བོད་ལུགས་མཆོད་རྟེན་ཀུན་ལས་བཏུས་པ་སྲིད་གསུམ་མཛེས་པའི་རྒྱན་ཞེས་བྱ་བའི་མཆོད་
རྟེན་གྱི་རྣམ་གཞག་བྱུང་བ་དང་བཅས་པའི་མཚམས་སྦྱོར་མདོར་བསྡུས།
༡ མཆོད་རྟེན་གྱི་ལོ་རྒྱུས་བཤད་པ།
མཆོད་རྟེན་ཞེས་པའི་ཐ་སྙད་ནི་སཾསྐྲྀཏའི་སྐད་ཀྱི་སྟྰས་ཞེས་པ་ལས་འགྱུར་བ་སྟེ་མཆོད་པའི་ཞིང་ངམ་རྟེན་གྱི་དོན་ཡིན་པར་གསུངས་སོ། ། སྤྱིར་སྣོད་ཀྱི་འཇིག་རྟེན་འདི་ཉིད་ཀྱང་རང་བཞིན་ལྷུན་གྱིས་གྲུབ་པའི་མཆོད་རྟེན་གྱི་རང་བཞིན་ཡིན་པར་གསུངས་ཏེ། དུས་འཁོར་ལས།རླུང་དང༌། མེ་དང༌། ཆུ་དང༌། ས་བཅས་ཀྱི་དཀྱིལ་འཁོར་བཞི་པོ་ནི་མཆོད་རྟེན་གྱི་བང་རིམ་དང༌། རི་རབ་བུམ་པ་དང༌། རི་རབ་ཀྱི་མགྲིན་པ་མན་བྲེ་དང༌། དེ་ཡན་ཆོས་འཁོར་ཆར་ཁེབས་ཀྱི་རྣམ་པར་གསུངས་ཤིང༌། རྡོ་རྗེ་བཀོད་པའི་རྒྱུད་ལས་ཀྱང༌། འདོད་ཁམས་དབང་གི་རི་བོ་ལ།གཟུགས་ཁམས་བང་རིམ་ཁྲི་འཕང་ཅན། ། གཟུགས་མེད་བུམ་རྟེན་བུམ་པ་བཅས། ། ཞེས་དུས་འཁོར་དང་མཐུན་པརསྣང་ངོ༌། ། དེ་ནས་ཕྱོགས་བཞི་བླ་ན་མེད་པའི་མཆོད་རྟེན་བཞི་ཡོད་པའི་བཞེད་ཚུལ་ལ། ཐིག་ལེ་དབང་གི་རྒང་ཅེས་པ་ལས། ། ཚད་མེད་བསམ་ཡས་ལས་བྱུང་འབྲས ། ཤར་དུ་བྱམས་པ་རྡོ་རྗེ་བརྩེགས། ། ལྷོ་རུ་སྙིང་རྗེ་རིན་ཆེན་བརྩེགས། ། ནུབ་ཏུ་དགལ་བ་པདྨ་བརྩེགས། ། བྱང་དུ་བཏང་སྙོམས་རྒྱ་གྲམ་བརྩེགས། ། རང་བྱུང་རིན་ཆེན་སྣང་བའོ། ། ཞེས་གསུངས་པ་དང༌། བྱིན་རླབས་སྐུ་གདུང་ཆ་བརྒྱད་གླིང་བཞིར་ཡོད་ཚུལ་གསུངས་པའང་སྣང་སྟེ། འཁོར་ལོ་འབྱུང་བའི་རྒྱུད་ལས། ཤར་ལུས་འཕགས་གླིང་ན་བྱིན་ལྡན་སྙོམས་གཏེར་དང༌། མཐར་ལེགས་གཡུང་དྲུང་ཏོག་གཉིས། ལྷོ་འཛམ་བུ་གླིང་ན་ཐུགས་རྗེའི་སྤྲུལ་པ་དང༌། ཡིད་བཞིན་ལྷུན་གྲུབ་གཉིས། ནུབ་བ་ལང་སྤྱོད་ན་དཔེ་མེད་བསམ་འདས་དང༌། རྨད་གྲགས་ཆོས་དབྱིངས། བྱང་སྒྲ་མི་སྙན་ན་ཡོན་ཏན་རིན་ཆེན་བརྩེགས་དང༌། ཁམས་གསུམ་བདེ་རྒྱས་སྒྲོན་མེའི་མཆོད་རྟེན་གཉིས་བཅས་བཞུགས་པར་གསུངས་པ་དང༌། ཡང་ཧེ་རུ་ཀས་དྲག་པོ་ཆེན་པོ་བཏུལ་བའི་ཚེ་ཡུལ་བརྒྱད་ཀྱི་དུར་ཁྲོད་དུ། མ་མོ་བརྒྱད་ཀྱི་དངོས་གྲུབ་འབྱུང་བའི་མཆོད་རྟེན་བརྒྱད་བྱུང་བར་གསུངས་ཏེ། བདུད་རྩི་མཆོག་གི་རྒྱུད་ལས། རོ་ཡི་སྲུང་མ་ཆེན་པོ་ནི། །མ་མོ་ཆེན་མོ་བརྒྱད་བཞག་གོ། ། ཅེས་པ་སྟེ། མ་ག་ངྔྷར་བདེ་བྱེད་དང༌། སིངྒ་ལར་རི་པོ་ཏཱ་ལ་དང༌། བལ་བོར་བྱ་རུང་ཁ་ཤོར།སེང་གེའི་གླིང་དུ་གེའུ་དོན་ན། ལི་ཡུལ་དུ་གོ་མ་ས་ལ་གྷན་དྷ། ཁ་ཆེར་ཀ་ན་ཀ ཟ་ཧོར་དུ་བདེ་སྐྱིད་གཞོན་ནུའི་མཆོད་རྟེན་བཅས་དངོས་གྲུབ་འབྱུང་བའི་མཆོད་རྟེན་བརྒྱད་ཡོད་པར་གསུངས་སོ། ། གཞན་ཡང་ཉན་ཐོས་དང༌། རང་རྒྱལ་དང་ཐེག་པ་ཆེན་པོ་གསུམ་གྱི་མཆོད་རྟེན་གྱི་བཀོད་པ་སོགས་མི་འདྲ་བ་བཞུགས་པ་དང༌། ཐེག་ཆེན་གྱི་ལུགས་ལའང༌།མགོན་པོ་ཀླུ་སྒྲུབ་ཀྱིས། ལྷུང་བཟེད་སྦུབ་པ་ལྟ་བུ་དང༌། ཁང་བཟང་ལྟ་བུ་དང་རྒྱལ་མཚན་ལྟ་བུ་སོགས་ཀྱི་མཆོད་རྟེན་བརྒྱད་བཞུགས་ཚུལ་གསུངས་པ་དང༌། ཡང་སངས་རྒྱས་དང་སོ་སྐྱེས་ཀྱི་མཆོད་རྟེན་མི་འདྲ་བ་དང༌། སྔགས་ཀྱི་རྒྱུད་སྡེ་སོ་སོའི་མཆོད་རྟེན་མི་འདྲ་བ་ཤིན་ཏུ་མང་པོ་བྱུང་བར་གསུངས་ཀྱང་། འདིར་མདོ་ཙམ་ལས་ཞིབ་ཏུ་མ་སྨྲས་སོ། ། ཡང་སྟྰས་ཞེས་པའི་ཐ་སྙད་འདི་དྲན་གསོའི་རྟེན་དང་བང་སོ་གཉིས་ཀར་འཇུག་ཅིང་སྔོན་བསྐལ་པ་དུ་མ་ནས་འཕགས་ཡུལ་སོགས་སུ་ཡོད་ཚུལ་ཡང་ཡོད་དེ་ཨསྟུ་ཀ་ཡའི་དཔལ་ལྡན་འབྲས་སྤུངས་ཀྱི་མཆོད་རྟེན་གྱི་ལོ་རྒྱུས་ལས།མཆོད་རྟེན་འདི་བཅོམ་ལྡན་འདས་གསེར་ཐུབ་ཀྱི་བསྟན་པ་ལ་གྲུབ་ཐོབ་པའི་རྣལ་འབྱོར་པ་ཞིག་གིས། ཉིན་ལམ་བཅུ་གཉིས་ཀྱི་ས་ལ་འབྲས་སོ་བའི་ཆར་པ་གྱང་རིམ་གསུམ་ཙམ་རེ་ཕབ་པའི་ཕུད་ལ་ལྷ་དང༌། མི་དང༌། ཁྱབ་འཇུག་དང༌། མགོན་པོ་བདུན་ཅུ་རྩ་ལྔ་སོགས་ཀྱིས་བཞེངས་པར་གྲགས་ཤིང་ཕྱི་ནང་ཐུན་མོང་གི་མཆོད་གནས་སུ་གྱུར་པ་དེ་སོགས་སྟོན་པ་སངས་རྒྱས་ཤཱཀྱ་ཐུབ་པ་ཞིང་འདིར་མ་བྱོན་སྔོན་ནས་ཡོད་པར་བཤད་དོ །
(༡)འཕགས་ཡུལ་དུ་བསྟན་པ་འདིའི་མཆོད་རྟེན་ཐོག་མར་དར་ཚུལ།
སངས་རྒྱས་བཅོམ་ལྡན་འདས་ལུམྔི་ནའི་ཚལ་དུ་ངོ་མཚར་བའི་མཚན་མ་བྱེ་མ་སྙེད་དང་བཅས་པ་སྐུ་བལྟམས་པ་སོགས། ཞིང་འདིའི་མཛད་པ་གཙོ་བོ་གང་བསྟན་པའི་སར། དེ་མཚོན་པའི་མཚན་མ་དང་བཅས་པའི་མཆོད་རྟེན་ཇི་ལྟར་བཞེངས་པའི་ཚུལ་ལ།ལས་ཀྱི་མཐའ་བརྗོད་པའི་མདོ་ལས། སྤྲུ།ལ་པས་མཛད་པ་ཡུན་བསྟན་ཕྱིར། མཆོད་རྟེན་བརྒྱད་དུ་སྐུ་གདུང་བཞག་ཅེས་གསུངས་པ་ལྟར་སྦྱིན་བདག་སྐལ་ལྡན་རྣམས་ཀྱིས། སྟོན་པའི་མཛད་པ་ཁྱད་པར་ཅན་རེ་བསྟན་པའི་སར་དེ་འབྲེལ་བརྡ་ཁྱད་ཅན་གྱི་རྗེས་སུ་དྲན་པའི་རྟེན་ནམ་མཆོད་པར་བྱ་ཡུལ་གྱི་རྟེན་ཡང་ཁྱད་པར་ཅན་རེ་བརྩེགས་པ་དེ་དག་ལ་སླར་ཡང་མཆོད་རྟེན་ཞེས་པའི་ཐ་སྙད་ཆགས་ཤིང་ཡོངས་སུ་གྲགས་པར་གྱུར་ཅིང༌། མཆོད་རྟེན་བརྒྱད་པོ་ཇི་ལྟར་བྱུང་བའི་ཚུལ་ནི། དང་པོ་སྔོན་རྒྱ་གར་འཕགས་པའི་ཡུལ་དུ། སྟོན་པ་སངས་རྒྱས་ཤཱཀྱ་ཐུབ་པ་སྐུ་བལྟམས་པའི་གནས་མཆོག་གྲོང་ཁྱེར་སེར་སྐྱའི་ལུམྦི་ན་ཡི་ཚལ་དུ་ཡབ་རྒྱལ་པོ་ཟས་གཙང་གིས་སྦྱིན་བདག་མཛད་དེ་བཞེངས་པའི་པདྨ་སྤུངས་པའི་མཆོད་རྟེན་ནམ་བཀྲ་ཤིས་འབྱུང་བའི་མཆོད་རྟེན་བསྟན་པ་འདིའི་རྟེན་གྱི་ཐོག་མར་གྲགས་པ་དེ་དང༌། གཉིས་པ་སྟོན་པ་བྱང་ཆུབ་མངོན་དུ་མཛད་པའི་གནས་ཆེན་རྡོ་རྗེའི་གདན་དུ་རྒྱལ་པོ་གཟུགས་ཅན་སྙིང་པོས་སྦྱིན་བདག་མཛད་དེ་བཞེངས་པའི་བྱང་ཆུབ་ཆེན་པོའི་མཆོད་རྟེན། གསུམ་པ་སྟོན་པས་ཝ་ར་ཎ་སྰིར་ཀུན་ཤེས་ཀཽཎྜ་ནྱ་སོགས་ལ་བདེན་པ་བཞིའི་ཆོས་ཀྱི་འཁོར་ལོ་ཐོག་མར་བསྐོར་བའི་སར་ཁོང་རྣམས་ཀྱིས་སྦྱིན་བདག་མཛད་དེ་བཞེངས་པའི་བཀྲ་ཤིས་སྒོ་མང་མཆོད་རྟེན། བཞི་པ་སྟོན་པ་མཉེན་ཡོད་ཛི་ཏཱའི་ཚལ་དུ་ཆོ་འཕྲུལ་ཆེན་པོ་བསྟན་ཏེ་ལོག་པར་སྨྲ་བའི་མུ་སྟེགས་ཀྱི་སྟོན་པ་དྲུག་སྟེ་རྫོགས་བྱེད་དང༌། ཕྱུག་ལྷས་ཀྱི་བུ་མ་སྐ་རི་དང༌། རྣམ་པར་སྨྲ་བའི་བུ་མོའི་བུ་ཀུན་ནས་རྒྱལ་བ་དང༌། སྐྲ་ལི་བ་ཅན་མི་ཕམ་པ། ཀཱ་ཏྱ་ཡ་ནའི་ནོག་ཅན་གཉེན་གྱི་བུ་གཅེར་བུ་བཅས་ཚར་བཅད་ཅིང་ཕམ་པར་བྱེད་པའི་ཡུལ་དེར། ལི་ཙཱ་བྰི་རྣམས་ཀྱིས་སྦྱིན་བདག་བྱས་ཏེ་བཞེངས་པའི་ཆོ་འཕྲུལཆེན་པོའི་མཆོད་རྟེན། ལྔ་པ་སྟོན་པ་སུམ་རྩེན་དུ་དབྱར་གནས་མཛད་དེ་སྔ་དྲོ་དགག་དབྱེ་མཛད། ཕྱི་དྲོ་འཛམ་གླིང་དུ་ཕེབས་པ་མཛད་པའི་ཚེ་དཔལ་ལྡན་པ་རྣམས་ཀྱིས་བཞེངས་པའི་ལྷ་བབས་མཆོད་རྟེན། དྲུག་པ་རྒྱལ་པོའི་ཁབ་ཏུ་ལྷས་སྦྱིན་གྱིས་དགེ་འདུན་རྣམས་དབྱེན་བྱས་ནས་མཆོག་ཟུང་གིས་འདུམ་པའི་ཚེ་རྒྱལ་བྱེད་སོགས་མ་གྷ་ངྷ་་པས་བཞེངས་པའི་དབྱེན་འདུམ་མཆོད་རྟེན། བྱམས་དངོས་མཆོད་རྟེན་དང་འོད་ཟེར་མཆོད་རྟེན་ཡང་ཟེར།བདུན་པ་སྟོན་པས་ཡངས་པ་ཅན་དུ་སྐུ་ཚེའི་འདུ་བྱེད་དུ་ཟླ་བ་གསུམ་དུ་བྱིན་གྱིས་བརླབས་པའི་ཚེ་གྲོང་ཁྱེར་པ་རྣམས་ཀྱིས་བཞེངས་པའི་རྣམ་པར་རྒྱལ་པའི་མཆོད་རྟེན། བརྒྱད་པ་རྩྭ་མཆོག་གྲོང་དུ་དགོངས་པ་མྱ་ངན་ལས་འདས་པའི་ཚེ་ཡུལ་མི་རྣམས་ཀྱིས་པཞེངས་པའི་མྱ་ངན་འདས་པའི་མཆོད་རྟེན་བཅས་མཆོད་རྟེན་བརྒྱད་དུ་གྲགས་པ་རྣམས་ཏེ། སྟོན་པ་མྱ་ངན་ལས་འདས་རྗེས་སངས་རྒྱས་ཀྱི་རིལ་བསྲེལ་དང་འཕེལ་གདུང་རྣམས་ཕྱོགས་དང་ཕྱོགས་མཚམས་སུ་དྲངས་ཏེ། དེ་དག་བཞུགས་པའི་མཆོད་རྟེན་དབྱིབས་དང་རྣམ་པ་སྣ་ཚོགས་བགྲངས་ལས་འདས་པ་ཞིག་བཞེངས་སོ། །
(༢)བོད་ཡུལ་དུ་མཆོད་རྟེན་དར་ཚུལ།
རང་རེ་བོད་དུ་དམ་པའི་ཆོས་ཀྱི་དབུ་མ་བརྙེས་གོང་ནས་མཆོད་རྟེན་ཡོད་པར་སེམས་ཏེ།གནལརབས་སུ་བོན་གྱི་ཆོས་ལུགས་སྣ་ཚོགས་དར་བ་ནས་བཟུང༌། བཙན་དང༌། ཡུལ་ལྷ་གཞི་བདག་གི་མཆོད་ཡུལ་གྱི་རྟེན་ཏེ། རྟེན་མཁར་ཞེས་པ། དེང་སང་ཡང་དེ་ཡི་རྒྱུན་མ་ནུབ་པར་བོད་ཁམས་ཀུན་ཏུ་མཐོང་རྒྱུ་ཡོད་པ་དེ། མིང་འདོགས་ཚུལ་གྱི་ཁྱད་པར་ཙམ་ལས། དེའི་དགོས་པ་དང་དོན་ཕྱོགས་མཚུངས་སུ་མཐོང་ངོ༌། ། དེ་ནས་བྱང་ཆུབ་སེམས་དཔལ་ཀུན་ཏུ་བཟང་པོའི་རྣམའཕྲུལ་དུ་གྲགས་པའི་སྤྲུལ་པའི་རྒྱལ་པོ་ལྷ་ཐོ་ཐོ་རི་གཉན་བཙན་དེ་ཉིད་སྐུ་ན་གཞོན་དུས་ཡུམ་བུ་བླ་མཁར་རི་རྒྱུད་གོང་མར་ནོར་གྱི་བང་སོ་དྲྭ་མིག་ལྔ་པ་ཞིག་སྦས་པའི་སྒོ་ལ་བཀའ་རྟགས་མཆོད་རྟེན་བང་རིམ་གསུམ་པ་ཞིག་བརྐོས་ཚུལ་འཁོད་པ་དང༌། ཁོང་དགུང་ལོ་དྲུག་ཅུ་བཞེངས་པའི་སྐབས། གསེར་གྱི་མཆོད་རྟེན་མུ་དྲའི་ཕྱག་རྒྱ་སོགས་ནམ་མཁའ་ནས་བབ་པའམ། ཡང་ན་ལོ་ཙཱ་བ་ལི་ཐེ་སེས་ཕུལ་བ་གང་ལྟར་ཡང་སྐབས་དེར་བོད་དུ་ནང་པ་སངས་རྒྱས་པའི་མཆོད་རྟེན་ཐོག་མར་བྱུང་བ་མངོན། ཆོས་རྒྱལ་སྲོང་བཙན་སྒམ་པོའི་དུས་སུ་དམ་པའི་ཆོས་ཀྱི་སྲོལ་རྒྱ་ཆེར་གཏོད། ལྷ་ས་དམར་པོ་རིའི་སྟེང་དུ་མཆོད་རྟེན་དཀར་པོ་དང༌། མཐའ་འདུལ་དང་ཡང་འདུལ་གྱི་ལྷ་ཁང་བརྒྱ་རྩ་བརྒྱད་ཀྱི་ཐོག་མ་ཁྲ་འབྲུག་བྱམས་པ་མི་འགྱུར་གྱི་གཙུག་ལག་ཁང་དུ་ལྷ་ཁང་མ་བཞེངས་སྔོན་ཀླུ་གདུག་པ་ཅན་སྦྲུལ་མགོ་ལྔ་དང་ལྡན་པ་ཞིག་བསྒྲལ་བའི་དོན་དུ་མཆོད་རྟེན་རྩེ་ལྔ་པ་བཞེངས།འོ་ཐང་མཚོ། ཀླུའི་ཕོ་བྲང་གི་ལྷོ་ནུབ་ཏུ་ཙནྡ་གྱི་རུན་སྲང་ཡོད་པར་མཆོད་རྟེན་ཀེ་རུ་བརྩིགས། །ར་ས་འཕྲུལ་སྣང་གཙུག་ལག་ཁང་དུ་མཛད་པ་བཅུ་གཉིས་དང་ཁྲོ་བོ་རྨེ་བརྩེགས་ཀྱི་རྒྱབ་ན་ཆོས་ཀྱི་རྒྱལ་པོ་རང་ཉིད་ཀྱི་ཕྱག་བཟོ་མཆོད་རྟེན་བརྒྱད་སོགས་བོད་ཁམས་ཀུན་ཏུ་མཆོད་རྟེན་མང་པོ་བཞེངས། ཁྲི་སྲོང་ལྡེའུ་བཙན་གྱི་དུས་སུ་སློབ་དཔོན་པདྨ་འབྱུང་གནས་བསམ་ཡས་སུ་ཐོག་མར་གདན་དྲངས་པའི་དུས་སུ་ཟུར་མཁར་རྡོའི་མཆོད་རྟེན་ནམ་ངོ་མཚར་རྡོའི་མཆོད་རྟེན་ལྔ་དང།བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་ཕྱོགས་བཞི་རུ་སྣ་ནམ་རྒྱལ་ཚ་ལྷ་སྣང་དང༌། མཆིམས་རྡོ་རྗེ་སྤྲེལ་ཆུང་སོགས་ཀྱིས་ལས་དཔོན་བྱས་ཏེ་མཆོད་རྟེན་དཀར་པོ་བྱང་ཆུབ་ཆེན་པོ་ཉན་ཐོས་ཀྱི་ལུགས་དང༌། མཆོད་རྟེན་དམར་པོ་ཆོས་ཀྱི་འཁོར་ལོ་པདྨས་བརྒྱན་པ་བྱང་ཆུབ་སེམས་དཔའི་ལུགས།མཆོད་རྟེན་ནག་པོ་དེ་བཞིན་གཤེགས་པའི་སྐུ་གདུང་གིས་བརྒྱན་པ་སངས་རྒྱས་ཀྱི་ལུགས། མཆོད་རྟེན་སྔོན་པོར་དཔལ་ལྷ་ལས་བབས་པ་དེ་བཞིན་གཤེགས་པའི་ལུགས་སྒོ་མང་བཅུ་དྲུག་གིས་བརྒྱན་པ་དང༌། མཆོད་རྟེན་འོད་འབར་བ་དང༌། ཕྱི་ལྕགས་རིའི་སྟེང་དུ་སངས་རྒྱས་ཀྱི་རིང་བསྲེལ་རེ་བཞུགས་པའི་མཆོད་རྟེན་བརྒྱ་རྩ་བརྒྱད་སོགས་བཞེངས། སློབ་དཔོན་པདྨ་རང་གི་ཕྱག་འཁར་གྱིས་བསམ་ཡས་མཆིམས་ཕུའི་བྲག་རྡོ་ལ་མཆོད་རྟེན་བརྒྱ་རྩ་བརྒྱད་བྲིས་པ་དེབ་འདིའི་བརྙན་པར་དུ་བཞུགས་པ་ལྟར་དང༌། ཁྲི་གཙུག་ལྡེ་བཙན་རལ་བ་ཅན་གྱི་དུས་སུ་བཙན་པོའི་ཐུགས་དམ་གྱི་རྟེན་དུ་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས་པའི་ཡང་ཕུད་ཀྱིས་ཡེར་པར་མཆོད་རྟེན་བཞེངས་པ་དང༌། དེའི་གཙང་ཁང་དགུ་ཐོག་གི་ཡང་རྩེའི་རྒྱ་ཕིབས་རླུང་གིས་བསྐྱོད་པ་ན་མཁའ་ལ་གདུགས་ལྟར་དུ་འཁོར་བ་དེ་ལྕགས་ཐག་གིས་ཟུར་བཞི་ནས་མཆོད་རྟེན་ཆེན་པོ་བཞིའི་ངོས་སུ་བཏགས།ལྷ་ལུང་དཔལ་རྡོར་གྱིས་ཡེར་པ་ལྷ་རི་སྙིང་པོར་ས་དཔྱད་མཛད་དེ་མཆོད་རྟེན་ཆེན་མོ་བཞེངས་པ་དང༌། ལོ་ཙཱ་བ་སྐ་ཅོག་ཞང་གསུམ་མྱ་ངན་ལས་འདས་པའི་སྐུ་གདུང་གི་མཆོད་རྟེན་ཧས་པོ་རིར་བརྩིགས་པ་སོགས། མཆོད་རྟེན་མང་དུ་བཞེངས་པ་ཡིན་ལ། མདོར་ན་དེ་ཡན་ཆད་བསྟན་པ་སྔ་དར་གྱི་དུས་སུ་བོད་དུ་གཙུག་ལག་ཁང་སྟོང་རྩ་བརྒྱད་བཞེངས་པ་གསུངས་ལ་གཙུག་ལག་ཁང་རེའི་ནང་དུ་སྐུ་གསུང་ཐུགས་ཀྱི་རྟེན་རེ་མི་བཞུགས་མི་སྲིད་མོད། མཆོད་རྟེན་བགྲངས་ལས་འདས་པ་ཞིག་བཞེངས་མྱོང་བ་ནི་རིག་པས་དཔྱད་ན་ཤེས་པར་འགྱུར་རོ། 1/9 1 2 3 4 5 6 下一页 尾页 |
