ད་སྔ་གཟིགས་བཞིན་པ།  མདུན་ངོས། > ཆེད་ལས་ཐ་སྙད། > སྐྱེ་དངོས།
༄༅། །ཕུང་ཁམས་སྐྱེ་མཆེད་ཀྱི་རྣམ་བཞག་ལས་སྐབས་བཞི་པ།རྟེན་འབྲེལ་བཅུ་གཉིས་ལས་ཟུར་བཀོད།བདེན་མཐོང་སྒོ་བཞིའི
སྤེལ་དུས།01-16  ཡོང་ཁུངས།  རྩོམ་པ་པོ།

ཟུར་བཀོད 

བདེན་མཐོང་སྒོ་བཞིའི་ཐད་ཀྱི་སྡོམ་བྱང༌།
འཇུ་མི་ཕམ།
 
བཞི་བཅོམ་དྲུག་ལྡན་མཐའ་ལས་འདས།།ཞི་འཇམ་ཐུགས་རྗེའི་དཔལ་ལྡན་པ།།གཞོན་ནུར་གྱུར་པ་ལ་བཏུད་ནས།།མཁས་འཇུག་སྡོམ་བྱང་འཛིན་ཆོས་སྤེལ།།གང་ལ་མཁས་པར་བྱ་བ་ཡི།།གནས་བཅུ་དག་ཏུ་གསུངས་པ་ནི།།ཕུང་ཁམས་སྐྱེ་མཆེད་རྟེན་འབྲེལ་དང༌།།གནས་དང་གནས་མིན་དབང་པོ་དུས།།བདེན་པ་དང་ནི་ཐེག་པ་དང༌།།འདུས་བྱས་འདུས་མ་བྱས་པ་བཅུའོ།།གཟུགས་དང་ཚོར་བ་འདུ་ཤེས་དང༌།།འདུ་བྱེད་རྣམ་ཤེས་ཕུང་པོ་ལྔ།།གཟུགས་ནི་དབང་ལྔ་དོན་ལྔ་དང༌།།ཆོས་ཀྱི་སྐྱེ་མཆེད་གཟུགས་བཅས་སོ།།མིག་རྣ་སྣ་ལྕེ་ལུས་དབང་ལྔ།།གཟུགས་སྒྲ་དྲི་རོ་རེག་དོན་ལྔ།།མིག་ཡུལ་གཟུགས་ཀྱི་དབྱེ་བ་ལ།།སྔོ་སེར་དཀར་དམར་རྩ་པའི་མདོག།སྤྲིན་དང་དུ་བ་རྡུལ་ཁུག་སྣ།།ཉི་གྲིབ་སྣང་མིན་ཡན་ལག་བརྒྱད།།རིང་ཐུང་ལྷམ་ཟླུམ་མཐོ་དམའ་དང༌།།ཕྲ་རག་ཕྱལ་དང་ཕྱལ་མིན་དབྱིབས།།གཞན་ཡང་བཟང་ངན་བར་མ་སོགས།།ནང་གི་དབྱེ་བ་དུ་མར་འགྱུར།།སྒྲ་ཡི་ནང་གི་དབྱེ་བ་ལ།།ཟིན་བྱུང་རྒྱུས་བྱུང་མ་བྱུང་དང༌།།གཉིས་ཀ་ལས་ནི་བྱུང་བ་གསུམ།།སེམས་ཅན་དུ་སྟོན་དོན་རྗོད་བྱེད།།དེ་ཟློག་དང་གཉིས་དོན་བརྗོད་ལ།།འཇིག་རྟེན་འཕགས་པས་བརྟག་གཉིས་དང༌།།གཞན་ཡང་བཟང་ངན་བར་མ་གསུམ།། ནང་གི་དབྱེ་བ་ཚད་མེད་དོ།།དྲི་ལ་ཞིམ་མི་ཞིམ་ཆ་མཉམ།།ལྷན་སྐྱེས་སྦྱར་བྱུང་སོགས་དབྱེའོ།།མངར་སྐྱུར་ལན་ཚྭ་ཁ་ཚ་བསྐ།།རོ་ནི་རྣམ་པ་དྲུག་ཏུ་འདོད།།གཞན་ཡང་ཡིད་འོང་མི་འོང་དང༌།།བར་མ་གསུམ་སོགས་དབྱེ་བ་མང༌།།རེག་བྱ་རྒྱུ་དང་འབྲས་བུ་གཉིས།།སྲ་གཤེར་དྲོ་གཡོ་རྒྱུ་འབྱུང་རེག།འཇམ་རྩུབ་ལྕི་ཡང་བཀྲེས་སྐོམ་གྲང༌།།མཉེན་ལྷོད་དམ་ཚིམ་ན་རྒ་འཆི།།ངལ་སོས་པ་དང་སྤུང་ཆེ་སོགས།།འབྲས་བུའི་རེག་བྱའི་དབྱེ་བའོ།།ཆོས་ཀྱི་སྐྱེ་མཆེད་པ་ཡི་གཟུགས་ལྔ་ནི།།བསྡུས་ལས་གྱུར་དང་མངོན་པར་སྐབས་ཡོད་དང༌།།ཡང་དག་བླངས་པ་ལས་བྱུང་གཟུགས་དང་ནི།།ཀུན་བརྟགས་པ་དང་དབང་འབྱོར་གཟུགས་ལྔའོ།།ཕྲ་རབ་རྡུལ་དང་རྡུལ་ཕྲན་དང༌།།ལྕགས་ཆུ་རི་བོང་ལུག་དང་གླང༌།།ཉི་ཟེར་སྲོ་མ་ཤིག་ནས་སོར།གོང་ནས་གོང་དུ་བདུན་འགྱུར་ཏེ།།སོར་མོ་ཉེར་བཞི་ཁྲུ་གང་ལ།།ཁྲུ་བཞི་གཞུ་འདོམ་གང་ཞེས་བྱ།།གཞུ་འདོམ་ལྔ་བརྒྱ་རྒྱང་གྲགས་ཏེ།།རྒྱང་གྲགས་བརྒྱད་ནི་དཔག་ཚད་དོ།།ཚོར་བའི་ཕུང་པོའི་དབྱེ་བ་ལ།།བདེ་དང་སྡུག་བསྔལ་བཏང་སྙོམས་གསུམ།།བདེ་དང་ཡིད་བདེ་སྡུག་བསྔལ་དང༌།།ཡིད་མི་བདེ་དང་བཏང་སྙོམས་ལྔ།།མིག་གི་འདུས་ཏེ་རེག་པ་ལས།།བྱུང་བའི་ཚོར་བ་ལ་སོགས་དྲུག།དེ་ལ་བདེ་སྡུག་བཏང་སྙོམས་ཀྱི།།དབྱེ་བའི་ཚོར་བ་བཅོ་བརྒྱད་འགྱུར།།ཡང་ནི་ལུས་ཚོར་སེམས་ཚོར་གཉིས།།ཟང་ཟིང་བཅས་དང་ཟང་ཟིང་མེད།།ཞེན་པ་རྟེན་དང་ངེས་འབྱུང་རྟེན།།ལ་སོགས་དབྱེ་བས་དུ་མར་འགྱུར།འདུ་ཤེས་ཀྱི་ནི་ཕུང་པོ་ལ།།མིག་གི་འདུས་ཏེ་རེག་པ་ལས།།བྱུང་བའི་འདུ་ཤེས་ལ་སོགས་དྲུག།དོན་དང་ཐ་སྙད་འཛིན་པས་གཉིས།།ཡང་ནི་མཚན་བཅས་མཚན་མེད་དང༌།།ཆུང་ངུ་ཆེ་དང་ཚད་མེད་པ།།ཅི་ཡང་མེད་པས་འདུ་ཤེས་དྲུག།དེ་ལ་སོགས་པའི་དབྱེ་བ་མཛད།།འདུ་ཤེས་ཀྱི་ནི་ཕུང་པོ་ལ།།མཚུངས་ལྡན་མཚུངས་ལྡན་མིན་གཉིས་ལས།།སེམས་དང་མཚུངས་པར་ལྡན་པ་ནི།།སེམས་བྱུང་ལྔ་བཅུ་ང་གཅིག་སྟེ།།ཚོར་འདུ་སེམས་པ་ཡིད་བྱེད་དང༌།།རིག་པ་ལྔ་ནི་ཀུན་འགྲོ་འོ།།འདུན་པ་མོས་པ་དྲན་པ་དང༌།། ཏིང་འཛིན་ཤེས་རབ་ཡུལ་ངེས་ལྔ།།ཚོར་བ་འདུ་ཤེས་གཉིས་མ་གཏོགས།།གཞན་ཀུན་འདུ་བྱེད་ཕུང་པོས་བསྡུས།།དད་དང་བག་ཡོད་ཤིན་ཏུ་སྦྱང༌།།བཏང་སྙོམས་ངོ་ཚ་ཁྲེལ་ཡོད་དང༌།།མ་ཆགས་མ་སྡང་གཏི་མུག་མེད།།རྣམ་པར་མི་འཚེ་བརྩོན་འགྲུས་ནི།།དགེ་བའི་སེམས་བྱུང་བཅུ་གཅིག་སྟེ།།ངོ་བོ་དགེ་ཕྱིར་དེ་འབྲེལ་དགེ།མ་རིག་འདོད་ཆགས་ཁོང་ཁྲོ་དང༌།།ང་རྒྱལ་ཐེ་ཚོམ་ལྟ་བ་ལ།།རྩ་བའི་ཉོན་མོངས་དྲུག་ཅེས་བྱ།།ལྟ་བ་དེ་ལ་ལྔར་ཕྱེ་ན།།འཇིག་ཚོགས་ལྟ་དང་རྟག་ཆད་ཀྱི།།མཐར་ལྟདང་ནི་ལོག་ལྟ་དང༌།།ལྟ་བ་མཆོག་ཏུ་འཛིན་པ་དང༌།།ཚུལ་ཁྲིམས་བརྟུལ་ཞུགས་མཆོག་འཛིན་ནོ།།ལྟ་བ་ལྔ་དང་ལྟ་མིན་ལྔ།།རྩ་བའི་ཉོན་མོངས་བཅུ་ཞེས་བྱ།།ཁྲོ་བ་འཁོན་འཛིན་འཚིག་པ་དང༌།།རྣམ་འཚེ་ཕྲག་དོག་གཡོ་དང་སྒྱུ།།ངོ་ཚ་མེད་དང་ཁྲེལ་མེད་དང༌།།འཆབ་པ་སེར་སྣ་རྒྱགས་པ་དང༌།།མ་དད་པ་དང་ལེ་ལོ་དང༌།།བག་མེད་བརྗེད་ངས་ཤེས་བཞིན་མིན།།རྨུགས་པ་རྒོད་པ་རྣམ་གཡེང་བཅས།།ཉེ་བའི་ཉོན་མོངས་ཉི་ཤུ་འོ།།ཉོན་མོངས་སུམ་ཅུ་དེ་དག་ལས།།འཇིག་མཐར་གཉིས་དང་དེ་གཉིས་དང༌།། མཚུངས་ལྡན་མ་རིག་མ་གཏོགས་གཞན།།འདོད་ཁམས་འདི་ནི་ངོ་བོ་ཡིས།།མི་དགེ་ཡིན་ཕྱིར་དེ་དག་དང༌།།འབྲེལ་བའི་ལསརྣམས་མི་དགེར་འགྱུར།།གཉིད་དང་འགྱོད་པ་རྟོག་དང་དཔྱོད།།གཞན་འགྱུར་བཞི་ཞེས་བྱ་བ་ཡིན།།ལྡན་མིན་འདུ་བྱེད་ཉེར་བཞི་ནི།།ཐོབ་དང་མ་ཐོབ་སྐལ་མཉམ་དང༌།།འདུ་ཤེས་མེད་དང་དེའི་སྙོམས་འཇུག། འགོག་པའི་སྙོམས་འཇུག་སྲོག་དབང་དང༌།།སྐྱེ་གནས་རྒ་དང་མི་རྟག་དང༌།།མིང་དང་ཚིག་དང་ཡི་གེའི་ཚོགས།།སོ་སྐྱེ་འཇུག་པ་སོ་སོར་ངེས།།འབྱོར་འབྲེལ་མགྱོགས་པ་གོ་རིམ་དུས།།ཡུལ་དང་གྲངས་དང་ཚོགས་པ་སྟེ།།འདིས་མཚོན་གཞན་རྣམས་དེ་ལྟར་ཤེས།།རྣམ་པར་ཤེས་པའི་ཕུང་པོ་ལ།།མིག་གི་རྣམ་པར་ཤེས་པ་ནས།།ཡིད་ཤེས་བར་གྱི་ཚོགས་དྲུག་དང༌།།ཉོན་མོངས་ཅན་གྱི་ཡིད་དང་ནི།།ཀུན་གཞི་རྣམ་པར་ཤེས་པ་བཅས།།རྣམ་ཤེས་ཚོགས་བརྒྱད་དག་ཏུ་འདོད།།འདུས་བྱས་ཆོས་ཀུན་ཕུང་པོ་ལྔར།འདུས་ཕྱིར་དེ་དག་གཏམ་གཞི་དང༌།རྒྱུ་བཅས་འཇིག་རྟེན་ལྟ་གནས་དང༌།།སྲིད་པ་དག་ཏུའང་བརྗོད་པ་ཡིན།།འདུན་པ་དང་ནི་འདོད་ཆགས་ཀྱི།།ཉེར་ལེན་ཟག་བཅས་ཕུང་པོ་དེ།།འཐབ་བཅས་སྡུག་བསྔལ་ཀུན་འབྱུང་དང༌།།ངེས་པར་འབྱུང་བྱ་དག་ཏུ་བརྗོད།།ཕུང་ལྔའི་རབ་དབྱེ་ལ་མཁས་ན༌།།བདག་ལ་གཅིག་པར་འཛིན་པ་ཡི།།ལྟ་བ་ངན་པ་ལྡོག་འགྱུར་ཞིང༌།།འདུས་བྱས་ཆོས་ལ་མཁས་བར་འགྱུར།།མིག་དང་གཟུགས་དང་མིག་ཤེས་ཁམས།།རྣ་བ་སྒྲ་དང་རྣ་ཤེས་ཁམས།།སྣ་དང་དྲི་དང་སྣ་ཤེས་ཁམས།།ལྕེ་དང་རོ་དང་ལྕེ་ཤེས་ཁམས།ལུས་དང་རེག་བྱ་ལུས་ཤེས་ཁམས།།ཡིད་དང་ཆོས་དང་ཡིད་ཤེས་ཁམས།། དབང་དྲུག་ཡུལ་དྲུག་ཤེས་དྲུག་སྟེ།།དེ་ལྟར་ཁམས་ནི་བཅོ་བརྒྱད་དོ།།དྲུག་པོ་འདས་མ་ཐག་པ་ཡི།།རྣམ་ཤེས་གང་ཡིན་དེ་ཡིད་དབང༌།། ཆོས་ཁམས་དབྱེ་བ་བཅུ་དྲུག་སྟེ།།བརྟགས་འགོག་བརྟགས་མིན་ནམ་མཁའ་དང༌།།དགེ་སོགས་དེ་བཞིན་ཉིད་གསུམ་དང༌།། འདུ་ཤེས་མེད་དང་འགོག་སྙོམས་ཀྱི།སེམས་མེད་གཉིས་ཏེ་འདུས་མ་བྱས།།རྣམ་པ་བརྒྱད་དང་ཚོར་བ་དང༌།།འདུ་ཤེས་འདུ་བྱེད་ཆོས་ཀྱི་ནི།།སྐྱེ་མཆེད་གཟུགས་ལྔ་དང་བཅས་སོ།།དེ་ལྟར་ཁམས་ནི་བཅོ་བརྒྱད་དུ།།ཤེས་བྱས་ཆོས་ཀུན་འདུས་པས་ན།།དེ་ལ་ཟག་བཅས་ཟག་མེད་སོགས།།དབྱེ་བའི་རྣམ་གྲངས་ཤེས་པར་བྱ།།ཡུལ་དྲུག་གཟུང་བྱའི་རྒྱུ་དང་ནི།།དབང་དྲུག་འཛིན་དང་ཤེས་དྲུག་གིས།།དེ་འཛིན་བྱེད་པར་རྟོགས་པ་ན།།བདག་རྒྱུར་ལྟ་བ་ལྡོག་པར་འགྱུར།།མིག་རྣ་སྣ་ལྕེ་ལུས་ཡིད་དང༌།།གཟུགས་སྒྲ་དྲི་རོ་རེག་ཆོས་ཀྱི།།སྐྱེ་མཆེད་དག་ནི་བཅུ་གཉིས་ཏེ།།མིག་དང་གཟུགས་ནས་ཡིད་ཆོས་བར།།སྐྱེ་མཆེད་ཅེས་པའི་མིང་སྦྱར་རོ།།རྣམ་ཤེས་ཁམས་བདུན་ཡིད་དུ་བསྡུས།།ཡིད་ནི་ཀུན་གྱི་ཡུལ་ཅན་ཏེ།།རྟོག་བཅས་ཡིད་ཀྱིས་ཆོས་རྣམས་ལ།།རྫས་བཏགས་སྣང་སེལ་འགལ་འབྲེལ་དང༌།།ཡུལ་དང་ཡུལ་ཅན་ལ་སོགས་བའི།།ཐ་སྙད་སྣ་ཚོགས་བྱས་པ་ཡིས།།ཤེས་བྱའི་དོན་ལ་མི་རྨོངས་འགྱུར།།ཡུལ་ལ་སྣང་ཡུལ་གཟུང་ཡུལ་དང༌།།ཞེན་ཡུལ་འཇུག་ཡུལ་རྣམ་པ་བཞི།།ཡུལ་ཅན་བློ་ཡི་དབྱེ་བ་ལ།།སྣང་ལ་མ་ངེས་ཡིད་དཔྱོད་དང༌།།མ་རྟོགས་ལོག་རྟོག་ཐེ་ཚོམ་དང༌།།མངོན་སུམ་རྗེས་དཔག་ཚད་མ་གཉིས།།བཅས་ཤེས་དང་ནི་བདུན་དུ་དབྱེ།།བློ་ཀུན་མ་རྟོགས་ལོག་རྟོག་དང༌།།ཐེ་ཚོམ་ཡང་དག་རྟོགས་བཞིར་འདུ།།སེལ་བར་དོན་དང་བློའི་རྣམ་གཉིས།།རྣམ་གཅོད་དང་ནི་ཡོངས་གཅོད་གཉིས།།མི་སྲིད་མི་ལྡན་གཞན་ལྡན་གཅོད།།དོན་ལྡོག་གཞི་ལྡོག་རང་ལྡོག་གསུམ།།དེ་ལ་སོགས་པའི་དབྱེ་བ་ཡོད།།འགལ་ལ་ལྷན་ཅིག་མི་གནས་དང༌།།ཕན་ཚུན་སྤང་འགལ་རྣམ་པ་གཉིས།།དང་པོར་བློ་འགལ་དོན་འགལ་གཉིས།།གཉིས་པར་དངོས་འགལ་བརྒྱུད་འགལ་གཉིས།།འབྲེལ་ལ་བདག་གཅིག་འབྲེལ་བ་དང༌།།དེ་བྱུང་འབྲེལ་བ་རྣམ་གཉིས་སོ།།ཐ་སྙད་རང་གི་རྣམ་དབྱེ་ལ།།ཤེས་བརྗོད་འཇུག་པའི་ཐ་སྙད་གསུམ།།མཐོང་ཐོས་བྱེ་བྲག་ཕྱེད་པ་དང།།མྱོང་བའི་ཐ་སྙད་རྣམ་པ་བཞི།།ཡིན་ཡོད་སྒྲུབ་དང་མེད་མིན་འགག།འགག་སྒྲུབ་ཐ་སྙད་ཡན་ལག་བཞི།།ཆོས་ཀུན་བསྡུ་ན་སྣང་བ་གཟུགས།།གཙོ་བོ་སེམས་དང་འཁོར་སེམས་བྱུང༌།།ལྡན་མིན་འདུ་བྱེད་འདུས་མ་བྱས།།ཤེས་བྱ་གཞི་ལྔ་དེར་འདུ་འོ།།ཕྱི་ཡི་ཡུལ་དྲུག་ལོངས་སྤྱད་བྱ།།ནང་གི་དྲུག་པོ་སྤྱོད་བྱེད་ལ།།སྐྱེ་མཆེད་དེ་དག་སྣ་ཚོགས་པས།། བདག་ལ་ཟ་པོར་འཛིན་པ་ལྡོག།ཕྱི་དང་ནང་གི་ཆོས་ཐམས་ཅད།། རྟེན་ཅིང་འབྲེལ་བར་འབྱུང་སྟེ་སྐྱེ།།ཕྱི་ཡི་རྒྱུ་དང་འབྲེལ་བ་ནི།།ས་བོན་མྱུ་གུ་འདབ་མ་དང༌།།སྡོང་བུ་སྦུ་གུ་སྙིང་པོ་དང༌།།མེ་ཏོག་འབྲས་བུ་རིམ་པར་འབྱུང༌།།དེ་དང་འབྲེལ་བའི་རྐྱེན་དྲུག་སྟེ།།ས་ཆུ་མེ་རླུང་མཁའ་དུས་སོ།།ནང་གི་རྟན་འབྲལ་བཅུ་གཉིས་ན།།འདི་ཡོད་པ་ལས་འདི་འབྱུང་སྟེ།།མ་རིག་འདུ་བྱེད་རྣམ་པར་ཤེས།།མིང་གཟུགས་སྐྱེ་མཆེད་དྲུག་རེག་པ།།ཚོར་བ་སྲེད་པ་ལེན་པ་དང༌།།སྲིད་པ་སྐྱེ་བ་རྒ་ཤི་འོ།།མ་རིག་སྲེད་ལེན་གསུམ་ཉོན་མོངས།།འདུ་བྱེད་སྲིད་པ་གཉིས་ནི་ལས།།ལྷག་མ་བདུན་པོ་སྡུག་བསྔལ་ཏེ།།བསྡུ་ན་ཀུན་འབྱུང་སྡུག་བསྔལ་གཉིས།།མ་རིག་ཡོད་ན་ལུགས་འབྱུང་དུ།།མགལ་མེ་བསྐོར་ལྟར་རྒྱུན་མི་འཆད།།མ་རིག་ལྡོག་ན་ལུགས་ལྡོག་གི།བདེན་དོན་རྣམ་པ་བཅུ་གཉིས་འགྲུབ།།དེ་དག་རྐྱེན་དྲུག་འབྲེལ་བ་སྟེ།།ས་ཆུ་མེ་རླུང་མཁའ་རྣམ་ཤེས།།རྟེན་དམིགས་སྣང་མཁའ་ཡིད་བྱེད་ལྔས།།མིག་ཤེས་སྐྱེ་སོགས་ཆོས་རྣམས་ཀུན།།རྒྱུ་རྐྱེན་སྣ་ཚོགས་འདུས་ལས་སྐྱེ།།དུས་དང་དབང་ཕྱུག་སོགས་ཀྱིས་མིན།།ཁ་ཏོན་མར་མེ་མེ་ལོང་རྒྱ།།མེ་ཤེལ་ས་བོན་སྐྱུར་དང་སྒྲས།།ཕུང་པོ་ཉིང་མཚམས་སྦྱོར་བ་ནི།།མི་འཕོ་བར་ཡང་མཁས་རྟོགས་བྱ།།དེ་ལྟར་རྟེན་འབྲེལ་དོན་རྟོགས་ན།།རྟག་མིན་ཆད་མིན་འཕོས་པའང་མིན།།རྒྱུ་ཆུང་ན་ཡང་འབྲས་བུ་ཆེ།།རྒྱུ་འབྲས་རྒྱུ་མཐུན་ཉིད་དུ་ཤེས།།ཆོས་ཀུན་རྒྱུ་མེད་མ་ཡིན་ལ།།རྒྱུ་མིན་གཞན་ལས་མ་བྱུང་སྟེ།།རྟེན་འབྲེལ་དབང་གིས་སྣང་བ་ཀུན།།མ་སྐྱེས་རང་བཞིན་ཞི་བར་མཐོང༌།།དེ་ཕྱིར་དུས་གསུམ་རྟོགས་ལ་མི་རྨོངས་ཤིང༌།།འཕགས་ལམ་བརྒྱད་ལྡན་ཆོས་དང་ཤེས་བྱ་ཀུན།།ཡང་དག་གཟིགས་པ་སངས་རྒྱས་ཆོས་ཀྱི་སྐུ།།རྟེན་ཅིང་འབྲེལ་འབྱུང་མཐོང་བ་དེས་མཐོང་ངོ་།།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2016 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备14000172号