ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་ཕར་ཕྱིན་
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
བརྒྱད་པ་འཇུག་པའི་བསྒྲུབ་པ་ལ། བསམ་གཏན་དང་གཟུགས་མེད་པའི་སྙོམས་འཇུག་ལ་འཇུག་པ་དང་། སྦྱིན་སོགས་དང་། འཕགས་པའི་ལམ། ཚད་མེད་པ། མི་དམིགས་པ་དང་ལྡན་པ། འཁོར་གསུམ་ཡོངས་སུ་དག་པ། ཆེད་དུ་བྱ་བ། མངོན་པར་ཤེས་པ། རྣམ་པ་ཐམས་ཅད་མཁྱེན་པ་ཉིད་ལ་འཇུག་པ་སྟེ་དགུའོ། ། འདིའི་བསམ་གཏན་གཟུགས་མེད་དང་ཞི་ལྷག་གི་སྐོར་རྣམས་མངོན་པའི་སྐབས་སུ་བལྟའོ། །
དགུ་པ་ཚོགས་ཀྱི་བསྒྲུབ་པ་ལ། བརྩེ་བའི་ཚོགས་ཀྱི་བསྒྲུབ་པ། སྦྱིན་སོགས་དྲུག ཞི་གནས། ལྷག་མཐོང་། ཞི་ལྷག་ཟུང་འབྲེལ། ཐབས་ལ་མཁས་པ། ཡེ་ཤེས། བསོད་ནམས། ལམ། གཟུངས། ས་བཅུ། གཉེན་པོའི་ཚོགས་ཀྱི་སྒྲུབ་པ་སྟེ་བཅུ་བདུན་ནོ། འདིའི་གཟུངས་ལ་བཟོད་པ། ཆོས། དོན། སྔགས་ཀྱི་གཟུངས་ཏེ་བཞི། སྔགས་ལ་རིགས་སྔགས། གཟུངས་སྔགས། གསང་སྔགས་གསུམ་མོ། ། འདིའི་སྐབས་ཀྱི་སྟོང་ཉིད་བཅུ་དྲུག་དང་ས་བཅུ་སོགས་དབུ་མའི་སྐབས་སུ་བལྟ་བར་བྱའོ། །
བཅུ་པ་ངེས་འབྱུང་བསྒྲུབ་པ་ལ། ཆེད་དུ་བྱ་བ་དང་། མཉམ་པ་ཉིད། སེམས་ཅན་གྱི་དོན་བྱེད་པ། འབད་པ་མེད་པ། མཐའ་ལས་འདས་པ། དོན་ཐོབ་པའི་མཚན་ཉིད། རྣམ་པ་ཐམས་ཅད་མཁྱེན་པ། དེས་ཁྱད་པར་གྱི་ལམ་གྱི་ངེས་པར་འབྱུང་བ་སྟེ་བརྒྱད་དོ། ། མཁྱེན་པ་ཡུལ་གྱི་སྒྲུབ་པ། སྦྱོར་བ་བྱེ་བྲག་གི་བསྒྲུབ་པ་གཉིས་སོ། །
གཉིས་པ་ལམ་ཤེས་པ་ཉིད་ལ་མཚོན་བྱེད་ཀྱི་ཆོས་བཅུ་གཅིག་ལས།
དང་པོ་ལམ་ཤེས་ཀྱི་ཡན་ལག་ལ། ལམ་ཤེས་ཀྱི་སྣོད་རུང་དུ་བསྒྲུབས་པ། ཡུལ་དེས་པ། རིགས་ཀྱིས་ཁྱབ་པ། ལམ་ཤེས་གྱི་རང་བཞིན། ལམ་ཤེས་ཀྱི་བྱེད་ལས་ཏེ་ལྔའོ། །
གཉིས་པ་ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་སྐབས་སུ་བདེན་བཞིའི་རྣམ་པ་ལ། སྡུག་བདེན་ལ་མི་རྟག སྡུག་བསྔལ། སྟོང་། བདག་མེད་བཞི། ཀུན་འབྱུང་བདེན་པ་ལ། རྒྱུ། ཀུན་འབྱུང་། རབ་སྐྱེ། རྐྱེན་བཞི། འགོག་བདེན་ལ། འགོག་པ། ཞི་བ། གྱ་ནོམ། ངེས་འབྱུང་བཞི། ལམ་བདེན་ལ། ལམ། རིག་པ། སྒྲུབ་པ། ངེས་འབྱིན་བཞི་སྟེ་བཅུ་དྲུག་གོ། །
གསུམ་པ་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་སྐབས་སུ། རང་རྒྱལ་ལ། བསེ་རུ་ལྟ་བུ་དང་། ཚོགས་སྤྱོད་ཆེ་ཆུང་གཉིས་ཏེ་གསུམ་མོ། །
བཞི་པ་ཐེག་ཆེན་མཐོང་ལམ་ལ། བར་ཆད་མེད་ལམ། རྣམ་གྲོལ་ལམ་གཉིས། མཉམ་བཞག་དང་། རྗེས་ཐོབ་ཡེ་ཤེས་གཉིས། འདའ་བྱ་དང་། འདའ་བྱེད་ཀྱི་མཐོང་ལམ་གཉིས། ཤེས་བཟོད་བཅུ་དྲུག་མངོན་པའི་སྐབས་སུ་བལྟའོ། །
ལྔ་པ་ཐེག་ཆེན་སྒོམ་ལམ་གྱི་བྱེད་པ་ལ། ནད་ཞི་བ་སོགས་དྲུག་སྟེ་སླའོ། །
དྲག་པ་མོས་པ་སྒོམ་ལམ་ལ། རང་དོན། གཞན་དོན། རང་གཞན་གཉིས་ཀའི་དོན་གྱི་མོས་པ་སྒོམ་ལམ་སྟེ་གསུམ་མོ། །
བདུན་པ་དེའི་ཕན་ཡོན་ལ། བསྟོད་པ། བཀུར་བ། བསྔགས་པ་སྟེ་གསུམ་མོ། །
བརྒྱད་པ་བསྔོ་བ་སྒོམ་ལམ་ལ། བསྔོ་བ་ཁྱད་པར་ཅན། མི་དམིགས་པ། ཕྱིན་ཅི་མ་ལོག་པ། དབེན་པ། སངས་རྒྱས་ཀྱི་བསོད་ནམས་དྲན་པ། ཐབས་དང་བཅས་པ། མཚན་མ་མེད་པ། རྗེས་སུ་ཡི་རང་བ། ཁམས་གསུམ་དུ་མ་གཏོགས་པ། ཆུང་འབྲིང་ཆེན་པོའི་མིང་ཅན་ཏེ་བཅུ་གཉིས་སོ། །
དགུ་པ་རྗེས་སུ་ཡི་རང་བསྒོམ་ལམ་ལ། ཐབས་ཁྱད་པར་ཅན་དང་། ཤེས་རབ་ཁྱད་པར་ཅན་གྱིས་ཟིན་པ་གཉིས་སོ། ། དེ་རྣམས་ལ་ཟག་བཅས་སྒོམ་ལམ་ཟེར་རོ། །
བཅུ་པ་སྒྲུབ་པ་སྒོམ་ལམ་ལ། ངོ་བོ། འབྲས་བུ། བྱེད་ལས། གནས་སྐབས་ཀྱི་ཡོན་ཏན། མཐའི་ཡོན་ཏན་གྱིས་ཁྱད་པར་དུ་བྱས་པ་ལྔའོ། །
བཅུ་གཅིག་པ་རྣམ་དག་སྒོམ་ལམ་ལ། ས་བཅུའི་བཅུའོ། ། འདི་གཉིས་ནི་ཟག་མེད་སྒོམ་ལམ་མོ། ། སྤྱིར་མཐོང་ལམ་ལ་བདེན་པ་མངོན་རྟོགས་དང་། སྒོམ་ལམ་ལ་རྗེས་ལ་མངོན་རྟོགས་ཞེས་འབྱུང་ངོ་། །
གསུམ་པ་གཞི་ཐམས་ཅད་ཤེས་པ་ཉིད་ལ་མཚོན་བྱེད་ཀྱི་ཆོས་དགུ་ལས།
དང་པོ་ཤེས་པས་སྲིད་ལ་མི་གནས་པ་ནི། ཀུན་རྫོབ་ལ་ལྟོས་པའི་སྲིད་མཐའ་འགོག་བྱེད་དོ། །གཉིས་པ་སྙིང་རྗེས་ཞི་ལ་མི་གནས་པ་ནི། ཀུན་རྫོབ་ལ་ལྟོས་པའི་ཞི་མཐའ་འགོག་བྱེད་དོ། །
གསུམ་པ་ཐབས་མ་ཡིན་པས་རིང་བའི་གཞི་ཤེས་སོ། །
བཞི་པ་ཐབས་ཀྱིས་རིང་བ་མ་ཡིན་པའི་གཞི་ཤེས་སོ། །
ལྔ་པ་མི་མཐུན་ཕྱོགས་ཀྱི་གཞི་ཤེས་སོ། །
དྲུག་པ་གཉེན་པོ་ཕྱོགས་ཀྱི་གཞི་ཤེས་སོ། །
བདུན་པ་གཉེན་ཤེས་སྦྱོར་བ་ལ། ཡུལ་གྱི་སྒོ་ནས་བཞི། ངོ་བོའི་སྒོ་ནས་གསུམ། བྱེད་པའི་སྒོ་ནས་གཉིས། དཔེའི་སྒོ་ནས་གཅིག་སྟེ་བཅུ། འདིའི་བྱ་དཀའ་རྣམ་གསུམ་ནི། ཆེད་དུ་བྱ་བ། སྦྱོར་བ། ལས་བྱ་དཀའ་བའོ། །སྣང་བ་རྣམ་བདུན་ནི། རྨི་ལམ། སྒྱུ་མ། སྨིག་རྒྱུ། སྒྲ་བརྙན། གཟིགས་བརྙན། དྲི་ཟའི་གྲོང་ཁྱེར། སྤྲུལ་པའོ། །
བརྒྱད་པ་སྦྱོར་བ་དེའི་མཉམ་པ་ཉིད་ལ་གཟུགས་སོགས་ཀྱི་ངོ་བོ་དང་། མཚན་ཉིད་དང་། དབྱེ་བ་དང་། ཡུལ་ཅན་ལ་རློམ་པ་མེད་པའི་བཞིའོ། །
དགུ་བ་མཐོང་བའི་ལམ་སྟེ། གཞི་ཤེས་དེ་ནི་ཐེག་དམན་གྱི་རྟོགས་རིགས་སུ་གནས་པའོ། །
བཞི་པ་རྣམ་ཀུན་མངོན་པར་རྫོགས་པར་རྟོགས་པ་ལ་མཚོན་བྱེད་ཀྱི་ཆོས་བཅུ་གཅིག་ལས།
དང་པོ་རྣམ་པ་ལ། མེད་པ། མི་སྐྱེ་བ། དབེན་པ། མི་རྫི་བ། གནས་མེད་པ། ནམ་མཁའ། བརྗོད་དུ་མེད་པ། མིང་མེད་པ། འགྲོ་བ་མེད་པ། མི་འཕྲོགས་པ། མི་ཟད་པ། སྐྱེ་བ་མེད་པ། བྱེད་པ་པོ་མེད་པ། ཤེས་པ་པོ་མེད་པ། འཕོ་བ་པོ་མེད་པ། འདུལ་བ་པོ་མེད་པ། ངོ་བོ་ཉིད་མེད་པ། མ་སྐྱེས་པ། མ་འགགས་པ། གཟོད་མ་ནས་ཞི་བ། རང་བཞིན་གྱིས་མྱ་ངན་ལས་འདས་པ། ཀུན་ནས་ཉོན་མོངས་པ་མེད་པ། རྣམ་པར་བྱང་བ་མེད་པ། སྤྲོས་པ་མེད་པ། རློམ་པ་མེད་པ། མི་གཡོ་བའི་རྣམ་པ་སྟེ་གཞི་ཤེས་ཀྱི་རྣམ་པ་ཉེར་བདུན། འདོད་ཆགས་དང་བྲལ་བ། མི་གནས་པ། ཞི་བ། འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པ། ཀུན་ནས་ཉོན་མོངས་མེད་པ། སེམས་ཅན་མེད་པ། ཚད་མེད་པ། མཐའ་གཉིས་དང་མ་འབྲེལ་བ། ཐ་མི་དད་པ། མཆོག་ཏུ་འཛིན་པ་མེད་པ། རྣམ་པར་མི་རྟོག་པ། གཞལ་དུ་མེད་པ། ཆགས་པ་མེད་པ། མི་རྟག་སོགས་བཞི། མཚན་ཉིད་མེད་པ། སྟོང་ཉིད་བཅུ་དྲུག་ནི་དབུ་མའི་སྐབས་སུ་བལྟའོ། ། ངེས་ལམ་ཤེས་ཀྱི་རྣམ་པ་སོ་དྲུག་གོ། ། བྱད་ཕྱོགས་སོ་བདུན། རྣམ་ཐར་གསུམ། སྤྲུལ་པའི་ལམ་གསུམ། མཐོང་ཆོས་བདེར་གནས་ཀྱི་ལམ་ལྔ། འདས་ལམ་དགུ། སྤོང་ལམ་བཞི་རྣམས་ཀྱི་མིང་མངོན་པའི་སྐབས་སུ་བལྟའོ། ། སངས་རྒྱས་ཀྱི་ལམ་བཅུ་ནི། ཕར་ཕྱིན་བཅུ། སྟོབས་བཅུ། མི་འཇིགས་པ་བཞི། སོ་སོ་ཡང་དག་པར་རིག་པ་བཞི། སངས་རྒྱས་ཀྱི་ཆོས་མ་འདྲེས་བཅོ་བརྒྱད་རྣམས་ཆོས་སྐུར་བལྟའོ། །དེ་བཞིན་ཉིད། རང་བྱུང་། སངས་རྒྱས་ཀྱི་རྣམ་པ་སྟེ་རྣམ་མཁྱེན་གྱི་རྣམ་པ་བརྒྱ་རྩ་བཅུ་རྣམས་བསྡོམས་པས་མཁྱེན་གསུམ་གྱི་རྣམ་པ་བརྒྱ་དོན་གསུམ་མོ། །
གཉིས་པ་སྦྱོར་བ་ལ། སྦྱོར་བ་པོ་ནི་སངས་རྒྱས་བསྟེན་པ་སོགས་བཞི་སྟེ་སླའོ། །སྦྱོར་བ་དངོས་ལ། མི་གནས་པའི་སྦྱོར་བ། དེ་བཞིན་དུ་གནས་པ་བཀག་པ། ཟབ་པ། གཏིང་དཔག་དཀའ་བ། ཚད་མེད་པ། ཚེགས་ཆེན་ཡུན་རིང་རྟོགས་པ། ལུང་བསྟན་པ། ངེས་པར་འབྱུང་བ། བར་ཆད་མེད་པ། བྱང་ཆུབ་ལ་ཉེ་བ། བྱང་ཆུབ་མྱུར་བ། གཞན་དོན། འཕེལ་འགྲིབ་མེད་པ། ཆོས་དང་ཆོས་མིན་སོགས་མེད་པ། བསམ་གྱིས་མི་ཁྱབ་པ་མི་མཐོང་བ། རྣམ་པར་མི་རྟོག་པ། འབྲས་བུ་རིན་ཆེན་སྦྱིན་བྱེད། རྣམ་པར་དག་པ། ས་འཚམས་ཀྱི་སྦྱོར་བ་དང་ཉི་ཤུའོ། །
གསུམ་པ་སྦྱོར་བའི་ཡོན་ཏན་ནི། བདུད་ཀྱི་མཐུ་བཅོམ་པ་སོགས་བཅུ་བཞི་དང་།
བཞི་པ་སྐྱོན་ནི། འགལ་རྐྱེན་རང་ལ་བརྟེན་པ་ཉེར་གསུམ། མཐུན་རྐྱེན་མ་ཚང་བ་རང་གཞན་གང་རུང་ལ་བརྟེན་པ་ཉེར་གསུམ་སྟེ་ཞེ་དྲུག་འདི་རྣམས་མིང་འདོགས་སླའོ། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2019 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号