ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་གསུམ་པ། ཐེག་ཆེན་གྱི་གྲུབ་མཐའ་སྨ
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
རྣམ་པར་རིག་པ་ཙམ་དུ་སྨྲ་བའི་སློབ་དཔོན་ནི་ཐོགས་མེད་སྐུ་མཆེད། གནས་བརྟན་ཆོས་སྐྱོང༌།བློ་བརྟན། ཕྱོགས་གླང༌། ཆོས་གྲགས། གསེར་གླིང་པ། ཤནྟི་པ་སོགས་མང་དུ་ཡོད་ཅིང་འདི་དག་ལས་འགའ་ཞིག་ནི་སྐུ་ཚེའི་སྟོད་ལ་སེམས་ཙམ་དང་སྐུ་ཚེའི་སྨད་ལ་དབུ་མ་བར་གྱུར་པའང་ཡོད་ལ། འཕགས་པ་ཐོགས་མེད་ལྟ་བུ་རང་ཉིད་དབུ་མ་ཐལ་འགྱུར་བར་གནས་ཀྱང་སེམས་ཙམ་དང་མཐུན་པར་དགོངས་འགྲེལ་གྱི་བསྟན་བཅོས་བརྩམས་པ་ཡང་སློབ་དཔོན་དེ་དག་གི་ནང་ན་མང་དུ་ཡོད་པས། དེ་ལ་དགོངས་ནས་རྗེ་བདག་ཉིད་ཆེན་པོས།   དབྱིག་གཉེན་དང་ཕྱོགས་གླང་གི་གཞུང་རྩོད་མེད་རྣམས་ནས་ནི་རྣམ་པར་རིག་པ་ཙམ་གྱི་ལུགས་སུ་བཀྲལ་མོད་ཀྱང་སློབ་དཔོན་དེ་དག་གི་བཞེད་པ་ཇི་ལྟར་ཡིན་པ་རྣམས་ནི་བདག་ཅག་འདྲ་བ་རྣམས་ཀྱིས་ཤིན་ཏུ་རྟོགས་པར་དཀའོ་ཞེས་འཇུག་པའི་རྣམ་བཤད་ཆེན་མོར་བཀའ་བསྩལ་ཏོ།   །དེས་ན་སེམས་ཙམ་པའི་སློབ་དཔོན་ཡིན་ན་སེམས་ཙམ་པ་ཡིན་མི་དགོས་ཏེ། ཕལ་ཆེན་སྡེ་པའི་དགེ་སློང་ཡིན་ན་ཕལ་ཆེན་སྡེ་པ་ཡིན་མི་དགོས་པ་བཞིན་ནོ།   །
གཉིས་པ་དེ་ལས་བྱུང་བའི་གྲུབ་མཐའི་རྣམ་བཞག་ལ་མཚན་ཉིད། སྒྲ་བཤད། དབྱེ་བ། གྲུབ་མཐའི་འདོད་ཚུལ་དང་བཞི། དང་པོ་ནི།   ཕྱི་དོན་རིགས་པས་འགོག་ཅིང་རྣམ་ཤེས་བདེན་པར་སྨྲ་བའི་རང་སྡེ་ནི་སེམས་ཙམ་པའི་མཚན་ཉིད་དེ། འདི་ལ་རྣམ་རིག་པ་ཞེས་ཀྱང་ཟེར་ལ་རྣལ་འབྱོར་སྤྱོད་པ་བ་ཞེས་ཀྱང་ཟེར་རོ།   །རྣམ་པར་རིག་པ་ཙམ་དུ་སྨྲ་ཚུལ་ནི་ཤེས་བྱ་ཐམས་ཅད་ཤེས་པའི་བདག་ཉིད་དུ་སྨྲ་བ་སྟེ།   ཁམས་གསུམ་པོ་འདི་ནི་སེམས་ཙམ་མོ་ཞེས་པའི་ལུང་དང༌།    རྣམ་པར་བསྔོས་པ་ལ་སོགས་པའི་དོན་མེད་ཀྱང་མཉམ་པར་བཞག་པའི་ཤེས་པའི་དབང་གིས་མདུན་ན་འདུག་པ་ལྟ་བུར་གཟུགས་བརྙན་སྣང་བ་བཞིན་དུ།    ཕྱི་རོལ་གྱི་དོན་མེད་ཀྱང་དོན་དུ་སྣང་བའི་བག་ཆགས་བསྒོས་པའི་རྐྱེན་གྱིས་ཡུལ་དུ་སྣང་བའི་རྣམ་རིག་འབྱུང་བ་མི་འགལ་བའི་རིགས་པ་ལ་བརྟེན་པར་ཐེག་བསྡུས་ལས་གསུངས་ཏེ།    དེ་ཉིད་ལས་གོང་གི་ལུང་དེ་དང་དགོངས་འགྲེལ་གྱི་ལུང་དེ་དྲངས་པའི་མཇུག་ཐོག་ཏུ་ལུང་དེས་རིགས་པ་ཡང་བསྟན་པ་ཡིན་ནོ། །འདི་ལྟར་སེམས་མཉམ་པར་བཞག་པ་ན་ཤེས་བྱའི་གཟུགས་བརྙན་རྣམ་པར་བསྔོས་པ་ལ་སོགས་པ་གང་དང་གང་མཐོང་བ་དེ་ཉིད་སེམས་མཐོང་བ་སྟེ།   རྣམ་པར་བསྔོས་པ་ལ་སོགས་པ་དོན་གཞན་མེད་དོ།    །རིགས་པ་འདིས་བྱང་ཆུབ་སེམས་དཔའ་རྣམ་པར་རིག་པ་ཐམས་ཅད་ལ་རྣམ་པར་རིག་པ་ཙམ་ཉིད་དུ་རྗེས་སུ་དཔག་པར་བྱ་བར་འོས་སོ་ཞེས་གསུངས་སོ།   །
གཉིས་པ་སྒྲ་བཤད་པ་ནི།    ཁམས་གསུམ་པོ་ཐམས་ཅད་སེམས་ཙམ་གྱི་བདག་ཉིད་དུ་སྨྲ་བས་ན་སེམས་ཙམ་པ་སོགས་ཏེ་ཤེས་པར་སླའོ།   །
གསུམ་པ་དབྱེ་བ་ནི།   ས་སྡེ་སོགས་ཀྱི་རྗེས་འབྲངས་ལུང་གཙོ་བོར་སྨྲ་བ་ལུང་གི་རྗེས་འབྲངས་དང༌།   ཚད་མའི་བསྟན་བཅོས་སྡེ་བདུན་མདོ་དང་བཅས་པ་ནས་བཤད་པ་ལྟར་གྱི་རིགས་པའི་རྗེས་འབྲངས་གཉིས་སུ་ཡོད་པ་ནི་གྲགས་ཆེ་ལ།    རྣམ་པའི་འདོད་ཚུལ་གྱི་སྒོ་ནས་དབྱེ་ན་རྣམ་བདེན་རྫུན་གཉིས་སུ་ཡོད་ཅིང༌། དེ་ཡང་ལུང་རིགས་ཀྱི་རྗེས་འབྲངས་རེ་རེ་ལའང་རྣམ་བདེན་རྫུན་གཉིས་གཉིས་ཀྱི་རྣམ་བཞག་ཡོད་པར་གཞུང་དུ་མ་ལས་བཤད་དོ།    །རྣམ་བདེན་རྫུན་གྱི་ནང་གསེས་ཀྱི་དབྱེ་བ་དང་འདོད་ཚུལ་ནི་འོག་ཏུ་འཆད་དོ།   །
བཞི་པ་གྲུབ་མཐའི་འདོད་ཚུལ་ལ་གཉིས། བཀའི་དྲང་ངེས་ཇི་ལྟར་ཕྱེ་བ་དང༌།   དེ་ལ་བརྟེན་ནས་གྲུབ་པའི་མཐའི་རྣམ་པར་བཞག་ཚུལ་ལོ། །དང་པོ་ནི།   འཕགས་པ་ཐོགས་མེད་ཀྱིས་དྲང་ངེས་འབྱེད་པའི་ཤིང་རྟའི་སྲོལ་ཕྱེ་བ་ནི་མདོ་སྡེ་དགོངས་འགྲེལ་ལ་བརྟེན་པ་ཡིན་ཏེ།    བསྡུ་བ་ལས།དོན་དམ་པ་མཚན་ཉིད་ལྔ་དང་ལྡན་པ་ཡང་དགོངས་འགྲེལ་ལས་བྱུང་བ་བཞིན་ཤེས་པར་བྱའོ་ཞེས་དང༌།ཆོས་རྣམས་གྱི་མཚན་ཉིད་ནི་དགོངས་འགྲེལ་ལས་བྱུང་བ་བཞིན་བལྟ་བར་བྱའོ་ཞེས་དང༌།   ཆོས་རྣམས་ཀྱི་ངོ་བོ་ཉིད་མེད་པ་ནི་དགོངས་འགྲེལ་ལས་བྱུང་བ་བཞིན་བལྟ་བར་བྱའོ་ཞེས་པའི་ལུང་ཚན་པ་གསུམ་གྱི་དང་པོས་དོན་དམ་པའི་རྣམ་བཞག་དང༌། གཉིས་པས་མཚན་ཉིད་གསུམ་གྱི་རྣམ་བཞག་དང༌། གསུམ་པས་མདོ་སྡེ་ལ་དྲང་ངེས་འབྱེད་པའི་ཚུལ་རྣམས་དགོངས་འགྲེལ་ལ་བརྟེན་པར་གསུངས་པའི་ཕྱིར་དང༌། རྣམ་ཤེས་ཚོགས་བརྒྱད་དང་མཐར་ཐུག་ཐེག་པ་གསུམ་དུ་བསྒྲུབས་པ་ཡང་མདོ་དགོངས་འགྲེལ་ལ་བརྟེན་ནས་བཤད་པའི་ཕྱིར་རོ། །     

 

རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号