| རྗེ་ཙོང་ཁ་པའི་རྣམ་ཐར་དད་པའི་འཇུག་ངོགས། མཁས་གྲུབ་རྗེས་མཛད་པའི་འདུས་པའི་ཞི་རྒྱས་ཀྱི་སྦྱིན་སྲེག འདུལ་འཛིན་གྲགས་པ་རྒྱལ་མཚན་གྱིས་མཛད་པའི་དགེ་སློང་གི་བསླབ་བྱ་ཆེན་མོ་དང་ཀུན་རིག་ཊྰིཀ་ཆེན། བསླབ་བྱ་གནམ་རྩེང་ལྟིང་མ། བུ་སྟོན་ཆོས་འབྱུང༌། བུ་སྟོན་ཐམས་ཅད་མཁྱེན་པས་མཛད་པའི་ཐུབ་བའི་རྣམ་ཐར་ཆེན་མོ་དང༌། སྙིང་ཐུང་བདུད་མོ་ལ་སྨད་པ་དང་བཅས་པ། ས་སྐྱ་ལེགས་བཤད། ཤེས་བྱའི་མཁའ་དབྱིངས་མ། ཡེ་ཤེས་ཡོན་ཏན་བཟང་པོའི་བསྟོད་པ། བསྐལ་བཟང་རྒྱན་ཕྲེང༌། འདུལ་ལུང་ཀ་པ་ནས་བཟུང་རྒྱལ་བའི་བཀའ་འགྱུར་རིན་པོ་ཆེ་ཡོངས་རྫོགས། མགོན་པོ་ཕྱག་དྲུག་པ་དང་ཞལ་གྱི་བསྐང་གསོ། སྤྱན་སྔ་བློ་གྲོས་རྒྱལ་མཚན་གྱི་གསུང་འབུམ་ཡོངས་རྫོགས། དཔལ་དུས་ཀྱི་འཁོར་ལོའི་འགྲེལ་ཆེན་དྲི་མེད་འོད། རྒྱལ་བ་ལྔ་པས་མཛད་པའི་སྨན་བླའི་མདོ་ཆོག འདུལ་བའི་ལས་ཆོག སྤྱན་སྔ་ཆོས་དྲུག རྗེ་རིན་པོ་ཆེའི་གསུང་ཟིན་བྲིས་སྐོར་མང་པོ་དང༌། མཁས་གྲུབ་རྗེས་མཛད་པའི་རྒྱུད་སྡེ་སྤྱི་རྣམ། སྔགས་འཆང་གཟུངས་ཀྱི་དཔལ་བ་དང་བླ་མ་འཕགས་པ་སོགས་ཀྱི་མན་ངག་གིས་བརྒྱན་པའི་ཁྱུང་ཁྲའི་ལས་ཚོགས། རྣམ་སྲས་བེའུ་བུམ། དུར་ཁྲོད་བདག་པོའི་ལས་ཚོགས། དམ་པ་སངས་རྒྱས་ཀྱིས་མཛད་པའི་འཇམ་དབྱངས་ཆོས་སྐོར།རྟོགས་བརྗོད་དཔག་བསམ་འཁྲི་ཤིང༌།རྒྱལ་པ་ལྔ་པས་མཛད་པའི་བླ་མའི་རྣལ་འབྱོར་གྱི་སྐོར། གཡང་པ་ཆོས་རྗེས་མཛད་པའི་རྒྱལ་བ་དགེ་འདུན་རྒྱ་མཚོའི་རྣམ་ཐར་ཞབས་སྟེགས་དང་བཅས་པ། ཛེ་ཏཱ་རིས་མཛད་པའི་ཚེ་དཔག་མེད་ཀྱི་བསྟོད་པ་སྒྲུབ་ཐབས་དང་བཅས་པ། སྒྲ་མི་སྙན་གྱི་ཚེ་སྒྲུབ་བླ་མ་རྟོགས་ལྡན་པས་མཛད་པའི་རྗེའི་རྣམ་ཐར་ལེགས་བཤད་ཀུན་འདུས། རྒྱལ་བ་ལྔ་པའི་རྣམ་ཐར་ག་པའི་སྟོད་ཆ་ནས་ལུང་གི་འཕྲོ་ཡོད་པ་རྣམས། རྗེ་རིན་པོ་ཆེས་མཛད་པའི་འདུལ་བའི་ཟིན་བྲིས།སྤྱོད་འཇུག་ཤེར་ལེའི་ཟིན་བྲིས། བདག་བྱིན་རླབས་ཀྱི་ཟིན་བྲིས། མཁས་གྲུབ་རྗེ་སྐུ་མཆོད་ཀྱི་ཡིག་ཆུང༌། རྗེ་གྲགས་པ་རྒྱལ་མཚན་གྱིས་མཛད་པའི་རབ་གནས་རྣམས་ཀྱི་ལུང་དང༌། ཀུན་རིག་གི་དབང༌། ངན་སོང་སྦྱོང་བའི་དཀྱིལ་འཁོར་བཅུ་གཉིས་ཀྱི་དབང༌།གདུགས་དཀར་ལྷ་སོ་ལྔ་དང་བཅུ་བདུན་མ་གཉིས་ཀྱི་དབང་སྟ་གོན་དང་བཅས་པ། འཇམ་དབྱངས་ཆོས་སྐོར་གྱི་ནང་གི་སྒྲོལ་དཀར་གྱི་རྗེས་གནང་དང་ཉེར་མཁོའི་ལུང་འགའ་ཞིག་རྣམས་གསན་ཞིང༌། ལྕགས་རྟ་ས་ག་ཟླ་བའི་ཚེས་བཅུ་བཞི་བཅོ་ལྔ་གཉིས་ལ་དམ་པ་འདིའི་ཞབས་དྲུང་ཐེག་ཆེན་གསོ་སྦྱོང་གི་སྡོམ་པ་བཞེས་ནས། སྨྱུང་བར་གནས་པའི་ཆོ་ག་ཇི་ལྟར་བྱ་བའི་ཚུལ་རྣམས་ཀྱང་སྔ་གོང་ནས་དོགས་གཅོད་མཛད་དེ་སྦྱོར་དངོས་གཉིས་ཀ་རྣམ་པར་དག་པར་མཛད་དོ། །རྗེ་འདི་ནི་ལེགས་ཚོགས་ཐམས་ཅད་ཀྱི་རྩ་བ་བཤེས་གཉེན་བསྟེན་ཚུལ་ལ་ཤིན་ཏུ་བཟོ་བར་མཛད་པས་བླ་ཆེན་གྱི་གོ་སར་བཞུགས་པ་ཙམ་ལས་བླ་མ་རྣམས་ལ་ཆེ་འགྱིང་ནམ་ཡང་མི་མཛད་པར་ཤིན་ཏུ་གུས་པས་ཕྱག་འཚལ་ཞིང་མཆོད་པའི་དངོས་པོ་ཡིད་དུ་འོང་བ་མཐའ་དག་གིས་མཆོད་ཅིང་བཀའ་བཞིན་སྒྲུབ་པ་ལས་ནམ་ཡང་མི་གཡེལ་བར་མཛད་དེ་རྗེ་ཉིད་ཀྱི་ཞལ་ནས། ཐོས་པའི་ཚོམ་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་བྱེད། ཐོས་པས་དོན་མ་ཡིན་པ་སྤོང༌། །ཐོས་པས་མྱ་ངན་འདས་པ་ཐོབ། ། ཅེས་དང༌། སྡིག་པ་དང་ནི་དགེ་བའི་ཆོས། །མ་ཐོས་བར་དུ་ཤེས་མི་འགྱུར། །མིག་ལྡན་མར་མེ་ཡོད་པ་ཡིས།།གཟུགས་རྣམས་མཐོང་བ་ཇི་ལྟ་བར།།དེ་བཞིན་དགེ་དང་སྡིག་པའི་ཆོས། །ཐོས་པས་རྣམ་པར་ཤེས་པར་འགྱུར། །ཞེས་སོགས་གསུངས་པ་ལྟར་རྒྱལ་བའི་བཀའ་དང་དེའི་དགོངས་འགྲེལ་གྱི་བསྟན་བཅོས་མང་པོའི་ལུང་ཐོབ་པར་འདོད་པ་དང༌། དེའང་བདག་ཉིད་ལྟ་བུའི་བློ་དམན་གྱིས་ཐོས་པ་ཙམ་གྱིས་དགོངས་དོན་ཟབ་མོ་རྣམས་རྟོགས་དཀའ་བས་རྟག་ཏུ་དགེ་བའི་བཤེས་གཉེན་དམ་པ་དང་མི་འབྲལ་བར་བྱ་དགོས་སྙམ་སྟེ། སྔ་གོང་ནས་མཁན་ཆེན་རྡོ་རྗེ་འཛིན་པ་ཆེན་པོ་དང༌། ཁྱབ་བདག་འཁོར་ལོའི་མགོན་པོ་བློ་བཟང་དོན་གྲུབ་པའི་ཞལ་སྔ་ནས་དང༌། བཀའ་དྲིན་མཚུངས་མེད་བསོད་ནམས་གྲགས་པའི་ཞལ་སྔ་ནས་གསུམ་ལའང་བླ་བྲང་རང་དུ་བཞུགས་དགོས་པའི་གསོལ་བ་བཏབ། དེ་ཡང་དགེ་བའི་བཤེས་གཉེན་པོ་ཏོ་བ་ཆེན་པོའི་ཞལ་ནས། རྣམ་གྲོལ་བསྒྲུབ་པ་ལ་བླ་མ་ལས་གལ་ཆེ་བ་མེད་དེ། ཚེ་འདིའི་བྱ་བ་བལྟས་ནས་བྱས་ཆོག་པ་ལ་ཡང་སློབ་མཁན་མེད་པར་མི་འོང་ན་ངན་སོང་ནས་འོང་མ་ཐག་པ་འགྲོ་མ་མྱོང་བའི་སར་འགྲོ་བ་ལ་བླ་མ་མེད་པར་ག་ན་འོང༌། གསུངས་པ་དེ་མད་སྙམ་པ་བྱུང༌། དེ་ཡང་གོ་སའི་དབང་གིས་བླ་ཆེན་གྱི་འགྱིལ་ཚུལ་ལ་གནས་དགོས་པ་ཙམ་མ་གཏོགས་བཤེས་གཉེན་དམ་པ་དེ་དག་ལ་མི་གུས་པ་སྐད་ཅིག་ཙམ་ཡང་སྐྱེ་མ་མྱོང་ཞིང༌། པོ་ཏོ་བས་སྤྱན་སྔའི་གྲྭ་པ་རྣམས་ལ། ཁྱེད་ངའི་དགེ་བཤེས་བྱང་ཆུབ་སེམས་དཔའ་འདི་ལྟ་བུ་དང་འཕྲད་ནས་བཀའ་བཞིན་བསྒྲུབ་ཏུ་ཡོད་པ་བསོད་ནམས་ཆེའོ། །ཞེས་གསུངས་པ་ལྟར་འདི་དག་ལྟ་བུའི་བཤེས་གཉེན་དམ་པ་དང་མཇལ་བ་བསོད་ནམས་ཆེ་ཞིང་སྐལ་བ་བཟང་སྙམ་པ་དང༌། 10/21 མདུན་ངོས། 上一页 8 9 10 11 12 13 下一页 尾页 |
