ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་དང་པོ། ཕྱི་རོལ་པའི་ལུགས་ཀྱི་གྲུ
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
བློ་ལུས་ཀྱི་ཉེར་ལེན་ཡིན་པ་འགོག་པ་ནི།   ལུས་ཁོ་ན་སེམས་ཀྱི་རྒྱུ་ཡིན་ན་ཤི་བའི་ལུས་ལའང་སེམས་ཡོད་པར་ཐལ་བར་འགྱུར་ཏེ། ལུས་ཡོད་པ་ཙམ་གྱིས་སེམས་ཀྱི་དངོས་རྒྱུ་ཐོགས་པ་མེད་པ་མ་ཚང་བ་མེད་པའི་ཕྱིར། རྣམ་འགྲེལ་ལས། ལུས་ནི་གནས་པ་ཉིད་ན་སེམས།   །ལྡོག་པ་མེད་པ་ཐལ་བར་འགྱུར། །ཞེས་སོགས་ཀྱི་རིགས་པ་དང༌། བློ་ནི་ལུས་ལ་འབྲས་བུའི་ཚུལ་དུ་བརྟེན་པ་ཡང་མ་ཡིན་ཏེ།ཤེས་རབ་ལ་སོགས་པ་ཕུལ་དུ་བྱུང་བ་དང་འགྲིབ་པ་ནི་ལུས་ཀྱི་ཕུལ་དུ་བྱུང་བ་དང་འགྲིབ་པ་ལ་ལྟོས་པ་མེད་པའི་ཕྱིར། བློ་ལུས་ཀྱི་བདག་ཉིད་ཡིན་པའི་ཚུལ་གྱིས་བརྟེན་པ་ཡང་མ་ཡིན་ཏེ། སྐྱེས་བུ་དེའི་བློ་ལ་ཡོད་པའི་ཡོན་ཏན་ཐམས་ཅད་སྐྱེས་བུ་དེའི་ལུས་མཐོང་བའི་དབང་ཤེས་ལ་ཡང་མངོན་སུམ་དུ་སྣང་བར་་་་ཐལ་བའི་ཕྱིར་རོ།   །རྟགས་གྲུབ་སྟེ། ཁྱོད་ལྟར་ན་ལུས་རྟག་པ་ཡིན་པས་དེ་དང་བློ་རྫས་གཅིག་ཡིན་ན་ཆ་མེད་རྫས་གཅིག་ཡིན་དགོས། དེ་ལྟར་ན་ལུས་སེམས་གཅིག་ཡིན་དགོས་པའི་ཕྱིར་རོ། །འདི་རྣམས་ཀྱང་རྣམ་འགྲེལ་གྱི་རིགས་པ་ཡིན་ནོ། །
སྤྱིར་རྒྱུ་མེད་པར་འདོད་པ་དགག་པ་ནི།   དངོས་པོ་རྣམས་རྟག་ཏུ་ཡོད་པའམ་གཏན་མེད་པའམ་ཐམས་ཅད་ལས་ཐམས་ཅད་སྐྱེ་བར་ཐལ་བར་འགྱུར་ཏེ། རྒྱུ་མེད་ཅིང་གཞན་ལ་མི་ལྟོས་པའི་ཕྱིར། རྣམ་འགྲེལ་ལས། རྒྱུ་མེད་གཞན་ལ་མི་ལྟོས་ཕྱིར།   །རྟག་ཏུ་ཡོད་པའམ་མེད་པར་འགྱུར།། ཞེས་དང་།ཟླ་བའི་ཞབས་ཀྱིས་འཇུག་པ་རྩ་འགྲེལ་ལས་ཀྱང་རིགས་པ་དེས་བཀག་གོ   །སྐྱེ་བ་སྔ་ཕྱི་ཡོད་པར་བསྒྲུབས་པ་ནི། ཐ་མལ་བ་སྐྱེས་མ་ཐག་གི་རིག་པ་དང་པོ་ཆོས་ཅན། རང་རྒྱུ་རིག་པ་སྔ་མ་སྔོན་དུ་སོང་སྟེ། རིག་པ་ཡིན་པའི་ཕྱིར། དཔེར་ན་ད་ལྟའི་རིག་པ་འདི་བཞིན། ཐ་མལ་བ་འཆི་ཁའི་རིག་པ་ཐ་མ་ཆོས་ཅན། རིག་པ་ཕྱི་མ་འཚམས་སྦྱོར་ཏེ།  སྲིད་པ་དང་བཅས་པའི་རིག་པ་ཡིན་པའི་ཕྱིར། ཐ་མལ་བ་འཆི་ཁའི་དབང་པོ་ཐ་མ་ཆོས་ཅན།   དབང་པོ་ཕྱི་མ་འཚམས་སྦྱོར་ཏེ། ལུས་ལ་སྲེད་པ་ངང་བཅས་པའི་དབང་པོ་ཡིན་པའི་ཕྱིར། ཞེས་པ་རྣམས་ཆོས་ཀྱི་གྲགས་པ།   ལེགས་ལྡན་འབྱེད།ཞི་འཚོ་རྣམས་ཀྱི་གཞུང་ལས་མཐུན་པར་བྱུང་ཞིང༌། སློབ་དཔོན་ཀ་མ་ལ་ཤི་ལས། གང་འདོད་ཆགས་དང་བཅས་པའི་སེམས་ཡིན་པ་དེ་ནི། རང་གིས་ཉེ་བར་བླང་བར་བྱ་བའི་སེམས་གཞན་སྐྱེད་པར་ནུས་པ་ཡིན་ཏེ། ཆགས་པ་དང་བཅས་པའི་སྔར་གྱི་གནས་སྐབས་ཀྱི་སེམས་བཞིན། ཐ་མལ་བ་འཆི་བའི་སེམས་ཀྱང་འདོད་ཆགས་དང་བཅས་པ་ཡིན་ནོ་ཞེས་བྱ་བ་ནི་རང་བཞིན་གྱི་རྟགས་སོ་ཞེས་གསུངས་པ་ལྟར་རོ། །གཏན་ཚིགས་འདི་དག་གི་ཕྱོགས་ཆོས་དང་རྗེས་སུ་འགྲོ་ལྡོག་གི་ཁྱབ་པ་བསྒྲུབ་ཚུལ་གྱི་གནད་རྣམས་ཞིབ་ཏུ་ཤེས་ན་སྐྱེ་པ་སྔ་ཕྱི་ཡོད་པ་སོགས་ལ་ངེས་ཤེས་འདྲེན་པ་ལ་ཁྱད་ཆེ་མོད་ཀྱང་མང་བས་འཇིགས་ནས་མ་བྲིས་ཤིང༌། དཔྱོད་ལྡན་རྣམས་ཀྱིས་རྣམ་འགྲེལ་ལེའུ་གཉིས་པ་རྩ་འགྲེལ་སོགས་གཞུང་ཆེན་མོ་རྣམས་སུ་བལྟ་བར་བྱའོ། །
ཀུན་མཁྱེན་ཡོད་པར་བསྒྲུབ་པ་ནི།   དེ་ལྟར་སྐྱེ་བ་སྔ་ཕྱི་བསྒྲུབས་པས་ཐམས་ཅད་མཁྱེན་པའང་འགྲུབ་པ་ཡིན་ཏེ། སྐྱེ་བ་དུ་མར་བརྩེ་བ་དང་ཤེས་རབ་སོགས་གོམས་པར་བྱས་པས་མཐའ་མེད་དུ་འཕེལ་བར་གྱུར་བའི་ཕྱིར། རྟགས་གྲུབ་སྟེ།   རྟེན་བརྟན་པ་དང་གོམས་ཟིན་འབད་རྩོལ་བསྐྱར་མ་ལ་མི་ལྟོས་པར་རང་གི་ངང་གིས་འཇུག་པའི་ཕྱིར། རྟེན་བརྟན་པ་ཡིན་ཏེ། སེམས་ཀྱི་ངོ་བོ་ཉིད་དུ་སྐྱེས་པའི་ཡོན་ཏན་ཡིན་པའི་ཕྱིར། གོམས་པ་ན་རང་གི་ངང་གིས་འཇུག་པར་འགྱུར་ཏེ། བརྩེ་བ་སོགས་གོམས་པར་བྱས་ན་བློའི་རིགས་འདྲ་རེ་རེ་སྐྱེད་པ་ལ་སྔར་དང་འདྲ་བའི་འབད་རྩོལ་རེ་རེ་མི་དགོས་པར་རིགས་འདྲ་དུ་མ་རྒྱུན་ལྡན་དུ་སྐྱེ་བའི་སེམས་ཀྱི་ཡོན་ཏན་ཡིན་པའི་ཕྱིར། དཔེར་ན་མེ་ལ་སོགས་པས་ཤིང་དག་ལ་ཐལ་བར་མ་སོང་གི་བར་དུ་ངང་གིས་འཇུག་པ་བཞིན། ཞེས་པ་སྟེ་རྒྱས་པར་རྣམ་འགྲེལ་དང༌། དེའི་འགྲེལ་པ་རྣམས་སུ་བལྟའོ། །
གཉིས་པ། གཞན་སྡེས་རྟག་པར་སྨྲ་བ་དགག་པ།
གཉིས་པ་རྟག་སྨྲ་དགག་པ་ལ། གྲངས་ཅན་པ་དགག་པ། ཚངས་པ་པ་དགག་པ།   ཁྱབ་འཇུག་པ་དང་དཔྱོད་པ་པ་གཉིས་དགག་པ། དབང་ཕྱུག་པ་བྱེ་བྲག་པ་རིག་པ་ཅན་པ་གསུམ་དགག་པ། གཅེར་བུ་པ་དགག་པ་སྟེ་ལྔ་ལས།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号