|
རྣམ་ཤེས་ཀྱི་ཕུང་པོ་ལ། སེམས། ཡིད། རྣམ་ཤེས་གསུམ་མིང་གི་རྣམ་གྲངས་སོ། །སེམས་ཀྱི་གཙོ་བོ་ཀུན་གཞི་ལ། ས་བོན་ཐམས་ཅད་པའི་རྣམ་པར་ཤེས་པ། ཀུན་གཞི་རྣམ་པར་ཤེས་པ། རྣམ་པར་སྨིན་པའི་རྣམ་པར་ཤེས་པ། ལེན་པའི་རྣམ་པར་ཤེས་པ་རྣམས་དོན་གཅིག་གོ། ། ཡིད་ལ་དོན་དམ་པའི་ཡིད་དང་། གནས་སྐབས་པའི་ཡིད་གཉིས་ལས། སྔ་མ་ནི་ཉོན་ཡིད་དང་། ཕྱི་མ་ནི་འཇུག་ཤེས་དྲུག འགགས་མ་ཐག་པའི་རྣམ་པར་ཤེས་པའོ། །རྣམ་པར་ཤེས་པ་ཚོགས་དྲུག་ནི་མིག་གི་རྣམ་པར་ཤེས་པ་སོགས་དྲུག་གོ། །ཁམས་ཀྱི་རྣམ་པར་བཞག་པའི་མིང་གི་རྣམ་གྲངས་ཡང་དེར་འདུའོ། །ཆོས་ཁམས་ཀྱི་འདུས་མ་བྱས་ལ་བརྒྱད་དེ། དགེ་བའི་དེ་བཞིན་ཉིད། མི་དགེ་བའི་དེ་བཞིན་ཉིད། ལུང་མ་བསྟན་གྱི་དེ་བཞིན་ཉིད། ནམ་མཁའ། སོ་སོར་བརྟགས་པའི་འགོག་པ། སོ་སོར་བརྟགས་མིན་གྱི་འགོག་པ། མི་གཡོ་བའི་འགོག་པ། འདུ་ཤེས་དང་ཚོར་བ་འགོག་རྣམས་སོ། །དགེ་བའི་དེ་བཞིན་ཉིད་ལ། གང་ཟག་གི་བདག་མེད་དང་། ཆོས་ཀྱི་བདག་མེད་གཉིས་སོ། །བདག་མེད་པ་དང་། སྟོང་པ་ཉིད་དང་། མཚན་མ་མེད་པ་དང་། ཡང་དག་པའི་མཐའ་དང་། དོམ་དམ་པ། ཆོས་ཀྱི་དབྱིངས་རྣམས་མིང་གི་རྣམ་གྲངས་སོ། མིག་ཡིན་ལ་མིག་གི་ཁམས་མ་ཡིན་པ། མིག་གི་ཁམས་ཡིན་ལ་མིག་མ་ཡིན་པ། གཉིས་ཀ་ཡིན་པ། གཉིས་ཀ་མ་ཡིན་པ་སྟེ་མུ་བཞི་ཡིན་ལ། དེ་ནི་དབང་པོ་གཟུགས་ཅན་གཞན་རྣམས་དང་ཡིད་ལ་ཡང་འདྲའོ། །མིག་གིས་གཟུགས་ལ་བལྟ་བའི་ཚེ་ཡུལ་དབང་རྟེན་གསུམ་ཀ་ས་མཚུངས་པ་དང་། ཡུལ་རྟེན་ས་མཚུངས་ཤིང་དབང་པོ་ས་མི་མཚུངས་པ་དང་། ཡུལ་དབང་ས་མཚུངས་ཤིང་རྟེན་ས་མི་མཚུངས་པ་ཡང་ཡོད། དེ་བཞིན་དུ་རྣ་བ་ལ་ཡང་རིགས་འགྲེའོ། ། འདོད་པའི་ཡིད་ལ་དགེ་སོགས་གསུམ་ལས། དགེ་བ་ལ། སྐྱེས་ཐོབ་དང་སྦྱོར་བྱུང་གཉིས་སོ། །ཉོན་མོངས་ཅན་གྱི་སེམས་ལ་ཀུན་འགྲོ་དང་། ཀུན་འགྲོ་མ་ཡིན་པ་གཉིས་སོ། །ལུང་མ་བསྟན་ལ་རྣམ་སྨིན་སྐྱེས་དང་། ཐ་མལ་བར་འདུག་པ། མངོན་པར་འདུ་བྱེད་པ་ལས་བྱུང་བའི་སྤྱོད་ལམ་པ། བཟོའི་གནས་པ། སྤྲུལ་སེམས་རྣམས་སོ། ། དེས་ཁམས་གོང་མ་རྣམས་ཀྱི་སེམས་ཀྱི་མིང་གི་རྣམ་གྲངས་ཀྱང་ཅི་རིགས་སུ་ཤེས་པར་བྱའོ། །
ཕུང་བོ་རྣམས་ཀྱི་གོ་རིམས་ནི། གནས་དང་གནས་པའི་རིམ་པ། རྟེན་པ་དང་བརྟེན་པའི་རིམ་པ། ཀུན་ནས་ཉོན་མོངས་དང་རྣམ་བྱང་གི་རྟེན་གྱི་དབང་དུ་བྱས་པའོ། །མངོན་པ་འོག་མར། རགས་ཕྲའི་རིམ་པ། ཀུན་ནས་ཉོན་མོངས་སྐྱེ་བའི་རིམ་པ། ཟས་ལ་ལོངས་སྤྱོད་པའི་རིམ་པ། ཁམས་གསུམ་ན་སྤྱོད་ཚུལ་གྱི་རིམ་པ་རྣམས་ཀྱི་སྒོ་ནས་བཤད་དོ། །ཕུང་པོའི་སྒྲ་དོན་ནི། སྤུངས་པ་དད་ཁུར་དང་སྡོང་པོ་སྟེ་གསུམ་མོ། །སྤུངས་པ་ནི། འདས་པ་སོགས་གསུམ་དང་། ཕྱི་ནང་གཉིས། རགས་ཕྲ་གཉིས། ངན་པ། གྱ་ནོམ་པ། རྒྱང་རིང་བ། ཐག་ཉེ་བ་སྟེ་སྲེད་པའི་དམིགས་པ་བཅུ་གཅིག་གོ། །ཁམས་ཀྱི་དོན་ནི། རིགས། ས་བོན། རྒྱུ། རང་བཞིན། ཆ་ཕྲ་བ། གཞི་སྟེ་དྲུག་གོ། །སྐྱེ་མཆེད་ཀྱི་སྒྲ་དོན་ནི། སྐྱེ་ཞིང་རྒྱས་པར་བྱེད་པའོ། །ཕུང་པོ་ལྔའི་དཔེ་ནི། དབུ་བ་བརྡོས་པ། ཆུ་ཡི་ཆུ་བུར། སྨིག་རྒྱུ། ཆུ་ཤིང་། སྒྱུ་མ་རྣམས་སོ། །ཆོས་གསུམ་གྱི་རྣམ་པའི་རབ་དབྱེ་ལ། རྫས་སུ་ཡོད་པ། བཏགས་པའི་ཡོད་པ། ཀུན་རྫོབ་ཏུ་ཡོད་པ། དོན་དམ་དུ་ཡོད་པ་བཞི། ཤེས་པར་བྱ་བ། རྣམ་པར་ཤེས་པར་བྱ་བ། མངོན་པར་ཤེས་པར་བྱ་བ་གསུམ། ཤེས་པར་བྱ་བ་ལ་གཞན་རྣམས་གོ་སླ་ལ། སྤྱོད་ཡུལ་བཅུ་གསུམ་ནི། མོས་པ་ཤེས་པའི་སྤྱོད་ཡུལ། དེ་བཞིན་དུ་སྦྱར་ཏེ། རིགས་པ། རྣམ་པར་འཕྲོ་བ་མེད་པ། སོ་སོ་རང་གི་ཤེས་པ། གཞན་གྱི་བདག་ཉིད། འོག་མ། གོང་མ། རྣམ་པར་སུན་འབྱིན་པ། ཀུན་ནས་མི་ལྡང་བ། མི་སྐྱེ་བ། ཤེས་པ། མཐར་ཐུག་པ། དོན་ཆེན་པོ་ཤེས་པའི་སྤྱོད་ཡུལ་ཏེ་བཅུ་གསུམ་མོ། ། རྣམ་པར་ཤེས་པར་བྱ་བ་ལ་དགུ། རྣམ་པར་མི་རྟོག་པ། རྣམ་པར་རྟོག་པ། རྒྱུ། འཇུག་པ། རྒྱུ་མཚན། རྒྱུ་མཚན་ལས་བྱུང་བ། མི་མཐུན་པ། གཉེན་པོ། ཕྲ་བའི་རབ་ཏུ་དབྱེ་བའོ། །མངོན་པར་ཤེས་པར་བྱ་བ་ལ། ཀུན་དུ་འགྲོ་བ། རྗེས་སུ་ཐོས་པ། སྤྱོད་པ་ལ་འཇུག་པ། འོང་བ། འགྲོ་བ། མངོན་པར་བྱུང་བ་སྟེ་དྲུག་གོ། ། དེ་ནི་རྫུ་འཕྲུལ་དང་། ལྷའི་རྣ་བ་དང་། གཞན་གྱི་སེམས་ཤེས་པ་དང་། སྔོན་གནས་རྗེས་དྲན་དང་། ལྷའི་མིག་དང་། ཟག་པ་ཟད་པའི་མངོན་ཤེས་ཏེ་དྲུག་གི་ཡུལ་ལོ། ། གཟུགས་ཅན་ཡིན་མིན་ལ། གཟུགས་ཀྱི་བདག་ཉིད་དང་། འབྱུང་བ་རྟེན་གྱུར་དང་། དགའ་བ་ཀུན་འབྱུང་བ་དང་། ཕྱོགས་བཅས་དང་། ཁྱབ་པ། ཡུལ་ཉེ་བར་བསྟན་དུ་རུང་བ། ཡུལ་སྤྱོད་ཡུལ་དུ་འགྱུར་བ། གཉིས་སྤྱོད་ཡུལ་དུ་མཚུངས་པ། འབྲེལ་བ། རྗེས་སུ་འབྲེལ་བ། རབ་ཏུ་རྟོག་པ། གནོད་བྱ་ཡིན་པ། གོ་བར་བྱེད་པ། བསགས་པ། ཕྱི་རོལ་དུ་བལྟས་པ། ནང་དུ་བལྟས་པ། ཡུན་རིང་བ། ཡོངས་སུ་ཆད་པ། དེའི་དུས། ངེས་པར་སྟོན་པ་སྟེ་གཟུགས་ཅན་ཉི་ཤུའོ། །གཟུགས་ཅན་མིན་པ་ནི་དེ་ལས་ལྡོག་པའོ། །བསྟན་དུ་ཡོད་པ་བསྟན་དུ་མེད་པ་གཉིས། ཐོགས་པ་དང་བཅས་པ། ཐོགས་པ་མེད་པ་གཉིས་ལས། ཐོགས་བཅས་ནི། རང་བཞིན་ཆ་ཕྲ་བ། བྲི་བ་ཆ་ཕྲ་བ། སེམས་དབང་སྒྱུར་བ་ཆ་ཕྲ་བ་གསུམ་ལས་ལོག་པའི་རིགས་དང་། ཉེ་བར་བསགས་པ་དང་། ཡོངས་སུ་སྦྱང་བ་མ་བྱས་པའི་ཐོགས་བཅས་གསུམ་མོ། །མངོན་པ་འོག་མར། ཡུལ་ལ་ཐོགས་བཅས་དང་། བསྒྲིབས་པའི་ཐོགས་བཅས་ཡིན་མིན་ལ་མུ་བཞི་དང་། ཡུལ་ལ་ཐོགས་པ་དང་དམིགས་པ་ལ་ཐོགས་པ་ཡིན་མིན་ལ་མུ་གསུམ་དུ་བཤད་དོ། །
ཟག་བཅས་ཟག་མེད་ལ། ཟག་པའི་སྒོ་དྲུག་གང་རུང་དང་འབྲེལ་བ་ཟག་བཅས་ཏེ། སྒོ་དྲུག་ནི། ཟག་པའི་བདག་ཉིད། ཟག་པ་དང་འབྲེལ་བ། ཟག་པས་བཅིངས་པ། ཟག་པའི་རྗེས་སུ་མཐུན་པ། ཟག་པའི་རྒྱུ་ལས་བྱུང་བ་སྟེ་དྲུག་གོ། །འཐབ་བཅས་འཐབ་མེད་གཉིས། ཟང་ཟིང་དང་བཅས་པ། ཟང་ཟིང་མེད་པ་གཉིས། ཞེན་པ་བསྟེན་པ། མངོན་པར་འབྱུང་བ་བསྟེན་པ་གཉིས་རྣམས་ལ་འཐབ་པའི་སྒོ་དྲུག ཟང་ཟིང་གི་སྒོ་དྲུག ཞེན་པའི་སྒོ་དྲུག་རེ་ཡོད་པ་རྣམས་སྔ་མའི་རིགས་བསྒྲེ་སྦྱར་ནས་ཤེས་པར་བྱའོ། །འདུས་བྱས་དང་འདུས་མ་བྱས་གཉིས་སོ། །འཇིག་རྟེན་དང་འཇིག་རྟེན་ལས་འདས་པ་གཉིས་ལས། འཇིག་རྟེན་པ་ལ་དག་པ་དང་མ་དག་པ་གཉིས། འཇིག་རྟེན་ལས་འདས་པ་ལ། མཉམ་བཞག་དང་རྗེས་ཐོབ་གཉིས། འདི་ནི་ཆོས་ཀྱི་དབང་དུ་བྱས་པ་ཡིན་ལ། གང་ཟག་གི་དབང་དུ་བྱས་ན་སྐྱེ་འཕགས་གཉིས་སོ། །བྱུང་བ་དང་མ་བྱུང་བ་གཉིས་ལས། བྱུང་བ་ལ་དང་པོ་བྱུང་བ། རྒྱུན་གྱིས་བྱུང་བ། རྒྱས་པ་ལས་བྱུང་བ། རྟེན་བྱུང་བ། འགྱུར་བར་བྱུང་བ། ཡོངས་སུ་སྨིན་པར་བྱུང་བ། མཉམ་པར་བྱུང་བ། ཁྱད་པར་དུ་བྱུང་བ། འོད་གསལ་བར་བྱུང་བ་མ་ཡིན་པ། ཀུན་ཏུའགྲོ་བར་བྱུང་བ། ས་བོན་དང་བཅས་པར་བྱུང་བ། ས་བོན་མ་ཡིན་པར་བྱུང་བ། གཟུགས་བརྙན་དང་དབང་འབྱོར་བ་དང་ངེས་པར་བསྟན་པའི་ཕྱིར་བྱུང་བ། གཅིག་ནས་གཅིག་ཏུ་བྱུང་བ། སྐད་ཅིག་ཞིག་ནས་བྱུང་བ། ཕྲད་པ་དང་བྲལ་བར་བྱུང་བ། གནས་སྐབས་གཞན་དུ་བྱུང་བ། འཆི་འཕོ་བ་དང་སྐྱེ་བར་བྱུང་བ། འཇིག་པ་དང་ཆགས་པར་བྱུང་བ། སྔོན་གྱི་དུས་ན་བྱུང་བ། འཆི་བའི་དུས་ན་བྱུང་བ། བར་དུ་བྱུང་བ། ཉིང་མཚམས་སྦྱོར་བའི་དུས་ན་བྱུང་བ་སྟེ་ཉི་ཤུ་རྩ་བཞིའོ། །མངོན་པ་འོག་མར། རྣམ་སྨིན་སྐྱེས་དང་། རྒྱས་བྱུང་དང་། རྒྱུ་མཐུན་ལས་བྱུང་བ། རྫས་ལྡན་གྱི་ཁྱད་པར། སྐད་ཅིག་མའི་དབྱེ་བ་དང་ལྔའི་སྒོ་ནས་བྱུང་བའི་རྣམ་བཞག་བཤད་དོ། ། འཛིན་པ་དང་གཟུང་བ་གཉིས་ལས། འཛིན་པ་ལ་ཕྲད་ནས་འཛིན་པ་དང་། མ་ཕྲད་པར་འཛིན་པ་གཉིས་དང་། རང་མཚན་འཛིན་པ་དང་། སྤྱི་མཚན་འཛིན་པ་གཉིས་སོ། །ཕྱི་བལྟས་ནང་བལྟས་གཉིས་ལ་དབྱེ་བ་མེད་དེ། ཉོན་མོངས་ཅན་ཡིན་མིན་གཉིས་ལས། ཉོན་མོངས་ཅན་ལ། མི་དགེ་བ་དང་། བསྒྲིབས་ལུང་མ་བསྟན་གཉིས་སོ། ། ཉོན་མོངས་ཅན་མ་ཡིན་པ་ལ། དགེ་བ་དང་། མ་བསྒྲིབས་ལུང་མ་བསྟན་གཉིས་སོ། །དུས་གསུམ་ནི། འདས་པ་དང་། མ་འོངས་པ་དང་། ད་ལྟར་བྱུང་བའོ། །དགེ་སོགས་གསུམ་ལས། དགེ་བ་ལ། ངོ་བོ་ཉིད་ཀྱི་དགེ་བ། དེ་བཞིན་དུ་སྦྱར་ཏེ། འབྲེལ་བ། རྗེས་སུ་འབྲེལ་པ། སློང་བ། དོན་དམ་པ། སྐྱེ་བས་ཐོབ་པ། སྦྱོར་བ། མདུན་དུ་བྱས་པ། ཕན་འདོགས་པ། ཡོངས་སུ་འཛིན་པ། གཉེན་པོ། ཉེ་བར་ཞི་བ། རྒྱུ་མཐུན་པས་དགེ་བ་སྟེ་བཅུ་གཉིས་སོ། །དེའི་ནང་གི་གཉེན་པོ་ལ། རྣམ་པར་སུན་འབྱིན་པའི་གཉེན་པོ། སྤོང་གཉེན། གཞི་གཉེན། ཐག་བསྲིང་བ་གཉེན་པོ། རྣམ་པར་གནོན་པ་གཉེན་པོ། བྲལ་བ་གཉེན་པོ། ཉོན་སྒྲིབ་ཀྱི་གཉེན་པོ། ཤེས་སྒྲིབ་ཀྱི་གཉེན་པོ་སྟེ་བརྒྱད་དོ། །དེས་མི་དགེ་བ་དང་ལུང་མ་བསྟན་གྱི་མིང་གི་རྣམ་གྲངས་ཡང་ཤེས་སླའོ། །འདོད་པ་དང་ལྡན་པ། གཟུགས་དང་ལྡན་པ། གཟུགས་མེད་པ་དང་ལྡན་པ་གསུམ་གྱི་དབྱེ་བ་ནི་སླའོ། །
ཞར་བྱུང་ཆགས་བྲལ་ལ། ཕྱོགས་གཅིག་ལ་ཆགས་པ་དང་བྲལ་བ། མཐའ་དག་ལས་ཆགས་པ་དང་བྲལ་བ། རྟོག་པས་ཆགས་བྲལ། གནོན་པའི་ཆགས་བྲལ། ལེགས་པར་སྟོན་པའི་ཆགས་བྲལ་ཏེ་ལྔ་དང་། ཡང་ཆགས་བྲལ་བཅུར་དབྱེ་བ་ཡང་ཡོད་དེ་གོ་སླའོ། །སློབ་པ། མི་སློབ་པ། གཉིས་ཀ་མ་ཡིན་པའི་ཆོས། མཐོང་སྤང་། སྒོམ་སྤང་སྤང་བྱ་མ་ཡིན་པ་རྣམས་ཀྱི་མིང་གི་རྣམ་གྲངས་ཡང་གོང་འོག་ཏུ་ཅི་རིགས་པར་འབྱུང་བའི་ཕྱིར་འདིར་མ་བྲིས་སོ། ། རྟེན་འབྲེལ་གྱི་རྣམ་བཞག་ནི། མདོ་སྔགས་དང་གྲུབ་མཐའ་སྤྱི་ལ་མཁོ་བས་མངོན་པ་གོང་འོག་དང་གཞུང་གཞན་ལས་འབྱུང་བའི་མེད་མི་རུང་གི་མིང་གི་རྣམ་གྲངས་མདོར་བསྡུས་ཏེ་འབྲི་བར་བྱའོ། །དེ་ལ་བརྟེན་པ་དང་། འཕྲད་པ་དང་ལྟོས་པ་གསུམ་སྐབས་འདིར་དོན་གཅིག་ལ། རྟེན་འབྲེལ་གྱི་མིང་གི་རྣམ་གྲངས་ལ་རྟེན་འབྲེལ། བརྟེན་ནས་འབྱུང་བ། བརྟེན་ནས་སྐྱེས་པ། རྐྱེན་ལས་སྐྱེས་པ། རྟེན་ནས་གྲུབ་པ། རྟེན་ཅིང་འབྲེལ་བར་འབྱུང་བ་ཞེས་པ་རྣམས་འབྱུང་ཞིང་། ལྟོས་ནས་གྲུབ་པ། བརྟེན་ནས་བཏགས་པ། རྐྱེན་ཉིད་འདི་པ་ཙམ། བཏགས་པ་ཙམ་ཞེས་ཀྱང་གྲུབ་མཐའ་གོང་མ་རྣམས་ཀྱི་སྐབས་སུ་འབྱུང་ངོ་། །དབྱེ་ན། ཕྱི་དང་ནང་གི་རྟེན་འབྲེལ་གཉིས། གཟུགས། ཤེས་པ། ལྡན་མིན་འདུ་བྱེད་ཀྱི་རྟེན་འབྲེལ་གསུམ། སེམས་ཅན་དུ་སྟོན་པ་དང་མི་སྟོན་པའི་རྟེན་འབྲེལ་གཉིས། སྐད་ཅིག་མ། རྒྱུན་ཆགས་པ། འབྲེལ་བ་ཅན། གནས་སྐབས་པའི་རྟེན་འབྲེལ་ཏེ་བཞི། སྣོད་དང་བཅུད་ཀྱི་རྟེན་འབྲེལ་གཉིས་རྣམས་སུ་ཡོད་ལ། དབུ་མ་པའི་ལུགས་ལ་འདུས་བྱས་དང་འདུས་མ་བྱས་ཀྱི་རྟེན་འབྲེལ་གཉིས་ཀྱང་འདོད་དོ། །སྐབས་འདིར་རྐྱེན་གསུམ་ལས་བྱུང་བ་རྟེན་འབྲེལ་གྱི་དོན་ཏེ། རྐྱེན་གསུམ་ནི། གཡོ་བ་མེད་པའི་རྐྱེན། མི་རྟག་པའི་རྐྱེན། ནུས་པའི་རྐྱེན་ཏེ་གསུམ་མོ། །ཡན་ལག་བཅུ་གཉིས་ནི། 5/14 མདུན་ངོས། 上一页 3 4 5 6 7 8 下一页 尾页 |
