|
ཡི་དྭགས་ལ། ཕྱིའི་སྒྲིབ་པ་ཅན། ནང་གི་སྒྲིར་པ་ཅན། ཟས་སྐོམ་གྱི་སྒྲིབ་པ་ཅན་ཏེ་གསུམ་མོ༑ ༑མི་ལ། གླིང་བཞིའོ། །འདོད་ལྷ་རིགས་དྲུག་ནི། རྒྱལ་ཆེན་བཞིའི་རིས་ཀྱི་ལྷ། སུམ་ཅུ་རྩ་གསུམ་པ། འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་དོ། །གཟུགས་ཁམས་གནས་རིགས་བཅུ་བདུན་ནི། ཚངས་རིས། ཚངས་པ་མདུན་ན་འདོན། ཚངས་ཆེན་ཏེ་གདུམ་ནི་བསམ་གཏན་དང་པོའོ། །འོད་ཆུང་། ཚད་མེད་འོད། འོད་གསལ་གསུམ་ནི་བསམ་གཏན་གཉིས་པའོ། །དགེ་ཆུང་། ཚད་མེད་འོད། དགེ་རྒྱས་གསུམ་ནི་བསམ་གཏན་གསུམ་པའོ། །སྤྲིན་མེད། བསོད་ནམས་སྐྱེས། འབྲས་བུ་ཆེ་བ་སྟེ་སོ་སོ་སྐྱེ་བོའི་གནས་གསུམ་དང་༑མི་ཆེ་བ། མི་གདུང་བ། ཤིན་ཏུ་མཐོང་བ། གྱ་ནོམ་སྣང་བ། འོག་མིན་ཏེ་འཕགས་པའི་གནས་ལྔ་སྟེ་བརྒྱད་ནི་བསམ་གཏན་བཞི་པའོ། །འདིའི་གོང་ན་དབང་ཕྱུག་ཆེན་པོའི་གནས་ཅེས་བྱ་བའི་གནས་རིགས་བཅོ་བརྒྱད་པ་ཞིག་ཡོད་པར་ཐེག་པ་ཆེན་པོའི་སྡེ་སྣོད་ལས་འབྱུང་ངོ་། །གཟུགས་མེད་རིགས་བཞི་ནི། ནམ་མཁའི་མཐའ་ཡས་སྐྱེ་མཆེད་། རྣམ་ཤེས་མཐའ་ཡས་སྐྱེ་མཆེད། ཅི་ཡང་མེད་པའི་སྐྱེ་མཆེད། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དོ། །ལྷ་མ་ཡིན་ནི་ལྷ་དང་དུད་འགྲོ་ཡི་དྭགས་ཅི་རིགས་སུ་འདུའོ། །སྲིད་པ་བདུན་ནི། དམྱལ་བའི་སྲིད་པ། དུད་འགྲོའི་སྲིད་པ། ཡི་དྭགས་ཀྱི་སྲིད་པ། ལྷའི་སྲིད་པ། མིའི་སྲིད་པ། ལས་ཀྱི་སྲིད་པ། སྲིད་པ་བར་མའོ། །རྣམ་ཤེས་ཀྱི་གནས་པ་བདུན་ནི། ལུས་དང་འདུ་ཤེས་གཉིས་ཀ་ཐ་དད་པ་དང་། ལུས་ཐ་དད་ཅིང་འདུ་ཤེས་གཅིག་པ། དེ་ལས་ལྡོག་པ། གཉིས་ཀ་གཅིག་པ། གཟུགས་ཅན་མ་ཡིན་པའི་གནས་དང་པོ་གསུམ་སྟེ་བདུན་ནོ། ། དེའི་སྟེང་དུ་སྲིད་རྩེ་དང་འདུ་ཤེས་མེད་པའི་སེམས་ཅན་བསྣན་པ་ནི་སེམས་ཅན་གྱི་གནས་པ་དགུའོ། །སེམས་ཀྱི་གནས་པ་བཞི་ནི། ཕུང་པོ་དང་པོ་བཞི་ལ་སྤྱོད་པས་ཕྱེ་བའོ། །
སྐྱེ་གནས་བཞིས་དབྱེ་བ་ནི། སྒོང་སྐྱེས། མངལ་སྐྱེས། དྲོད་གཤེར་ལས་སྐྱེས་པ། རྫུས་སྐྱེས་ཏེ་བཞིའོ། །སྣོད་ལ། འོག་གི་གཞིར་གནས་པ་ནི་རླུང་གི་དཀྱིལ་འཁོར། ཆུའི་དཀྱིལ་འཁོར། སའི་དཀྱིལ་འཁོར། དེ་ལ་བརྟེན་པའི་གནས་ནི་རི་རབ་ལྷུན་པོ་གྲུབ་བཞི་པ་བང་རིམ་བཞི་པ། ཤར་ཤེལ༑ ལྷོ་བེེཌྰུརྱ། ནུབ་པདྨ་རཱག བྱང་གསེར་ལས་གྲུབ་པའོ། །དེའི་མཐའ་སྐོར་དུ་གསེར་གྱི་རི་བདུན་ཏེ། གཉའ་ཤིང་འཛིན། གཤོལ་མདའ་འཛིན། སེང་ལྡེང་ཅན། ལྟ་ན་སྡུག རྟ་རྣ། རྣམ་འདུད། མུ་ཁྱུད་འཛིན་ནོ། །འཁོར་ཡུག་ཏུ་ནི་ལྕགས་ཀྱི་རིའོ། །དེ་དག་གི་བར་དུ་རོལ་མཚོ་བདུན་དང་། ཕྱིའི་རྒྱ་མཚོ་ཆེན་པོའོ། །རོལ་མཚོ་རྣམས་ནི་ཡན་ལག་བརྒྱད་ལྡན་ཡིན་ལ། ཡན་ལག་བརྒྱད་ནི། བསིལ་བ། ཞིམ་པ། ཡང་བ། འཇམ་པ། དང་བ། དྲི་ང་བ་མེད་པ། འཐུང་ན་མགྲིན་པ་ལ་མི་གནོད་པ། ལྟོ་བ་ལ་མི་གནོད་པའོ། །ཀླུའི་གནས་བརྒྱད་ནི། དགའ་བོ། ཉེ་དགའ་བོ། རྟ་ཡི་གཞི། བཏང་བཟུང་། གཟི་ཅན། ཡུལ་འཁོར་བསྲུང་། ནག་པོ་ཆེན་པོ། ཨ་ལའི་འདབ་ཀྱི་གནས་སོ༑ ༑རྒྱ་མཚོ་ལ་གནས་པའི་གླིང་བཞི་ནི། ལུས་འཕགས་གླིང་། འཛམ་བུ་གླིང་། བ་ལང་སྤྱོད། སྒྲ་མི་སྙན་ཏེ་དབྱིབས་ནི་རིམ་པ་བཞིན་དུ། ཟླ་གམ་དང་། ཤིང་རྟ་ལྟ་བུ་དང་། ཟླུམ་པོ་དང་། གྲུ་བཞིའོ། །
གླིང་གཡོག་གམ་གླིང་ཕྲན་བརྒྱད་ནི། ལུས་དང་ལུས་འཕགས་གཉིས། རྔ་ཡབ་དང་རྔ་ཡབ་གཞན་གཉིས། གཡོ་ལྡན་དང་ལམ་མཆོག་འགྲོ་གཉིས། སྒྲ་མི་སྙན་དང་སྒྲ་མི་སྙན་གྱི་ཟླ་རྣམས་སོ། འཛམ་བུ་གླིང་ན་རྡོ་རྗེ་གདན་ནས་བྱང་དུ་རི་ནག་བོ་དགུ་འདས་པ་ན་གངས་རི་ཆེན་པོ་ཏེ་སེ་ཡོད་དོ། །དེ་དང་སྤོས་ངད་ལྡང་བའི་རི་གཉིས་ཀྱི་བར་ན་མཚོ་མ་དྲོས་པ་ཡོད་དོ། །དེ་ལས་གངྒ། སིནྔྷུ། སི་ཏ། པཀྵུ་སྟེ་ཆུ་བོ་ཆེན་པོ་བཞི་འབབ་བོ། །གླིང་འདིའི་རི་ཆེན་པོ་གསུམ་ནི། གངས་ཅན། འབིགས་བྱེད༑ མངྔྷ་ར་གསུམ། ཤིང་ཁྱད་པར་ཅན་གསུམ་ནི། འཛམ་བུ། ཤལ་མ་ལི། ས་ལའི་རྒྱལ་བོ་བར་བརྟན་གསུམ་མོ། །སྤོས་ངད་ལྡང་བའི་བྱང་ཕྱོགས་ན། བྲག་གསེར་གྱི་བྱ་སྐྱིབས་དང་། རྫིང་བུ་དལ་གྱིས་འཐོར་ཞེས་བྱ་བ་ཡོད།
གནས་ཆེན་ལྔ་ནི། རྡོ་རྗེ་གདན། རི་བོ་རྩེ་ལྔ། པོ་ཊ་ལ། ཨོ་ཊི་ཡ་ན། ཤམྦྷ་ལའོ། ། གླིང་འདིའི་འོག་ན། གོང་དུ་བཤད་པའི་དམྱལ་བ་རྣམས་དང་ཡི་དྭགས་ཀྱི་གྲོང་ཁྱེར་སེར་སྐྱ་ཞེས་བྱ་བར་གཤིན་རྗེའི་རྒྱལ་པོའི་ཕོ་བྲང་རྒྱལ་པོའི་ཁབ་ཅེས་བྱ་བ་ཡོད་དོ། །ལྷུན་པོའི་ཆུ་མཚམས་སུ་ནི་ལྷ་མ་ཡིན་གྱི་གྲོང་ཁྱེར་འོད་ཅན་དང་། དེའི་འོག་ཏུ་སྐར་ཕྲེང་། དེའི་འོག་ཏུ་ཟབ་པ། དེའི་འོག་ཏུ་གསེར་ལྡན་ལ་སོགས་པ་ཡོད་དོ། །ལྷུན་པོའི་ཕྱེད་ན་ཉི་མ་དང་ཟླ་བའོ། །རི་རབ་ཀྱི་བང་རིམ་དང་པོ་ལ། གནོད་སྦྱིན་ལག་ན་གཞོང་ཐོགས། གཉིས་པ་ལ་ཕྲེང་ཐོགས། གསུམ་པ་ལ་རྟག་མྱོས། བཞི་པ་ལ་རྒྱལ་ཆེན་བཞི་པའི་ལྷ་རྣམས་གནས་སོ། །ལྟུན་པོའི་རྩེ་མོ་ན་སུམ་ཅུ་རྩ་གསུམ་སྟེ། འདིའི་སོ་གསུམ་ནི།འཇིག་རྟེན་པ་ལ་གྲགས་པ་ལྟར་ན་ནོར་ལྷ་བརྒྱད། ཉི་མའི་བུ་བཅུ་གཉིས།དྲག་བོ་བཅུ་གཅིག ཐ་སྐར་གྱི་བུ་གཉིས་རྣམས་ཡིན་ལ།བསྟན་བཅོས་ལ་གྲགས་པ་ནི།གྲོང་ཁྱེར་གྱི་ཕྱོགས་བཞི་ན་འཁོར་གྱི་གཙོ་བོ་ཉེ་དབང་བརྒྱད་བརྒྱད་དེ་སོ་གཉིས་དང༌།དབུས་ན་ལྷའི་དབང་པོ་བརྒྱ་བྱིན་ཏེ་སོ་གསུམ་མོ། །ལྷུན་པོའི་རྩེ་མོ་བཞི་ན་ལག་ན་རྡོ་རྗེ་ཐོགས་པའི་གནོད་སྦྱིན་གནས་པའི་ཁང་བུ་བརྩེགས་པ་བཞི་དང༌།དབུས་ན་བརྒྱ་བྱིན་གྱི་ཕོ་བྲང་གྲོང་ཁྱེར་ལྟ་ན་སྡུག་ཡོད།དེའི་དབུས་ན་རྣམ་པར་རྒྱལ་བའི་ཁང་བཟང་ཡོད་དོ།གྲོང་ཁྱེར་དེའི་ཕྱི་རོལ་གྱི་ཕྱོགས་བཞི་ན་ཤིང་རྟ་སྣ་ཚོགས་ཅན། རྩུབ་འགྱུར།འདྲེས་པ། དགའ་བའི་ཚལ་ཞེས་བྱ་བའི་སྐྱེད་མོའི་ཚལ་བཞིའོ། ། བྱང་ཤར་མཚམས་ན་ཤིང་ས་བརྟོལ་ཡོངས་འདུ་དང་ལྷོ་ནུབ་མཚམས་ན་ཆོས་བཟང་ལྷའི་འདུན་ས་ཡོད་དོ། །དེའི་སྟེང་ན་དགའ་ལྡན་ནས་བརྩམས་ཏེ་ཡས་རིམ་བཞིན་གོང་དུ་བཤད་པའི་ལྷའི་གནས་རྣམས་ཡོད་དོ། །དེ་ལྟ་བུའི་འཇིག་རྟེན་གྱི་ཁམས་སྟོང་ཕྲག་གཅིག་ལ་སྟོང་སྤྱི་ཕུད་ཀྱི་འཇིག་རྟེན་གྱི་ཁམས། དེ་སྟོང་ལ་སྟོང་བར་མའི་འཇིག་རྟེན་གྱི་ཁམས།དེ་སྟོང་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱའོ། །སེམས་ཅན་དེ་དག་གི་ལུས་ཚད་དང་སྣོད་ཀྱི་རྒྱ་ཆེ་ཆུང་རྣམས་དང་དཔངས་སོགས་གཞལ་ཚུལ་ནི། རྡུལ་ཕྲ་རབ་དང༌། རྡུལ་ཕྲན།ལྕགས་རྡུལ། ཆུ་རྡུལ། རི་བོང་གི་རྡུལ། ལུག་རྡུལ། གླང་རྡུལ། ཉི་ཟེར་གྱི་རྡུལ། སྲོ་མ།ཤིག ནས། སོར་མོ་རྣམས་རིམ་པ་བཞིན་དུ་བདུན་འགྱུར་དང༌། སོར་མོ་ཉི་ཤུ་རྩ་བཞི་ལ་ཁྲུ་གང༌།ཁྲུ་བཞི་ལ་གཞུ་འདོམ་གང༌། དེ་ལྔ་བརྒྱ་ལ་རྒྱང་གྲགས་གཅིག དེ་བརྒྱད་ལ་དཔག་ཚད་དུ་འཇོག་པའོ། །སེམས་ཅན་གྱི་ཚེ་ཚད་དང་བསྐལ་ཆེན་སོགས་ཀྱི་བརྩི་ཚུལ་ནི། དུས་མཐའི་སྐད་ཅིག་མ་བརྒྱ་ཉི་ཤུ་ལ་དེའི་སྐད་ཅིག དེ་དྲུག་ཅུ་ལ་ཐང་ཅིག དེ་སུམ་ཅུ་ལ་ཡུད་ཙམ། དེ་སུམ་ཅུ་ལ་ཉིན་ཞག དེ་སུམ་ཅུ་ལ་ཟླ་བ། ཞག་མི་ཐུབ་དྲུག་དང་བཅས་པའི་ཟླ་བ་བཅུ་གཉིས་ལ་ལོ་གཅིག་ཏུ་འཇོག་གོ།།
བསྐལ་པ་ལ་བར་བསྐལ། འཇིག་བསྐལ། སྟོང་བསྐལ། ཆགས་བསྐལ། གནས་བསྐལ།བསྐལ་པ་ཆེན་པོ་རྣམས་སུ་ཡོད་དོ། ། གཟུགས་དང་དུས་ཀྱི་ཚད་གཞལ་བར་བྱེད་པའི་གྲངས་ཀྱི་གནས་ལ་ལུགས་མི་འདྲ་བ་ལྔ་ཙམ་ཡོད་ཀྱང༌། མངོན་པའི་ལུགས་ནི། གཅིག བཅུ། བརྒྱ། སྟོང་ཁྲི། འབུམ། ས་ཡ། བྱེ་བ། དུང་ཕྱུར་ཏེ་དགུ་ནི་རྐྱང་པ་དང༌།ཐེར་འབུམ། ཁྲག་ཁྲིག རབ་བཀྲམ། གཏམས། དཀྲིགས། མི་འཁྲུགས། ཁྱད་འབྱིན། པང་སྟེང༌།དེད་འདྲེན། མཐའ་སྣང༌། རྒྱུ་རིགས། འོད་མཛེས། དབང་པོ། ལེགས་ཕྱིན། རྟོགས་འགྲོ། འབྱིད་རྡུལ།རྒྱ་རྟགས། སྟོབས་འཁོར། བརྡའ་ཤེས། རྣམ་བྱུང༌། སྟོབས་མིག བྱམས་པ། སྙིང་རྗེ། འགའ་བ། བཏང་སྙོམས་རྣམས་ཆེན་པོའི་ཟླ་དང་བཅས་ལ།གྲངས་མེད།ཚད་མེད། དཔག་མེད། བརྗོད་མེད། དཔག་ཡས།གཞལ་མེད།གཞལ་གྱིས་མི་ལང༌།བསམ་གྱིས་མི་ཁྱབ་པ་རྣམས་གོང་ནས་གོང་དུ་བཅུ་བཅུར་བསྒྲེའོ།འདི་ལ་མངོན་པ་མཛོད་ཀྱི་འགྲེལ་པར་སྟོབས་མིག་ཆེན་པོ་དང་གྲངས་མེད་ཀྱི་བར་དུ་གནས་བརྒྱད་མ་རྙེད་པར་གསུངས་པས། དེའི་ཚབ་ཏུ་ཚད་མེད་བཞི་ཆེན་པོ་རེ་དང་བཅས་བསྣན་ནས་འདྲེན་པ་ནི་བླ་མ་གོང་མའི་ཕྱག་ལེན་ཡིན་ནོ། །དེ་ལྟར་ན་བར་བསྐལ་གཅིག་ལ་མི་ལོ་དཀྲིགས་ཆེན་པོ་གསུམ། དཀྲིགས་གསུམ། གཏམས་ཆེན་པོ་དགུ། གཏམས་བདུན། རབ་བཀྲམ་ཆེན་པོ་བདུན། ཁྲག་ཁྲིག་ཆེན་པོ་དྲུག ཁྲག་ཁྲིག་གཉིས། ཐེར་འབུམ་ཆེན་པོ་བཞི་རྣམས་སུ་ཡོད་ལ།དེ་ལྟ་བུའི་བར་བསྐལ་ཉི་ཤུ་ནི་ཆགས་པའི་བསྐལ་པ།ཉི་ཤུ་གནས་བསྐལ།ཉི་ཤུ་འཇིག་བསྐལ།ཉི་ཤུ་སྟོང་བསྐལ་ཏེ་བར་བསྐལ་བརྒྱད་ཅུ་ལ་བསྐལ་ཆེན་གཅིག་ཏུ་འཇོག་གོ།། 8/14 མདུན་ངོས། 上一页 6 7 8 9 10 11 下一页 尾页 |
