གནའ་སྔ་མོ་ཞིག་ལ། རྒྱལ་ཁབ་ཅིག་ན་མིང་ལ་ས་སྐྱོང་སྟོབས་ལྡན་ཟེར་བའི་རྒྱལ་པོ་ཞིག་ཡོད་ལ། རྒྱལ་པོ་དེ་རི་དྭགས་རྔོན་རྒྱུར་ཧ་ཅང་དགའ། ཁོར་མིང་ལ་རླུང་ཤ་ཟེར་བའི་ཤ་ཁྱི་གཅིག་ཡོད་ཅིང༌། དེ་ནི་ཁོའི་གཅེས་ནོར་འདང་ཅན་འབའ་ཞིག་ཡིན་པས། ས་གོམ་པ་གང་ལ་སོང་ཡང་དེ་འཁྲིད་དགོས།
ནམ་ཟླ་ཤིན་ཏུ་བཟང་བའི་ཉིན་མོ་ཞིག་ལ། ས་སྐྱོང་སྟོབས་ལྡན་གྱིས་ཡང་སྔར་བཞིན་འཁོར་བློན་མང་པོ་ཁྲིད་དེ་རི་དྭགས་རྔོན་དུ་སོང༌། སྤང་ལྗོངས་དང་ནགས་ཚལ་གྱི་མཚམས་ཤིག་ནས་གཙོད་གཅིག་མཐོང་འཕྲལ། ས་སྐྱོང་སྟོབས་ལྡན་རབ་ཏུ་དགའ་ནས་གསོན་པོར་འཛིན་བསམས། ཡིན་ནའང༌། གཙོད་ཀྱི་གོམ་ལག་ཤིན་ཏུ་མྱུར་བས། བལྟས་བལྟས་ལ་ས་སྐྱོང་སྟོབས་ལྡན་གྱི་མིག་འོག་ནས་བྲོས་སོང༌། ས་སྐྱོང་སྟོབས་ལྡན་ཤིན་ཏུ་ཁྲོས་ནས་བཅིབས་རྟ་ལ་ལྕག་གིས་བཞུས་བཞིན་རྗེས་དེད་ནས་སོང༌། ཤ་ཁྱི་རླུང་ཤ་ཡིས་རང་གི་བདག་པོས་གཙོད་རྗེས་བསྙེགས་པ་མཐོང་ནས་དེ་མ་ཐག་རླུང་ཤ་འཚུབ་མ་འཁོར་བ་བཞིན་གཙོད་ཀྱི་སྔུན་ནས་བཀག་པ་མ་ཟད། མཆོང་ཐེངས་གཅིག་གིས་གཙོད་ཀྱི་སྐེ་ལ་རྨུག་ནས་རང་གི་བདག་པོར་འཛིན་རོགས་བྱས། ས་སྐྱོང་སྟོབས་ལྡན་གྱིས་ཤ་ཁྱི་རླུང་ཤས་རོགས་རམ་འོག་གཙོད་བསད་རྗེས་ཡིད་ཚིམ་སོང༌།
དུས་དེར་མི་རྟ་གཉིས་ཀ་ཐང་ཆད་ཅིང༌། ཉིན་གུང་ལ་བསླེབས་འདུག་པ་ན་ཉི་མའང་ཤིན་ཏུ་ཚ་གདུག་ཆེ། ས་སྐྱོང་སྟོབས་ལྡན་གྱིས་ཉེ་འདབས་ཀྱི་སྡོང་བོ་ཞིག་གི་སྟེང་ཆུ་ཐིགས་བཞིན་པ་མཐོང་ནས་གསེར་གྱིས་ཤན་པའི་དཀར་ཡོལ་རུམ་ནས་བླངས་ཏེ་སྡོང་འོག་ཏུ་བཞག་ནས་ཆུ་བླངས། ཆུ་ཐིགས་གིས་དཀར་ཡོལ་བཀང་ནས་ཁོས་བཏུང་བར་བརྩམས་དུས། ཤ་ཁྱི་རླུང་ཤས་མཆུ་ཏོས་བརྒྱབ་ནས་ཆུས་བཀང་བའི་དཀར་ཡོལ་སར་གཡུགས། ས་སྐྱོང་སྟོབས་ལྡན་གྱིས་ཤ་ཁྱི་སྐོམ་དྲགས་པ་རེད་བསམས་ནས། ཡང་བསྐྱར་ཆུ་དཀར་ཡོལ་གང་བླངས་ནས་ཤ་ཁྱིའི་མདུན་དུ་བཞག ཡིན་ནའང་ཤ་ཁྱིས་ཡང་བསྐྱར་དཀར་ཡོལ་དང་བཅས་པ་སར་གཡུགས། རྒྱལ་པོ་ཧ་ཅང་མ་དགའ་བར་ཤ་ཁྱིར་རྡོག་མཐིལ་གཅིག་བརྒྱབ་སྟེ། སླར་ཡང་ཆུ་ཐིགས་དཀར་ཡོལ་གང་བླངས་ནས་བཅིབས་རྟའི་མདུན་དུ་བཞག བཅིབས་རྟས་སྐེ་བསྲིངས་ནས་འཐུང་བར་བརྩམས་པ་ན་ཤ་ཁྱི་རླུང་ཤས་སླར་ཡང་མཆུ་ཏོས་བརྒྱབ་ནས་སར་གཡུགས།དུས་དེར་རྒྱལ་པོ་རབ་ཏུ་ཁྲོས་པས། ལྡོམ་ཁྱི་ཁྱོད་ཅེས་སྡིགས་སྨོད་བྱེད་ཀྱིན་རལ་གྲི་ཕྱུང་ནས་ཤ་ཁྱི་རླུང་ཤར་བསྣུན། ཤ་ཁྱི་རླུང་ཤ་ཡིས་མིག་ཟུང་ལས་མཆི་མ་བཞུར་བཞིན་རང་གི་བདག་པོར་མིག་ཅེ་རེར་བལྟས་པ་དང་དེ་ནས་སྡོང་མགོར་མིག་ཅེ་རེར་ལྟ་བཞིན་མིག་བཙུམ་ནས་ཤི་སོང༌། རྒྱལ་པོས་མགོ་བོ་ཡར་བཀྱགས་ནས་སྡོང་མགོར་བལྟས་ཙ་ན། སྡོང་མགོ་ན་དུག་སྦྲུལ་རྫ་མ་འདྲ་ཞིག་གིས་དུག་ཁ་ཆེ་རུ་གདངས་ནས་དུག་ཆུ་ཕྱིར་ཕུད་བཞིན་ཡོད་པ་མཐོང༌། རྒྱལ་པོས་ད་གཟོད་ཧ་གོ་སྟེ་སེམས་གཏིང་ནས་འགྱོད་པ་སྐྱེས། ཡིན་ནའང་འཕྱི་དྲགས་སོང༌། རང་གི་གཅེས་ཁྱི་རླུང་ཤ་སར་འགྱེལ་ནས་ཁྲག་གིས་བརྫིས་འདུག
གྲོགས་པོ་ཆུང་ཆུང་ཚོ།དོན་དག་ཅི་ཞིག་བསྒྲུབ་ཀྱང་སྔོན་ན་དེས་པར་དུ་བསམ་བློ་ཞིབ་མོ་གཏོང་དགོས། ཞིབ་འདང་མ་བརྒྱབ་པར་ཧོད་རྒྱུག་བྱས་ན་དོན་དག་ལེགས་པོར་མི་འགྲུབ་པ་མ་ཟད། སྐབས་འགར་ད་དུང་རང་གཞན་གཉིས་ཀར་གནོད་པའང་བྱེད་སྲིད། བསྒྲུབས་ཚར་རྗེས་འགྱོད་པ་སྐྱེས་པ་ནི་ལས་ཀྱི་མཐའ་མ་ཡིན་པས།དོན་སྙིང་ཅི་ཡང་ཡོད་པ་མ་རེད།
ཁ་དཔེ་ལའང༌། རྟ་འདོ་བས་ཆུ་འཐུང་དུས། སྔ་ལྟོས་ཤིག་དང་ཕྱི་ལྟོས་ཤིག སྟག་ཤ་རས་དོན་བསྒྲུབ་དུས་སྔ་འདང་ཞིག་དང་གཞུག་འདང་ཞིག་ཅེས་བཤད་སྲོལ་ཡོད་པས། ཁྱོད་ཀྱིས་བལྟས་ན་དེ་ལྟར་རེད་དམ། |
