སློབ་ཚན་འདིར་དགུ་བའི་ཉེར་གཉིས་ནི་དུས་ཆེན་ཞིག་ཏུ་གྱུར་ཚུལ་དང༌།དེར་རང་ཅག་བོད་མི་རྣམས་ཀྱིས་ཁྱད་པར་ཅན་གྱི་ལས་གང་འདྲ་བགྱི་བའི་སྐོར་རྟོགས་དགོས།
      བོད་ཟླ་དགུ་བའི་ཚེས་ཉེར་གཉིས་ཀྱི་ཉིན་ནི།སངས་རྒྱས་ལྷ་ཡུལ་ནས་བསྟན་པ་སངས་རྒྱས་ཀྱི་ཆོས་དང་འགྲོ་བ་སེམས་ཅན་ཐམས་ཅད་ཀྱི་དོན་སྒྲུབ་སླད་མི་ཡུལ་དུ་བབས་པའི་དུས་བཟང་ཡིན་པས་དགུ་བའི་ཉེར་གཉིས་ལ་ལྷ་བབས་དུས་ཆེན་ཞེས་ཀྱང་འབོད་སྲོལ་མཆིས།སངས་རྒྱས་ཤཱཀྱ་ཐུབ་པའི་ཡུམ་སྐུ་གཤེགས་ནས་ལྷའི་ཡུལ་དུ་སྐུ་འཁྲུངས་པ་དང༌།ལྷའི་ཡུལ་ཁམས་སུ་གནས་པའི་སྟོན་པའི་ཡུམ་དང་ལྷ་རྣམས་ལ་ཐོབ་དཀའ་བའི་ཆོས་གསུང་ཆེད།སྟོན་པ་སངས་རྒྱས་ལྷ་ཡུལ་དུ་ཕེབས་ནས་འགྲོ་དོན་ལེགས་པར་བསྐྱངས་པ་དང་བོད་ཟླ་དགུ་བའི་ཚེས་ཉེར་གཉིས་ཀྱི་ཉིན་སླར་ཡང་མི་ཡུལ་དུ་ཕེབས་པའི་དུས་ཆེན་བཟང་བོ་ཡིན་པས།བོད་ཀྱི་ས་ཆ་མང་བོར་ཉིན་དེར་ལྷ་་ལ་མཆོད་པ་དང་རྟེན་ལ་མཇལ་ཁ།དབུལ་བོར་སྦྱིན་པ།དགེ་འདུན་ལ་བསྙེན་བཀུར་ཚད་མེད་བྱས་ཏེ་དཀར་བོའི་ཆོས་སྤེལ་ཞིང་སྡིག་པའི་ལས་ལ་འཛེམ་པའི་ཡུལ་སྲོལ་ཞིག་ཆགས་ལ།ཡང་བོད་ཀྱི་ཡུལ་སྡེ་འགའ་ཞིག་ཏུ་ལྷ་འབེབས་པའི་དུས་ཚིགས་བཟང་བོ་ཞིག་ཏུ་བརྩིས་ཏེ་དེ་དང་འབྲེལ་བའི་ལས་དང་ཆོ་ག་སྤེལ་བའི་སྲོལ་ཡང་འདུག

བསམ་གཞིག སྦྱང་གཞི།
གཤམ་གྱི་དྲི་བར་ལན་ཐོབས།
དགུ་བའི་ཉེར་གཉིས་ལ་ཅིའི་ཕྱིར་ལྷ་བབས་དུས་ཆེན་ཟེར།