|
ས་བཅད་བཞི་པ།ངོ་བོ་མིང་དོན་བརྡ་སྤྲོད།
ངོ་བོ་མིང་དོན་བརྡ་སྤྲོད་ལ།།འདྲ་བའི་དཔེ་ལ་སྨན་ངོས་གཟུང༌།།མང་ག་བུར་ནི་འབྲི་ཚིལ་འདྲ།།སྟག་གཟིག་ག་བུར་ཕོ་ཅོང་འདྲ།།ཤེལ་ག་བུར་ནི་འཁྱགས་པ་འདྲ།།ཙནྡན་དཀར་པོ་ཤུག་པ་འདྲ།།ཙནྡན་དམར་པ་མཛོ་མོ་འདྲ།།ཨག་རུ་ཆུ་ཤིང་རུལ་བ་འདྲ།།གི་ཝང་ས་སེར་བསྒོངསཔ་འདྲ།།ཅུ་གང་དཀར་རྩི་ཕྱེ་མ་འདྲ།།གུར་གུམ་ལུག་རུ་སྐམ་པོ་འདྲ།།སུག་སྨེལ་བྲ་བོ་རུག་པ་འདྲ།།ཛཱ་ཏི་སྲེག་པའི་སྒོ་ང་འདྲ།།ལི་ཤི་ཟངས་མའི་གཟེར་བུ་འདྲ།།ཀ་ཀོ་ལ་བྱིང་བྱིང་ཐུ་ལུ་འདྲ།།གླ་རྩི་གྲོ་ཡི་ཚིག་མ་འདྲ།།དོམ་མཁྲིས་སྒོ་ངའི་སེར་ཐིག་འདྲ།།ཨུཏྤལ་ཧ་ལོ་བེམ་པ་འདྲ།།ནཱ་ག་པུཥྤ་གྲོ་ག་ཕྱེ་མ་འདྲ།།ནཱ་ག་གེ་སར་ཟངས་ཁོག་དུམ་བུ་འདྲ།།པདྨ་གེ་སར་རྟ་རྔ་གྲིས་གཏུབས་འདྲ།།ཟི་ར་དཀར་པོ་གོ་སྙོད་འདྲ།།ཟི་ར་ནག་པོ་ཨུག་ཆོས་འབྲས་བུ་འདྲ།།ལ་ལ་ཕུད་ཡོག་མོའི་འབྲུ་གུ་འདྲ།།སོ་མ་ར་ཛ་བྱི་བའི་མཁལ་མ་འདྲ།།ཐལ་ཀ་རྡོ་རྗེ་ཁྱི་ཡི་ཕོ་མཚན་འདྲ།།གསེར་གྱི་མེ་ཏོག་གསོར་གྱི་རྩེ་མོ་འདྲ།།གསེར་གྱི་ཕུད་བུ་སྦུར་ཆུང་ཞར་མ་འདྲ།།དུག་མོ་ཉུང་བྱི་ལྕེ་སྐམ་པོ་འདྲ།།རྒུན་འབྲུམ་སེ་འབྲུམ་རྙིང་བ་འདྲ།།འུ་སུ་ག་འུ་ཁ་སྦྱོར་འདྲ།།སྟར་བུ་བུ་རམ་སྨུག་པོ་འདྲ།།བསེ་ཡབ་བུ་རམ་སྦྱར་མ་འདྲ།།སེ་འབྲུ་སེ་བའི་འབྲུ་གུ་འདྲ།།ཕོ་བ་རིས་སྲན་མ་བཙོས་སྐམ་འདྲ།།པི་པི་ལིང་་བྱི་བའི་རིལ་མ་འདྲ།།སྨན་སྒ་ར་མཉེ་སྐམ་པོ་འདྲ།། ཙི་ཏྲ་ཀ་ཤོ་མང་ངར་བ་འདྲ།།ཤིང་ཚ་ཟངས་ཀྱི་ཝ་ཞུ་འདྲ།།ཀ་རན་ཛ་སྦྲུལ་གྱི་སྒོ་ང་འདྲ།།ཤིང་ཀུན་རྒྱུས་པ་སྐམ་པོ་འདྲ།།བྱི་ཏང་ཀ་སྲན་མ་སད་ཁྱེར་འདྲ།།མ་རུ་ཙེ་བྱིའུའི་མཆིན་པ་འདྲ།།གོ་བྱེ་ཁྲག་གི་རྐྱལ་ཆུང་འདྲ།།སྤོས་དཀར་ཐང་ཆུ་སྐམ་པོ་འདྲ།།གུ་གུལ་ནག་པོ་ནལ་མོ་འདྲ།།ཤེལ་ཏ་ཤུག་པའི་ཐང་ཆུ་འདྲ།།རྒྱ་ཚ་ཅོང་ཞི་བཅག་པ་འདྲ།།རྒྱམ་ཚ་འཁྱགས་པ་བཅག་པ་འདྲ།།ཁ་རུ་ཚ་རྡོ་སྔོན་བཅག་པ་འདྲ།།ཙབས་རུ་ཚ་བུ་རམ་བསྲེག་པ་འདྲ།།རྭ་ཚ་ར་རུ་ཕྱེ་མ་འདྲ།། ཐལ་ཚ་ཐལ་བའི་རིལ་བུ་འདྲ།།མཛེ་ཚྭ་ཚྭ་ལ་ཕྱེ་མ་འདྲ།།ཝ་ཚ་ཚ་རྡོག་བཅག་པ་འདྲ།།ཨ་རུ་ར་གསེར་གྱི་སྒོ་ང་འདྲ།།བ་རུ་ར་ཉུང་ཆུང་བེམ་པ་འདྲ།།སྐྱུ་རུ་ཤོལ་པོའི་རྣ་ཆ་འདྲ།།སྙིང་ཞོ་ཤ་ནི་སྙིང་དང་འདྲ།།མཁལ་མ་ཞོ་ཤ་མཁལ་མ་འདྲ།།གླ་གོར་ཞོ་ཤ་གླང་མིག་འདྲ།།ཨ་འབྲས་ཤིང་གི་ལྦ་བ་འདྲ།།སྲ་འབྲས་ལྕགས་ཀྱི་བུམ་ཆུང་འདྲ།།འཇམ་འབྲས་འབུ་ཡི་རྫེ་མ་འདྲ།།འབྲ་གོ་རྟ་ཡི་ནུ་མ་འདྲ།།པ་ཏྲ་ཉུང་མ་གཤགས་པ་འདྲ།།པུཥྐར་མྰུ་ལ་ལུག་སུག་འདྲ།།རུ་རྟ་ཤ་རུ་གོག་པོ་འདྲ།།ཤུ་དག་སོར་མོ་སྐམ་པོ་འདྲ།།པུ་ཤེལ་རྩེ་འཇག་མའི་རྩ་བ་འདྲ།།ཁྱུང་སྡེར་དཀར་པོ་བྱ་ཕོའི་ཕྱི་སྡེར་འདྲ།།ཁྱུང་སྡེར་སྨུག་པོ་བྱ་རོག་སྡེར་མོ་འདྲ།།དཔའ་བོ་དཀར་པོ་ཉུང་ཤུན་འདྲ།།དཔའ་བོ་སེར་པོ་སྐྱེར་ཤུན་འདྲ།།ཤིང་མངར་གསེར་གྱི་ལྕུག་མ་འདྲ།།སླེ་ཏྲེས་བྲ་མའི་རྩབ་འདྲ།།ཀནྡ་ཀ་རི་སེ་བ་གཞོན་ནུ་འདྲ།།ཧོང་ལེན་གོང་མོའི་རིལ་མ་འདྲ།།ཏིག་ཏ་ཡུངས་ཀར་ངར་བ་འདྲ།།བ་ཤ་ཀ་ཆབ་རྩེའི་ལོ་མ་འདྲ།།བ་ལེ་ཀ་དབྱི་མོང་རྩ་བ་འདྲ།།ལི་ག་དུར་སྨིན་བུ་སྐམ་པོ་འདྲ།།གླ་སྒང་གྲོ་མ་སྐམ་པོ་འདྲ།།སྟབ་སེང་ཤོལ་པོའི་སྐོགས་པ་འདྲ།།རྩད་ནི་ལྕ་རྒོད་རྩ་བ་འདྲ།ལྡུམ་སྟག་ལུག་མུར་ལྦ་བ་འདྲ།། ཤྲྰི་ཁཎྡ་ཕབས་རྡོག་འདྲ།།དོང་ག་ཚིལ་ནག་བཅད་པ་འདྲ།།དན་རོག་སྦུ་རུ་སྐེ་བཅད་འདྲ།།ཀ་པེད་བྱིས་པའི་ཀླད་ཕོར་འདྲ།།ད་ཏྲིག་ལུག་ཤིག་སྒོ་ང་འདྲ།།མོན་ཆ་ར་ནི་ཁྲག་སྐམ་འདྲ།།སྨག་ནི་གྲོ་མའི་ཕྱེ་མ་འདྲ།།ཡ་བཀྴ་ར་བག་ཕྱེ་འདྲ།།བསེ་རུ་རྒྱ་ཁབ་གཤིབས་པ་འདྲ།། ག་དོར་ཤི་ཤ་སྐམ་པོ་འདྲ།།རྒྱ་རུ་འབིགས་པའི་སྙུང་བུ་འདྲ།།སྐྱེ་སའི་དབྱིབས་ལ་ངོས་བཟུང་བ།།ཧོང་ལེན་གཡའ་གངས་མཚམས་སུ་སྐྱེ།། ལོ་མ་ཁྲོག་པོ་རལ་གྲི་འདྲ།།མེ་ཏོག་སྨུག་པོ་འབྲོང་ལོ་འདྲ།།རྩ་བ་སྤུ་ཅན་གོང་བྲུན་འདྲ།།རེ་སྐོན་གཡའ་ཡི་ཆུ་རོང་སྐྱེ།།ལོ་མ་པར་པ་ཏ་དང་འདྲ།།མེ་ཏོག་སེར་པོ་ཕུང་པོ་ཡོང༌།།རྩ་བ་རྐང་གཅིག་རྩི་དམར་ཡོད།།གཡའ་ཡི་གངས་མཚམས་བྲག་སྲུབས་སྐྱེ།།ལོ་མ་སྒོར་ཆུང་འཕྲུག་མཐུག་པོ།།མེ་ཏོག་ཟངས་ཀྱི་གཟེ་རུ་འདྲ།།རྩ་བ་སེར་པོ་ཁ་དཔུན་(སྤུན)པོ།།དྲི་མེད་རོ་ནི་ཁ་ལ་འདང༌།།གང་གཱ་ཆུང་གཡའ་གསེབ་བྱེ་ལོགས་སྐྱེ།།ཟུར་བཞི་ལོགས་བརྒྱད་མཆོད་རྟེན་བརྩིགས།། མེ་ཏོག་དྲིལ་བུ་ཁ་བསླངས་འདྲ།།རྩ་བ་རྒྱུས་པ་འཛིངས་པ་འདྲ།།བྱ་རྒོད་སྤོས་ཀྱང་གཡའ་གསེབ་སྐྱེ།།ལོམ་མཐུག་པོ་སྲུབ་ཀའི་དབྱིབས།། མེ་ཏོག་སྔོ་སྐྱ་བ་སྤུ་ཅན།།དྲི་མ་གླ་བའི་རིལ་མ་མནམ།།སྲོ་ལོ་སྐྱེ་ས་དེ་དང་འདྲ།།ལོ་མ་སྒོང་ཐོག་པ་དང་འདྲ།།མེ་ཏོག་བ་ལུ་དཀར་པོ་འདྲ།། གང་བུ་ལེབ་མོ་བྱི་སྲན་འདྲ།།རྩ་བ་དཀར་ལ་སོབ་པ་ཡིན།། སུམ་ཅུ་ཏིག་གཡའ་གསེབ་སྤང་ལ་སྐྱེ།།ལོ་མ་ལེབ་ཆུང་ཀོ་མ་མཆུ།། ངར་པ་དམར་སེར་བ་སྤུ་ཅན།།མེ་ཏོག་དམར་སེར་སྤ་མ་མགོ།ཡུ་མོ་སྲོལ་གོང་གཡའ་གསེབ་སྐྱེ།།ལོ་མ་དམར་སྨུག་སོག་ལེ་ཁ།།མེ་ཏོག་སྦོམ་པོ་ཁོག་སྟོང་ཅན།།རྩ་བ་དཀར་པོ་འོ་མ་ཡོད།།ཡུ་མོ་མདེའུ་འབྱིན་མཐའ་གསེབ་སྐྱེས།།ལོ་མ་སྒོར་མོ་སྲན་ཆུང་འདྲ།།མེ་ཏོག་དམར་སྨུག་ར་གཟར་འདྲ།།གང་བུ་སྔོན་པོ་གཞུ་ཤུབས་འདྲ།།རྩ་བ་སྤང་སྤོས་སྡོང་བོ་འདྲ།།དར་ཡ་ཀན་ནི་བྲག་གསེབ་སྐྱེས།།ལོ་མ་ཕྲ་མོ་ཁ་གསུམ་ལ།།མེ་ཏོག་བ་དན་ཕྱར་བ་འདྲ།།རྩ་བ་སེར་ལ་ཁ་བ་ཡོད།། དར་ཡ་ཀན་སྨུག་པོ་ཞེས་བྱ་བ།།སྐྱེ་གནས་ཐང་དང་རྡོ་གསེབ་སྐྱེས།། ལོ་མ་ལེབ་ཆུང་སྲད་ཆུང་འདྲ།།མེ་ཏོག་སྔོན་པོ་ར་གཟར་འདྲ།། གང་བུ་གྲོག་མའི་གཟུགས་པོ་འདྲ།།རྩ་བ་རྒྱུས་ཕྲན་བཤད་པ་འདྲ།།ཐོ་དཀར་སྨུག་པོ་ཞེས་ཀྱང་བྱ།།སྔོན་མོ་ཆབ་འདྲེན་ཞེས་སུ་བཤད།།ཨ་བི་ཥ་ཞེས་བྱ་བ་ནི།།སྤེན་མ་སེ་བ་སྨྱག་ཤད་དང༌།།ར་མཉེའི་གསེབ་ཏུ་སྐྱེས་པ་ཡིན།།ལོ་མ་ངར་བ་ར་མཉེ་འདྲ།།མེ་ཏོག་འོད་གསལ་མདངས་དང་ལྡན།།འབྲས་བུ་ཨ་རུ་ར་དང་འདྲ།།རྩ་བ་དཀར་པོ་སྒོག་རུམ་འདྲ།།བདུད་རྩི་འོ་མ་འཛིན་དུ་གྲགས།།སྟག་ཤ་བ་ནི་སྤང་ལ་སྐྱེས༌།།ལོ་མ་སྲད་མ་འབྲས་ངན་འདྲ།།ས་རྒྱ་ཀོ་མཐིལ་རེ་ཙམ་ཁེབས།།གང་བུ་ལེབ་མོ་བྱི་སྲད་འདྲ།།ལོ་མ་ཆག་པར་བཅིང་ནས་སྦྱིན།།རྩ་བ་སྤྲ་ཐོག་འདྲ་ལ་མཉེན།།ཡུ་གུ་ཤིང་ནི་ལྗོངས་ལ་སྐྱེས།།ལོ་མ་སེར་པོ་བ་སྤུ་ཅན།།སྡོང་བོ་སྤྲ་བས་དྲིལ་ནས་ཡོད།།བྱི་བཟུང་མུ་དང་ལྗོངས་ལ་སྐྱེས།།གང་བུ་སྤྲེའུའི་མཇུག་མ་འདྲ།།གསེབ་ན་ཚེར་མའི་ལྕགས་ཀྱུ་ཡོད།།འབྲས་བུ་སྨུག་པོ་འབྲས་དང་ལྡན།།ལང་ཐང་རྩེ་ནི་ལྡུམ་རར་སྐྱེས།།སྡོང་བོ་ཕྲ་ལ་རིང་བ་ལ།།གང་བུ་རིལ་་བ་སྤྱི་བླུགས་འདྲ།།རྩ་བརྒྱད་མགོ་ལྟར་བསྒྲེངས་ནས་འོང༌།།འབྲུ་གུ་ཏིལ་ཙམ་སེག་བདར་རིས།།དཀར་པོ་ཆིག་ཐུབ་གཡའ་ལ་སྐྱེས།།ལོ་མ་ཁྲོ་ག་བ་དང་འདྲ།།མེ་ཏོག་གང་བུ་ཐང་ཕྲོམ་འདྲ།།ས་ལས་མ་འཕགས་ལྕོག་པོར་སྐྱེས།།རྩ་བ་དཀར་པོ་སུག་པ་འདྲ།།ཤོ(ཤུ)མོ་ཟ་ནི་ཞིང་ལ་སྐྱེས།།ལོ་འདབ་སྲད་ཆུང་འདྲ་བ་ལ།།གང་བུ་བྱ་ཕོའི་ཕྱི་སྡེར་འདྲ།།འབྲུ་གུ་གྲུ་ཡོན་སེ་དར་(སེག་བརྡར)རིས།།བྲེ་ག་མུ་དང་ཞིང་ལ་སྐྱེས།།ལོ་འདབ་སྲན་ཆུང་ཇི་བཞིན་ལ།།འབྲ་བུ་སྤྲུ་མའི་གང་བུ་འདྲ།།འབྲི་ཏ་ས་འཛིན་ལྗོངས་སུ་སྐྱེས།།ལོ་མ་ཐ་རམས་ལྟ་བུ་ལ།།མེ་ཏོག་སྔོན་པོ་སྤུངས་པ་འདྲ།།བ་ཐག་གྲོ་མའི་གྲོ་རྒྱངས་འདྲ།།དབང་བོ་ལག་པ་ན་ལ་སྐྱེས།ལོ་འདབ་ཀྱི་སྒོག་འདྲ་བ་ལ།།མེ་ཏོག་དམར་པོ་མདངས་དང་ལྡན།།ཟོར་སྒྲོ་ལྟ་བུར་ཀུན་ཏུ་སྐྱེས།།རྩ་བ་བུ་ཆུང་ལག་པ་ལ།།འོད་ལྡན་མཁའ་འགྲོ་འདུ་སར་སྐྱེས།།སྡོང་བོ་གཅིག་རེངས་མཐོ་རེ་ཙམ།།ལོ་འདབ་པ་ཏྲའི་མཆོད་སྡོང་འདྲ།།ཚི་ཅན་རོ་ནི་ཁ་མངར་བྲིད།།འཁྲུངས་དཔེ་ཞེས་པ་འགའ་ཙམ་བཀོད།།གཞན་དག་ལག་ལེན་ངོ་སྤྲོད་བགྱིས།།དེ་རྣམས་ངོ་བོ་བརྡ་སྤྲོད་དོ།།
ས་བཅད་ལྔ་པ།བཟང་ངན་མིང་དོན་བརྡ་སྤྲོད།
བཟང་ངན་མིང་དོན་བརྡ་སྤྲོད་ལ།།ག་བུར་མཉེན་འཇམ་སྟོན་ན་རྩུབ།།ཙནྡན་བཟང་ངན་ཆུ་ལ་དྲིས།།ཆུར་བྱིང་དྲི་མེད་སྟོན་ན་བཟང༌།།ཨ་ག་རུ་ནི་མེ་ལ་དྲིས།།དྲི་ཆེ་ཆིར་ཆིར་བྱུང་ན་བཟང༌།།ཛཱ་ཏི་སྙི་ལ་ལྕི་ན་བཟང༌།།གུར་གུམ་དམར་སྨུག་མཁྲེགས་ན་བཟང༌།།ཅུ་གང་དཀར་ཡང་དྲོད་མེད་བཟང༌།།ཀ་ཀོ་ལ་ནི་སོབ་ན་བཟང༌།།སུག་སྨེལ་སྤུ་མེད་རུག་ན་བཟང༌།།ལ་ཤི་ལ་ཤི་མེད་ན་བཟང༌།།གི་ཝང་ཡང་མཁྲེགས་སོ་མི་སག།དམར་སེར་རིལ་བུར་ཆགས་ན་བཟང༌།། དོམ་མཁྲིས་སེར་འོད་གཙང་ལ་དྭངས།།ཆུ་ལ་ཀ་བ་ཚུགས་ན་བཟང༌།།གླ་རྩི་འཇམ་མཁྲེགས་དྲི་ཆེ་བཟང༌།།ཨ་རུ་ར་ནི་གསེར་མདོག་ཐོན།།ཤ་རྒྱས་ཁེངས་པ་བཟང་བ་ཡིན།།བ་རུ་ཆུང་འཇམ་སྐྱ་ན་བཟང༌།།སྐྱུ་རུ་དཀར་ཤས་ཆེ་བ་བཟང༌།།མཁལ་མ་ཞོ་ཤ་དཀར་ཟླུམ་བཟང༌།།སེ་འབྲུ་སྣུམ་ལ་རོ་སྐྱུར་བཟང༌།།དྲོད་སྨན་བྱ་ཕྲ་ཆགས་ན་བཟང༌།།སྨན་སྒ་ཁོང་སྤུ་མེད་ན་བཟང༌།།སྨུག་པོ་སྙི་ལ་ཁུ་བ་དམར།།རོ་མངར་དྲི་མ་ཆེ་ན་བཟང༌།།དཀར་པོ་སྙི་ལ་མངར་ན་བཟང༌།།ཀུན་ལ་བཤད་པར་མི་ལང་བས།།ལག་ལེན་ངོ་སྤྲོད་ཐོབ་པར་གྱིས།།སྨན་ཡིག་མིང་དོན་བརྡ་སྤྲོད་འདི།།སློབ་དཔོན་བེེ་རོ་ཙ་ན་ཡིས།།བོད་སྨན་རྨོངས་པའི་དོན་ཕྱིར་བཀོད།།ཤེས་ཆུང་ཐེ་ཚོམ་སེལ་བར་ཤོག།མིང་དོན་བརྡ་སྤྲོད་ཅེས་བྱ་བ་རྫོགས་སོ། །མངྒ་ལཾ།།
(ཤ་བོ་འབྲུག་མོགཡང་འབུམ་བཀྲ་ཤིས།)
བསམ་གཞིགས།
༡གབ་ཡིག་མིང་དོན་བརྡ་སྤྲོད་བསྟན་པའི་དགོས་པ་ཅི་ཡིན།
༢བཟང་ངན་མིང་དོན་བརྡ་སྤྲོད་བསྟན་པའི་དགོས་པ་ཅི།
༣རྒྱུ་མཚན་གང་ལ་བལྟོས་ནས་སྨན་ལ་བཟང་ངན་ཕྱེས།
༤སྡེ་ཚན་མིང་དོན་བརྡ་སྤྲོད་ལ་སྡེ་ཚན་དུ་ཡོད། 2/2 མདུན་ངོས། 上一页 1 2 |
