ད་སྔ་གཟིགས་བཞིན་པ།  མདུན་ངོས། > ཆེད་ལས་ཐ་སྙད། > སྐྱེ་དངོས།
༄༅། །ཕུང་ཁམས་སྐྱེ་མཆེད་ཀྱི་རྣམ་བཞག་ལས་སྐབས་གཉིས་པ།ཁམས་བཅོ་བརྒྱད་ལས་ཁམས་ཀྱི་རབ་དབྱེ།
སྤེལ་དུས།01-16  ཡོང་ཁུངས།  རྩོམ་པ་པོ།
 
ལྔ་པ།ཁམས་གསུམ་ན་ཡོད་མེད་ཀྱི་ཁྱད་པར།
 
འདོད་པའི་ཁམས་ན་ཁམས་བཅོ་བརྒྱད་པོ་ཐམས་ཅད་ཡོད་ལ་ཁ་ཕྱིར་ལྟས་ཀྱི་འདོད་ཡོན་ལྔ་སྤྱོད་པས་འདོད་པའི་ཁམས་ཞེས་བྱའོ།ཕུང་པོ་ལྔའི་རབ་བཤད་ལས།གཟུགས་དང༌།སྒྲ་དང༌།དྲི་དང༌།རོ་དང༌།རེག་བྱ་སྟེ།ཡུལ་ལ་འདོད་པ་ཞེས་བྱ་ལ།འདོད་པ་དེ་ལ་གཙོ་བོར་འཛིན་ཅིང་སྤྱོད་པའི་ཁམས་ལ་འདོད་པའི་ཁམས་ཞེས་བྱའོ།།ཞེས་གསུངས་སོ།།
གཟུགས་ཁམས་ན་དྲི་རོ་དང་སྣ་ལྕེའི་རྣམ་ཤེས་ཀྱི་ཁམས་མེད་ལ་དེ་མ་གཏོགས་པ་བཅུ་བཞི་ཡོད་སྟེ།མིག་གི་ཁམས་དང༌།རྣ་བའི་ཁམས་དང༌།སྣའི་ཁམས་དང༌།ལྕེའི་ཁམས་དང༌།ལུས་ཀྱི་ཁམས་དང༌།ཡིད་ཀྱི་ཁམས་ཏེ།དབང་པོ་དྲུག་གི་ཁམས་དང༌།གཟུགས་དང༌།སྒྲ་དང༌།རེག་དང༌།ཆོས་ཏེ་ཡུལ་བཞིའི་ཁམས་དང༌།མིག་གི་རྣམ་པར་ཤེས་པའི་ཁམས་དང༌།རྣ་བའི་རྣམ་པར་ཤེས་པའི་ཁམས་དང༌།ལུས་ཀྱི་རྣམ་པར་ཤེས་པའི་ཁམས་དང༌།ཡིད་ཀྱི་རྣམ་པར་ཤེས་པའི་ཁམས་ཏེ་བཅུ་བཞི་ནི་གཟུགས་ཀྱི་ཁམས་དང་ཡང་ལྡན་ནོ།།གཟུགས་ཀྱི་ཁམས་ན་དྲིའི་ཁམས་དང༌།རོའི་ཁམས་ཏེ་ཡུལ་གྱི་ཁམས་གཉིས་དང༌།སྣའི་རྣམ་པར་ཤེས་པ་དང༌།ལྕེའི་རྣམ་པར་ཤེས་པ་གཉིས་ཏེ་ཁམས་བཞི་ནི་གཟུགས་ཀྱི་ཁམས་ན་མེད་སྟེ།ཅིའི་ཕྱིར་ཞེ་ན།འདི་ལྟར་དྲི་དང་རོ་གཉིས་ནི་ཟ་བའི་རང་བཞིན་ཡིན་ཏེ།རོ་ཡང་ཟས་དུམ་བུར་དུམ་བུར་བཅད་དེ་ཁམ་གྱིས་ཟ་བ་དང༌།དྲི་ཡང་ནང་ནས་དབུགས་ཀྱིས་དྲངས་ནས་ཁོང་དུ་དུམ་བུར་དུམ་བུར་བཅུག་པའི་རང་བཞིན་ཡིན་པས།ཁམ་གྱིས་ཟ་བའི་རང་བཞིན་ཡིན་ལ་ཁམ་གྱིས་ཟ་བའི་འདོད་ཆགས་དང་བྲལ་བ་རྣམས་གཟུགས་ཀྱི་ཁམས་སུ་སྐྱེ་བས་གང་གི་འདོད་ཆགས་དང་བྲལ་བ་གནས་གང་དུ་སྐྱེས་པ་དེས་ཡུལ་དེ་དང༌།རྣམ་པར་ཤེས་པ་དེ་དག་གནས་དེ་ན་མེད་དོ།།
གཟུགས་མེད་ཁམས་ན་ཟག་མེད་ཀྱི་དེ་གསུམ་མགཏོགས་པ་ཁམས་ཐ་མ་ཡིད་དང་ཡིད་ཤེས་ཆོས་ཁམས་གསུམ་གྱི་ཆ་ཤས་ཡོད་སྟེ།ཡིད་ཀྱི་ཁམས་དང༌།ཆོས་ཀྱི་ཁམས་དང༌།ཡིད་ཀྱི་རྣམ་པར་ཤེས་པའི་ཁམས་གསུམ་ནི་གཟུགས་མེད་པའི་ཁམས་དང་ལྡན་པའོ།།ཅིའི་ཕྱིར་ཞེ་ན།གཟུགས་ཀྱི་ཁམས་ལས་འདོད་ཆགས་དང་བྲལ་བ་རྣམས་གཟུགས་མེད་པའི་ཁམས་སུ་སྐྱེ་སྟེ།དེ་བས་ན་གཟུགས་མེད་པའི་ཁམས་སུ་མིག་ནས་ལུས་ཀྱི་ཁམས་ཀྱི་བར་དུ་ལྔ་དང༌།གཟུགས་ནས་རེག་བྱའི་ཁམས་ཀྱི་བར་དུ་ལྔ་སྟེ།གཟུགས་ཀྱི་རང་བཞིན་གྱི་ཁམས་བཅུ་དང༌།དེ་དག་ལ་བརྟེན་ཅིང་དམིགས་པའི་མིག་གི་རྣམ་པར་ཤེས་པའི་ཁམས་དང་ལུས་ཀྱི་རྣམ་པར་ཤེས་པའི་ཁམས་ལྔའི་བར་དུ་སྟེ།བཅོ་ལྔ་ནི་གཟུགས་མེད་པའི་ཁམས་ན་མེད་དོ།།
ཡིད་དང་ཆོས་དང་ཡིད་ཀྱི་རྣམ་པར་ཤེས་པའི་ཁམས་གསུམ་ལ་ཟག་པ་དང་བཅས་པའི་རང་བཞིན་ཡང་ཡོད།།ཟག་པ་མེད་པའི་རང་བཞིན་ཡང་ཡོད་པ་ལས་གཟུགས་མེད་པའི་ཁམས་ན་ཕུང་པོ་ཟག་པ་དང་བཅས་པའི་ཡིད་ལྡན་ནམ་ཟག་པ་མེད་པ་དང་ཡང་ལྡན་ནམ་སྙམ་པ་ལ་ཟག་པ་དང་བཅས་པའོ།།གཟུགས་མེད་པའི་ཁམས་ན་ནི་སོ་སོ་སྐྱེ་བོའི་ཡིད་ཀྱི་ཁམས་དང༌།ཆོས་ཀྱི་ཁམས་དང༌།ཡིད་ཀྱི་རྣམ་པར་ཤེས་པའི་ཁམས་ཟག་པ་དང་བཅས་པ་གསུམ་པོ་དང་ལྡན་ནོ།།
ཁམས་གསུམ་དུ་མ་གཏོགས་པའམ།འདོད་པ་དང༌།གཟུགས་དང༌།གཟུགས་མེད་པའི་ཁམས་ཀྱི་སྲེད་པས་མ་ཟིན་སྲེད་པས་མ་དམིགས་པ་ནི་མི་ལྡན་པ་ཞེས་བྱ་སྟེ།ཁམས་བཅོ་བརྒྱད་ལས་ཁམས་གསུམ་གང་དང་ཡང་མི་ལྡན་པའི་ཁམས་དུ་ཡོད་ཅེ་ན།ཟག་པ་མེད་པ་སྟེ།ཡིད་ཀྱི་ཁམས་དང༌།ཆོས་ཀྱི་ཁམས་དང༌།ཡིད་ཀྱི་རྣམ་པར་ཤེས་པའི་ཁམས་ཐ་མ་གསུམ་པོ་དེ་དག་ཉིད་གང་འཕགས་པའི་ལམ་དུ་གཏོགས་པའི་ཡིད་ཀྱི་ཁམས་དང་ཆོས་ཀྱི་ཁམས་དང༌།ཡིད་ཀྱི་རྣམ་པར་ཤེས་པའི་ཁམས་ཟག་པ་མེད་པ་དང༌།ཆོས་ཀྱི་ཁམས་ལས་འདུས་མ་བྱས་བཞི་ཟག་པ་མེད་པའི་རང་བཞིན་དེ་གསུམ་ནི་ཁམས་གསུམ་དང་མི་ལྡན་པའོ།།
 
དྲུག་པ།དགེ་སྡུག་ལུང་མ་བསྟན་གྱི་ཁྱད་པར།
 
སེམས་ཁམས་བདུན་དང་གཟུགས་སྒྲ་གཉིས་དང་ཆོས་ཁམས་ཀྱི་སེམས་བྱུང་ཚོར་འདུ་འདུ་བྱེད་གསུམ་རྣམས་དྲིལ་བའི་བཅུ་ལ་དགེ་མི་དགེ་ལུང་མ་བསྟན་གསུམ་ཆར་ཡོད།ལྷག་མ་དབང་པོ་ལྔ་དང་དྲི་རོ་རེག་བྱ་བརྒྱད་པོ་རྣམས་ལུང་དུ་མ་བསྟན་པའོ།།
དེ་ལ་དགེ་བ་རྣམ་པ་བཞི་ཡོད་དེ།རང་བཞིན་གྱིས་དགེ་བ་དང༌།ལྡན་པའི་དགེ་བ་དང༌།བསྐྱེད་པའི་དགེ་བ་དང༌།དོན་དམ་པའི་དགེ་བའོ།།འདི་ལྟར་འདོད་མི་ཆགས་པ་དང༌།ཞེ་མི་སྡང་བ་དང༌།གཏི་མི་མུག་པའི་དགེ་བའི་རྩ་བ་དང༌།ངོ་ཚ་ཤེས་པ་དང༌། ཁྲེལ་ཡོད་པ་དང་ལྔ་ནི་རང་བཞིན་གྱིས་དགེ་བའོ་ཞེས་བྱའོ།དགེ་བ་དེ་ལྔ་དང་ལྡན་པའི་སེམས་དང་སེམས་ལས་བྱུང་བ་རྣམས་ནི་ལྡན་པའི་དགེ་བ་ཞེས་བྱའོ།།དགེ་བ་དང་ལྡན་པའི་སེམས་དང་སེམས་ལས་བྱུང་བས་བསྐྱེད་པའི་ལུས་ཀྱི་སྒོ་ནས་ཐལ་མོ་སྦྱར་བ་དང༌།ངག་གི་སྒོ་ནས་བསྟོད་པ་དང༌།ཁ་ཏོན་ཀློག་པ་ནི་བསྐྱེད་པའི་དགེ་བ་ཞེས་བྱའོ།།སོ་སོར་བརྟགས་པས་འགོག་པ་དང༌།དེ་བཞིན་ཉིད་ནི་དོན་དམ་པར་དགེ་བ་ཞེས་བྱའོ།
མི་དགེ་བ་ལ་ཡང་རྣམ་པ་བཞི་ཡོད་དེ།རང་བཞིན་གྱིས་མི་དགེ་བ་དང༌།ལྡན་པས་མི་དགེ་བ་དང༌།བསྐྱེད་པས་མི་དགེ་བ་དང༌།དོན་དམ་པར་མི་དགེ་བའོ།།དེ་ལ་རང་བཞིན་གྱིས་མི་དགེ་བ་ནི་འདོད་ཆགས་དང༌།ཞེ་སྡང་དང༌།གཏི་མུག་མི་དགེ་བའི་རྩ་བ་དང༌།ངོ་ཚ་མི་ཤེས་པ་དང༌།ཁྲེལ་མེད་པ་དང་ལྔའོ།།ཆོས་དེ་ལྔ་དང་ལྡན་པའི་རང་བཞིན་སེམས་དང་སེམས་ལས་བྱུང་བ་རྣམས་ནི་ལྡན་པའི་མི་དགེ་བའོ།།མི་དགེ་བ་དང་ལྡན་པའི་སེམས་དང་སེམས་ལས་བྱུང་བས་བསྐྱེད་པའི་ལུས་ཀྱི་སྒོ་ནས་གཞན་ལ་བརྡེག་པ་དང༌།ངག་གི་སྒོ་ནས་ཚིག་རྩུབ་མོ་སྨྲ་བ་ལ་སོགས་པ་ནི་བསྐྱེད་པའི་མི་དགེ་བ་ཞེས་བྱའོ།འཁོར་བ་ནི་དོན་དམ་པར་མི་དགེ་བ་ཞེས་བྱའོ།།
ལུང་དུ་མ་བསྟན་པ་རྣམ་པ་བཞི་ཡོད་དེ།རང་བཞིན་གྱིས་ལུང་དུ་མ་བསྟན་པ་དང༌།ལྡན་པའི་ལུང་དུ་མ་བསྟན་པ་དང༌།བསྐྱེད་པའི་ལུང་དུ་མ་བསྟན་པ་དང༌།དོན་དམ་པའི་ལུང་དུ་མ་བསྟན་པའོ།།དེ་ལ་མིག་ནས་ལུས་ཀྱི་བར་དུ་དབང་པོ་ལྔ་དང༌།དྲི་དང༌།རོ་དང༌།རེག་བྱ་སྟེ།ཆོས་བརྒྱད་རྣམས་ནི་རང་བཞིན་གྱིས་ལུང་དུ་མ་བསྟན་པའོ།།སྤྱོད་ལམ་དང་བཟོའི་གནས་ལ་སོགས་པ་དང་ལྡན་པའི་སེམས་དང་སེམས་ལས་བྱུང་བ་རྣམས་ནི་ལྡན་པའི་ལུང་དུ་མ་བསྟན་པའོ།།ལུང་དུ་མ་བསྟན་པ་དང་ལྡན་པའི་སེམས་དང་སེམས་ལས་བྱུང་བས་བསྐྱེད་པའི་ལུས་ཀྱི་སྒོ་ནས་ཚེམ་དྲུབ་བྱེད་པ་དང༌།ངག་གི་སྒོ་ནས་ཚེམ་དྲུབ་ཀྱི་གཏམ་སྨྲ་བ་ནི་བསྐྱེད་པའི་ལུང་དུ་མ་བསྟན་པ་ཞེས་བྱའོ།།སོ་སོར་བརྟགས་པ་མ་ཡིན་པས་འགོག་པ་དང་ནམ་མཁའ་ནི་དོན་དམ་པར་ལུང་དུ་མ་བསྟན་པ་ཞེས་བྱའོ།།
སེམས་ཀྱི་ཁམས་བདུན་དང༌།གཟུགས་དང༌།སྒྲ་དང།ཆོས་ཀྱི་ཁམས་སྟེ་བཅུ་ལ་ནི་དགེ་བ་ཡང་ཡོད་མི་དགེ་བ་ཡང་ཡོད་ལུང་དུ་མ་བསྟན་པ་ཡང་ཡོད་དོ།།
སེམས་ཀྱི་ཁམས་བདུན་ལ་རྣམ་པ་གསུམ་ཇི་ལྟར་ཡོད་ཅེ་ན།སེམས་ཀྱི་ཁམས་བདུན་ནི་དགེ་བ་དང་མི་དགེ་བ་དང་ལྡན་པའི་སྒོ་ནས་དགེ་བ་དང་མི་དགེ་བར་གཞག་གི་དགེ་བ་དང་མི་དགེ་བའི་རང་བཞིན་ནི་མ་ཡིན་ནོ།དེ་ལ་འདོད་མ་ཆགས་པ་ལ་སོགས་པའི་དགེ་བ་དང་ལྡན་པའི་སེམས་ཀྱི་ཁམས་བདུན་ལ་ནི་དགེ་བ་ཞེས་བྱའོ།།འདོད་ཆགས་ལ་སོགས་པ་མི་དགེ་བ་དང་ལྡན་པའི་སེམས་ཀྱི་ཁམས་བདུན་ནི་མི་དགེ་བ་ཞེས་བྱའོ།།བཟོ་ལ་སོགས་པའི་ལས་དང་ལྡན་པའི་སེམས་ཀྱི་ཁམས་བདུན་ནི་ལུང་མ་བསྟན་པ་ཞེས་བྱའོ།།
གཟུགས་ཀྱི་ཁམས་དང༌།སྒྲའི་ཁམས་ལ་རྣམ་པ་གསུམ་དུ་གཞག་པ་ཡང་དགེ་བ་ལྔ་དང་ལྡན་པའི་སེམས་ཀྱིས་བསྐྱེད་པའི་སངས་རྒྱས་ལ་སོགས་པ་ལ་ཕྱག་འཚལ་བའི་ལུས་ཀྱི་ལས་ནི་དགེ་བ་ཞེས་བྱའོ།།མི་དགེ་བ་ལྔ་དང་ལྡན་པའི་སེམས་ཀྱིས་བསྐྱེད་པའི་གཞན་ལ་བརྡེག་པ་དང༌།སྲོག་གཅོད་པ་ལ་སོགས་པའི་ལུས་ཀྱི་ལས་ནི་མི་དགེ་བ་ཞེས་བྱའོ།།སྤྱོད་ལམ་དག་བཟོའི་གནས་བྱེད་པའི་ལུས་ཀྱི་ལས་ནི་ལུང་དུ་མ་བསྟན་པ་ཞེས་བྱའོ།སྒྲ་ཡང་དགེ་བའི་ལས་ཀྱིས་བསྐྱེད་ནས་སངས་རྒྱས་ལ་བསྟོད་པ་ལ་སོགས་པ་སྨྲ་བ་ནི་དགེ་བ་ཞེས་བྱའོ།།མི་དགེ་བའི་སེམས་ཀྱིས་བསྐྱེད་པའི་གཤེ་པ་ལ་སོགས་པ་དག་གི་ལས་ལ་ནི་མི་དགེ་བ་ཞེས་བྱའོ།།ཐ་མལ་པའི་གཏམ་དང་བཟོའི་གཏམ་སྨྲ་བ་ལ་ནི་ལུང་དུ་མ་བསྟན་པ་ཞེས་བྱའོ།།
ཆོས་ཀྱི་ཁམས་ལ་རྣམ་པ་གསུམ་དུ་གཞག་པ་ཡང་ཆོས་ཀྱི་ཁམས་ཚོར་བ་དང༌།འདུ་ཤེས་དང༌།འདུ་བྱེད་དང༌།རྣམ་པར་རིག་བྱེད་མ་ཡིན་པ་དང༌།འདུས་མ་བྱས་བཞི་སྟེ་བརྒྱད་ཡོད་པ་ལས་འདུ་བྱེད་ཀྱི་ཕུང་པོ་དགེ་བ་བཅུ་གཅིག་གི་ནང་ནས་འདོད་མ་ཆགས་པ་དང༌།ཞེ་མི་སྡང་བ་དང༌།གཏི་མི་མུག་པ་དང༌།ངོ་ཚ་ཤེས་པ་དང༌།ཁྲེལ་ཡོད་པ་ནི་རང་བཞིན་གྱིས་དགེ་བ་ཞེས་བྱའོ།།ཚོར་བ་དང༌།འདུཤེས་དགེ་བ་དང་ལྡན་པ་དང༌།བརྩོན་པ་ལ་སོགས་པ་དགེ་བ་གཞན་ཡོད་པ་ནི་ལྡན་པའི་དགེ་བ་ཞེས་བྱའོ།།འདུ་བྱེད་སེམས་དང་མི་ལྡན་པ་སྐྱེ་བ་དང༌།རྒ་བ་ལ་སོགས་པ་དགེ་བ་དང་ལྡན་པའི་སེམས་ཀྱིས་བསྐྱེད་པ་ནི་བསྐྱེད་པའི་དགེ་བ་ཞེས་བྱའོ།།སོ་སོར་བརྟགས་པས་འགོག་པ་དང༌།དེ་ཁོ་ན་ཉིད་ནི་དོན་དམ་པའི་དགེ་བ་ཞེས་བྱའོ།།འདུ་བྱེད་ཀྱི་ཕུང་པོ་ལ་འདོད་ཆགས་དང༌།ཞེ་སྡང་དང༌།གཏི་མུག་དང༌།ངོ་ཚ་མི་ཤེས་པ་དང༌།ཁྲེལ་མེད་པ་དང་ལྔ་ནི་རང་བཞིན་གྱིས་མི་དགེ་བ་ཞེས་བྱའོ།།ཚོར་བ་དང་འདུ་ཤེས་མི་དགེ་བའི་ཆོས་དང་ལྡན་པ་དང༌།རྣ་པར་འཚེབ་ལ་སོགས་པ་ཉེ་བའི་ཉོན་མོངས་པ་ཡོད་པ་རྣམས་ནི་ལྡན་པའི་མི་དགེ་བ་ཞེས་བྱའོ།།མི་དགེ་བའི་སེམས་ཀྱིས་བསྐྱེད་པའི་སྐྱེ་བ་དང༌།རྒ་བ་ལ་སོགས་པའི་འདུ་བྱེད་སེམས་དང་མི་ལྡན་པ་ནི་བསྐྱེད་པའི་མི་དགེ་བ་ཞེས་བྱའོ།།འདུ་བྱེད་ཀྱི་ཕུང་པོ་ལ་ལུང་དུ་མ་བསྟན་པའི་ཆར་བཤད་པ་རྣམས་ནི་ལྡན་པའི་ལུང་དུ་མ་བསྟན་པ་ཞེས་བྱའོ།།སོ་སོར་བརྟགས་པ་མ་ཡིན་པས་འགོག་པ་དང་ནམ་མཁའ་ནི་དོན་དམ་པར་ལུང་དུ་མ་བསྟན་པ་ཞེས་བྱའོ།།
ལྷག་མ་བརྒྱད་ནི་ལུང་དུ་མ་བསྟན་པའོ།།དེ་ཡང་གང་ཞེ་ན།དྲི་དང༌།རོ་དང༌།རེག་བྱ་དང༌།མིག་དང༌།རྣ་བ་དང༌།སྣ་དང༌།ལྕེ་དང༌།ལུས་ཀྱི་ཁམས་ཏེ་བརྒྱད་དོ།།བརྒྱད་པོ་དེ་དག་ནི་ལུང་དུ་མ་བསྟན་པ་ཉིད་ཡིན་གྱི་དེ་དག་ལ།རང་བཞིན་དང་ལྡན་པ་དང༌།བསྐྱེད་པ་དང༌།དོན་དམ་པར་དགེ་བ་ཡང་མེད་ལ།རང་བཞིན་དང་ལྡན་པ་དང༌།བསྐྱེད་པ་དང༌།དོན་དམ་པར་མི་དགེ་བ་ཡང་མེད་པ་ནི་ལུང་དུ་མ་བསྟན་པ་གཅིག་པུར་གཞག་གོ།
 
བདུན་པ།ཕྱི་ནང་གི་ཁྱད་པར།
 
ནང་ཞེས་བྱ་བ་ནི་བདག་གི་ལུས་སུ་གཏོགས་པ་ལ་བྱའོ།།ནང་གིར་གཏོགས་པ་བཅུ་གཉིས་སྟེ།མིག་གི་ཁམས་ནས་ཡིད་ཀྱི་ཁམས་ཀྱི་བར་དུ་དབང་པོ་དྲུག་གི་ཁམས་དང༌།མིག་གི་རྣམ་པར་ཤེས་པའི་ཁམས་ནས་ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་རྣམ་པར་ཤེས་པ་དྲུག་གི་ཁམས་བཅུ་གཉིས་ལ་ནང་གི་ཞེས་བྱའོ།
ལུས་ལས་མ་གཏོགས་པ་ནི་ཕྱི་རོལ་ཞེས་བྱ་སྟེ།གཟུགས་དང༌།སྒྲ་དང༌།དྲི་དང༌།རོ་དང༌།རེག་བྱ་དང༌།ཆོས་ཏེ་ཕྱིའི་ཡུལ་དྲུག་པོ་དེ་ལ་ཕྱི་རོལ་གྱི་ཞེས་བྱའོ།།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号