན་དང་བྲལ་བའི་ཕྱིར།ཡང་དེ་ཆོས་ཅན། སྐྱེས་བུས་བྱས་པ་མིན་ན་ཡང་དོན་ལོག་པར་སྟོན་པ་སྲིད་པར་ཐལ། ཁྱོད་ལས་དོན་ཤེས་ཤིང་གོ་བར་བྱེད་པའི་རྒྱུ་ངག་གི་བརྡའ་ནི་སྐྱེས་བུ་ལ་བརྟེན་པའི་ཕྱིར། ཡང་དེ་ཆོས་ཅན། ཁྱོད་ཀྱི་དོན་འཆད་པ་པོ་མི་མཐུན་པ་གཉིས་ཀྱིས་བཤད་ན་གང་རུང་ཅིག་གིས་ཅི་ཙམ་བཤད་ཀྱང་ཉན་པ་པོས་དོན་གང་ཡང་གོ་བ་མི་སྲིད་པར་ཐལ། ཁྱོད་ཀྱི་ཚིག་རྣམས་འབྲེལ་བ་རྟག་དངོས་ཀྱི་དབང་གིས་དོན་རེ་རེ་ཁོ་ན་ལ་བརྗོད་བྱེད་དུ་ངེས་པའི་ཕྱིར། ཡང་དེ་ཆོས་ཅན། ཁྱོད་ཅི་ཙམ་བཤད་ན་ཡང་ཉན་པ་པོས་དོན་གོ་མི་སྲིད་པར་ཐལ། དོན་བྱེད་པས་སྟོངས་པའི་རྟག་པ་ཡིན་པའི་ཕྱིར།   ཡང་ཚིག་གཅིག་བརྗོད་པས་དོན་ཐམས་ཅད་གོ་བར་ཐལ། ཆ་ཤས་མེད་པའི་གཅིག་པུ་ཡིན་པའི་ཕྱིར། རྐྱེན་གང་གིས་ཀྱང་བརྗོད་དུ་མེད་པར་ཐལ། འགྱུར་མེད་ཡིན་པའི་ཕྱིར། སྐྱེ་དགུ་ཐམས་ཅད་ཀྱིས་དོན་གོ་བར་ཐལ། ཀུན་ལ་ཁྱབ་པའི་ཕྱིར། ཁྱབ་ཏེ། རིག་བྱེད་རྟག་པ་དེ་ཀུན་ལ་ཁྱབ་པར་ཡོད་ཅིང་ཆ་མེད་པས་གོ་བ་དང་མི་གོ་བའི་བདག་ཉིད་སོ་སོར་མི་འཐད་པའི་ཕྱིར་ཞེས་སོགས་ཏེ།
རིགས་པའི་དབང་ཕྱུག་གིས། ཚིག་རྣམས་བདེན་པ་ཉིད་ཀྱི་རྒྱུ། །ཡོན་ཏན་སྐྱེས་བུ་ལ་བརྟེན་ཕྱིར། །སྐྱེས་བུས་མ་བྱས་ལོག་པའི་དོན། །ཅིས་མིན་ཞེས་ནི་གཞན་དག་བརྗོད། །ཞེས་པ་སོགས་རྣམ་འགྲེལ་ལེའུ་དང་བོའི་སྨད་ཀྱི་ཆ་ཕལ་ཆེར་ཕྱོགས་འདི་དགག་པའི་རིགས་པ་ཤིན་ཏུ་རྒྱས་པར་ཡོད་དོ།   །ཡང་སྐྱེས་བུ་ཆོས་ཅན། བཅིངས་པ་དང་གྲོལ་བར་མི་རིགས་པར་ཐལ། དུས་ཐམས་ཅད་དུ་རྟག་པ་གཅིག་བུ་ཡིན་པའི་ཕྱིར། དེ་ཆོས་ཅན། སྡུག་བསྔལ་ལས་ཐར་པར་མི་འགྱུར་བར་ཐལ། སྡུག་བསྔལ་དང་བདག་ཉིད་གཅིག་ཏུ་གྲུབ་པའི་ཕྱིར། སྐྱེས་བུ་ཆོས་ཅན། ཀུན་གྱི་བདག་ཉིད་དུ་མི་འགྱུར་ཏེ། དངོས་པོར་མེད་པའི་ཕྱིར། མོ་གཤམ་གྱི་བུ་མོ་བཞིན། ཡང་སྐྱེས་བུ་ཆོས་ཅན། མི་འགྱུར་བ་མ་ཡིན་པར་ཐལ།གཅིག་དང་དུ་མ་དང་ཕྲ་བ་དང་རགས་པར་ཡོད་པའི་ཕྱིར། ཞེས་སོགས་དེ་དག་གིས་འདོད་པའི་སྐྱེས་བུ་འགོག་པའི་རིགས་པའི་རྣམ་གྲངས་དུ་མ་རྟོག་གེ་འབར་བ་ལས་བཤད་པས་དེར་བལྟ་ཞིང༌། བརྗོད་བྱེད་ཀྱི་སྒྲ་ཡུལ་ལ་དངོས་དབང་གིས་བདེན་པར་འཇུག་པ་འགོག་པའི་རིགས་པ་ནི། རྣམ་འགྲེལ་ངེས་སུ་རྒྱས་པར་ཡོད་དོ། །ཚངས་པའི་ལུས་གཅིག་ལས་སྐྱེས་པས་མི་རིགས་བཞི་མི་རུང་བར་ཐལ་བ་དང༌། ཕྱུགས་ཀྱི་མཆོད་སྦྱིན་ཐར་ལམ་ཡིན་པ་འགོག་པ་ནི་དུས་འཁོར་གྱི་སྐོར་ནའང་ཡོད་དོ།།
༣  ཁྱབ་འཇུག་པ་དང་དཔྱོད་པ་པ་དགག་པ།
གསུམ་པ་ཁྱབ་འཇུག་པ་དང་དཔྱོད་པ་པ་དགག་པ་ལ་གཉིས། འདོད་པ་བརྗོད་པ་དང་དེ་དགག་པའོ། །དང་པོ་ལ། ཁྱབ་འཇུག་པ་དང༌། དཔྱོད་པ་པ་གཉིས་ལས། དང་པོ་ལ། སྟོན་པ་ནི་ཁྱབ་འཇུག་སྟེ་འདི་ལ་ནོར་ལྷ་དང༌། སྲེད་མེད་ཀྱི་བུ་དང༌།   གྲོང་འཇོམས་སོགས་མིང་ཤིན་ཏུ་མང་བར་བཤད་ལ། བླ་མ་ཟླ་བ་དང༌། སྟོན་པ་གཞོན་ནུ་མ་ལེན་སོགས་ཀྱང་ལུགས་འདིའི་སྟོན་པའོ། །མིང་གི་རྣམ་གྲངས་ནི་ཁྱབ་འཇུག་པ། ཟླ་བ་པ།   གླུའི་ཆོས་སྨྲ་བ་རྣམས་སོ། །ལུང་ནི་རྟོག་པ་ལ་ཕན་པའི་ཡལ་ག་དང༌། ཞག་ལྔ་པ། གཡུལ་གྱི་ལས་སྟོན་པའི་ཚིག་ལ་སོགས་པའོ། །དེ་ལ་ཁྱབ་འཇུག་ནི། རྒྱ་མཚོའི་ནང་ན་གྲོང་ཁྱེར་སྐོ་ལྡན་ཞེས་བྱ་བར་དཔལ་མོ་ལ་སོགས་པའི་ཆུང་མ་ཁྲི་དྲུག་སྟོང་སྐོར་ཞིང་གནས་པ་དང༌། ཚངས་པ་དང༌། བརྒྱ་བྱིན་དང༌། ཉི་མ། ཟླ་བ།   རིག་བྱེད་བཞི། རི་བོ་མཆོག་རབ། འབྱུང་བ་བཞི། བྲམ་ཟེ། སྦྱིན་བྱེད།   ཟ་བ་པོ་སོགས་མཐའ་དག་རང་ཉིད་ཡིན་པར་སྨྲ་བའི་མངོན་པའི་ང་རྒྱལ་དང་ལྡན་པ་ཞིག་སྟེ། ཉི་མའི་ནང་ན་ང་ཁྱབ་འཇུག །སྐར་ནང་འོད་ལྡན་ཟླ་བ་དང༌། །ཞེས་སོགས་སྨྲ་བའི་ཕྱིར་རོ། །དེ་ལ་ཞི་བ་དང་མ་ཞི་བའི་ངོ་བོ་གཉིས་ཡོད་ཅིང༌། ཞི་བ་ནི་ལྷ་རྫས་ཀྱི་ངོ་བོ་ཡོད་མིན་མེད་མིན་གྱི་བདག་ཉིད་འཆི་བ་མེད་པའི་ངོ་བོ་ཡིན་ལ། དེ་བསྒོམས་པས་ཐར་པ་འཐོབ་པར་སྨྲ་སྟེ། གང་གིས་ཁྱབ་འཇུག་ཡོན་ཏན་རྣམས།   །རྟག་ཏུ་བསྒོམས་པས་བདེ་འཐོབ་འགྱུར། ། ཞེས་སོ། །མ་ཞི་བ་ནི་ཉ་ལ་སོགས་པའི་ཁྱབ་འཇུག་གི་འཇུག་པ་བཅུར་བཤད་དེ། དེ་ཡང་ཉའི་གཟུགས་ཀྱིས་རིག་བྱེད་བཞི་རྒྱ་མཚོར་ནུབ་པ་བཏོན་པ་དང༌།   རུས་སྦལ་གྱིས་འཇིག་རྟེན་བཏེགས་ནས་རྒྱུན་དུ་གནས་པ་དང༌། ཕག་རྒོད་ཀྱི་གཟུགས་ཀྱིས་ཚངས་པའི་འཇིག་རྟེན་མན་ཆད་མནན་པ་དང༌། མིའི་སེང་གེའི་གཟུགས་ཀྱིས་ལྷ་མ་ཡིན་གྱི་དབང་པོ་འགྲོ་བ་སྐྱོང་གསེར་ཅན་བསད་པ་དང༌། མིའུ་ཐུང་གི་གཟུགས་ཀྱིས་ལྷ་མ་ཡིན་སྟོབས་ལྡན་ལས་གོམ་པ་གསུམ་གྱི་ས་བསླང་ཞེས་བསླུས་པ་དང༌།   ཤིང་རྟ་བཅུ་པའི་བུ་ར་མ་ཎར་སྤྲུལ་ནས་རང་གི་ཆུང་མ་སྲིན་པོ་ལངྐ་མགྲིན་བཅུས་འཕྲོགས་པ་ལ་སྤྲེའུ་ཧ་ནུ་མནྔྷ་ལ་གྲོགས་བཅོལ་ཏེ་སྲིན་པོ་དེ་བསད་པ་དང༌། ཛ་མཱད་ཨགྣིའི་བུ་ར་མ་ཎར་སྤྲུལ་ནས་སྲིད་སྒྲུབ་ལ་སོགས་པ་བསད་དེ་རྒྱལ་རིགས་བཅད་པ་དང༌། ནག་པར་སྤྲུལ་ནས་ཆུ་བོ་བཞི་ཕྱོགས་ཀུན་དུ་དྲངས་ཤིང་རྩོད་དུས་ཀྱི་སེམས་ཅན་ལ་ཕན་པར་བྱས་པ་དང་སངས་རྒྱས་ཤཱཀ་ཐུབ་ཏུ་སྤྲུལ་ནས་སྔོན་གྱི་སྡིག་པ་སྤྱངས་པ་དང༌།   རིགས་ལྡན་བྲམ་ཟེའི་བུ་ཀརྐི་རྩེ་ཞེས་བྱ་བ་མ་འོངས་པ་ན་འབྱུང་བས་སེམས་ཅན་མང་པོ་འདུལ་བར་འདོད་ཅིང༌། དེའི་དང་པོ་གསུམ་ལ་འཐད་པ་མེད་ཀྱང་གཏམ་རྒྱུད་རྙིང་པ་ལ་བརྟེན་པ་དང༌།   ཕྱི་མ་རྣམས་དྲང་སྲོང་གདུག་པས་ངོ་མཚར་ཆེ་ཆེ་རྣམས་ཁྱབ་འཇུག་གི་ཡོན་ཏན་དུ་བྱས་པར་དུས་འཁོར་གྱི་སྐོར་ནས་བཤད་དོ། །ལུགས་འདིས་ཀྱང་རྟག་པ་ཆ་མེད་ཀྱི་བདག་ཁས་ལེན་པ་དང༌།   གྲོལ་བྱེད་ཀྱི་ལམ་ནི་ཡི་གེ་ཨོཾ་བསྒོམ་པ་དང༌། རླུང་བུམ་པ་ཅན་བསྒོམ་པ་སོགས་ཡོད་པར་བཤད་ལ། འདིའི་རླུང་གི་རྣལ་འབྱོར་ལ་ཡན་ལག་དྲུག་བརྩི་ཚུལ་ཞིག་བཤད་མོད་ཀྱང་རང་རེའི་ཡན་ལག་དྲུག་དང་མི་འདྲ་སྟེ་སློབ་དཔོན་བྱང་ཆུབ་བཟང་པོས།   འདི་དག་ལ་ནི་དགག་པ་ཙམ་ལས་ཡན་ལག་དྲུག་པའི་རླུང་གི་ཏིང་ངེ་འཛིན་ནི་མེད་དོ།   །ཞེས་གསུངས་པའི་ཕྱིར།   ལུགས་འདིས་འཁོར་བ་ཟད་མཐའ་ཅན་དུ་འདོད་ཅིང་སྔར་བཤད་པའི་རིག་བྱེད་མཐའ་བ་སོགས་ལས་ཕལ་མོ་ཆེ་ཞིག་ནི་འདིའི་རྗེས་འབྲང་དུ་རྒྱ་གཞུང་དག་ལས་ཀྱང་བཤད་དོ། ། གཉིས་པ་དཔྱོད་པའམ་རྒྱལ་དཔོག་པ་ནི། རྒྱལ་དཔོག་པ་སྟོན་པར་འདོད་ཅིང་གྲུབ་མཐའི་འདོད་ཚུལ་ལ། བདག་ནི་བློའི་ངོ་བོ་སེམས་པ་ཅན་དང༌། བེམ་པོ་མ་ཡིན་པ།   ཤེས་རིག་གི་རང་བཞིན། རྟག་པའི་ངོ་བོ། ཡན་གར་བའི་རྫས་ཡོད། ཆ་ཤས་མེད་པ་ཞིག་ཏུ་འདོད་དོ། ། རིག་བྱེད་ཚད་མར་འདོད་ཚུལ་ནི་སྔ་མ་རྣམས་དང་འདྲ། མཐོ་རིས་ཀྱི་ཚངས་པ་ལྟ་བུ་ངན་འགྲོ་ལས་གྲོལ་བའི་ཕྱིར་ཐར་པ་ཡིན་གྱི་དྲི་མ་སེམས་ཀྱི་རང་བཞིན་ལ་ཞུགས་པ་ཡིན་པའི་ཕྱིར་ཉེས་ཟད་ཀྱི་སྐྱེས་བུ་མེད་པ་དང་ཤེས་བྱ་མཐའ་ཡས་པའི་ཕྱིར་ཀུན་མཁྱེན་པའི་སྐྱེས་བུ་མེད་པ་དང༌།   དེ་བས་ན་བདེན་པའི་ངག་ཡང་མེད་དོ་ཞེས་སྨྲའོ། །ཚད་མ་ནི་མངོན་རྗེས་གཉིས། སྒྲ་ལས་བྱུང་བ། དཔེ་ཉེར་འཇལ། དོན་གྱིས་གོ་བ། དངོས་པོ་མེད་པའི་ཚད་མ་དང་དྲུག་ཏུ་འདོད་ཅིང༌། འདིའི་སྒྲ་བྱུང་ནི་གྲངས་ཅན་དང་འདྲ། དཔེ་ཉེར་འཇལ་ནི། བ་མེན་མཐོང་བ་ལས་ལྐོག་ཏུ་གྱུར་པའི་བ་ལང་ལ་འདྲ་བར་དཔོག་པ་དང༌། དོན་གྱིས་གོ་བ་ནི། ལྷས་བྱིན་གསོན་པོ་ཁྱིམ་ན་མེད་པས་ཕྱི་རོལ་ན་ཡོད་པར་རྟོགས་པ་ལྟ་བུ་དང༌། དངོས་པོ་མེད་པའི་ཚད་མ་ནི། ཚད་མ་གཞན་ལྔ་པོ་གང་ཡང་མཇལ་བྱེད་དུ་མ་སྐྱེས་པའི་ཡུལ་རྟོགས་པ་ལ་འདོད་ཅིང༌།ཕྱི་མ་འདིའི་ཡུལ་ལ་ཡང་འོ་མ་ལ་ཞོ་མེད་པ་ལྟ་བུ་སྔ་ན་མེད་པ། ཞོ་ལ་འོ་མ་མེད་པ་ལྟ་བུ་ཞིག་ནས་མེད་པ།བ་ལང་ལ་རྟ་མེད་པ་ལྟ་བུ་ཕན་ཚུན་མེད་པ། རི་བོང་གི་རྭ་མེད་པ་ལྟ་བུ་ཤིན་ཏུ་མེད་པ་སྟེ་བཞིར་འདོད་ཅིང༌། ཞོ་ལ་འོ་མ་མེད་པའི་ཆ་ལྟ་བུ་ཡང་དངོས་པོར་འདོད་དོ།།
དེའི་ནང་ཚན་ཙཱ་ར་ཀ་པ་རྣམས་ནི།   ཚད་མ་དེ་དྲུག་གི་སྟེང་དུ་རྒྱུ་ལས་འབྲས་བུ་རྟོགས་པ་ལྟ་བུ་རིགས་པའི་ཚད་མ། ཡུལ་དེ་དམིགས་པ་མེད་པས་མེད་པར་རྟོགས་པ་མ་དམིགས་པའི་ཚད་མ།   སྨྲ་བ་པོ་སྔ་མ་དག་གིས་བསྟན་པའི་གྲགས་པ་རྒྱུད་པའི་ཞེས་གྲགས་ཀྱི་ཚད་མ། ཚོགས་པ་ཡོད་པར་རྟོགས་པ་ན་ཚོགས་པ་ཅན་ཡོད་པར་རྟོགས་པ་སྲིད་པའི་ཚད་མ།   འདི་ལྟ་བུ་འབྱུང་ངོ་སྙམ་དུ་སེམས་པ་ལས་དེ་ལྟར་བྱུང་བ་སྙམ་སེམས་པའི་ཚད་མ་སྟེ་ཚད་མ་བཅུ་གཅིག་ཏུ་འདོད་དོ།   །འདི་དག་གིས་འདོད་པའི་བྱས་ཤུགས་བཞི་བཅུ་ཞེ་བརྒྱད་སོགས་ནི་མངས་ཀྱིས་དོགསནས་མ་བྲིས་ལ་ཤེས་པར་འདོད་ན་རྟོག་གེ་འབར་བ་ན་རྒྱས་པར་ཡོད་པས་དེར་ལྟོས་ཤིག །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号