| བསྐ་མངར་ཁ་བསིལ་ཁ་བསྐ་མངར་བ་རྟུལ།།སྐྱུར་ཁ་ཚ་བ་རྣམ་གསུམ་ཡང་ལ་རྩུབ།།ལན་ཚ་སྐྱུར་ཚ་རྣམ་གསུམ་ཚ་ལ་རྣོ།ཞེས་པ་ལྟར་བྱས་ན་གོ་བ་དང་མཐུན་ཞིང༌།དེས་ན་གོང་གི་ནུས་སྟོབས་ཡོན་ཏན་གྱི་སྐབས་ཐམས་ཅད་དུ་བརྟེན་པ་རྒྱུའི་ས་སྨན་གྱི་ཡོན་ཏན་དྲུག་དང༌།ཆུ་སྨན་གྱི་དྲུགམེ་སྨན་གྱི་བདུན།རླུང་སྨན་གྱི་དྲུག་རྣམས་ཕན་ཚུན་འཕྲད་པ་ལ་བརྟེན་ནས་རྟེན་པ་འབྲས་བུ་འབྱུང་བ་དེ་ཡང༌།དཔེར་ན་རོ་ནི་མངར་སྐྱུར་ལན་ཚ་ཁ་ཚ་བསྐ།།གོ་རིམ་བཞིན་དུ་འཚོ་བྱེད་སྟོབས་ཆེན་ཡིན།།ཞེསབྱའི་རིགས་པས་ཕྱི་མ་བསྐ་བ་ལས་སྔ་མ་ཚ་བ་དང་ཁ་བ་དང་ལན་ཚ་བ་དང་སྐྱུར་བ་དང་མངར་བའི་བར་དུ་ཡོན་ཏན་གྱི་སྟོབས་རིམ་པ་བཞིན་དུ་ཆེ་བར་གསུངས་པས་འདིར་ཡང་འཁྱེར་བདེ་བར་ཚིགས་སུ་བཅད་ན་འདི་ལྟར་རོ།མངར་བས་ས་ཆུ་གཉིས་འཕྲད་ཡོན་ཏན་ནི།།ལྕི་རྟུལ་བསིལ་སླ་བརྟན་སྣུམ་འཇམ་མཉེན་བརྒྱད།།དེ་ཡང་སྔ་ཕྱིའི་ཡོན་ཏན་ཆེ་ཆུང་ནི།།ལྰི་བཅུ་རྟུལ་བདུན་བསིལ་སླ་བརྟན་གསུམ་ལྔ།།སྣུམ་བཞི་འཇམ་གསུམ་མཉེན་པ་ཡོན་ཏན་གཅིག།དེ་བཞིན་སྐྱུར་བ་མེ་ས་ལས་གྲུབ་པ།།ཚ་སྐམ་སྣུམ་བརྟན་ལྕི་རྣོ་རྩུབ་པ་བདུན།།དེ་ཡང་ཚ་བདུན་སྐམ་དྲུག་སྣུམ་བརྟན་བཞི།།ལྕི་གསུམ་རྣོ་གཉིས་རྩུབ་པ་ཡོན་ཏན་གཅིག།ལན་ཚ་ཆུ་མེ་ལས་གྲུབ་ཡོན་ཏན་ནི།།སྣུམ་རྩུབ་རྣོ་ཚ་ལྕི་སླ་མཉེན་གཡོ་བརྒྱད།།དེ་ཡང་སྣུམ་རྩུབ་བཞི་བཞི་རྣོབ་གསུམ།།ཚ་གཉིས་ལྕི་སླ་མཉེན་གཡོ་རེ་རེའོ།ཁ་བ་ཆུ་རླུང་ལས་གྲུབ་ཡོན་ཏན་ནི།།བསིལ་སླ་རྟུལ་རྩུབ་ཡང་མཉེན་དྲུག་དང་ལྡན།།བསིལ་བདུན་སླ་ལྔ་རྟུལ་རྩུབ་གསུམ་གསུམ་སྟེ།།ཡང་བ་གཉིས་ལ་མཉེན་པ་ཡོན་ཏན་གཅིག།ཚ་བ་མེ་རླུང་ལས་གྲུབ་ཡོན་ཏན་ནི།།ཡང་རྩུབ་སྐམ་གཡོ་རྣོ་ཚ་དྲུག་དང་ལྡན།།ཡང་དགུ་(བཅུ)རྩུབ་བདུན་སྐམ་གཡོ་རྣོ་གསུམ་དྲུག།ཚ་ལྔ་ཡོན་ཏན་གོ་རིམ་བཞིན་དུ་བཞག།བསྐ་བ་ས་རླུང་ལས་གྲུབ་ཡོན་ཏན་ནི།།གྲང་རྟུལ་སྐམ་པ་གསུམ་དང་ལྡན་པ་སྟེ།།གྲང་རྟུལ་བཞི་བཞི་སྐམ་པ་ཡོན་ཏན་གཉིས།།དེ་དག་ཡོན་ཏན་ལྔ་རིམ་བཞག་པས་ཤེས།།
གཉིས་པ།རོ་སོགས་མི་མཐུན་པ་འབྱུང་བའི་རྒྱུ་མཚན།
གཉིས་པ་རོ་སོགས་མི་མཐུན་པའི་རྒྱུ་མཚན་ནི།རོ་ནུས་ཞུ་རྗེས་ལ་སོགས་པ་མ་བཅོས་པ་གང་ཡིན་པ་དེ་ཡང་ནི་སྟོབས་ཤིན་ཏུ་ནས་ཆེ་བ་ཅན་ཡིན་ཏེ།དཔེར་ན་རོ་མངར་བ་ལྟ་བུའི་ཞུ་རྗེས་ཀྱང་མངར་བར་ཞུ་བ་ནུས་པ་ཡང་ལྕི་རྟུལ་བསིལ་སླ་བརྟན་འཇམ་མཉེན་སོགས་རོ་ནུས་ཞུ་རྗེས་མཐུན་པ་སྟེ།དེ་ལྟ་བུ་ནི་རོ་གང་ལ་ཡོད་ཀྱང་སྟོབས་ཤིན་ཏུ་ནས་ཆེ་བ་ཡིན་ལ།གལ་ཏེ་རོ་ནུས་ཞུ་རྗེས་གསུམ་ཀ་མཉམ་དུ་ཟིན་ཀྱང༌།ནུས་པ་སོ་སོའི་རྟེན་འབྱུང་བ་ལྔ་པོ་ཤས་ཆེ་ཆུང་གི་སྟོབས་དང༌།འབྱུང་འགྱུར་ཡང་སྨན་སོ་སོའི་གསར་རྙིང་སྣ་ཚོགས་པ་ལས་གྱུར་པ་དང༌།ཐང་ཕྱེ་ལ་སོགས་པ་སྦྱར་བའི་དབང་ལས།མཐར་ཐུག་གི་ནུས་པ་ཆེ་ཆུང་དང།ཕན་གནོད་སྣ་ཚོགས་འབྱུང་བར་གྱུར་བ་ཡིན་ཏེ།དེས་ན་རོ་དང་ནུས་པ་ཞུ་རྗེས་གསུམ་མི་མཐུན་ན་གང་གི་མཐུན་པ་དེའི་སྨན་འོག་མས་གོང་མ་དེ་ཉིད་ཟིལ་གྱིས་གནོན་པར་འགྱུར་བ་ཡིན་ཏེ།སྨན་གྱི་རོ་སོགས་གང་དང་གང༌།།སྟོབས་ལྡན་ཉིད་ཀྱིས་གནས་བྱེད་དེ།།ཤིན་ཏུ་ཟིལ་མནན་དེ་དང་དེའི།། སྒྲུབ་བྱེད་རྒྱུ་ནི་ཉིད་དུ་གནས།།ཞེས་བྱ་བ་སྨན་གྱི་རིགས་སུ་གཏོགས་པའི་རོ་ནུས་པ་དང༌།འཇུ་བ་དང༌།མཐུ་རྣམས་གང་དང་གང་ཡིན་པ་དེ་དག་གི་ནང་ནས་སྟོབས་དང་ལྡན་པ་དེ་ཉིད་ཀྱིས་སྨན་ལ་གནས་པར་བྱེད་པ་དེས་ནི་སྨན་གྱི་རིགས་དེ་ཤིན་ཏུ་ཟིལ་གྱིས་མནན་ཅིང་སྟོབས་ཆུང་བ་གཞན་དག་ཕམ་པར་བྱས་ནས་གནས་པ་དེ་དང་དེ་ནི་བྱ་བ་གང་སྒྲུབ་པར་བྱེད་པ་ཡིན་ནོ།།དེ་ཡང་ནི་རོ་ཡིས་འདི་བྱས་སོ།།ནུས་པས་ནི་འདི་བྱས་སོ།།སྟོབས་ཀྱིས་ནི་འདི་བྱས་སོ་ཞེས་བྱ་བ་ལྟ་བུའོ།།དོན་འདི་ཉིད་ཀྱིས་དཔེར་བརྗོད་བསྡུས་པ་ལས།སྤྲོས་ཏེ་བཤད་པ་འདིར་བསྟན་པ་ཡིན་ལ། གང་འདི་ལྟར་རོ་ལ་སོགས་པའི་རིགས་སུ་གཏོགས་པས་རོ་གཞན་དག་ལ་སྟོབས་དང་ལྡན་པར་གནས་ཤིང་དེ་དང་དེ་ཉིད་ཤིན་ཏུ་ཟིལ་གྱིས་མནན་ནས་བསྒྲུས་པའི་རྒྱུ་ཉིད་དུ་བྱེད་ཀྱི་རང་དང་གཞན་གྱི་སྟོབས་ཀྱིས་སྨན་ལ་རྣམ་པར་གནས་དང།སྟོབས་དང་ལྡན་པ་དང་སྟོབས་ཆུང་བ་དང་གཉིས་ཀའི་ཚུལ་གྱིས་རང་རང་གི་ལས་བྱེད་པ་ཡིན་པས་ན་དེའི་ཕྱིར་འདི་བསྟན་པར་བྱ་བའི་ཕྱིར་སྨྲས་པ་ནི།ཡོན་ཏན་མི་འཕྲོད་སྦྱར་བ་ནི།།མང་བས་ཉུང་ངུ་ཟིལ་གྱིས་གནོན།། ཞེས་བྱ་བ་ལ།གང་གི་ཡོན་ཏན་མི་འཕྲོད་པ་དག་སྦྱར་ཞིང་བསྲེས་པ་ན།མང་པོ་སྟོབས་དང་ལྡན་ཞིང་ཆུང་ངུ་ཟིལ་གྱིས་གནོན་ཅིང་རྒྱལ་བར་བྱེད་དེ།།ཡོན་ཏན་མི་འཕྲོད་ཅེས་བྱ་བ་འདིར་ནི་རྫས་མི་འཕྲོད་པའི་སྦྱོར་བ་ལ་བྱ་ཡི་ཡོན་ཏན་མི་འཕྲོད་པ་ཉིད་དུ་ནི་སྨྲ་བར་རིགས་པ་མ་ཡིན་ནོ།།དེ་ཡང་དྲང་སྲོང་ཙ་ར་ཀས་བཤད་པ།སྦྱོར་བ་ནི་རྫས་གཉིས་སམ་མང་པོ་སྦྱར་བ་ཡིན་ལ།དེ་ཡང་མི་འཕྲོད་པ་ནི་གཉིས་ཏེ།རང་བཞིན་མི་འཕྲོད་པ་དང་འབྲས་བུ་མི་འཕྲོད་པའོ།རང་བཞིན་མི་འཕྲོད་པ་ནི།དཔེར་ན་སྨན་ཡང་བ་དང་ལྕི་བ་སྦྱར་བ་དང༌།ཚ་བ་དང་བསིལ་བ་སྦྱར་བ་ལ་སོགས་པའོ། འབྲས་བུ་མི་འཕྲོད་པ་ནི་དཔེར་ན་རླུང་གི་ནད་སེལ་བའི་ཕྱིར་སྨན་རྩུབ་པ་དང་དྲོ་བ་ལྷན་ཅིག་སྦྱར་བ་དང༌།དེ་བཞིན་དུ་བསིལ་བ་དང་དྲོ་བ་ལྷན་ཅིག་སྦྱར་བ་ལ་སོགས་པའོ།།དེ་ལྟར་ན་རང་བཞིན་གྱིས་ཡོན་ཏན་མི་འཕྲོད་པའི་སྨན་གྱི་སྦྱོར་བ་དང༌།དེ་བཞིན་དུ་འབྲས་བུ་མི་འཕྲོད་པའི་སྨན་གྱི་སྦྱོར་བ་ཕན་ཚུན་རིགས་མི་མཐུན་པའི་སྦྱོར་བ་དེ་ལ་ནི་གང་རྫས་ཀྱི་རིགས་མང་པོས་ཟིལ་གྱིས་མནན་ནས་དེ་ཉིད་རྒྱུ་ཉིད་དུ་སྒྲུབ་པར་བྱེད་པ་གནས་པར་མཐོང་ངོ༌།།དེ་ཡང་དཔེར་ན་སྦྲང་རྩི་ནི་མངར་དུ་ཟིན་ཀྱང་བད་ཀན་ཞི་བར་བྱེད་དེ།།རོ་མངར་བ་ནི་བད་ཀན་བསྐྱེད་པར་བྱེད་པ་ཡིན་ཡང༌།།སྦྲང་རྩིས་བད་ཀན་ཞི་བར་བྱེད་པ་ནི།མི་མཐུན་པ་མི་འཕྲོད་པའི་ཡོན་ཏན་དང་ལྡན་པའི་ཕྱིར་རོ།།དེ་ལྟར་ན་རིགས་མཐུན་པའི་སྤྱོད་པ་མཚན་ཉིད་འདྲ་བ་ལས་ཀྱང་གང་ཞིག་གང་གིས་ཟིལ་གྱིས་མནན་ནས་རང་རྒྱུད་དུ་གྲུབ་པ་ཡིན་པར་སོམ་ཉིར་གྱུར་པ་དེ་དགག་པར་བྱ་བའི་ཕྱིར་འདིར་སྨྲས་པ་ནི།རོ་དང་འཇུ་བའི་མཐུ་དག་ནི།།དེ་ཡི་སྟོབས་ཀྱིས་ཟིལ་གྱིས་གནོན།།ཞེས་བྱ་བ་ལ་རོ་དང་ནུས་པ་དང་འཇུ་བ་དང༌།སྟོབས་རྣམས་ནི་ཇི་ལྟར་ལྷན་ཅིག་སྦྱར་ཞིང་ནུས་པ་མཉམ་པ་ཡིན་དུ་ཟིན་ཀྱང༌།རང་བཞིན་གྱིས་འཇུ་བས་ནི་རོ་ཟིལ་གྱིས་གནོན་ཏེ།དེ་ཡི་ནུས་པ་མེད་པར་བྱས་ནས་རང་གི་བྱ་བ་བསྟན་པའི་སྒོ་ནས་དེའི་ནུས་པ་ཟིལ་གྱིས་མནན་ནས་རང་གི་ནུས་པ་གསལ་བར་བསྟན་ཏོ།དེ་བཞིན་དུ་རོ་དང་འཇུ་བ་དེ་གཉིས་ཀྱང་མཐུས་ཟིལ་གྱིས་གནོན་ལ།རོ་དང་འཇུ་བ་དང་མཐུ་དེ་རྣམས་སྟོབས་ཀྱིས་ཟིལ་གྱིས་གནོན་པ་ཡིན་ནོ།རོ་སོགས་དེ་ལྟར་སྟོབས་ནི་མཉམ།མ་བཅོས་པ་ནི་སྟོབས་དང་ལྡན།།ཞེས་བྱ་བ་ལ་རོ་དང་འཇུ་བ་དང་མཐུ་དང་སྟོབས་རྣམས་ནི་དེ་ལྟར་ཞེས་པ་རྣམ་པ་འདིས་སྟོབས་མཉམ་ཞིང་མཚུངས་པ་ཡིན་ལ།དེའི་སྟོབས་ནི་རོ་ལ་སོགས་པར་དམིགས་ནས་མ་བཅོས་པ་གང་ཡིན་པ་དེ་ནི་སྟོབས་དང་ལྡན་པར་བཤད་དེ།རྫས་གང་གིས་རོ་མངར་བ་དེ་ཇི་སྐད་བཤད་པ་བཞིན་དུ་འཇུ་པ་མངར་བ་དང་ལྡན་པ་དང༌།དེ་བཞིན་དུ་ནུས་པ་བསིལ་བ་དང་ལྡན་པ་ནི་སྟོབས་ཆེ་བ་ཡིན་ལ།དེ་བཞིན་དུ་རོ་སྐྱུར་ཇི་སྐད་བཤད་པའི་ཞུ་རྗེས་སྐྱུར་བ་དང་ལྡན་ཞིང།དེ་བཞིན་དུ་ཚ་བའིནུས་པ་དང་བཅས་པ་དང༌།དེ་བཞིན་དུ་རོ་ཚ་བ་ཡང་ཞུ་རྗེས་ཀྱང་ཚ་ཞིང་ནུས་སཚབ་དང་ལྡན་པ་དང༌།དེ་བཞིན་དུ་འོ་མ་ཆང་ན་ལེ་ཤམ་ལ་སོགས་པ་ལས།འོ་མ་ནི་རོ་མངར་ལ་འཇུ་བ་དང་ནུས་པ་བསིལ་བ་དང༌།ཆང་ནི་རོ་སྐྱུར་ལ་འཇུ་བ་དང་ནུས་པ་དྲོ་བ་དང༌།ན་ལེ་ཤམ་ཡང་རོ་ཚ་ལ་འཇུ་བ་དང་ནུས་པ་དྲོ་བར་བྱེད་པ་སྟེ།སྨན་དེ་དག་ནི་རོ་དང་འཇུ་བ་དང་ནུས་པ་དང་སྟོབས་དག་མཉམ་པས།མ་བཅོས་པའི་སྟོབས་དང་ལྡན་པ་ཞེས་བྱ་བ་ཡིན་པར་ཤེས་པར་བྱའོ།།ཁོ་བོ་ཅག་གིས་རོ་དང་འཇུ་བ་དང་ནུས་པའི་རང་བཞིན་ཇི་ལྟ་བུ་ཡིན་པ་ནི་ལས་རྗེས་སུ་དཔགས་པས་ཤེས་ན་མཐུ་ཞེས་བྱ་བའི་རང་བཞིན་ཤེས་པར་དཀའ་བས།དེ་མི་ཤེས་པས་ཐེ་ཚོམ་དུ་གྱུར་ན་མཐུ་ནི་གང་ཞིག་ཡིན།གང་ལས་ནི་རྗེས་སུ་དཔགས་པར་བྱ་ཞེ་ན།འདིར་སྨྲས་པ་ནི།རོ་སོགས་མཉམ་པའི་ལས་གང་ཡིན།།ཁྱད་འཕགས་དེ་ནི་མཐུ་ལས་སྐྱེས།།ཞེས་བྱ་བ་ནི།རོ་ལ་སོགས་པ་མཉམ་ཞིང་མཚུངས་པ་ཉིད་ཀྱིས་ལས་གང་ཁྱད་པར་དུ་འཕགས་པ་སྨན་གང་ལ་སྣང་བ་དེ་ནི་མཐུ་ལས་སྐྱེ་བ་ཡིན་པར་ཤེས་པར་བྱའོ།།རྗེས་སུ་དཔགས་པ་དེ་ཡང་མཐུ་ཞེས་བྱ་བར་ཤེས་པར་བྱ་སྟེ།འདི་ནི་རྫས་ཀྱི་མཐུ་ཡིན་ནོ།དེ་ཡང་སྨན་གཉིས་རོ་དང་ཞུ་རྗེས་ནུས་པ་གསུམ་མཉམ་དུ་ཟིན་ཀྱང་ལས་ནི་མི་མཐུན་པར་བྱེད་དེ།ཁག་གཅིག་གིས་འཁྲུ་བར་བྱེད་ཅིང་ཁག་གཅིག་གིས་འཁྲུ་བ་གཅོད་པར་བྱེད་དོ།།དེས་ན་སྟོབས་ཀྱི་སྟོབས་ཉིད་ཡོད་པ་ཉིད་དུ་ཤེས་པར་བྱའོ།དེ་ལྟར་ན་སྨན་རེ་རེའི་འཇུག་པ་དང་ལྡོག་པའི་མཚན་ཉིད་ཅན་གྱི་ཆོས་རང་གི་རང་བཞིན་དངོས་པོ་རྐྱེན་སྣ་ཚོགས་པ་ལས་བྱུང་བ།ངེས་པར་བྱེད་པའི་མཚན་ཉིད་ཅན་དེ་ནི་མཐུ་ཞེས་བྱ་སྟེ།དངོས་པོ་གཞན་གྱི་མཐུ་ནི་མ་ཡིན་ཏེ།དན་ཏི་དང་ནི་ཙི་ཏྲ་ཀ།རོ་སོགས་མཚུངས་ཀྱང་དན་ཏིས་འཁྲུ།ཤིང་མངར་རྒུན་འབྲུམ་འདྲ་ཡང་འཁྲུ།།འོ་མ་མར་འདྲ་མར་དྲོད་བསྐྱེད།།ཅེས་སོགས་གསུངས་སོ།
གསུམ་པ།རོ་ནུས་ཞུ་རྗེས་མཐུན་དགོས་པར་གདམས་པ།
དེ་ཡང་རོ་ནུས་ཞུ་རྗེས་མཐུན་དགོས་པར་གདམས་པ་ནི།རོ་ནུས་ཞུ་རྗེས་རྣམས་མི་མཐུན་ན།འོག་མས་གོང་མ་ཟིལ་གྱིས་གནོན་པའི་རྒྱུ་མཚན་དེ་ལྟ་བས་ན།དེ་གསུམ་གང་གོང་དུ་སྨྲོས་པ་ལྟར། ཐམས་ཅད་མཐུན་པ་གཅིག་བྱུང་ན་རོ་ཡིས་ལས་བྱེད་པ་ཡིན་ཞེས་བྱ་བ་ལ།རོ་བཞིན་མི་གནོད་ཅེས་པ་རོའི་དབང་དུ་བྱས་ན་རླུང་མཁྲིས་བད་ཀན་གང་རུང་ལ་མི་གནོད་པའི་སྨན་ཞིག་བྱུང་ཕྱིར། ཞུ་རྗེས་ཀྱིས་ལས་བྱེད་པ་ཞེས་བྱ་ལ་དེ་ཡང་སྨན་གང་ཞིག་རོའི་དབང་དུ་བྱས་ན།རླུང་མཁྲིས་བད་ཀན་གང་རུང་ལ་གནོད་པར་རིགས་ཀྱང་མི་གནོད་པར་ཕན་པར་འགྱུར་བ་ནི།རོ་ལས་གོ་བཟློག་པ་ཞེས་བྱ་སྟེ།ནུས་པས་ལས་བྱེད་པར་འགྱུར་བ་ཡིན་པས་དེས་ན་ཐང་ཕྱེ་སོགས་སྦྱོར་བ་གང་ཡང་རུང་བ་ཐམས་ཅད་རོས་ལས་བྱེད་པ་རྣམས་ཕྱོགས་གཅིག་ཏུ་བསྡེབས་ནས་གཏོང་བ་དང༌།དེ་བཞིན་དུ་ནུས་པས་ལས་བྱེད་པ་རྣམས་ཀྱང་ཕྱོགས་གཅིག་ཏུ་བསྡེབས་ནས་གཏོང༌།དེ་བཞིན་དུ་ཞུ་རྗེས་ཀྱིས་ལས་བྱེད་པ་རྣམས་ཀྱང་ཕྱོགས་གཅིག་ཏུ་བསྡེབས་ཏེ་སྦྱར་དགོས་ཤིང།དེ་ལྟ་བུའི་སྦྱོར་ཚུལ་མ་ཤེས་པར་བབ་ཆོལ་དུ་སྦྱར་བའི་ཚེན་ཞུ་རྗེས་ཀྱི་ལས་བྱེད་པ་ཤུགས་ཆེ་ན་རོའི་ནུས་པ་གསོད་ཅིང་ནུས་པས་ལས་བྱེད་པ་ཤུགས་ཆེ་ན་སྔ་མ་གཉིས་ཀའི་ནུས་པ་ལྷག་མེད་དུ་གཏོང་བས།དེའི་ཕྱིར་རོ་ནུས་ཞུ་རྗེས་ཀྱི་ལས་བྱེད་ཚུལ་རྣམས་ནི་མཁས་པ་རྣམས་ཀྱིས་ཁོང་དུ་ཆུད་པར་བྱས་ནས་སྨན་གྱི་སྦྱོར་བ་བྱེད་པ་ནི་མན་ངག་གི་ཁྱད་ཆོས་བླ་ན་མེད་པའོ།།གལ་ཏེ་སྦྱོར་ཚུལ་དེ་ལྟ་བུ་མ་ཤེས་ན།རྒྱུད་ཆེན་ཉིད་ལས་ཇི་ལྟར་བཤད་པ་ལྟར་ཉམས་སུ་ལེན་དགོས་ཏེ།སྤྱི་བོའི་གཙུག་ནས་རྐང་མཐིལ་ཡན་ཆད་ཀྱི།།ནད་ཀྱི་རིགས་སུ་གྱུར་པའི་བཅོས་ཐབས་ཀུན།།ལག་ལེན་མན་ངག་རྒྱུད་ཆེན་འདིའི་ནང་དུ།བརྩེ་བའི་སེམས་ཀྱིས་དྲང་སྲོད་ཁྱེད་ལ་བཤད།།ཅེས་ནད་སྣ་རེ་རེ་ལ་སྨན་གྱི་སྦྱོར་བ་རེ་རེ་གསུངས་འདུག་པ་ལྟར་ཉམས་སུ་བླང་བར་བྱའོ།།
(མཁའ་འགྲོ་སྐྱབས།བློ་བཟང་དོན་གྲུབ།)
བསམ་གཞིགས།
༡རོ་དྲུག་མས་ནས་ཡར་གོ་རིམ་བཞིན་དུ་འཚོ་བྱེད་སྟོབས་ཆེན་ཡིན་པའི་རྒྱུ་མཚན་ཅི།
༢སྨན་གྱི་ནུས་སྟོབས་ཡོན་ཏན་ཐམས་ཅད་རོ་ལ་བརྟེན་ཚུལ་ཇི་ལྟར་ཡིན།
༣གཉེན་པོ་སྨན་གཅིག་ལ་རོ་དང་ཞུ་རྗེས།ནུས་པ་སོགས་མི་མཐུན་པ་འབྱུང་བའི་རྒྱུ་མཚན་ཅི།
༤སྨན་རྣམས་མཐུན་སྡེབས་ཀྱི་སྦྱོར་ཚུལ་གྲངས་གསུམ་དུ་ངེས་པའི་རྒྱུ་མཚན་ཅི།
༥སྨན་གྱི་རོ་དང་ཞུ་རྗེས།ཡོན་ཏན།ནུས་པ།མཐུ།སྟོབས་བཅས་ཀྱི་བར་ལ་འབྲེལ་བ་ཅི་ཞིག་ཡོད།
༦རོ་ནུས་ཞུ་རྗེས་སོགས་མ་བཅོས་པ་ཞེས་པ་གེགང་འདྲ་ཞིག་ལ་ངོས་འཛིན་དགོས། 3/3 མདུན་ངོས། 上一页 1 2 3 |
