ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་ཕར་ཕྱིན་
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
      ཁྱད་པར་དུ་འུ་ཅག་ཆེན་པོ་ཆིང་གི་རྒྱལ་རབས་འདི་ལ་བསོད་ནམས་སྟོབས་ཀྱིས་བླ་ན་འཕགས་པ་ཐེའི་ཙུང་པོག་ཏོ་རྒྱལ་པོ་མུག་ཏེན་གྱིས་སར་བཞུགས་སྐབས་སྣང་མཐའི་སྤྲུལ་པ་པཎ་ཆེན་བློ་བཟང་ཆོས་ཀྱི་རྒྱལ་མཚན་དང་། རྒྱལ་དབང་ལྔ་པ་ཆེན་པོས་སེ་ཆེན་ཆོས་རྗེར་གྲགས་པ་མངག་བསྟན་པ་ལ་ཐུགས་ཀྱིས་དགོངས་དགོས་ཚུལ་ཞུས་པས་པོག་ཏོ་རྒྱལ་པོ་ཤིན་ཏུ་དགྱེས། བོད་ལ་རྒྱལ་བ་ཡབ་སྲས་ལ་འབུལ་བ་དང་བཤད་སྒྲུབ་ཀྱི་སྡེ་ཆེ་ཆུང་མཐའ་ཡས་པ་ལ་འབུལ་འགྱེད་གྱ་ནོམ་པ་མཛད་དེ་རི་བོ་དགེ་ལྡན་པའི་བསྟན་པ་ལ་ལྷག་པར་མོས་པར་གྱུར། མི་རིང་བར་དེའི་སྲས་གོང་མ་ཤི་ཙུ་ཤུན་ཊི་རྒྱལ་པོས་རྒྱ་བོད་ཧོར་གསུམ་གྱིས་མཚོན་པའི་གནམ་འོག་གི་སྐྱེ་འགྲོ་ཕལ་མོ་ཆེ་དབང་དུ་བསྡུས། འཕགས་པ་འཇིག་རྟེན་དབང་ཕྱུག་དང་གཉིས་སུ་མེད་པའི་རྒྱལ་དབང་ལྔ་པ་ཆེན་པོ་ཕོ་བྲང་དུ་སྤྱན་དྲངས། གཙུག་ལག་ཁང་མང་དུ་བཞེངས། རྒྱལ་དབང་དེ་ཉིད་བསྟན་པའི་བདག་པོར་མངའ་གསོལ་ཏེ་ལུང་ལས་ཀྱིས་གཟེངས་བསྟོད་པ་སོགས་རྒྱལ་བ་ཐུབ་པའི་དབང་པོའི་བསྟན་པ་ལ་སྲི་ཞུ་ལྷག་པར་མཛད། དེའི་སྲས་གང་གི་དཔལ་དང་གཟི་བརྗིད་ཕུན་སུམ་ཚོགས་པས་སྔོན་དུས་ཆེ་སོར་འགྱིང་བའིས་བདག་ཕལ་མོ་ཆེའི་སྙེམས་པ་འཕྲོག་ཞིང་། བྱམས་བརྩེའི་སྟོབས་ཀྱི་གོམ་པ་མཐའི་རྒྱལ་ཕྲན་བྱེ་བའི་ཅོད་པན་ལ་ངལ་གསོ་བའི་ས་སྐྱོང་ཆེན་པོ་འཇམ་དཔལ་དབྱངས་དངོས་གོང་མ་ཤིང་ཙུ་བདེ་སྐྱིད་རྒྱལ་པོས་དགེ་འདུན་གྱི་སྡེ་མང་དུ་བཙུགས། སྐུ་གསུང་ཐུགས་རྟེན་བགྲང་ལས་འདས་པ་བཞེངས། མཁས་གྲུབ་ཚད་ལྡན་དུ་མ་ཡུལ་གྲུ་སོ་སོ་ནས་གདན་དྲངས་ཏེ་བསྟན་པ་རྒྱས་པར་བྱེད་དུ་བཅུག གནམ་འོག་གི་སྐྱེ་འགྲོ་སྤྱི་དང་ཁྱད་པར་ཧོར་གྱི་སྐྱེ་བོ་མཐའ་དག་ལ་གཅིག་ཏུ་བརྩེ་བའི་སྒོ་ནས། རྒྱལ་བའི་བཀའ་འགྱུར་རོ་ཅོག་ཧོར་གྱི་སྐད་དུ་བསྒྱུར་བ་རྣམས་ལ་མཁས་པ་དུ་མར་ཞུ་གཏུགས་གྱིས་གཏན་ལ་ལེགས་པར་འབེབ་ཏུ་བཅུག་སྟེ་སྤར་དུ་བསྒྲུབས་ནས་དད་པ་དང་སྐལ་བར་ལྡན་པ་རྣམས་ལ་ཆོས་སྦྱིན་གྱི་སྒོ་འཕར་བརྒྱ་ཕྲག་ཕྱེ་སྟེ་ཚིམ་པར་མཛད་པ་སོགས་རྒྱལ་བའི་བསྟན་པ་རིན་པོ་ཆེ་འདི་ཉིད་མི་ནུབ་པའི་རྒྱལ་མཚན་དུ་མཛད་དོ། །
      དེ་རྗེས་འཇམ་དཔལ་རྣོན་པོ་མི་རྗེའི་གར་གྱིས་རོལ་བ་གོང་མ་ཤི་ཙུང་ཡོང་ཊིང་རྒྱལ་པོས་དཀོན་མཆོག་གསུམ་གཙུག་ཏུ་མཆོད། ཞྭ་སེར་ཅོད་པན་འཆང་བའི་རིང་ལུགས་བླ་ནས་བླར་སྤེལ་བར་མཛད་ཅིང་བསྟན་པའི་བྱ་བ་མཛད་ཚུལ་ནི་སྔ་མ་ཇི་ལྟ་བ་བཞིན་ལ། ཁྱད་པར་དུ་བདག་པོ་འདི་ཉིད་ཟབ་མོ་དབུ་མའི་ལྟ་བ་ཉམས་སུ་བཞེས་པ་ཞིག་གོ། ། གནམ་འོག་གི་ཆབ་འབངས་མཐའ་དག་ལ་བརྩེ་བ་ཆེན་པོས་ཆོས་སྲིད་ཟུང་དུ་འབྲེལ་བའི་བཀའ་ཁྲིམས་བཟང་པོས་བདེ་བར་བསྐྱངས། བསྟན་བཅོས་འགྱུར་རོ་ཅོག་གི་སྤར་གསར་དུ་བསྒྲུབས་པ་སོགས་མཁས་པས་གཅིག་ཏུ་བསྔགས་པར་འོས་པའི་མཛད་པས་ནོར་འཛིན་གྱི་ཁྱོན་དགེ་ལེགས་ཀྱིས་ཁྱབ་པར་མཛད་དོ། ། དེ་ནས་ད་ལྟའི་གོང་མ་ཆེན་པོ་འཇམ་དཔལ་གཞོན་ནུར་གྱུར་པ་འདི་ཉིད་ཀྱིས་ཡབ་མེས་ཀྱི་སྲོལ་བཟང་པོ་གོང་ནས་གོང་དུ་འཕེལ་བ་དང་། ཆབ་འབངས་མཐའ་དག་ལ་ཐུགས་ཤིན་ཏུ་བརྩེ་བས་བདེ་བར་སྐྱོང་བའི་ཐབས་འབའ་ཞིག་ཐུགས་ལ་བརྣག་པས་བསྟན་འགྲོའི་སྨན་ཡོན་དུ་འགྱུར་བའི་མཛད་པ་རླབས་པོ་ཆེ་འཕེལ་བཞིན་པ་ནས། བྱེ་བྲག་ཧོར་སོག་སྤྱི་ལ་མཆོག་ཏུ་སྨན་པར་དགོངས་ཏེ། ཉེ་ལམ་བཀའ་ཡི་དགོངས་འགྲེལ་གྱི་བསྟན་བཅོས་འགྱུར་རོ་ཅོག་ཧོར་གྱི་སྐད་དུ་བསྒྱུར་ཏེ་སྤར་དུ་བསྐྲུན་དགོས་ཚུལ་གྱི་བཀའ་ཕབས་པར་བརྟེན། བཀའ་སྤྱི་བོས་བླངས་ཏེ་བསྒྱུར་བ་ལ་ཉེ་བར་ཞུགས་སོ། ། དེ་ལ་ཡང་ཆེན་པོ་ཧོར་གྱི་ཡུལ་གྲུ་སོ་སོའི་སྐད་ཀྱི་བྱིངས་འདྲ་ཡང་། ཟུར་ཅུང་ཟད་ཙམ་རེ་མི་འདྲ་བ་མང་ཞིང་། ཁྱད་པར་དུ་ཆོས་བསྒྱུར་བའི་མིང་བརྡའ་འདོགས་ཚུལ་བཀས་བཅད་འདྲ་བ་ཞིག་མི་འདུག་པས། ལོ་ཙྰ་བ་དུ་མས་སོ་སོར་རང་རང་གི་འདོད་པས་ཐ་སྙད་མི་མཐུན་པ་སྣ་ཚོགས་སྦྱར་ཚེ་ཐོས་བསམ་བྱེད་པ་རྣམས་ཀྱིས་རྟོགས་དཀའ་བ་སོགས་ཉེས་པ་དུ་མའི་གཞིར་འགྱུར་པས་གསུང་རབ་ཀྱི་མིང་བརྡའི་ཐ་སྙད་འདོགས་ལུགས་རགས་བསྡུས་ཞིག་སྦྱར་ནས་སྤར་དུ་བསྒྲུབས་ཏེ། ཀུན་ལ་ཁྱབ་པར་བྱས་ན་ལེགས་ཚུལ་ཞུས་པར་དེ་ལྟར་གྱིས་ཞེས་པའི་བཀའ་སྩལ་བ་སྤྱི་བོས་མནོས་ཏེ། ཚུལ་དེ་འགོད་པར་བྱ་བ་ལ།
        དེ་ཡང་བོད་ཀྱི་ཡི་གེའི་འཇུག་ཚུལ་སོགས་སྤྱིའི་རྣམ་བཞག་སྟོན་པ་ཐོན་མི་སམྦྷོ་ཊས་མཛད་པའི་སུམ་ཅུ་པ་དང་རྟགས་ཀྱི་འཇུག་པ། ཁྲི་རལ་པ་ཅན་གྱི་དུས་སུ་ལོ་པཎ་རྣམས་ཀྱིས་ཆོས་བསྒྱུར་ཚུལ་བཀས་བཅད་དུ་མཛད་པ་སྒྲ་སྦྱོར་བམ་གཉིས། ཀ་ཅོག་སོགས་ལོ་ཙྰ་བ་དུ་མས་མདོ་ལས་འབྱུང་བའི་མིང་གི་རྣམ་བཞག་དུ་མ་བསྡུས་པ་བྱེ་བྲག་རྟོགས་བྱེད་ཆེ་ཆུང་། གཞན་ཡང་སྟག་སྟོན་གཞོན་ནུ་དཔལ་གྱི་དག་ཡིག་འོད་ཟེར་བརྒྱ་པ། བུ་སྟོན་སེང་གེ་འོད་ཀྱི་སྒྲ་དོན་རྒྱ་མཚོའི་མེ་ལོང་། བྱམས་པ་གླིང་པའི་སྨྲ་རྒྱན། བསམ་ལྡིངས་པའི་འཁྲུལ་སྤོང་། ཞ་ལུ་ལོ་ཆེན་གྱི་ཟ་མ་ཏོག དཔལ་ཁང་ལོ་ཙྰ་བའི་ངག་སྒྲོན། བརྡའ་གསར་རྙིང་གི་རྣམ་བཞག་སྟོན་པ་སྐྱོགས་སྟོན་གྱི་ལི་ཤི་གུར་ཁང་དང་དབུས་པ་བློ་གསལ་གྱིས་མཛད་པ། བློ་ལྡན་ཤེས་རབ་ཀྱི་ཉེར་མཁོ་བསྡུས་པ། གཞན་ཡང་དམ་པ་མང་པོས་མཛད་པའི་སུམ་རྟགས་ཀྱི་ཊིཀྐ་སོགས་མང་དུ་ཡོད་ལས་འདིར་ནི་དེ་དག་རྣམས་ལས་འབྱུང་བའི་མིང་དང་བརྡའི་རྣམ་བཞག་དང་། བརྡའ་གསར་རྙིང་གི་དབྱེ་བ་སོགས་ཆེ་ལོང་དང་རིག་གནས་སོ་སོའི་གཞུང་བསྒྱུར་བ་ལ་ཉེ་བར་མཁོ་བའི་རང་རང་གི་སྐབས་ཀྱི་མེད་དུ་མི་རུང་བའི་མིང་གི་རྣམ་གྲངས་ཇི་ལྟར་ནུས་པ་བཞིན་དུ་ལེ་ཚན་སོ་སོར་བྲི་བར་བྱའོ། །
       དེ་ལ་སྤྱིར་རྒྱལ་པའི་གསུང་རབ་རིན་པོ་ཆེ་ནི་ཐོག་མཐའ་བར་གསུམ་དུ་དགེ་བ། གྲོལ་བ་དོན་དུ་གཉེར་བ་རྣམས་ལ་ཐར་བ་དང་ཐམས་ཅད་མཁྱེན་པའི་ལམ་གསལ་བར་བྱེད་པའི་མིག་ཏུ་གྱུར་པ་ཤ་སྟག་ཡིན་པས། བསྒྱུར་བྱེད་ལོ་ཙྰ་རྣམས་ཀྱིས་ཀྱང་ཚུལ་འདི་ཉིད་འཇིག་རྟེན་དུ་ཡུན་རིང་དུ་གནས་ན་ཅི་མ་རུང་སྙམ་པའི་བསམ་པས་ཐུབ་བསྟན་གཅེས་པར་འཛིན་པ་འབའ་ཞིག་ཡིད་ལ་བརྣགས་ཏེ། ཁེ་འདོད་དང་གྲགས་འདོད་ཕྱོགས་སུ་ལྷུང་བའི་ཡིད་སྤངས། གཟུ་བོའི་བློས་ཚིག་དང་དོན་གྱི་ཆ་ལ་ལེགས་པར་དཔྱད། རང་གིས་ཇི་ལྟ་བ་བཞིན་མ་ཤེས་པ་རྣམས་མཁས་པར་གྲགས་པ་མཆོག་དམན་སུ་ལ་ཡང་རུང་སྟེ་ལེགས་པར་དྲིས་ཤིང་ཐེ་ཚོམ་བཅད་ནས། ཚིག་གསལ་ཞིང་གོ་བདེ་བ་དོན་དང་མི་འགལ་བར་བྱས་ཏེ་ལེགས་པར་བསྒྱུར་ན། རང་གཞན་གྱི་རྒྱུད་ལ་ལེགས་ཚོགས་དུ་མ་སྤེལ་བར་ནུས་ཞིང་། རྒྱལ་བའི་བསྟན་པ་ལ་བྱ་བ་བྱས་པར་འགྱུར་བས་བསོད་ནམས་ཀྱི་ཕུང་པོ་གཞན་དུ་མེད་པ་འཐོབ་པར་འགྱུར་གྱི། གཞན་དུ་ན་རང་ཉིད་མཁས་པ་མིན་ཀྱང་མཁས་པར་རློམ་པ་ལ་དྲེགས། གཞན་མཁས་པར་གྱུར་ཀྱང་དེ་ལ་ཕྱོགས་སུ་ལྷུང་བའི་ཡིད་ཀྱིས་སྡང་བས་བློ་མིག་བསྒྲིབས། དམ་པའི་ཆོས་ལ་གལ་ཆུང་དུ་བཟུང་བས་ཉི་མ་འཕུལ་ཐབས་ཀྱི་སྦྱོར་བས་པོ་ཏི་ཇི་མང་མང་དུ་བསྒྱུར་བ་ལ་དགའ་དག་གིས་ནི། སངས་རྒྱས་ཀྱི་བཀའ་དྲི་མ་མེད་པ་ལོག་བཤད་ཉེས་བཤད་ཀྱི་བཙོག་ཆུས་བསླད་པའི་འབྲས་བུ་རང་གཞན་ཀུན་ལ་འདི་ཕྱིར་བཟོད་པར་དཀའ་བའི་སྡུག་བསྔལ་འབྱུང་བ་ལ་ཅིར་ཡང་མི་སེམས་པར་ཟད་དོ། །
        དེ་ལྟར་ཕན་ཡོན་དང་ཉེས་དམིགས་ལེགས་པར་ངེས་པར་བྱས་ནས་བསྒྱུར་ཚུལ་དངོས་ལ། གཞུང་གི་ཚིག་རྣམས་བོད་སྐད་ཀྱི་གོ་རིམས་ཇི་ལྟ་བ་བཞིན་དུ་བསྒྱུར་ན་ཧོར་སྐད་ལ་གོ་བདེ་ཞིང་། དོན་འཁྲུགས་པར་མི་འགྱུར་བ་རྣམས་ནི་དེ་ཇི་ལྟ་བ་བཞིན་དུ་བསྒྱུར་བར་བྱ་ཞིང་། དེ་ལྟ་མ་ཡིན་པར་ཚིག་གོང་འོག་བསྣོར་ན་དོན་གོ་བ་གསལ་ཞིང་བརྗོད་བདེ་བ་རྣམས་ནི་ཚིགས་བཅད་ཡིན་ན་ཤློོ་ཀ་གཅིག་གི་ནང་དུ་གང་བདེ་བར་སྣོར་ཞིང་བསྒྱུར་བ་དང་། ཚིག་ལྷུག་པ་རྣམས་ནི་ཚིག་གཅིག་གམ་གཉིས་སམ་གསུམ་སོགས་ཚིག་དེ་དག་གི་དོན་གང་དུ་བསྙེགས་པ་ཡན་ཆད་དུ་གང་བདེ་བར་སྣོར་ཞིང་བསྒྱུར་བར་བྱ། འོན་ཀྱང་དོན་སྔ་ཕྱི་འཁྲུགས་པར་མི་འགྱུར་བ་གལ་ཆེ་ལ། དེ་ཡང་ཚིག་དེ་ཀའི་ནུས་པ་འདོན་ལུགས་ལ་ལེགས་པར་བརྟགས་དགོས་སོ། ། ཡང་འགའ་ཞིག་བོད་སྐད་ཇི་ལྟ་བ་བཞིན་བསྒྱུར་ན་ཧོར་ཡིག་ལ་ཚིག་ལྷག་ཧ་ཅང་མང་བས་དོན་གྱི་ཆ་བསྒྲིབས་པ་ལྟ་བུ་ཡང་མང་དུ་ཡོད་པས། དེ་ལ་ནི་དོན་ལ་མི་གནོད་པར་བྱས་ཏེ་ཚིག་ལྷག་རྣམས་དོར་བས་ཆོག་ལ། སྐབས་འགའ་ཞིག་ཏུ་ཚིག་ཟུར་ཅུང་ཟད་རེ་མ་བསྣན་ན་དོན་གྱི་ནུས་པ་མི་རྫོགས་པ་ལྟ་བུ་ཡང་ཡོད་པས། དེ་ལ་ནི་དོན་གསལ་བ་ལ་ཕན་ཞིང་ཚིག་རོར་མ་སོང་བའི་སྐད་ཟུར་བསྣན་ནས་བསྒྱུར་བར་བྱའོ། ། མིང་གཅིག་དོན་དུ་མ་ལ་བསྙེག་ཏུ་རུང་བ་རྣམས་ནི་ལྟག་འོག་ལ་ལེགས་པར་བརྟགས་ཏེ། ཕྱོགས་གཅིག་ལ་ཐག་གཅོད་དུ་རུང་ན་གར་བསྙེག་པ་དེར་བསྒྱུར་ལ། ཐག་གཅོད་དུ་མི་རུང་ཤིང་ཧོར་སྐད་ལ་ཕྱོགས་གཉི་ཀར་བསྙེགས་པའི་སྐད་དོད་མ་རྙེད་ན་ནི་བོད་སྐད་སོར་གནས་སུ་བཞག་པར་བྱའོ། ། ཡང་པཎ་གྲུབ་དང་རྒྱལ་བློན་ལ་སོགས་པའི་གང་ཟག་གི་མིང་དང་ཡུལ་དང་མེ་ཏོག་དང་རྩི་ཤིང་ལ་སོགས་པའི་མིང་བསྒྱུར་ན་གོ་དཀའ་ཞིང་ཚིག་མི་བདེ་བ་དང་། འོལ་སྤྱིར་བསྒྱུར་དུ་རུང་ཡང་དོན་དེ་ལྟར་ཡིན་མིན་གཏོལ་མེད་པ་རྣམས་ལ་ནི་མིང་གི་མགོ་མཇུག་ཇི་ལྟར་རིགས་པར་པཎྚི་ཏ་དང་རྒྱལ་པོ་དང་། མེ་ཏོག་ཞེས་སོགས་གང་ལ་བྱ་བའི་མིང་གཅིག་བླ་ཐབས་སུ་བསྣན་ནས་རྒྱ་གར་སྐད་དམ་བོད་སྐད་སོར་བཞག་ཏུ་བཞག་པར་བྱའོ། ། གཞུང་ཆེན་མོའི་འགྲེལ་པ་རྣམས་ལ་རང་རང་གི་རྩ་བའི་དཔེ་སྔར་བསྒྱུར་ཟིན་པ་ཡོད་ན་འགྲེལ་པའི་ནང་གི་རྩ་བའི་ཚིག་ཀྱང་དེ་དང་མཐུན་པར་བྱ་ལ། མེད་ན་སྔོན་དུ་རྩ་བའི་དཔེ་བསྒྱུར་ཞིང་དེ་ཡང་འགྲེལ་པ་ལ་བསྟུན་ནས་བསྒྱུར་བར་བྱའོ། །རྒོལ་ཕྱིར་རྒོལ་གྱི་རྩོད་པའི་ཚིག་རྣམས་ནི་ཕན་ཚུན་གཉི་ཀའི་བསམ་པའི་གདེངས་དང་རྩོད་པ་འགྲོ་ལུགས་ལེགས་པར་བརྟགས་ཏེ་བསྒྲུབ་ངག་དང་སུན་འབྱིན་པའི་ངག་རྣོ་ཞིང་གོ་བདེ་བའི་ཚིག་གིས་བསྒྱུར་དགོས་སོ། ། གཞན་ཡང་བསྟོད་པའི་ཚིག་དང་། སྨད་པའི་ཚིག་དང་། ངོ་མཚར་བའི་ཚིག་དང་། སྐྱོ་བར་འགྱུར་བའི་ཚིག་དང་། འཇིགས་པའི་ཚིག་ལྟ་བུ་རྣམས་ལ་ནི། ཧོར་སྐད་དུ་ཀུན་ལ་གྲགས་པ་ནུས་པ་ཆེ་ཞིང་ཡིད་འཁུལ་བཏུབ་པ་སྐབས་སུ་བབས་པའི་ཚིག་གིས་བསྒྱུར་བར་བྱའོ། །གཞུང་གི་དོན་ལེགས་པར་མ་ཤོད་པའམ་ལོག་པར་བཤད་པར་མངོན་པ་འགའ་ཞིག་
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2019 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号