ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་ཕར་ཕྱིན་
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
       ཕྱིས་སུ་རྗེ་བཙུན་འཇམ་དཔལ་དབྱངས་ཀྱི་གདུལ་བྱའི་ཞིང་ཁམས་མ་ཧྰ་ཙི་ནའི་ཡུལ་དུ་ནི། སྔོན་ཅིའུ་ཞེས་པས་རྒྱལ་སྲིད་འཛིན་པའི་སྐབས་སུ། ལྷོ་ནུབ་མཚམས་ནས་ནམ་མཁར་འོད་ཀྱི་ཕུང་བོ་ཆེན་པོ་ཞིག་བྱུང་བ། རྒྱལ་པོས་ལྟས་མཁན་རྣམས་ལ་དྲིས་པར། ཕྱོགས་དེར་སྐྱེས་བུ་དམ་པ་ཞིག་འཁྲུངས་པའི་ལྟས་ཡིན་ཅིང་ད་ནས་ལོ་སྟོང་ཙམ་ན་དེའི་ལུགས་འདིར་རྒྱས་པར་འགྱུར་ཞེས་ལུང་བསྟན། ཕྱིས་སུ་ཧན་མིང་རྡི་རྒྱལ་པོའི་རིང་ལ། སྐབས་ཤིག་རྒྱལ་པོའི་རྨི་ལམ་དུ་སྐྱེས་བུ་གསེར་གྱི་ཁ་དོག་ཅན་འདོམ་གསུམ་ལྷག་པ་ཉི་མའི་འོད་ཟེར་འཕྲོ་བ་ཞིག་ནམ་མཁའ་ནས་ཕོ་བྲང་གི་ཡང་ཐོག་ཏུ་ཕེབས་པ་ཞིག་རྨིས་པ། ཕྱི་ཉིན་ཅི་ཡིན་སྙན་དུ་བློན་པོ་རྣམས་ལ་དྲིས་ཤིང་ཡིག་རྙིང་ཀློག་པས་སྔར་གྱི་ལུང་བསྟན་དེ་རྙེད་ནས་ངོ་མཚར་ཞིང་། མི་རིང་བར་རྒྱ་གར་ནས་དུས་ལ་བབས་པར་ཤེས་ནས་དགྲ་བཅོམ་པ་ཅིག་དང་། པཎྚི་ཏ་གཅིག་སྟེ་གཉིས་ཀྱིས་སྐུ་དང་ཐུགས་ཀྱི་རྟེན་འགའ་ཞིག་དང་། གསུང་རབ་མང་བོ་སྤྱན་དྲངས་ནས་རྒྱ་ནག་ཏུ་ཕེབས་རྫུ་འཕྲུལ་མང་དུ་བསྟན། གཉུག་མར་གནས་པའི་བོན་པོ་རྣམས་ཚར་བཅད་པས་མཆོག་དམན་མཐའ་དག་མོས་པར་གྱུར། དེ་ནས་བརྩམས་ཏེ་རིམ་གྱིས་པཎ་གྲུབ་མང་དུ་བྱོན་ནས་རྒྱལ་བའི་བཀའ་དང་བསྟན་བཅོས་རྣམས་རང་གི་སྐད་དུ་བསྒྱུར་ཤིང་གཏན་ལ་ཕབས། བཤད་སྒྲུབ་ཀྱི་སྡེ་མང་དུ་བཙུགས་ཏེ་བསྟན་པ་རིན་པོ་ཆེ་དར་རྒྱས་སུ་གྱུར་པ་ད་ལྟའི་བར་དུ་གནས་སོ། །
འཕགས་པ་འཇིག་རྟེན་དབང་ཕྱུག་གི་གདུལ་བའི་ཞིང་ཁམས་ཁ་བ་ཅན་གྱི་ལྗོངས་སྤུར་རྒྱལ་བོད་ཀྱི་རྒྱལ་ཁམས་སུ་བསྟན་པ་དར་ཚུལ་ནི། བོད་རྗེའི་ཐོག་མ་གཉའ་ཁྲི་བཙན་པོ་ཡིན་ལ། དེ་ནས་རྒྱལ་རབས་ཉེར་དྲུག་པ་ཆོས་རྒྱལ་སྲོང་བཙན་སྒམ་པོའི་དུས་སུ་ཇོ་ཤྰཀ་སོགས་ལྷ་རྟེན་མང་དུ་སྤྱན་དྲངས་ཏེ་གཙུག་ལག་ཁང་བཞེངས་པ་དང་ཐོན་མི་སམ་བྷོ་ཊ་རྒྱ་གར་དུ་བརྫངས། བྲམ་ཟེ་ལི་བྱིན་དང་ལྷ་རིག་པའི་སེང་གེ་སོགས་ལས་ཡི་གེ་དང་བསྟན་བཅོས་མང་དུ་བསླབས། དེས་བོད་དུ་ཕེབས་ནས་རྒྱ་གར་གྱི་ཡི་གེ་ལ་ཡུལ་སྐད་ཀྱི་དབང་གིས་སྣོན་བྲི་ཅུང་ཟད་བྱས་ཏེ་དབྱངས་ཡིག་བཞི་དང་གསལ་བྱེད་སུམ་ཅུར་གཏན་ལ་ཕབས་ཏེ་བོད་ཡིག་བརྩམས། སུམ་ཅུ་པ་དང་རྟགས་ཀྱི་འཇུག་པ་སོགས་ཡི་གེའི་བསྟན་བཅོས་ཀྱང་མཛད། ཐུགས་རྗེ་ཆེན་པོའི་ཆོས་སྐོར་དང་མདོ་སྡེ་དཀོན་མཆོག་སྤྲིན་སོགས་བཀའ་དང་བསྟན་བཅོས་འགའ་ཞིག་ཀྱང་བསྒྱུར་ཏེ་དམ་པའི་ཆོས་མང་དུ་བསྒྱུར་བའི་སྲོལ་བཏོད། དེ་ནས་རྒྱལ་རབས་དྲུག་པ་ཁྲི་སྲོང་ལྡེ་བཙན་གྱི་དུས་སུ་མཁན་ཆེན་ཞི་བ་འཚོ་དང་སློབ་དཔོན་པདྨ་སམ་བྷ་ཝ་སོགས་པཎ་གྲུབ་སྤྱན་དྲངས། སྦས་རཏྣ་སོགས་སད་མི་མི་བདུན་རབ་ཏུ་བྱུང་། མདོ་རྒྱུད་བསྟན་བཅོས་བགྲང་ལས་འདས་པ་བསྒྱུར། ཆོས་གྲྭ་ཆེན་པོ་བཅུ་གཉིས་དང་སྒོམ་གྲྭ་དུ་མ་བཙུགས་པ་སོགས་བསྟན་པའི་བྱ་བ་རྒྱ་ཆེར་མཛད། ཁྲི་རལ་བ་ཅན་གྱི་སྐབས་སྔར་ཡབ་མེས་ཀྱི་དུས་སུ་བསྒྱུར་བའི་ཆོས་རྣམས་ལ་ཞུ་གཏུགས་མཛད་དེ་སྐད་གསར་བཅད་ཀྱིས་གཏན་ཕབས། དགེ་འདུན་ཀྱི་བསྙེན་བཀུར་དང་དགེ་བཅུའི་ཁྲིམས་འཆའ་བ་སོགས་བོད་གླིང་ཐམས་ཅད་དཀར་བོ་དགེ་བའི་ལམ་ལ་བཀོད། དེ་ལྟར་སངས་རྒྱས་ཀྱི་བསྟན་པ་ཉིན་མོ་ལྟར་གསལ་བ་བར་སྐབས་སུ་བདུད་ཀྱིས་ཡིད་བསླད་པའི་རྒྱལ་པོ་སྡིག་ཅན་གྱི་དབང་གིས་ཅུང་ཟད་འགྲིབ་པར་གྱུར་པ་སླར་ཡང་སངས་རྒྱས་དང་བྱང་ཆུབ་སེམས་དཔའ་བདག་ཉིད་ཆེན་པོ་རྣམས་ཀྱི་ཐུགས་བསྐྱེད་རླབས་པོ་ཆེའི་མཐུ་ལས་མདོ་ཁམས་སྨད་ནས་བླ་ཆེན་དགོངས་པ་རབ་གསལ་སོགས་ཀྱིས་བསྟན་པའི་མེ་རོ་གསོས་པ་ལས་རིམ་གྱིས་བཤད་བསྒྲུབ་ཀྱི་བསྟན་པ་དར་ཞིང་། ཁྱད་པར་དུ་གནས་ལྔ་རིག་པའི་པཎྚི་ཏ་བྱང་ཆུབ་ཀྱི་སེམས་ཀྱིས་ཐུགས་རྒྱུད་གཏམས་པ་དཔལ་ལྡན་ཨ་ཏི་ཤ་དྰི་པཾ་ཀ་ར་ཤྲིཛྙྰ་ན་ཞེས་ཡོངས་སུ་གྲགས་པ་དེ་ཉིད་བོད་ཆོས་རྒྱལ་གྱི་གདུང་བརྒྱུད་ལྷ་བླ་མ་ཡེ་ཤེས་འོད་ཁུ་དབོན་གྱིས་འབད་པ་ཆེན་པོས་སྤྱན་དྲངས། བོད་དུ་ཕེབས་ནས་བྱང་ཆུབ་ལམ་གྱི་སྒྲོན་མ་སོགས་མཛད་དེ་རྒྱལ་བའི་བསྟན་པ་ལ་མ་རྟོགས་པ་དང་ལོག་པར་རྟོགས་པའི་དྲི་མ་མཐའ་དག་བསལ་ནས་བསྟན་པ་རིན་པོ་ཆེ་ཡོངས་སུ་རྫོགས་པ་ལེགས་པར་བྱི་དོར་བྱས་ཏེ་གསལ་བར་མཛད། སྲས་ཀྱི་ཐུ་བོ་ཁུ་རྔོག་འབྲོམ་གསུམ་སོགས་ཀྱིས་བཤད་སྒྲུབ་གཉི་ཀས་བསྟན་པ་བསྐྱངས་པས་ཇོ་བོ་བཀའ་གདམས་པ་ཞེས་པའི་རྣམ་ཐར་གཙང་མའི་ཚད་དུ་འཁྱོལ་བས་བོད་ཡུལ་མཛེས་པར་བྱས། གཞན་ཡང་དཔལ་ལྡན་ས་སྐྱ་པ་ཡབ་སྲས་དང་གྲུབ་དབང་མར་པ་ཡབ་སྲས་སོགས་ལས་ཀྱང་རིམ་པར་བརྒྱུད་པའི་བཤད་པ་དང་སྒྲུབ་པའི་སྡེ་མང་དུ་ཚུགས་ཤིང་། མཁས་གྲུབ་ཚད་ལྡན་དུ་མས་གངས་རིའི་ལྗོངས་ཡོངས་སུ་གང་བར་གྱུར།
        ཕྱིས་སུ་རྒྱལ་སྲས་དམ་པ་རྣམས་ཀྱི་ནང་ནས་ཀྱང་སྙིང་སྟོབས་དང་རྣམ་དཔྱོད་ཕུལ་དུ་བྱུང་བ་རྗེ་བཙུན་བརྟན་པའི་འཁོར་ལོ་ཉིད་ངུར་སྨྲིག་གི་ཟློས་གར་འཆང་བའི་ཚུལ་དུ་རོལ་ཤིང་མཐོན་མཐིང་རལ་པའི་ཐོར་ཅོག་ནི་པཎ་ཞྭ་གསེར་གྱི་མདོག་ཅན་དུ་མཛད་དེ་བསྟན་པའི་བདག་པོར་གྱུར་པ་རྗེ་རྒྱལ་བ་གཉིས་པ་བློ་བཟང་གྲགས་པའི་དཔལ་གྱིས་དགེ་བའི་བཤེས་གཉེན་མང་དུ་བསྟེན། ཕྱི་ནང་གི་གྲུབ་མཐའ་སྤྱི་དང་ནང་པའི་གྲུབ་མཐའ་བཞིའི་ཁྱད་པར་ཕྲ་མོ་དག་ལའང་རིགས་པ་དྲི་མ་མེད་པའི་སྒོ་ནས་ཞིབ་ཏུ་སྦྱངས་པས་གྲུབ་མཐའ་རྒྱ་མཚོ་ལྟ་བུའི་ཕ་རོལ་ཏུ་ཕྱིན། རིག་གནས་མདོ་སྔགས་ཐམས་ཅད་ལ་ཐོས་བསམ་བསྒོམས་པས་གྲུབ་པའི་རྟོགས་པ་མཆོག་བརྙེས། ཡི་དམ་གྱི་ལྷ་དུ་མའི་ཞལ་གཟིགས། རྗེ་བཙུན་འཇམ་དཔལ་དབྱངས་ལ་ཟབ་རྒྱས་ཀྱི་གདམས་པ་མང་དུ་གསན། འཆད་རྩོད་རྩོམ་པས་སྡེ་སྣོད་གསུམ་དང་རྒྱུད་སྡེ་བཞིའི་གསུང་རབ་མཐའ་ཡས་པ་གདུལ་བྱ་རྣམས་ལ་འདོམས་པར་མཛད་པས་ཤྰཀྱའི་རིང་ལུགས་དྲི་མ་མེད་པ་ཉིན་མོ་ལྟར་གསལ་བར་གྱུར་ཏོ། ། དེ་ཉིད་ཀྱི་སྲས་ཀྱི་ཐུ་བོ་རྒྱལ་ཚབ་མཁས་གྲུབ་སོགས་འཕགས་ཡུལ་གྱི་འཛམ་གླིང་རྒྱན་དྲུག་ལྟ་བུ་དུ་མས་རྗེ་ཉིད་ཀྱི་བཞེད་སྲོལ་ཇི་ལྟ་བ་བཞིན་རིན་པར་བསྐྱངས། རྗེ་བཙུན་དེ་ཉིད་ཀྱི་བཀའ་དྲིན་ལས་མདོ་སྔགས་བཤད་སྒྲུབ་ཐམས་ཅད་ཕན་ཚུན་འགལ་བ་མེད་པར་གཅིག་གྲོགས་སུ་གཅིག་འཆར་བའི་སྒོ་ནས་རང་གཞན་ཐམས་ཅད་ཀྱི་དོན་ལེགས་པར་སྒྲུབ་ནུས་པའི་མཁས་པ་དང་གྲུབ་པའི་སྐྱེ་བོ་དུ་མས་ས་སྟེང་ཐམས་ཅད་མཛེས་པར་གྱུར་ཞིང་ཀུན་མཁྱེན་བུ་རམ་ཤིང་པའི་རིང་ལུགས་ཟླ་བ་ཡར་གྱི་ངོ་ལྟར་འཕེལ་བ་འདི་བཞིན་ལགས་སོ། །
     ཆེན་པོ་ཧོར་གྱི་ཡུལ་དུ་ནི་སྔོན་གནམ་གྱི་བུ་བུར་ཏོ་ཆོ་ནོར་གྲགས་པ་ལས། མི་རབས་དགུ་པ་དུ་བུན་མེར་གེན་འདས་རྗེས་ནག་མོ་ཨེ་ལན་ཡུགས་སར་གནས་པ་ལ། ནམ་མཁའ་ནས་འཇའ་འོད་ལྟ་བུ་ཞིག་བྱུང་བ་ལུས་ལ་ཕོག་པ་ལས་བདེ་བ་མྱོང་སྟེ། མངལ་དུ་སེམས་ཅན་ཆགས་པ་བཙས་ནས་པོ་ཏོན་ཆར་དུ་གྲགས། དེ་ལས་མི་རབས་དགུ་པ་ཡི་སུ་ཁེ་འི་བྰ་ཐུར་གྱི་སྲས་སུ་གནས་བསྐོས་ས་ཡི་ཚངས་པ་ཆིང་གི་སི་འཁྲུངས། ཡངས་པའི་རྒྱལ་ཁམས་ཕལ་མོ་ཆེར་མངའ་བསྒྱུར་ཤིང་། དེ་ཉིད་ཀྱི་རིགས་ལས་རྒྱལ་པོ་ཨོ་གོ་ཏའི་སྲས་གཉིས་པ་རྒྱལ་བུ་གོ་དོན་གྱིས་རིག་པའི་གནས་ལྔ་ལ་སྦྱངས་པ་མཐར་ཕྱིན་པའི་མཁས་པ་ཆེན་པོ་ས་སྐྱ་པཎྚི་ཏ་ཀུན་དགའ་རྒྱལ་མཚན་དཔལ་བཟང་པོ་སྤྱན་དྲངས་ཏེ་མཆོད་ཡོད་དུ་འབྲེལ་ནས་བསྟན་པའི་དབུ་བརྙེས། ཧོ་པི་ལི་སེ་ཆེན་རྒྱལ་པོའི་དུས་སུ་རྗེ་བཙུན་དེ་ཉིད་ཀྱི་རིགས་དབོན་འགྲོ་བའི་མགོན་པོ་ཆོས་རྒྱལ་འཕགས་པ་གདན་དྲངས་ཏི་ཤྲྰི་སྟེ་རྒྱལ་པོའི་དབུ་མངའ་གསོལ། ཆོས་ཞུས་པའི་ཡོན་བོད་ཆོལ་ཁ་གསུམ་དང་ཟང་ཟིང་མང་དུ་ཕུལ། གཙུག་ལག་ཁང་བཞེངས་པ་དང་དགེ་འདུན་གྱི་སྡེ་འཛུགས་པ། ཉན་བཤད་སྒོམ་བསྒྲུབ་བྱེད་པ་སོགས་བསྟན་པའི་སྲོལ་ལེགས་པར་བཙུགས། ཧོར་ཡིག་གསར་དུ་བརྩམས་ནའང་ཅུང་ཟད་མ་ཚང་བས་དམ་པའི་ཆོས་མང་དུ་བསྒྱུར་བ་སོགས་མ་བྱུང་འདུག ཧའི་སང་ཁུ་ལུག་རྒྱལ་པོའི་དུས་སུ་ཀུན་མཁྱེན་ཆོས་སྐུ་འོད་ཟེར་གདན་དྲངས། འདི་ལ་ཆོས་ཀྱི་འོད་ཟེར་ཡང་ཟེར་བ་འདུག་ཅིང་། གསེར་ལྡིངས་པ་གཞོན་ནུ་འོད་ཀྱི་སྲས་ཡིན་མིན་བརྟག་པར་བྱ་ཞིང་། དུས་ཐོག་འགྲིག་པར་སྣང་ལ་ཀུན་མཁྱེན་ཆོས་སྐུ་འོད་ཟེར་སྐུ་ན་སོ་ཕྲ་བའི་སྐབས་ཀྱི་མཚན་ཆོས་ཀྱི་འོད་ཟེར་ལ་ཆོས་རྒྱལ་འཕགས་པས་ཆོས་སྐུ་འོད་ཟེར་ཞེས་བསྒྱུར་བར་ཁོང་གི་རྣམ་ཐར་ལས་འབྱུང་བ་དང་ཡང་འགྲིགས་པར་སྣང་ངོ་། ། དེས་སྔར་བརྩམས་པའི་ཧོར་ཡིག་ལ་བསྣོན་དགོས་པ་རྣམས་བསྣན་ནས་ཚང་བར་བྱས་མདོ་དང་བསྟན་བཅོས་མང་དུ་བསྒྱུར་བའི་སྲོལ་བཏོད། བུ་ཡན་ཐུ་རྒྱལ་པོའི་རིང་ལ་བཅོམ་ལྡན་རིག་རལ་གྱི་སློབ་མ་མཁས་པ་ཆེན་པོ་འཇམ་དབྱངས་པ་སྤྱན་དྲངས་ཏེ་མཆོད་གནས་མཛད། འདིས་རྒྱུ་རྐྱེན་སྦྱར་ཏེ་སྣར་ཐང་གི་བསྟན་འགྱུར་བཞེངས། ཕྱིས་སུ་ཐུ་མེད་ཨལ་ཐན་རྒྱལ་པོའི་རིང་ལ་རྒྱལ་དབང་ཐམས་ཅད་མཁྱེན་པ་བསོད་ནམས་རྒྱ་མཚོ་གདན་དྲངས་གསོན་གཤིན་གྱི་དགེ་བར་རློམ་པའི་སྲོག་གཅོད་པ་སོགས་ཆོས་ལོག་ཏུ་སྤྱོད་པ་རྣམས་འདོར་དུ་བཅུག གཙུག་ལག་ཁང་ཆེན་པོ་བཞེངས། འབངས་རྣམས་ཆོས་མཐུན་གྱི་དགེ་བ་ལ་སྦྱོར་བ་སོགས་མཛད་དེ། དཔལ་མཉམ་མེད་རི་བོ་དགེ་ལྡན་པ་དང་མཆོད་ཡོན་དུ་འབྲེལ་བར་གྱུར། དེའི་ཅུང་རྗེས་ཙམ་ལ་པཎྚི་ཏ་ཤྲྰི་ཀེ་ཐུ་ཀུ་ཤྲྰི་ཆོས་རྗེས་ཡུམ་རྒྱས་འབྲིང་བསྡུས་གསུམ་སོགས་སོག་སྐད་དུ་བསྒྱུར། ཆ་ཀར་གྱི་ལེགས་ལྡན་ཧུ་ཐུག་ཐུའི་རིང་ལ་ཡང་ཀུན་དགའ་འོད་ཟེར་སོགས་ལོ་ཙྰ་མང་དུ་བསགས་ནས་བཀའ་འགྱུར་རོ་ཅོག་སོགས་ཆོས་མང་དུ་བསྒྱུར་བར་གྲགས་ལ། དེ་དག་ནས་བརྩམས་ཏེ་ད་ལྟའི་བར་དུ་ཆོས་བསྒྱུར་བ་དང་འཆད་ཉན་བྱེད་པ་སོགས་ཆོས་ལུགས་ལེགས་པར་འཕེལ་བས་ཧོར་གྱི་ཡུལ་ལྗོངས་ཐམས་ཅད་དཀར་པོ་དགེ་བའི་ལམ་ལ་གནས་ཤིང་མཆོག་གསུམ་བླ་མར་འཛིན་པའི་དད་པ་དང་གཏོང་བ་སོགས་ཡ་རབས་ཀྱི་སྤྱོད་ཚུལ་ལ་ཤིན་ཏུ་བརྩོན་པར་གྱུར་ཏོ། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2019 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号