| བསྐ་བའི་ཞུ་རྗེས་མངར་ནུས་པ་རྩུབ་པས་རོ་སོགས་མ་མཚུངས་ཀྱང་ཉེས་ཀུན་སེལ་བ་དང༌།བསྐ་བའི་ཞུ་རྗེས་ཚ་བར་ཞུ་ནས་བཅུད་ལེན་ལ་ཕན་པ་དང༌།ཚ་བའི་ཞུ་རྗེས་མངར་བར་ཞུ་ནས་བད་རླུང་སེལ་བར་བཤད་པ་ལྟ་བུ་བསམ་ལས་འདས་པ་ན།གནས་ཚོད་དུ་ཕོ་བའི་མེ་གསུམ་དང་སྨན་གྱི་རྒྱུ་རྐྱེན་རོ་ནུས་ཞུ་རྗེས་སོགས་མཐའ་གཅིག་ཏུ་མ་ངེས་པར་སྨན་གྱི་མཐུ་ཞེས་བྱ་བ་སྨན་རང་རང་རང་གི་རང་བཞིན་ཁོ་ན་གཙོ་ཆེ་བ་ཡིན་ཏེ།དེ་ལ་སྨན་ནི་བཟང་དང་ངན།ལ་ལ་རོ་ཡིས་ལས་བྱེད་ལ།།གཞན་དག་འཇུ་བས་བྱེད་པ་ཡིན།།ཡོན་ཏན་གཞན་དང་ནུས་པ་དང༌།།མཐུ་ཡིས་ལ་ལ་བྱེད་པ་ཡིན།།ཞེས་སོགས་གསུངས་པས་ཀྱང་རྟོགས་པར་ནུས་སོ།གཞན་ཡང་གོང་དུ་དང་པོར་རོ་དྲུག་ཟས་སྐོམ་གང་ཟོས་པ།།ཞེས་སོགས་ཕོ་བའི་མེ་དྲོད་གཙོ་བོར་འཆད་པའི་སྐབས་མྱགས་བྱེད་སོགས་དབང་བཙན་པར་མཛད་པ་དང༌།མངར་དང་ལན་ཚའི་ཞུ་རྗེས་མངར་བར་ཞུ་ཞེས་སོགས་སྨན་གྱི་རོ་གཙོ་ཆེར་འཆད་པའི་སྐབས་ཡིན་པས་རོ་སྐྱེ་བའི་རྒྱུ་བཙན་པར་མཛད་པ་དང༌།ཐ་མ་ནུས་སྦྱོར་གྱི་སྐབས་སུ་དོན་གྱི་གནས་ཚོད་གཙོ་བོར་མཛད་ནས་གསུངས་པའི་རྣམ་དབྱེ་རྣམས་ཡིད་ལ་ངེས་དགོས་ཏེ།ཕོ་བའི་མེ་དང་འཕྲད་པ་ལས།།གང་ཞིག་རོ་གཞན་འབྱུང་འགྱུར་བ།།རོ་རྣམས་ཀྱིས་ནི་མཐར་ཞུ་བ།།དེ་ནི་ཞུ་བ་ཞེས་བཤད་དེ།།ཞེས་དང༌།རྫས་ཀྱི་རོ་ནི་འབབ་པ་ན།།ལས་ཀྱི་མཐལ་ནི་ཞུ་བ་ཡིན།།ཇི་སྲིད་གནས་པའི་ཡོན་ཏན་ཏེ།།ནུས་པ་ལས་ནི་ཤེས་པར་འགྱུར།།ཞེས་འཇུ་ཚུལ་གྱི་རྒྱུ་མཚན་ནི་དེ་ལྟ་བུ་ཞིག་ཡིན་ལ། དེས་ན་སྔར་གོང་དུ་བཤད་པའི་ཞུ་བའི་རྗེས་མངར་སྐྱུར་ཁུ་བ་གསུམ་པོས་ནི།ཉེས་པ་རྣམ་པ་གསུམ་པོ་གཉིས་གཉིས་ཞུ་རྗེས་རེ་རེས་སེལ་བར་བྱེད་པ་ཡིན་ཏེ།དཔེར་ན་ཞུ་རྗེས་མངར་བས་ནི་རླུང་མཁྲིས་གཉིས་སེལ་བར་བྱེད་ལ།ཞུ་རྗེས་སྐྱུར་བས་ནི་བད་རླུང་གཉིས་སེལ་ལ།ཞུ་རྗེས་ཁ་བས་ནི་བད་མཁྲིས་གཉིས་སེལ་བར་བྱེད་པ་ཡིན་ནོ།
གསུམ་པ།དམིགས་བསལ་ཤིན་ཏུ་ཕྲ་བར་བཤད་པ།
གསུམ་པ་དམིགས་བསལ་ཤིན་ཏུ་ཕྲ་བར་བཤད་པོས་དངོས་བསྟན་དང་ཤུགས་བསྟན་གཉིས་ལས།དང་པོ།དངོས་བསྟན་ནི།དང་པོ་ནི།འོ་མ་ཕལ་ཆེར་ཞུ་རྗེས་མངར་སྣུམ་ཞིང་མདངས་བསྐྱེད་ལུས་ཟུངས་འཕེལ།།རླུང་དང་མཁྲིས་སེལ་རོ་བཙའ་བྱེད།།བད་ཀན་བསྐྱེད་ལྕི་བསིལ་བ་ཡིན།།ཞོ་ནི་རོ་དང་ཞུ་རྗེས་སྐྱུར།རྟུག་སྐེམ་ལྕི་ལ་རླུང་ནད་སེལ།།བུ་རམ་ཤིང་ཁུ་འཁྲུ་ལྕི་སྣུམ།།ཤ་བསྐྱེད་རོ་བཙའ་བད་གཅིན་འཕེལ།།བསིལ་ཞིང་ཁྲག་མཁྲིས་སེལ་བ་དང༌།རོ་དང་ཞུ་རྗེས་མངར་བ་ཡིན།།ཆང་ནི་དྲོད་འབར་ཡི་ག་འབྱེད།།རྣོ་ཞིང་དྲོད་བསྐྱེད་ཁོང་བརྟས་དགའ།མངར་བཅས་ཁ་ཞིང་ཚ་བ་དང༌།།ཞུ་རྗེས་སྐྱུར་ཞིང་ཅུང་ཟད་འཁྲུ།ཞེས་སོགས་སྨན་སོ་སོའི་རོ་ནུས་ཞུ་རྗེས་ནི་རྐྱང་སེལ་གྱི་སྐབས་སུ་འཆད་དོ།
གཉིས་པ།ཤུགས་བསྟན་ནི།གོང་དུ་ཆུ་མ་རྩི་ལ་སོགས་པ་ཡི།ལྡན་པའི་རོ་རྣམས་དེ་ལས་བསྒྲེས་ཏེ་དཔྱད།།ཅེས་གསུངས་པའི་རིགས་པས་རྐྱང་བའི་རོ་དྲུག་གི་ཞུ་རྗེས་དེ་ལྟར་འབྱུང་བ་ལས་རྗེས་སུ་དཔགས་པས་སྨན་གཅིག་ལ་རོ་དྲུག་ཀ་དང་ལྡན་པ་དང༌།ལྔ་ལྡན་བཞི་ལྡན་གསུམ་ལྡན་གཉིས་ལྡན་ལྟ་བུ་དང༌།རོའི་སྟོབས་ཀྱིས་སྦྱོར་བ་ཇི་སྙེད་ཅིག་ཡོད་པ་རྣམས་ཀྱི་ཞུ་རྗེས་ཀྱང་ཤེས་པར་བྱ་དགོས་ཏེ།འདིར་ཡང་སྔར་བཤད་པ་དང་འདྲ་བར་སྤྱིར་བཏང་དུ་ཕོ་བར་གནས་པའི་བད་མཁྲིས་རླུང་གསུམ་གྱི་ཁམས་གཙོ་ཆེ་བའི་དབང་དུ་བྱས་ནས་དུས་ལ་ལྟོས་པའི་ཞུ་རྗེས་གསུམ་དང༌།ཅུང་ཟད་དམིགས་ཀྱིས་བསལ་བ་མྱགས་བྱེད་སོགས་ཀྱི་ཁམས་དང༌།རོ་རྣམས་ཀྱི་ཁམས་ཕན་ཚུན་འཕྲད་པ་གཙོ་ཆེ་བའི་དབང་དུ་བྱས་ནས་ཞུ་རྗེས་གསུམ་སོ་སོར་འབྱུང་ཚུལ་དང༌།ཤིན་ཏུ་དམིགས་བསལ་གྱིས་བསལ་བ་སྨན་དང་རང་རར་གི་མཐུ་ཉིད་གཙོ་ཚེ་བར་དོན་ལ་གནས་པ་ལྡན།མྱགས་བྱེད་སོགས་དང་རོའི་ཁམས་གང་ལའང་མ་ལྟོས་པར་ཞུ་རྗེས་གསུམ་རང་སྟོབས་ཀྱིས་འབྱུང་བའི་ཚུལ་ལས་ནམ་ཡང་འདའ་བ་མེད་ལ།དེ་བཞིན་དུ་སྦྱར་བའི་ཁྱད་པར་ལས་བྱུང་བའི་སྨན་ཞི་སྦྱང་གི་སྦྱོར་སྡེ་རེ་རེ་བ་རྣམས་ཀྱི་ཞུ་རྗེས་ཀྱང་མཚུངས་མོད།འོན་ཏུ་ཟིན་ཀྱང་ཞི་སྦྱང་གི་སྨན་མཐའ་དག་ཀུན་ཀྱང་འོག་ནས་ནུས་པ་སོ་སོར་བཤད་པའི་སྐབས་བཞིན་རྫས་དང་རང་གི་ནུས་པ་གནས་ཚོད་དང་མཐུ་སྟོབས་ཆེ་བའི་དབང་དུ་བྱས་ནས་ནུས་སྟོབས་འབའ་ཞིག་ཏུ་སྦྱར་བ་ཡིན་པས་དཔྱད་པ་སྔ་མ་གཉིས་ཀྱི་དབང་དུ་ཅུང་ཟད་མི་འགྲོ་བར་དཔྱད་གསུམ་པ་ཤིན་ཏུ་དམིགས་ཀྱིས་བསལ་བ་ཁོ་ན་ལྟར་དོན་ལ་གནས་པ་ཡིན་ཏེ།སྤྱིར་བཏང་བ་ལ་དམིགས་ཀྱིས་བསལ།།བསྟན་བཅོས་ཀུན་ལ་རབ་ཏུ་གཅེས།།ཞེས་གསུངས་པ་ལྟར་སོ།
བཞི་པ།ཞུ་རྗེས་མདོར་བསྡུས་སུ་བསྟན་པ།
ཞུ་རྗེས་མདོར་བསྡུས་སུ་བསྟན་པ་ལ།ཞུ་རྗེས་ཕོ་བའི་མེ་དང་འཕྲད་པའི་ཞེ།མངར་དང་ལན་ཚ་གཉིས་ལས་མངར་བ་ནི།།ས་ཆུ་ལས་སྐྱེས་འབྲས་བུའི་དུས་ན་ཡང༌།།དེ་ཉིད་ཤས་ཆེ་མྱགས་བྱེད་ཆེས་མཐུན་ཡང༌།།མེ་ཉིད་མྱགས་བྱེད་ཆུས་ཉམས་བྱས་པས་ན།། གཉིས་ཀའི་ཞུ་རྗེས་མངར་བ་ཉིད་དུ་གྲུབ།།དེ་བཞིན་འཇུ་བྱེད་ཉིད་དང་འཕྲད་པའི་ཞེ།མངར་བ་ས་ཡི་རང་བཞིན་མེ་བུ་ལ།།ཆུ་ནི་མེ་དགྲ་ཡིན་ཡང་རང་གནས་སུ།།རང་སྟོབས་ཆེ་བས་ཆུ་ནུས་ཞི་མི་གསལ།།དེ་བཞིན་ལན་ཚའི་ཆུ་ནུས་གོང་དང་འདྲ།།མེ་ནུས་ནང་འཕྲད་གྱུར་ཀྱང་མེ་གཅིག་པུས།།རོ་མི་སྐྱེ་སྟེ་དེ་བཞིན་མེ་མཉམ་དང༌།།འཕྲད་ཚེ་རང་གནས་མྱགས་བྱེད་ཉིད་ལས་ནི།།རིང་དུ་སོང་བས་མི་གསལ་དུ་འགྲོ་སྟེ།།མངར་བའི་ཆུ་ནུས་འཇུ་བྱེད་སྐབས་ཞི་བས།།རླུང་གི་ས་བོན་ཙམ་ཡང་ལྡང་མི་འཇུག།ས་ནུས་རླུང་གིས་གཏོར་བས་རྒྱུ་མེད་སོང༌།།ལན་ཚའི་ཆུ་ནུས་གོང་དང་མཚུངས་ངེས་ལ།།མེ་རླུང་ནུས་པ་སྟོབས་ཆེར་སོང་བ་སྟེ།།ཞུ་རྗེས་ཚ་བ་ཙམ་ཞིག་སྐྱེད་ཡོད་དེ།།སྐྱུར་བའི་ཞུ་རྗེས་རོ་དང་མཚུངས་རྒྱུ་ནི།།འཇུ་བྱེད་ཉིད་ཀྱི་སྐབས་སུ་བཤད་མོད་ཀྱང༌།།དང་པོར་མྱགས་བྱེད་ཉིད་དང་འཕྲད་པའི་ཚེ།སྐབས་དེར་འགྱུར་ཚུལ་ཉིད་ཀྱང་འཆད་དགོས་ཏེ།།དགོངས་གཞི་སྐྱུར་བ་མེ་ས་ལས་བྱུང་སྟེ།།འབྲས་བུའི་དུས་ན་དེ་ཉིད་ཤས་ཆེ་བ།།མྱག་བྱེད་ས་ཆུའི་རང་བཞིན་དང་འཕྲད་དུས།།མེ་ནུས་ཞི་སྟེ་མངར་བ་ཙམ་འཇུ་ཡང༌།།སླར་ཡང་འཇུ་བྱེད་ཉིད་དང་འཕྲད་པའི་ཞེ།མེ་སྟོབས་རང་གི་ས་བོན་ལས་ལྡང་ཞིང༌།།ས་སྟོབས་གནས་སྐབས་གཉིས་ཀར་མི་ཉམས་ཏེ།།མེ་ཡི་བུ་ཡང་ཡིན་པས་སྟོབས་འཕེལ་ཏེ།།ས་མེ་ལས་ནི་ཞུ་རྗེས་སྐྱུར་བར་གྲུབ།།སླར་ཡང་མེ་མཉམ་ཉིད་དང་འཕྲད་དུས་སུ།།ས་ནུས་ཉིད་ནི་རླུང་གིས་གཏོར་བ་དང༌།།མེ་ཡང་རང་སྟོབས་ཆུང་ན་འཆི་བས་ན།།ཞུ་རྗེས་ཉིད་ཀྱང་ཧ་ཅང་མི་གསལ་ལོ།།ཁ་ཚ་བསྐ་གསུམ་ཉིད་ལས་ཁ་བ་ནི།།ཆུ་རླུང་གིས་བསྐྱེད་མྱགས་བྱེད་འཕྲད་སྐབས་སུ།ཆུ་ནང་འཕྲད་དེ་ས་ཆུ་གཉིས་ཀ་ཡིས།།རླུང་ལ་གནོད་པས་རང་སྟོབས་མི་གསལ་ལོ།།དེ་ནས་འཇུ་བྱེད་ཉིད་དང་འཕྲད་པའི་ཚེ།།མེ་ཡིས་ཆུ་ནུས་སྐེམ་ཤིང་རླུང་གིས་ནི།།ས་བོན་ལས་ཀྱང་ལྡང་བར་མི་ནུས་པས།།དེ་བཞིན་རང་སྟོབས་འདིར་ཡང་མི་འཐོན་ནོ།དེ་ནས་མེ་མཉམ་ཉིད་དང་འཕྲད་པའི་དུས།།།རླུང་གི་ས་བོན་ཉིད་ལས་ལངས་པས་ན།།བུ་དང་འཕྲད་པས་ཆུ་ནུས་ཉིད་ལྡང་སྟེ།།ཆུ་རླུང་ཉིད་ལས་ཞུ་རྗེས་ཁ་བར་གྲུབ།།ཚ་བ་མེ་རླུང་གིས་བསྐྱེད་མྱགས་བྱེད་དང༌།།འཕྲད་དུས་མེ་ནུས་མྱགས་བྱེད་ཆུས་ཉམས་ཏེ།།རླུང་གི་དགྲ་གཉེན་གཉིས་ཀ་དང་འཕྲད་པས།།བཏང་སྙོམས་ཉིད་དེ་རང་སྟོབས་མི་གསལ་ལོ།།འཇུ་བྱེད་སྐབས་སུ་མེ་ཡི་ས་བོན་ལས།།ལངས་ཏེ་མེ་ནུས་ནང་འཕྲད་སྟོབས་ཆེ་བས།།རླུང་གི་ནུས་པ་ཉིད་བཅོམ་མི་གསལ་ལོ།།མེ་མཉམ་དུས་སུ་རླུང་གིས་ས་བོན་ལས།།ལངས་ཏེ་དེ་གཉིས་ལས་ནི་མེ་ཡི་སྟོབས།། སྦར་བས་ཞུ་རྗེས་ཉིད་ཀྱང་ཚ་བར་གྲུབ།།བསྐ་བ་ས་རླུང་གིས་བསྐྱེད་མྱགས་བྱེད་དུས།།ས་ནུས་ནང་འཕྲད་རླུང་ནུས་བཅོམ་མི་གསལ།། འཇུ་བྱེད་དུས་ནི་ས་ནི་མ་དང་འཕྲད།།རླུང་ནི་བུ་དང་འཕྲད་པས་མེ་སྟོབས་སྦར།ས་མེ་ལས་ནི་སྐྱུར་སྐྱེ་མི་འགལ་ལོ།།མེ་མཉམ་དུས་སུ་རླུང་ནུས་ནང་འཕྲད་པས།།རླུང་གིས་ས་ནུས་གཏོར་ནས་འཇུ་བྱེད་ཀྱི།།ཤུགས་དང་བཅས་པ་མེ་རླུང་ཉིད་ལས་ནི།།ཞུ་རྗེས་ཚ་བར་རིགས་པས་ཡང་དག་གྲུབ།།དེ་ཡང་འགྲེལ་བ་ཟླ་བའི་འོད་ཟེར་ལས།། ཕོ་བའི་མེ་དང་འཕྲད་པའི་ཚེ།གང་ཞིག་རོ་གཞན་འབྱུང་འགྱུར་བས། རོ་རྣམས་ཀྱིས་ནི་མཐར་ཞུ་བ།དེ་ནི་ཞུ་བ་ཞེས་བཤད་དོ།ཞེས་གསུངས་དགོངས་དོན་རིག་པའི་མདའ་ཡིས་བསྣུན།།
(མཁའ་འགྲོ་སྐྱབས)
བསམ་གཞིགས།
༡སྨན་ཀུན་གྱི་ཞུ་རྗེས་བསྡུས་ན་རོ་གསུམ་དུ་འདུ་བའི་རྒྱུ་མཚན་ཅི།
༢གཉེན་པོ་སྨན་གཅིག་གི་སྟེང་དུ་རོ་ནུས་ཞུ་རྗེས་གསུམ་ག་ཚང་བ་ཡོད་དམ།
༣རོའི་ནུས་པ་དང༌།ནུས་པའི་ནུས་པ།ཞུ་རྗེས་ཀྱི་ནུས་པ་གསུམ་ལ་ཁྱད་པར་ཅི་ཞིག་ཡོད།
༤ཞུ་རྡེས་སྐབས་ཀྱི་རོའི་འབྱུང་བ་རྣམས་མ་བུ་དགྲ་གྲོགས་སུ་འགྱུར་ཚུལ་ཇི་ལྟར་ཡིན།
༥རོ་ལྡན་པའམ་འདུས་པའི་སྨན་གྱི་སྦྱོར་བ་ཇི་སྙེད་ཙིག་ཡོད་པ་དེ་རྣམས་ཀྱི་ཞུ་རྗེས་ཇི་ལྟར་ཤེས་དགོས།
ས་བཅད་གཉིས་པ།རོའི་ཁྱད་པར་བཤད་པ།
དང་པོ།ནུས་སྟོབས་ཡོན་ཏན་ཐམས་ཅད་རོ་ལ་བརྟེན་ཚུལ།
རོའི་ཁྱད་པར་བཤད་པ་ལ་ནུས་སྟོབས་ཡོན་ཏན་ཐམས་ཅད་རོ་ལ་བརྟེན་ཚུལ་དང༌།རོ་སོགས་མི་མཐུན་པ་འབྱུང་བའི་རྒྱུ་མཚན་དང༌།དེ་ཉིད་མཐུན་དགོས་པར་གདམས་པ་དང་གསུམ་ལས།དང་པོ་ནི།སྔར་བཤད་མ་ཐག་པའི་ནུས་སྟོབས་ཡོན་ཏན་དེ་དག་རྣམས་ཀྱང་ཕལ་ཆེར་ནི་རོ་དྲུག་པོ་ལས་རྗེས་སུ་འབྱུང་བ་ཡིན་ཏེ།རོ་དེ་ཡང་ནི།ས་ཆུ་མེ་རླུང་ལ་སོགས་པའི་འབྱུང་བ་རྣམས་ལ་བརྟེན་ནས་བྱུང་བ་ཡིན་པ་དེའི་ཕྱིར་ཡོན་ཏན་ལྕི་སྣུམ་ཡང་རྩུབ་ལ་སོགས་པ་ནི་རོ་དྲུག་པོ་དེ་ལས་འབྱུང་བ་ཡིན་ཏེ།སྨན་གྱི་ཡོན་ཏན་ལྕི་སོགས་དང༌།།རོ་ནི་ས་ལ་སོགས་བརྟེན་པས།།མཚུངས་པར་སྤྱོད་པ་ཉེར་གདམས་པས།།རོ་ལས་མིང་དུ་བཏགས་པ་ཡིན།།ཞེས་བྱ་བ་དེ་ལྟ་བས་ན་རོ་དྲུག་ཏུ་གསུངས་པའི་ནང་ནས་རོ་ལན་ཚ་བ་དང༌།བསྐ་བ་དང༌།མངར་བ་དང་བཅས་པའི་རྣམ་པ་གསུམ་པོ་འདི་ནི།རིམ་པ་བཞིན་དུ་ལན་ཚ་བ་ལས་བསྐ་བ་ལྕི།བསྐ་བ་ལས་མངར་བ་ཤིན་ཏུ་ལྕི་བ་དང༌།དཔེ་དེ་བཞིན་དུ་ལན་ཚ་སྐྱུར་མངར་གསུམ་པོ་ནི་རིམ་བཞིན་སྔ་མ་སྔ་མ་ལས་ཕྱི་མ་ཕྱི་མ་རྣམས་སྣུམ་པ་ཡིན་ནོ།དེ་བཞིན་དུ་རོ་བསྐ་བ་དང༌།ཁ་བ་དང༌།མངར་བ་དང་གསུམ་པོ་འདི་ནི་རིམ་པ་བཞིན་སྔ་མ་ལས་ཕྱི་མ་ཉིད་ཤིན་ཏུ་བསིལ་བ་དང༌།ཁ་བསྐ་མངར་རྣམས་ནི་རིམ་པ་ལྟར་རྟུལ་བ་དང༌།སྐྱུར་ཚ་ཁ་བ་རྣམ་པ་གསུམ་པོ་ནི་རིམ་བཞིན་ནུས་པ་ཡང་ལ་རྩུབ་པ་ཤས་ཆེ་བ་དང༌།ཚ་སྐྱུར་ལན་ཚ་རྣམ་པ་གསུམ་པོའི་ནུས་པ་ཚ་ལ་རྣོ་བའི་གོ་རིམ་དང་ལྡན་པ་ཡིན་ནོ།དེ་ལྟར་བཤད་མ་ཐག་པ་དེ་རྣམས་ནི་གཞུང་འདི་ཉིད་ཟབ་ཅིང་དགོངས་གཞི་དགོངས་པ་ཅན་དུ་གསུངས་པ་མང་བས་རང་གིས་མ་གོ་བ་དང་ལོག་པར་རྟོག་པ་དང་ཐེ་ཚོམ་གྱི་བློས་བཤད་ན་མི་རུང་བས་འདིར་འབྲུ་བསྣོན་ཙམ་དུ་བྱས་པ་ཡིན་གྱིས།ལར་རོ་ནུས་ཞུ་རྗེས་མཐུན་པའི་དབང་དུ་བྱས་ན་འདི་ལྟར་ཉམས་སུ་ལེན་པར་རིགས་ཏེ།སྐྱུར་དང་ལན་ཚ་མངར་གསུམ་རིམ་བཞིན་ལྕི།དེ་བཞིན་མངར་སྐྱུར་ལན་ཚ་སྣུམ་པ་ཡིན།། 2/3 མདུན་ངོས། 上一页 1 2 3 下一页 尾页 |
