|
ས་བཅད་གསུམ་པ།ཕྱེ་མའི་སྐོར་བསྟན་པ།
དེ་ནས་སྨན་གྱི་སྦྱོར་བ་ནི།།ཕྱེ་མ་ལྡེ་གུ་ཐང་དང་ནི།།རིལ་བུ་སྨན་མར་ལྔ་དག་གོ།དང་པོར་ཕྱེ་མ་བཤད་པ་ནི།།ཕྱེ་མའི་རྒྱལ་པོ་ག་པུར་ནི།།ག་པུར་ཅུ་གང་ཀ་ཀོ་ལ།།ཛཱ་ཏི་ལི་ཤི་གུར་གུམ་དང༌།།གླ་སྒང་སུག་སྨེལ་སྤང་སྤོས་དང༌།།བ་ལེ་ཀ་དང་རྡོ་དྲེག་དང༌།པུ་ཙེ་ཤེལ་དང་ཆུ་སྲིན་སྡེར།།ནཱ་ག་གེ་སར་པད་གེ་སར།།ཙནྡན་དཀར་པོ་གི་ཝང་དང༌།།ཨུཏྤལ་སྔོན་པོ་འབུ་སུག་ཧང༌།།ཤིང་ཚ་ཟི་ར་ཙནྡན་དམར།།ཚ་བ་གསུམ་སྟེ་ཉི་ཤུ་ལྔ།།ལྷ་ཡི་དབང་པོ་ཚངས་པས་བཤད།།ལད་ལུད་མང་དང་དབུགས་མི་བདེ།།སྐད་འགགས་ཡི་ག་འཆུས་པ་དང༌།།ཕོ་བ་དྲོད་སྐྱེད་ཆམ་པ་མོད།།ཁྲག་ཏུ་སྐྱུགས་དང་སྐྱིགས་བུས་འདེབས།།རིམས་ནད་ཀུན་དང་མཁྲིས་ནད་དང༌།།ཚ་བ་རྒྱས་དང་རྙིངས་པ་དང༌།།སྙིང་མི་དྲན་དང་མྱོས་པ་དང༌།།གློ་མཆིན་མཆེར་པ་ན་བ་དང༌།།རྩིབ་ལོགས་ཟུག་དང་གཞང་འབྲུམ་དང༌།། ཚད་ནད་ཁྲག་ཏུ་འཁྲུ་བ་དང༌།།ཁྱད་པར་དུ་ཡང་རིམས་ནད་སེལ།། དེ་ལས་བསྡུས་པ་བརྒྱད་པ་ནི།།ག་པུར་གུར་གུམ་བ་ལེ་ཀ།ཅུ་གང་ཙནྡན་དཀར་པོ་དང༌།།ཤིང་མངར་མཚལ་དང་པུ་ཙེ་ཤེལ།།རྒས་ཐག་སྲ་དང་ལུས་ཡང་དང༌།།མཆིན་ཁྲག་གློར་ལུད་དབུགས་མི་བདེ།། ཁྲག་མཁྲིས་གསར་རྙིང་ཀུན་ལ་འོ།།ག་པུར་བདུན་པ་སྦྱར་བས་ནི།།ག་པུར་ཅུ་གང་བ་ལེ་ཀ།གུར་གུམ་ཙནྡན་དཀར་པོ་དང༌།།ཤིང་མངར་མཚལ་དང་པུ་ཙེ་ཤེལ།།པདྨ་གེ་སར་པུ་ཤེལ་ཙེ།།སྦྱར་བ་ཀ་ར་དྲུག་འགྱུར་ཏེ།།དེ་ཡིས་ཁྲག་དང་མཁྲིས་པ་སེལ།།ཤིན་ཏུ་བསྡུས་པ་ཚ་བ་ནི།།ཤིན་ཏུ་རྒྱས་པ་འཇོམས་པ་སྟེ།།ག་པུར་ཅུ་གང་ཨུཏྤལ་སྔོ།སྦྱར་བས་ཚད་པ་རྒྱས་པ་སེལ།།ཅུ་གང་དག་གི་སྦྱོར་བ་ནི།།ཅུ་གང་ཤིང་མངར་སྟར་བུ་དང༌།།རྒུན་འབྲུམ་ར་ཐུག་ལུག་ཐུག་གི།སྲོ་ལོ་ཕུར་མོང་ཐལ་བ་དང༌།།ཛཱ་ཏི་སུག་སྨེལ་པི་པི་ལིང༌།།འདི་རྣམས་ཀྱི་ནི་ཕྱེ་མ་ཡིས།།གློ་འཁྲུགས་པ་དང་རྡོལ་བ་དང༌།། ཚ་བ་རྒྱས་དང་རྙིངས་པ་དང༌།།དྲག་ཏུ་ལུ་དང་སྟོད་གཟེར་དང༌།།གློ་ཟགས་རྣམས་ལ་མཆོག་ཏུ་འོ།།ཅུ་གང་ཛཱ་ཏི་ཨ་རུ་ར།།ཤིང་མངར་ལྕགས་ཕྱེ་ཕྱེ་མ་དང༌།།སུག་སྨེལ་ཀ་ར་སྦྱར་བ་ཡིས།།གློ་ཡི་ནད་རྣམས་སེལ་བར་བྱེད།།ཅུ་གང་ལྕགས་ཕྱེ་སུག་སྨེལ་དང༌།།ཛཱ་ཏི་ཕུར་མོང་ཐལ་བ་དང༌།།ཀ་ར་དག་དང་སྦྱར་བ་ཡིས།།གློ་སྐྲན་སྐྱ་རྦབ་སྣ་སུབ་དང༌།།ཁྲག་རྨུགས་རྣག་རྨུགས་སེལ་བར་བྱེད།།ཅུ་གང་སྤང་རྩི་དོ་བོ་དང༌།།སྤང་རྒྱན་དཀར་པོ་ཤིང་མངར་དང༌།།ཨ་རུ་ར་དང་ལྔ་པོས་ནི།།སྐད་འགགས་སྟོད་ནི་གཟེར་ས་དང༌།།རོ་རྒྱབ་གཟེར་བའི་ནད་སེལ་ལོ།།དེ་རྣམས་ཐ་སྐར་དག་གིས་མཛད།།ཨ་ག་རུ་དང་སུག་སྨེལ་དང༌།།ཤིང་ཚ་བཅའ་སྒ་བལ་བུ་དང༌།།བ་ལེ་ཀ་དང་ལ་ལ་ཕུད།།གླ་སྒང་ཟི་ར་ཤུ་ཏི་དང༌།།མ་ནུ་པི་པི་ལིང་དང་ནི།། ཏང་ཀུན་བྱེའུ་རུག་ན་ལེ་ཤམ།།ནཱ་ག་གེ་སར་གི་ཝང་དང༌།།ནཱ་ག་པུཥྤ་ཀ་རར་སྦྱར།།རིམས་དང་སྐྲན་དང་འོར་དང་ནི།།དབུགས་མི་བདེ་དང་ལུད་པ་ལུ།།མཆན་ཁུང་ཆུ་སེར་ཟགས་པ་དང༌།།གློ་ཡི་ནད་རྣམས་སེལ་བར་བྱེད།།གུར་གུམ་ཅུ་གང་བ་ལེ་ཀ།ཨུཏྤལ་སྔོན་པོ་པུ་ཙེ་ཤེལ།།ཙནྡན་དཀར་དམར་ཀ་རར་སྦྱར།།གློ་མཆིན་གཉིས་ཀྱི་ཚད་པ་སེལ།།གུར་གུམ་ཅུ་གང་བ་ལེ་ཀ།ཤིང་མངར་ཙནྡན་དཀར་ཨུཏྤལ།།པུ་ཙེ་ཤེལ་དང་ཀ་རར་སྦྱར།གློ་མཆིན་ཚད་པའི་ནད་ཀུན་སེལ།།གུར་གུམ་ཅུ་གང་བ་ལེ་ཀ།པྲི་ཤིང་སྣ་མའི་མེ་ཏོག་དང༌།།མཚེ་དང་ཨུཏྤལ་སྔོན་པོ་དང༌།།ཏིག་ཏ་ཀ་རར་སྦྱར་བ་ཡིས།།གློ་མཆིན་བསྣད་པ་སེལ་བར་བྱེད།།གུར་གུམ་ལི་ཤི་སུག་སྨེལ་དང༌།།ཙནྡན་དཀར་དམར་ཤིང་ཚྭ་དང༌།།ཟི་ར་དཀར་པོ་པི་པི་ལིང༌།།བུ་རམ་དག་དང་སྦྱར་བས་ནི།།ཕོ་མཆིན་རྙིང་པ་འདྲིལ་བ་དང༌།།མཆིན་སྐྲན་ལ་སོགས་མཆིན་ནད་སེལ།།གུར་གུམ་ཅུ་གང་ཨ་རུ་ར།ཤིང་ཚྭ་ཙནྡན་བ་ལེ་ཀ།ནཱ་ག་གེ་སར་པད་གེ་སར།ཨུཏྤལ་སྔོན་པོ་པུ་ཤེལ་ཙེ།གློ་མཆིན་ཚད་པས་རྒྱས་པ་སེལ།།གུར་གུམ་ཅུ་གང་ཙནྡན་དཀར།། ཙནྡན་དཀར་དམར་བ་ལེ་ཀ།བ་ཤ་ཀ་དང་ཨུཏྤལ་སྔོ།།ཁྲག་འཁྲུགས་ཚད་པ་རྒྱས་པ་དང༌།།གློ་མཆིན་ནད་དང་གཟེར་བ་དང༌།།རྩ་ནད་ཚད་པ་རྙིང་པ་དང༌།།མཆིན་པའི་ནད་ནི་དེས་སེལ་ལོ།།སེའུ་འབྲུ་ཤིང་ཚྭ་སུག་སྨེལ་དང༌།།ནཱ་ག་གེ་སར་པ་ཏྲ་དང༌།།ཟི་ར་འུ་སུ་ལ་ལ་ཕུད།།ཚ་བ་གསུམ་ནི་ཞོ་བཞི་བཞི།།ཕོ་བ་གྲང་བས་འཁྲུ་བ་དང༌།།ཕོ་བ་དྲོད་ཉམས་སྐེམ་པ་དང༌།།སྐོམ་དང་ལྦ་བ་ལྐོག་ནད་དང༌།།ལུད་པ་ལུ་དང་དབུགས་མི་བདེ།།སེའུ་འབྲུ་སུག་སྨེལ་ཀ་ཀོ་ལ།།ཛཱ་ཏི་ལ་ལ་ཕུད་དང་ནི།།ཚ་བ་གསུམ་པོ་བུ་རམ་དང༌།།སྦྱར་བས་ཕོ་རླུང་བད་རླུང་སེལ།།སེའུ་འབྲུ་སུག་སྨེལ་ཅུ་གང་དང༌།།གནྡྷ་པ་ཏྲ་གོ་སྙོད་དང༌།།འུ་སུ་ལ་ལ་ཕུད་དང་ནི།།ཤིང་ཚ་རྣམས་གཉིས་ཚ་བ་གསུམ།། ཀ་རར་སྦྱར་བས་འཁྲུ་བ་དང༌།།མ་ཞུ་ལུད་པ་དབུགས་མི་བདེ།།ཆུ་སྐྱགས་གཞང་འབྲུམ་ཞི་བར་བྱེད།།སེའུ་འབྲུ་སུག་སྨེལ་ཛཱ་དང༌།།ཀ་ཀོ་ལ་དང་ལི་ཤི་དང༌།།ལ་ལ་ཕུད་དང་ཤིང་ཚ་དང༌།།འུ་སུ་མྰུ་ལ་ཚ་བ་གསུམ།།བུ་རམ་སྦྱར་བས་འཁྲུ་ནད་དང༌།།སྐེམ་ནད་སྐྲན་དང་གྲང་བ་སེལ།།སེའུ་འབྲུ་སུག་སྨེལ་པི་པི་ལིང༌།།ཤིང་ཚ་རྒྱམ་ཚྭ་ལྕེ་མྱང་ཚྭ།།སེའུ་འབྲུ་དྲུག་པས་མཆིན་དྲིའི་སྐྲན།།འཁྲུ་དང་སྐྱུག་པ་སེལ་བར་བྱེད།།སེའུ་འབྲུ་ན་ལེ་ཤམ་དང་ནི།།པི་པི་ལིང་དང་ཁ་རུ་ཚྭ།། རྒྱམ་ཚྭ་ལྕེ་མྱང་ཚྭ་དག་དང༌།།སྦྲང་རྩིར་སྦྱར་བས་མཆིན་དྲིའི་སྐྲན།། འཁྲུ་སྐྱུག་གཟེར་བ་སེལ་བར་བྱེད།།སེའུ་འབྲུ་ན་ལེ་ཤམ་དང་ནི།།ར་ཚྭ་ཤིང་ཚ་ཤིང་མངར་དང༌།།གོ་སྙོད་ནཱ་ག་པུཥྤ་དང༌།།ཚ་བ་གསུམ་དང་ཁ་རུ་ཚྭ།།ཀ་ར་དག་དང་སྦྱར་བ་ནི།།བད་ཀན་རྒྱས་དང་སྟོད་ལྕི་དང༌།།མགོ་འཁོར་མིག་གཟེར་ཟས་མི་འདོད།།དེ་ཡི་ནད་སེལ་ཤ་ཡང་སྐྱེ།།སེའུ་འབྲུ་སུག་སྨེལ་བུ་རམ་གསུམ།།ཡང་ན་བུ་རམ་པི་པི་ལིང༌།།བུ་རམ་ཆ་སྙོམས་ཁོང་དྲོད་བསྐྱེད།།ཧི་བ་ཡང་ཞེས་བྱ་བ་འོ།འཇམ་འབྲས་སྲ་འབྲས་མོན་ཆ་མ།ལ་ལ་ཕུད་དང་ཙི་ཏྲ་ཀ། བཙོད་དང་དོང་ཀ་པི་པི་ལིང༌།།ཅུ་གང་ལི་ཤི་སུག་སྨེལ་དང༌།།དྰ་ཏི་ད་ཏྲིག་ཀ་རར་སྦྱར།།སྟོད་ཚད་སྨད་གྲང་བད་རླུང་དང༌།།ཁྲག་མཁྲིས་འཁྲུ་བ་ཀུན་ལ་ཕན།།ད་ལིས་ན་ལེ་ཤམ་དང་ནི།།བཅའ་ལྒ་ཤིང་ཚ་པི་པི་ལིང༌།།དབུགས་མི་བདེ་དང་ལུད་པ་ལུ།།སྐྱུགས་བུའི་ནད་དང་ཡི་ག་འཆུལ།རིམས་དང་སྐྱ་རྦབ་ཁྲག་ཏུ་འཁྲུ།།སྐྲན་དང་ཕོ་བ་དྲོད་ཞན་དང༌།།གྲང་བ་དག་གི་ནད་རྣམས་དང༌།།གཞང་འབྲུམ་དག་ནི་ཞི་བར་བྱེད།།ད་ལིས་ཤིང་ཚ་པུ་ཙེ་ཤེལ།།སུག་སྨེལ་དབྱི་མོང་དག་དང་ནི།།ནཱ་ག་པུཥྤ་གེ་སར་ང༌།།བྱི་ཙེ་ལག་དང་ཚ་བ་གསུམ།།སྦྱར་བས་གཞང་ནད་སྙིང་འཕར་དང༌།།དབུགས་མི་བདེ་དང་སྐྲན་དང་ནི།།བད་རླུང་སྲིན་ནད་ལྟོ་སྦོས་སེལ།།སུག་སྨེལ་ཤིང་ཚ་ནཱ་ག་པུཥྤ།།ཚ་བ་གསུམ་དང་སྦྱར་བ་ཡིས།།ལུད་པ་ལུ་དང་དབུགས་མི་བདེ།།ཡི་ག་འཆུས་དང་སྐོམ་དད་དང༌།།སྙིང་ནད་གཞང་འབྲུམ་ནད་དང་ནི།།དེ་རྣམས་ལ་ནི་བདུད་རྩིའོ།ཡང་ན་སུག་སྨེལ་ལ་ལ་ཕུད།།དོང་དྲ་པི་པི་ལིང་དང་ནི།།སེའུ་འབྲུ་གླ་སྒང་དག་དང་ནི།།ཤིང་ཚ་ནཱ་ག་གེ་སར་དང༌།།གནྡྷ་པ་ཏྲ་དེ་རྣམས་ནི།།ཀ་ར་དག་དང་སྦྱར་བ་ནི།།ཕོ་བ་དྲོད་མེད་ཡི་ག་འཆུས།།དབུགས་མི་བདེ་དང་གློ་ནད་སེལ།།སེའུ་འབྲུ་སུག་སྨེལ་ལ་ལ་ཕུད།།པི་པི་ལིང་དང་དོང་དྲ་གསུམ།།བུ་རམ་དག་དང་སྦྱར་བ་ནི།།ཕོ་ནད་ཟས་ནི་མི་འཇུ་དང༌།།བད་ཀན་སྐྲན་དང་སྙིང་རླུང་དང༌།།མཁལ་ནད་སྐྱུགས་བྲོ་དང་ག་འབྱེད།།ཁྱད་པར་ཕོ་བའི་ནད་དག་སེལ།།དུག་མོ་ཉུང་དང་དོང་དྲ་དང༌།།ཨ་བི་ཤ་དང་གླ་སྒང་དང།།ནཱ་ག་པུཥྤ་བིལ་བ་དང༌།། སྐྱེར་བའི་རྩ་བ་པུ་ཙེ་ཤེལ།།ཕོ་ནད་མཁྲིས་པ་ལས་གྱུར་དང༌།།མིག་སེར་ཁྲག་ཏུ་འཁྲུ་བ་དང༌།།ཚ་ཞིང་ཟུག་གཟེར་ཆེ་བ་དང༌།།ཁྲག་ཏུ་འཁྲུ་དང་མཁྲིས་ལ་ཕན།།དུག་མོ་ཉུང་དང་ཨ་བི་ཤ།ཨ་རུ་ར་དང་ཤིང་ཤུན་དང༌།།ཁ་རུ་ཚྭ་དང་སྦྲང་རྩིར་སྦྱར།།ཕོ་བ་ཉམ་ཆུང་ཟས་མི་འཇུ།།བེ་སྣབས་དང་ནི་སློན་པ་དང༌།།གཟེར་ཟུག་ཆེ་བའི་ནད་རྣམས་དང༌།།ཚད་པས་འཁྲོག་པ་རྣམས་ལ་ཕན།།ཏིག་ཏ་འབྲས་བུ་གསུམ་དང་ནི།།ག་པུར་གུར་གུམ་ཅུ་གང་དང༌།།ལི་ཤི་གླ་སྒང་པུ་ཙེ་ཤེལ།།དུག་མོ་ཉུང་གི་ཕྱེ་མས་ནི།།མཁྲིས་པ་ཤ་ཡ་རྙོང་བུ་དང༌།། མཆིན་མཁྲིས་ཚད་པའི་ནད་རྣམས་སེལ།།གཡུ་རྙིང་གསེར་གྱི་མེ་ཏོག་དང༌།།རྒུན་འབྲུམ་ག་བུར་གུར་གུམ་དང༌།།ལི་ཤི་ཙནྡན་དཀར་པོ་དང༌།།དོམ་མཁྲིས་གླ་སྒང་སྦྱར་བ་ནི།།མཆིན་པ་བསྣད་འཁྲུགས་ཁྲག་སྐྱེས་དང༌།།མཆིན་པའི་ནད་རྣམས་སེལ་བར་བྱེད།།མ་ནུ་ཤུ་དག་པི་པི་ལིང༌།།དོང་དྲ་ན་ལེ་ཤམ་དང་ནི།།སུག་སྨེལ་ཤིང་ཚ་རྒྱམ་ཚྭ་དང༌།།ཁ་རུ་ཚྭ་དང་བུ་རམ་སྦྱར།བད་ཀན་སྐྱ་བོ་གྲང་བ་དང༌།།བེ་སྣབས་རྒྱུ་ལོང་ཞུགས་པ་དང༌།།སྐྱུག་བྲོ་ཟས་མི་ཞིམ་པ་དང༌།།སྐྱ་རྦབ་སྐྲངས་པ་དག་ལ་ཕན།།བྱི་ཏང་ཀ་དང་ཨ་རུ་ར།།བྱི་ཙེ་ལག་དང་དབང་པོ་ལག།སྒོག་པ་ནས་ཚིག་སྦྱངས་པས་ནི།།སྲིན་ནད་སྐྱུགས་པ་དག་ལ་ཕན།།གསེར་སྦྲུལ་ལི་ཤི་ག་བུར་དང༌།།གུར་གུམ་ནེ་ག་ཆུང་དང་ནི།།ཀྱི་ལྕེ་ནག་པོ་པུ་ཙེ་ཤེལ།།བཙན་དུག་ཤ་དུག་དུག་རྣམས་སེལ།།དུག་ནད་ཐམས་ཅད་འཇོམས་པའོ།སྲིན་བུ་སྡིག་པ་ཀ་ཀ་རུ།།སེའུ་འབྲུ་ཚ་བ་གསུམ་དང་ནི།།སུག་སྨེལ་ཤིང་ཚ་རྒྱམ་ཚྭ་དང༌།། ཁ་རུ་ཚྭ་དང་འབྲས་བུ་གསུམ།།ཤིང་ཚ་བུ་རམ་སྦྱར་བའི་ཕྱེ།།མཁལ་ནད་ཆུ་སྲི་གྲང་ནད་སེལ།།དུང་དང་བྱི་རུ་གླ་རྩི་དང༌།།ཙནྡན་དཀར་པོ་ག་བུར་དང༌།།གུར་གུམ་གླ་སྒང་ནས་སྔོན་མ།།གསེར་ནི་ཅུང་ཟད་སྦྱར་བ་ཡིས།།སྙིང་ཚད་ཆེ་ཞིང་འཕར་བ་དང༌།།སྙིང་རླུང་དངངས་ལ་ལྕེ་སྐམ་ཐུང༌།།ཨ་རུ་ར་དང་དོང་དྲ་དང༌།།བུ་རམ་དཀར་པོར་སྦྱར་བ་ནི།།བད་རླུང་ཆུ་སེར་དག་དང་ནི།།ཆུ་སྐེམ་འོར་དུ་ལྷུང་བ་དང༌།།ཕོ་བའི་ཁ་ན་དམུ་ཡོད་དང༌།།ལོང་སྐེམ་པ་ལ་འདིས་ཕན་ཏེ།།ཆུ་སྐོལ་ཁོལ་ཕུལ་ཏྲེ་སམ་མོ།།བུ་རམ་པི་པི་ལིང་དང་ནི།།དོང་དྲ་མྰུ་ལ་ཤིང་ཚ་དང༌།།སུག་སྨེལ་དག་གི་ཕྱེ་མ་ནི།།ཚ་བ་ལྡང་དུབ་ནུབ་མོ་རྔུལ།།ལུད་པ་ལུ་དང་དབུགས་མི་བདེ།།ཆུ་སྐྱགས་འོང་ཞིང་སྙིང་མི་བདེ།།འོར་དང་སྐྲན་ལ་འདིས་ཕན་ཏེ།།ཆུ་སྐོལ་ཕུལ་བ་བུ་རམ་ཕྱེ།།ཀྱི་ལྕེ་སྨུག་པོ་བུ་རམ་དང༌།།ལི་ག་དུར་དང་པུ་ཙེ་ཤེལ།།ཤིང་ཚྭ་འབོས་མོ་སྦྲོ་ལ་མ།།པི་པི་ལིང་དང་ནཱ་ག་པུཥ།།གུར་གུམ་དག་གི་ཕྱེ་མས་ནི།།བད་ཀན་མགུལ་བ་འགགས་པ་དང༌།།ལྟོར་ནི་དུག་སོང་འཁྲུ་བ་དང༌།།ཕྱི་ས་སྲི་དང་སྐྱུགས་པ་སྟེ།།ཆུ་སེར་དག་དང་དུག་ནད་སེལ།།བ་བྷི་མི་དང་པུ་ཙ་ར།ཤ་རི་ཤུ་དག་ཀྱི་ལྕེ་བ།།པུ་ཙེ་ཤེལ་དང་རྒྱམ་ཚྭ་དང༌།།པི་པི་ལིང་དང་ན་ལེ་ཤམ།།དུར་བྱིད་དག་གི་ཕྱེ་མར་སྦྱར།ཆུ་སྐོལ་དག་གིས་ཕུལ་བས་ནི།།སྐྲན་དང་དམུ་རྫིངས་འོར་ནད་ནི།།ཆུ་སྐྱགས་མཆིན་པ་སྐྲངས་པ་ལ།།ཁ་རུ་ཚྭ་དང་བུ་རམ་སྦྱར།ཆུ་སྐོལ་ཕུལ་བས་སྐྱུགས་པ་སེལ།།སོ་མ་རཱ་ཛ་ལས་ཕྱེ་མའི་ལེའུ་སྟེ་དོན་དགུ་བའོ།།
(སྐད་བཟང་རྡོ་རྗེ།)
བསམ་གཞིགས།
༡སྨན་གྱི་ནུས་པ་ཐོན་ཚུལ་ཇི་ལྟར་ཡིན།
༢སོ་མ་རཱ་ཛའི་གཞུང་དུ་བསྟན་པའི་དརྱ་ཀན་གྱི་སྐོར་ལ་ཁྱད་ཆོས་ཅི་ཡོད།
༣ཤེལ་ཕྲེང་དང་བསྡུར་ན་མི་འདྲ་ས་གང་དག་ཡོད།
༤ག་པུར་ལ་ཕྱེ་མའི་རྒྱལ་པོ་ཞེས་གསུངས་དོན་ཅི།
༥འདིར་བསྟན་པའི་སྦྱོར་བ་རྣམས་ལས་སྦྱོར་ཁོངས་གཅིག་ལ་སྨན་བསིལ་དྲོད་གཉིས་ཀ་འདུས་པ་ཡོད་དམ། 2/2 མདུན་ངོས། 上一页 1 2 |
