ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་ཕར་ཕྱིན་
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
འདུག་ནའང་གཞུང་རྩམས་པ་ལྟར་བསྒྱུར་བར་བྱ་ཡི། གཞུང་གཞན་གྱི་ལེགས་པར་བཤད་པ་ལས་བླངས་ཏེ་འཆོས་པར་མི་བྱ་སྟེ། གལ་ཏེ་དེ་ལྟར་བྱས་ན་སློབ་དཔོན་རྣམས་ཀྱི་ལུགས་སོ་སོ་བ་རྣམས་འཁྲུག་པར་འགྱུར་བའི་ཕྱིར་རོ། ། གདམས་ངག་གི་གཞུང་རྣམས་སུ་ལྷ་དང་རྫས་དང་གྲངས་སོགས་ཀྱི་མིང་གབ་ཚིག་གཞན་གྱིས་བསྟན་པ་རྣམས་ནི་དེ་ཇི་ལྟ་བ་བཞིན་བསྒྱུར་བར་བྱ་ཡི། ། རང་མིང་རྗེན་པར་མི་བསྒྱུར་ཏེ། དེ་ལྟར་ན་གབ་པའི་དགོས་པ་མེད་པར་འགྱུར་བའི་ཕྱིར་རོ། ། ཡང་སྙན་དངགས་ཀྱི་སྐབས་སུ་མངོན་བརྗོད་ཀྱི་མིང་གིས་བསྟན་པ་བོང་བུ་ལ་མགྲིན་བཟང་ཞེས་པ་ལྟ་བུ་ཡང་མིང་དེ་ཉིད་ཀྱིས་བསྒྱུར་བར་བྱ་ཡི་རང་མིང་གིས་མི་བསྒྱུར་ཏེ། གཞན་དུ་ན་མི་མཛེས་པར་འགྱུར་བའི་ཕྱིར་བའི་ཕྱིར་རོ། །གཞན་ཡང་རྩ་བའི་རྣམ་ཤེས་དང་ཀུན་གཞི་ཞེས་པ་གཉིས་དོན་བསྙེགས་པའི་གཞི་ཕལ་ཆེར་གཅིག་ཡིན་ཀྱང་ཕལ་ཆེན་སྡེ་པ་དང་སེམས་ཙམ་པ་གཉིས་ཀྱིས་མིང་འདོགས་ལུགས་དང་བཤད་ཚུལ་ཅུང་ཟད་མི་འདྲ་བ་ལྟ་བུ་རྣམས་ཀྱང་རང་རང་གི་གཞུང་ལས་ཇི་ལྟར་འབྱུང་བ་ལྟར་བསྒྱུར་བར་བྱ་ཡི། དོན་གཅིག་པ་ལ་བསམས་ནས་ཐ་སྙད་ཕན་ཚུན་བསྲེ་བར་མི་བྱའོ། ཡང་བདེན་པར་གྲུབ་པ་དང་། རང་གི་མཚན་ཉིད་ཀྱིས་གྲུབ་པ་གཉིས་དབུ་མ་ཐལ་འགྱུར་བ་ལྟར་ན་དོན་གཅིག་པས་གཅིག་ཡོང་སར་གཅིག་ཤོས་སུ་བསྒྱུར་ཆོག་པའི་སྐབས་ཡོད་མོད་ཀྱང་། དབུ་མ་རང་རྒྱུད་པ་ལྟར་ན་དེ་གཉིས་ཤིན་ཏུ་མི་འདྲ་བས་དོན་གཅིག་པར་བྱེད་མི་རུང་བ་ལྟ་བུ་ཡང་མང་བས། ལེགས་པར་དཔྱད་ནས་རང་རང་གི་ལུགས་ལྟར་བསྒྱུར་ཤེས་དགོས་སོ། ། གཞན་ཡང་བདག་མེད་དང་བདེན་མེད་གཉིས་ཀྱང་དབུ་མ་པ་ལྟར་ན་འགངས་འདྲ་ན་ཡང་། གྲུབ་མཐའ་འོག་མའི་སྐབས་སུ་ཆོས་ཐམས་ཅད་བདག་མེད་པར་ཁས་ལེན་ཀྱང་བདེན་མེད་དུ་ཁས་མི་ལེན་པ་སོགས་ཀྱི་ཁྱད་པར་འགངས་ཆེ་བ་རྣམས་ཀྱང་ཕྱེད་དགོས་ཏེ། གཞན་དུ་ན་ཕྱོགས་གཅིག་ལ་དོན་གཅིག་ཏུ་བཤད་པ་མཐོང་བས་སྐབས་ཐམས་ཅད་དུ་དོན་གཅིག་པར་བཟུང་ནས་མ་བརྟག་པར་ཐ་སྙད་ཕན་ཚུན་བསྲེས་ན་གྲུབ་མཐའ་རྣམས་ཀྱི་མི་འདྲ་བའི་ཁྱད་པར་མཐའ་དག་འཆོལ་བར་འགྱུར་བའི་ཕྱིར་རོ། ། གཞན་ཡང་གྲུབ་པ། བསྒྲུབས་པ། འགྲུབ་པ། ཞེས་དང་། བཅོམ། གཞོམ། འཇོམས་ཞེས་པ་ལྟ་བུ་འདས་པ་དང་ད་ལྟ་བ་དང་མ་འོངས་པའི་ཚིག་གི་ཁྱད་པར་རྣམས་དང་། འདིས་རྙེད་པ་དང་། འདི་རྙེད་པ་ལྟ་བུ་བྱེད་པ་དང་། ལས་ཀྱི་སྒྲས་བསྟན་པའི་ཁྱད་པར་དང་། སངས་རྒྱས་ཁོ་ན་ཡོན་ཏན་དང་ལྡན་ཞེས་དང་། སངས་རྒྱས་ཡོན་ཏན་དང་ལྡན་པ་ཁོ་ན་ཞེས་པ་ལྟ་བུ་ཁོ་ན་ཞེས་པའི་སྒྲ་ཚིག་གི་གོང་འོག་ཏུ་འཇུག་པའི་ཁྱད་པར་གྱིས་གཞན་ལྡན་རྣམ་གཅོད་དང་། མི་ལྡན་རྣམ་གཅོད་ཀྱི་ཚིག་ཏུ་འགྱུར་ཚུལ་དང་། འཕྲལ་བ་ཞེས་པ་བརྡའ་གསར་ལ་སོ་སོར་ཕྱེ་བའི་དོན་ལ་འཇུག་ནའང་བརྡའ་རྙིང་ལ་དཔྲལ་བའི་སྐད་དོད་ཡིན་པ་ལྟ་བུ་སོགས་མང་དུ་ཡོད་པ་རྣམས་ལེགས་པར་ལྟག་འོག་ལ་བརྟགས་ནས་བསྒྱུར་དགོས་སོ། །
      གཞན་ཡང་ཧོར་སྐད་ལ་ཚིགས་བཅད་དང་ལྷུག་པའི་ཁྱད་པར་དང་། ཚིགས་བཅད་ཀྱང་རྐང་པ་རིང་ཐུང་སྙོམས་པ་སོགས་བོད་སྐད་ཇི་ལྟ་བ་བཞིན་མི་འབྱུང་ནའང་ཚིགས་སུ་བཅད་པ་རྣམས་ནི་སྙན་འཇེབས་དོན་རྫོགས་པ་གོ་སླ་བ་རྐང་པ་རིང་ཐུང་ཀྱང་ཕལ་ཆེར་སྙོམས་པ་བྱ་ཞིང་བསྟོད་པ་དང་གསོལ་འདེབས་ལྟ་བུ་འགའ་ཞིག་ལ་ཧོར་སྐད་ལ་གྲགས་པའི་མགོ་མཚུངས་ཀྱི་རྒྱན་ལྟ་བུ་བྱས་ཀྱང་འགལ་བ་མེད་ལ། གཞུང་ཆེན་མོ་རྣམས་ལ་ནི་དེ་ལྟར་མི་བྱ་སྟེ། གཞན་དུ་ན་ཚིག་ལྷག་མང་དུ་འཇུག་པས་དོན་བསྒྲིབས་པར་འགྱུར་བས་སོ། ། གཞན་ཡང་བརྡའ་སྦྱོར་གྱི་གཞུང་འདི་དང་གཞན་དག་ཏུ་མ་འབྱུང་བའི་བརྡའ་གསར་དུ་སྦྱོར་དགོས་པ་བྱུང་ན་རང་རང་གི་སར་འདོད་པས་རང་དགར་མི་འདོགས་པར་བསྒྱུར་བའི་གྲྭར་གཏུགས་ཏེ་གཞུང་དང་གཏན་ཚིགས་དང་མི་འགལ་བར་བསྒྱུར་བར་བྱའོ། ། དེ་དག་ནི་གླེང་གཞི་དང་ཆོས་བསྒྱུར་ཚུལ་བཀས་བཅད་མདོ་ཙམ་མོ། །
     ད་ནི་གཞུང་དོན་དངོས་ལ་འཇུག་པར་བྱ་སྟེ། དེ་ལ་གཉིས། རིག་པའི་གནས་ལྔ་སོ་སོའི་གཞུང་བསྒྱུར་བ་ལ་མཁོ་བའི་མིང་གི་རྣམ་གྲངས་བསྟན་པ་དང་། ཐུན་མོང་ལ་མཁོ་བའི་བརྡའ་གསར་རྙིང་གི་དབྱེ་བ་སོགས་བཤད་པའོ། ། དང་པོ་ལ་ལྔ། ནང་རིག་པ་དང་། གཏན་ཚིགས་རིག་པ་དང་། སྒྲ་རིག་པ་དང་། བཟོ་རིག་པ་དང་། གསོ་བ་རིག་པའི་གཞུང་བསྒྱུར་བ་ལ་མཁོ་བའི་མིང་གི་རྣམ་གྲངས་བསྟན་པའོ། ། དང་པོ་ལ། མཚན་ཉིད་ཀྱི་ཐེག་པ་དང་། སྔགས་ཀྱི་ཐེག་པ་གཉིས་ལས་དང་པོ་ལ། ཕར་ཕྱིན་དང་། དབུ་མ་དང་། མངོན་པ་དང་། འདུལ་བ་དང་། གྲུབ་མཐའ་སྤྱིའི་གཞུང་བསྒྱུར་བ་ལ་མཁོ་བའི་མིང་གི་རྣམ་གྲངས་བསྟན་པ་དང་ལྔ་ལས། 
      དང་པོ་ནི། ཕར་ཕྱིན་གྱི་གཞུང་གི་བརྗོད་བྱའི་གཙོ་བོ་དངོས་པོ་བརྒྱད་ལ་དོན་འདུན་ཅུས་སྟོན་པས། དང་པོ་རྣམ་པ་ཐམས་ཅད་མཁྱེན་པ་ཉིད་ལ་མཚོན་བྱེད་ཀྱི་ཆོས་བཅུ་ལས་དང་པོ་ཐེག་ཆེན་སེམས་བསྐྱེད་ནི། ས་ལྟ་བུའི་སེམས་བསྐྱེད། གསེར། ཟླ་བ། མེ། གཏེར། རིན་ཆེན་འབྱུང་གནས། མཚོ། རྡོ་རྗེ། རི། སྨན། བཤེས་གཉེན། ཡིད་བཞིན་ནོར་བུ། ཉི་མ། གླུ། རྒྱལ་པོ། མཛོད། ལམ་པོ་ཆེ། བཞོན་པ། བཀོད་མའི་ཆུ། སྒྲ་སྙན། ཆུ་བོ། སྤྲིན་ལྟ་བུའི་སེམས་བསྐྱེད་དེ་ཉེར་གཉིས། ཡང་ན་སྨོན་པའི་སེམས་དང་། འཇུག་པའི་སེམས་གཉིས། ཡང་ན་མོས་པ་སྤྱོད་པ། ལྷག་བསམ་དག་པ། རྣམ་པར་སྨིན་པ། སྒྲིབ་པ་སྤངས་པའི་སེམས་བསྐྱེད་དེ་བཞི། ཡང་ཕྱུགས་རྫི་ལྟ་བུ། མཉན་པ་ལྟ་བུ། རྒྱལ་པོ་ལྟ་བུའི་སེམས་བསྐྱེད་དེ་གསུམ། ཡང་ཀུན་རྫོབ་དང་། དོན་དམ་སེམས་བསྐྱེད་གཉིས། རགས་པ་བརྡའ་ལས་བྱུང་བ་དང་། ཆོས་ཉིད་ཀྱིས་ཐོབ་པའི་སེམས་བསྐྱེད་དེ་གཉིས་རྣམས་སོ། །
གཉིས་པ་ཐེག་ཆེན་བསྒྲུབ་པའི་གདམས་ངག་ལ། བསྒྲུབ་པའི་ངོ་བོ་ལ་གདམས་པ། བདེན་པ་བཞི། དཀོན་མཆོག་གསུམ། མ་ཞེན་པ། ཡོངས་སུ་ངལ་བ་མེད་པ། ལམ་ཡོངས་སུ་འཛིན་པ། སྤྱན་ལྔ། མངོན་ཤེས་དྲུག མཐོང་ལམ། སྒོམ་ལམ་ལ་གདམས་པ་དང་བཅུའོ། ། འདིའི་སྤྱན་ལྔ་དང་མངོན་ཤེས་དྲུག་དགེ་བདུན་ཉི་ཤུའི་མིང་གི་སྐོར་རྣམས་ནི་མངོན་པའི་སྐབས་སུ་བལྟ་བར་བྱའོ། །
གསུམ་པ་ངེས་འབྱེད་ཡན་ལག་ལ། སྦྱོར་ལམ་དྲོད། རྩེ་མོ། བཟོད་པ། ཆོས་མཆོག་བཞི། དམིགས་པ། རྣམ་པ། རྒྱུ། ཡོངས་སུ་འཛིན་པ། སྤང་བྱ་རྣམ་རྟོག ངོ་བོ་ཆེ་འབྲིང་ཆུང་གསུམ་གྱི་སྒོ་ནས་ཁྱད་པར་དུ་འཕགས་པ་སྟེ་ཁྱད་ཆོས་དྲུག་གོ། ། རྣམ་རྟོག་བཞི་ནི། ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་གཉིས་རྫས་སུ་ཡོད་པ་དང་། བཏགས་པར་ཡོད་པར་འཛིན་པའི་འཛིན་རྟོག་གཉིས་ཏེ་བཞིའོ། །
བཞི་པ་སྒྲུབ་པའི་རྟེན་རང་བཞིན་གནས་རིགས་ལ། རྟོགས་པའི་ཆོས་དྲུག་དང་། གཉེན་པོ་དང་སྤང་བའི་སྒྲུབ་པ། སྤང་བྱ་ཡོངས་སུ་གཏུགས་པ། ཤེས་རབ། སྙིང་བརྩེ་བ། ཐུན་མོང་མ་ཡིན་པ། གཞན་དོན་གོ་རིམས་སུ་བྱེད་པ། ཡེ་ཤེས་རྩོལ་བ་མི་མངའ་བར་འཇུག་པའི་སྒྲུབ་པ་སྟེ་སྒྲུབ་པ་བཅུ་གསུམ་གྱི་རྟེན་རིགས་བཅུ་གསུམ་མོ། །ཡང་རང་བཞིན་གནས་རིགས་དང་རྒྱས་འགྱུར་གྱི་རིགས་གཉིས། ལུགས་གཞན་ཉན་རང་བྱང་སེམས་ཀྱི་རིགས་གསུམ་དང་། ངེས་པའི་རིགས། མ་ངེས་པའི་རིགས། རིགས་ཆད་དང་དྲུག་ཏུ་བཤད་དོ། །
ལྔ་པ་ཐེག་ཆེན་བསྒྲུབ་པའི་དམིགས་པ་ལ། དགེ་བ་དང་། མི་དགེ་བ་དང་། ལུང་དུ་མ་བསྟན་པ་དང་། འཇིག་རྟེན་ལས་འདས་པ་དང་། མ་འདས་པ་ལས། ཟག་བཅས་དང་། ཟག་མེད་ཀྱི་ཆོས་དང་། འདུས་བྱས་དང་། འདུས་མ་བྱས་པ་དང་། ཐུམ་མོང་དང་ཐུན་མོང་མ་ཡིན་པའི་ཆོས་ཏེ་བཅུ་གཅིག་གོ། །
དྲུག་པ་ཐེག་ཆེན་བསྒྲུབ་པའི་ཆེད་དུ་བྱ་བ་ལ་སེམས་ཆེན་པོ་དང་། སྤོང་བ་ཆེན་པོ་དང་། རྟོགས་པ་ཆེན་པོ་སྟེ་གསུམ་མོ། །
བདུན་པ་གོ་ཆའི་སྒྲུབ་པ་ལ་སྦྱིན་པ་ནས་ཤེས་རབ་ཀྱི་བར་གྱི་གོ་སྒྲུབ་དྲུག་གོ། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号