༼༢༨༠༽

ཡིན་པའི་ཕྱོགས་སུ་སོང་བ་དང་། དགེ་འདུན་གྱི་གནས་ནས་ཕྱུང་བའོ་ཞེས་གསུངས་ཏེ། དེ་ལྟར་ལུང་མ་མོ་དང་གཞི་འགྲེལ་ལས་ཀྱང་བཤད་དོ།་་་་་ཐ་དད་དུ་གནས་པ་ལ་སྡོམ་པ་ཡོད་པའི་ཕྱིར། ཐ་དད་དུ་གནས་པར་གཟུང་དུ་གསོལ་ཞེས་བརྗོད་པས་སྡོམ་པ་བཏང་བར་འགྱུར་བར་མི་རིགས་སོ་ཞེ་ན། འདི་ནི་བསླབ་པ་འབུལ་བ། གོ་བར་བྱེད་པའི་མཚོན་བྱེད་ཙམ་ཡིན་ཏེ། དཔེར་ན་མཁན་པོ་གྲོངས་ནས་མེད་ཀྱང་། མཁན་བུ་ལ་སྡོམ་པ་ཡོད་མོད་ཀྱི་མཁན་པོ་འབུལ་ལོ་ཞེས་བརྗོད་པ་དེ་སྡོམ་པ་འབུལ་བའི་ཆོ་ག་ཡིན་པ་བཞིན་ནོ། །རང་བཞིན་དུ་གནས་པ་རྣམས་ཀྱིས་ལྷན་ཅིག་ཏུ་གནས་པར་མི་བྱ་བ་ནི་ཕམ་པ་བྱུང་བ་སྟེ། རྣམ་འབྱེད་ལས་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་གསུངས་པ་དང་། རྣམ་འབྱེད་འགྲེལ་ལས་གནས་པར་མི་བྱ་བ་ནི་ཉམས་པའོ་ཞེས་བཤད་དོ། །ཕམ་པ་འཆབ་བཅས་ཀྱིས་ཉམས་པའོ། །འབུལ་བའི་ཚིག་དག་ཡིན་ཞེས་སྨོས་ན། སྤྲིངས་ཡིག་དང་ལག་བརྡ་ལ་སོགས་པ་ལུས་ཀྱི་རིག་བྱེད་ཀྱིས་ཕུལ་བར་འགྱུར་རམ་མི་འགྱུར་ཞེ་ན། རང་གི་རྣམ་བཤད་དང་ཊཱི་ཀ་ལས། ལུས་ཀྱི་རྣམ་པར་རིག་བྱེད་ལས་ཀྱང་བསླབ་པ་ཕུལ་བར་འགྱུར་ཞེས་བཤད་དོ། །འོད་ལྡན་ལས་ཀྱང་། གོ་བར་བྱེད་པ་ཐམས་ཅད་ཀྱིས། །བརྡ་ཕྲད་མི་ལ་གོ་བྱེད་ནའོ། །ཞེས་བཤད་དོ། །འོ་ན་ལུང་མ་མོ་ལས། སྤྲིངས་ཡིག་དང་ལག་བརྡས་བསླབ་པ་འབུལ་ན་ཡང་བསླབ་པ་མ་ཕུལ་བ་ཞེས་བྱའོ། །ཞེས་གསུངས་པ་དང་འགལ་ཞེ་ན། དེ་ནི་ཕ་རོལ་པོས་དོན་མ་གོ་བ་ལ་དགོངས་སོ་ཞེས་རིགས་སོ། །བསླབ་པ་འབུལ་བའི་ལེའུ་འོ། །གཉིས་པ་དགེ་སློང་ཕ་མའི་རྣམ་འབྱེད་སོ་སོར་བསྟན་པ་འདི་ལ་གཉིས་ཏེ། སྤྱིའི་དོན་དང་སོ་སོའི་དོན་ཏོ། །དང་པོ་ལ་དགུ་སྟེ། ལྟུང་བ་སྡེ་ལྔ་པོ་རྣམས་ཀྱི་དབྱེ་བ་དང་། བསྡུ་བ་དང་། མཚན་ཉིད་དང་། གྲངས་ངེས་པ་དང་། གོ་རིམ་ངེས་པ་དང་། སྒྲ་བཤད་པ་དང་། འདས་ན་ཅིར་འགྱུར་དང་། བསྲུང་བའི་ཕན་ཡོན་དང་། མ་བསྲུངས་པའི་ཉེས་དམིགས་སོ། །དང་པོ་ལ་གཉིས་ལས་དབྱེ་བའི་གཞི་ནི་རབ་བྱུང་གི་སོ་སོ་ཐར་པའི་སྡོམ་པ་ལས་འདས་པའི་ལྟུང་བ་ཙམ་མོ། །དབྱེ་བའི་སྒོ་ནི་ངོ་བོ་ཐ་དད་ཀྱི་སྒོ་ནས་མི་འབྱེད་དེ། དངོས་དང་མདོར་བསྡུས་ལ་ལྟོས་ནས། དཔག་ཏུ་མེད་པས་དབྱེ་བར་མི་ནུས་པའི་

༼༢༨༡༽

ཕྱིར་རོ། །འོ་ན་གང་ཞེ་ན། སྡེ་ཚན་ཐ་དད་ཀྱི་སྒོ་ནས་ཕྱེ་ན། ལྟུང་བའི་སྡེ་ཚན་ལྔ་སྟེ། ལུང་ལྔ་ཚན་པ་ལས་ཉེས་པ་ལྔ་སྟེ། ཕམ་པ་དང་། དགེ་འདུན་ལྷག་མ་དང་། ལྟུང་བྱེད་དང་། སོ་སོར་བཤགས་པར་བྱ་བ་དང་། ཉེས་བྱས་སོ་ཞེས་པ་དང་། རྣམ་འབྱེད་ལས་རྫུན་རྣམ་པ་ལྔ་སྟེ། གཞི་མེད་པར་ལྟུང་བ་སྡེ་ལྔས་གླེང་བའོ། །ཞེས་པ་དང་། འདུལ་བ་བསྡུ་བ་ལས། ལྟུང་བའི་སྡེ་ཚན་ལྔ་སྟེ།་་་་་དེ་དག་གིས་ལྟུང་བ་ཐམས་ཅད་བསྡུས་པ་ཡིན་ནོ་ཞེས་འདུལ་བ་བསྡུ་བ་ལས་སོ། །ཞེས་པ་དང་། འོད་ལྡན་ལས། ལྟུང་བ་རིགས་ལྔ་དག་ཏུ་འཇུག་པར་བྱེད་པ་ཡིན་པའི་ཕྱིར་ཞེས་བཤད་དོ། །སྡེ་ཚན་ལྔ་པོ་དེར་སྦོམ་པོ་མི་འདུས་སོ་ཞེ་ན། ཕམ་ལྷག་གི་ན་སྨད་ཡིན་པས་ཕམ་ལྷག་གི་སྡེར་འདུས་ཏེ། འོད་ལྡན་ལས་ཉེས་པ་སྦོམ་པོ་ནི་གཉིས་ཏེ། ཕམ་པ་ལས་བྱུང་བ་དང་། ལྷག་མ་ལས་བྱུང་བའོ་ཞེས་བཤད་དོ། །བཙུན་པ་ངོ་བོ་ཉིད་མེད་པས། །ལྟུང་བ་རིགས་ལྔ་ནི་ཕམ་པ་དང་། ལྷག་མ་དང་སྦོམ་པོ་དང་ལྟུང་བྱེད་དང་། སོ་སོར་བཤགས་པར་བྱའོ་ཞེས་སྦོམ་པོའི་སྡེ་བཤད་པ་་་་་་མདོ་སྡེ་རྒྱན་གྱི་འགྲེལ་བཤད་ལས། ནི། བཤད་པ་ཙམ་དུ་ཟད་དེ་མི་འཐད་དོ། །སོ་སོ་ཐར་པ་ལས།་་་་་མ་ངེས་པའི་ཆོས་གཉིས་ནི་སྡེ་ལྔ་པོ་དེར་མ་འདུས་སམ་སྙམ་ན། འདུལ་བ་བསྡུ་བ་ལས། མ་ངེས་པ་གང་ཡིན་པ་དེ་ནི་ཕམ་པ་ལ་སོགས་པ་དེ་དག་ཉིད་དུ་ཅི་རིགས་པར་འདུས་པར་རིག་པར་བྱའོ་ཞེས་གསུངས་ཏེ། གསུམ་དུ་མ་ངེས་པའི་ཆོས་ནི་་་་་་དགེ་སློང་དང་བུད་མེད་འདོམ་གང་གིས་བར་དུ་མ་བཅད་པར་འདོད་པར་བྱར་རུང་བར་སྟན་ལ་འདུག་ན། ཕམ་ལྷག་ལྟུང་བྱེད་དང་གསུམ་གང་འབྱུང་མ་ངེས་པ་དེ་ནི། ཕམ་ལྷག་དང་ལྟུང་བྱེད་དུ་འདུས་ཏེ། གཉིས་སུ་མ་ངེས་པའི་ཆོས་ནི་་་་་་དགེ་སློང་དང་བུད་མེད་འདོམ་གང་གིས་བར་དུ་བཅད་དེ་འདོད་པ་བྱར་མི་རུང་བར་སྟན་ལ་འདུག་ན་རེག་པའི་ལྷག་མ་དང་འདུག་པའི་ལྟུང་བྱེད་གཉིས་གང་འབྱུང་མ་ངེས་པ་དེ་ནི། ལྷག་མ་དང་ལྟུང་བྱེད་དུ་འདུས་པའོ།་་་་་ལྟུང་བ་སྡེ་ལྔ་པོ་དེར་སྤང་ལྟུང་མ་འདུས་སམ་སྙམ་ན་ལྟུང་བྱེད་ཀྱི་སྡེར་འདུས་ཏེ། ལྟུང་བྱེད་ཀྱི་བྱེ་བྲག་ཡིན་པའི་ཕྱིར་རོ། །གཉིས་པ་བསྡུ་བ་ལ་གཉིས་ཏེ། བསྡུ་བ་དངོས་དང་། ཞར་ལ་བྱུང་བའོ། །དང་པོ་ལ་གསུམ་ལས། དང་པོ་བསམ་པ་དང་དངོས་པོའི་ཆ་ནས་བསྡུ་བ་ནི། ལྟུང་བ་ཐམས་ཅད་གཉིས་སུ་འདུས་ཏེ། འདུ་ཤེས་གཙོ་བོ་དང་། དངོས་པོ་གཙོ་བོའོ། །དེའང་འོད་ལྡན་

༼༢༨༢༽

ལས། བསླབ་པའི་གཞི་ནི་རྣམ་པ་གཉིས་ཏེ། འདུ་ཤེས་གཙོ་བོར་བྱ་བ་དང་། དངོས་པོ་གཙོ་བོར་བྱ་བའོ་ཞེས་བཤད་དོ། །དངོས་པོ་གཙོ་བོ་ནི་མི་ཚངས་སྤྱོད་དང་འབྱིན་པ་གཉིས་ཀྱི་ལྟུང་བ་ཡིན་ལ། འདུ་ཤེས་གཙོ་བོ་ནི་དེ་དག་ལས་གཞན་པའི་ལྟུང་བ་རྣམས་ཡིན་ཏེ། མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་དེར་མ་ཟད་དོ་ཞེས་བཤད་དོ།་་་་་མི་ཚངས་སྤྱོད་ཀྱི་ཕམ་པ་དང་དེའི་སྦོམ་པོ་ལ་སོགས་པ་དེ་དག་དང་མི་ཚངས་པར་སྤྱོད་པའི་ཕམ་པ་དང་འདྲ་བའི་ཉེས་བྱས་རྣམས་དངོས་པོ་གཙོ་བོའོ། །འབྱིན་པའི་ལྷག་མ་དང་དེའི་སྦོམ་པོ་ལ་སོགས་པ་དག་དང་། དགེ་སློང་མས་འབྱིན་པའི་ལྟུང་བྱེད་དང་། དགེ་ཚུལ་གྱིས་འབྱིན་པའི་བསྡོམ་བྱའི་ཉེས་པ་དངོས་པོ་གཙོ་བོ་སྟེ་སྤྱིར་བསྟན་གྱི་གཞུང་དེས་ཤེས་སོ། །གཉིས་པ་བྱེད་ལས་ཀྱི་ཆ་ནས་བསྡུ་བ་ནི། ལྟུང་བ་ཐམས་ཅད་གཉིས་སུ་འདུས་པ་སྟེ། གསོ་བའི་ལྷག་མ་དང་བཅས་པ་དང་། ལྷག་མ་མེད་པའི་ལྟུང་བའོ། །དེ་ཡང་གཅིག་ལས་འཕྲོས་པ་ལས་ཉེས་པ་གཉིས་ཏེ་ལྷག་མ་དང་བཅས་པ་དང་། ལྷག་མ་མ་ལུས་པའོ་ཞེས་བཤད་དོ། །དེ་གཉིས་ནི་ཐུན་མོང་གི་ཕམ་པ་འཆབ་བཅས་དང་དེ་ལས་གཞན་པའི་ལྟུང་བ་རྣམས་ཏེ་མས་རིམ་བཞིན་ནོ། །གསུམ་པ་ངོ་བོའི་ཆ་ནས་བསྡུ་བ་ནི་ལྟུང་བ་ཐམས་ཅད་གཉིས་སུ་འདུས་ཏེ། རང་བཞིན་གྱིས་ཁ་ན་མ་ཐོ་བ་དང་། བཅས་པའི་ཁ་ན་མ་ཐོ་བའོ། །དེ་ཡང་ལུང་རྣམ་འབྱེད་ལས། རང་བཞིན་དང་བཅས་པའི་ཁ་ན་མ་ཐོ་བ་གང་ཁས་བླངས་པ་དེ་ཕྱིར་བཅོས་བྱེད་དུ་གཞུག་ཅེས་གསུངས་པ་དང་། འདུལ་བ་བསྡུ་བ་ལས། རང་བཞིན་ཁ་ན་མ་ཐོ་དང་། །བཅས་པའི་ཁ་ན་མ་ཐོ་དང་། །ཞེས་གསུངས་པ་དང་། འོད་ལྡན་གྱི་རྩ་བ་ལས། རང་བཞིན་ཁ་ན་མ་ཐོ་མ་གཏོགས་བསྒྲིམ། །བཅས་པའི་ཁ་ན་མ་ཐོ་བས་ཀྱང་བསྐྱང་ཞེས་བཤད་དོ། །གཉིས་པ་ཞར་ལ་བྱུང་བ་ནི་ཁ་ན་མ་ཐོ་བ་དེ་གཉིས་ཀྱི་ཁྱད་པར་གང་ཞེ་ན། འདི་ལ་བཞི་སྟེ། གཞན་ལུགས་དགག་པ་དང་། རང་ལུགས་བཞག་པ་དང་། དེ་ལ་རྩོད་པ་སྤང་བ་དང་། འཕྲོས་པའི་དོན་ཏོ། །དང་པོ་ནི། ཁ་ཅིག་ན་རེ། ཉོན་མོངས་པས་ཀུན་ནས་བསླང་བའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། ཉོན་མོངས་པས་ཀུན་ནས་མ་བསླངས་པའི་ལྟུང་བ་ནི་བཅས་པའི་ཁ་ན་མ་ཐོ་བ་ཡིན་ཏེ། རྣམ་འབྱེད་འགྲེལ་ལས་རང་བཞིན་གྱི་ཁ་ན་མ་ཐོ་བ་ནི་ཉོན་མོངས་པ་ཅན་གྱི་སེམས་ལས་བྱུང་བ་སྟེ། ངོ་བོ་ཉིད་ཀྱིས་སྐྱོན་ཆགས་པའི་ཕྱིར་རོ། །

༼༢༨༣༽

ཞེས་བཤད་པས་ཤེས་སོ་ཟེར་རོ། །དེ་དགག་པ་ལ་གཉིས་ཏེ། གནོད་བྱེད་བརྗོད་པ་དང་། སྒྲུབ་བྱེད་གཞིག་པའོ། །དང་པོ་ནི། སོ་སོ་སྐྱེ་བོས་བྱ་བ་མ་ཡིན་པ་བྱས་པའི་ལྟུང་བ་ཐམས་ཅད་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པར་ཐལ། ལྟུང་བ་གང་ཞིག ངས་འདི་ལྟར་བྱའོ་ཞེས་བདག་ཏུ་འཛིན་པའི་ཉོན་མོངས་པས་ཀུན་ནས་བསླང་པའི་ཕྱིར་རོ། །རྟགས་ཉམས་སུ་མྱོང་བས་གྲུབ་ཅིང་། ང་དང་བདག་ཏུ་འཛིན་པ་དེ་ཉོན་མོངས་པ་ཡིན་ནམ་སྙམ་ན། སུམ་ཅུ་པ་ལས། རྩ་བའི་ཉོན་མོངས་པ་དྲུག་གསུངས་ཏེ་ཉོན་མོངས་ནི། འདོད་ཆགས་ཁོང་ཁྲོ་གཏི་མུག་དང་ང་རྒྱལ་ལྟ་བ་ཐེ་ཚོམ་ཞེས་བདག་ཏུ་ལྟ་བ་དེ་ཉོན་མོངས་པ་ཡིན་པར་གསུངས་སོ།་་་་་ཁྱབ་པ་མ་གྲུབ་ན་དམ་བཅའ་ཉམས་སོ། །འདོད་ན་འོད་ལྡན་ལས་འཕགས་པ་ཉེ་སྦས་ཀྱིས་ནི་མྱོས་པར་འགྱུར་བའི་ཁུ་བ་བཅས་པའི་ཁ་ན་མ་ཐོ་བ་དང་བཅས་པ་ཡིན་ཡང་ཤིན་ཏུ་སྨད་པ་ཡིན་ཏེ་ཞེས་བཤད་དོ།་་་་་འདུལ་བ་བསྡུ་བ་ལས་ཀྱང་། རང་བཞིན་ཁ་ན་མ་ཐོ་དང་། །བཅས་པའི་ཁ་ན་མ་ཐོ་དང་། །ཞེས་གསུངས་སོ། །གཉིས་པ་སྒྲུབ་བྱེད་གཞིག་པ་ནི།་་་་་སྤྱིར་ན་ཉོན་མོངས་པ་མི་དགེ་བ་ཡིན་པ་དང་། ཉོན་མོངས་པ་ལུང་མ་བསྟན་ཡིན་པ་སྟེ་གཉིས་ལས། རྣམ་འབྱེད་འགྲེལ་ལས་བཤད་པ་དེ་མི་དགེ་བ་ཡིན་པའི་ཉོན་མོངས་པ་ལ་དགོངས་པ་ཡིན་ཏེ། ངོ་བོ་ཉིད་ཀྱིས་སྐྱོན་ཆགས་པའི་ཕྱིར་རོ། །ཞེས་གསུངས་པས་སོ། །ཉོན་མོངས་པ་མི་དགེ་བ་ཡིན་པ་ནི་ཞེ་སྡང་ལྟ་བུའོ། །ཉོན་མོངས་པ་ལུང་མ་བསྟན་ཡིན་པ་ནི་བདག་ཏུ་འཛིན་པ་ལྟ་བུའོ།་་་་་རྩ་བའི་ཉོན་མོངས་པ་དྲུག་གི་ནང་ནས། ང་དང་བདག་ཏུ་འཛིན་པ་ནི་ལུང་མ་བསྟན་ཡིན་ཏེ། སུམ་ཅུ་པ་ལས་དེ་བཞིན་སྒྲིབ་ལ་ལུང་མ་བསྟན་ཞེས་སོ། །ཁ་ཅིག་་་་་་རྒྱ་ན་རེ་རྐྱེན་ལ་ལྟོས་ཏེ་གནང་བ་མི་འབྱུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རྐྱེན་ལ་ལྟོས་ཏེ་གནང་བ་འབྱུང་བ་ནི་བཅས་པའི་ཁ་ན་མ་ཐོ་བ་སྟེ། རང་བཞིན་ཁ་ན་མ་ཐོ་མ་གཏོགས་བསྒྲིམ། །བཅས་པའི་ཁ་ན་མ་ཐོ་བས་ཀྱང་བསྐྱེད་ཞེས་པ་དང་། ཞུ་བ་ལས། བཙུན་པ་ནད་པ་ལ་ཅི་འཚལ་བར་བགྱི། །ཨུ་པ་ལི་རང་བཞིན་གྱི་ཁ་ན་མ་ཐོ་བ་མ་གཏོགས་པ་གང་གིས་ནད་གསོས་པར་གྱུར་པ་དེ་དག་བྱིན་ཅིག་ཅེས་གསུངས་པ་དང་། མཛོད་འགྲེལ་ལས། ཉན་ཐོས་མངོན་པ་བས་ཆང་བཅས་པའི་ཁ་ན་མ་ཐོ་བ་དང་བཅས་པ་ཡིན་ཏེ། ཆང་འཁུར་བར་བསྲེལ་བ་དང་ལུས་ལ་བྱུག་པ་གནང་

༼༢༨༤༽

བའི་ཕྱིར་ཞེས་བཅས་པ་ཡིན་པའི་སྒྲུབ་བྱེད་དུ་གནང་བ་གཏན་ཚིགས་སུ་བཀོད་པས་ཀྱང་ཤེས་སོ་ཞེས་ཟེར་རོ། །དེ་དགག་པ་ལ་གཉིས་ཏེ། གནོད་བྱེད་བརྗོད་པ་དང་། སྒྲུབ་བྱེད་གཞིག་པའོ། །དང་པོ་ནི། ཆང་གི་དྲི་རོ་མངོན་པར་གྱུར་པའི་ཆང་འཐུང་བའི་ལྟུང་བ་ཆོས་ཅན། བཅས་པའི་ཁ་ན་མ་ཐོ་བ་མ་ཡིན་པར་ཐལ། རྐྱེན་ལ་ལྟོས་ཏེ་གནང་བ་མི་འབྱུང་བའི་ཕྱིར་རོ། །རྟགས་གཞུང་གིས་གྲུབ་སྟེ་བཀག་པ་མངོན་ཤེས་ཀྱི་ཊཱི་ཀ་ལས་བཀག་པ་ཞེས་བྱ་བ་ནི་སྲོག་ལ་བབ་ཀྱང་གཞི་འདི་རྣམ་པ་ཐམས་ཅད་དུ་མི་བྱའོ་ཞེས་བྱ་བ་སྟེ། ང་ལ་སྟོན་པར་སྨྲ་བ་རྣམས་ཀྱིས་ཐ་ན་རྩྭའི་མཆོག་མས་ཀྱང་ཆང་མི་བཏུང་ངོ་ཞེས་གསུངས་པ་དང་། སྲོག་གཅོད་པ་ལ་སོགས་པ་རང་བཞིན་གྱི་ཁ་ན་མ་ཐོ་བ་དང་བཅས་པ་མི་བྱའོ་ཞེས་གསུངས་སོ།་་་་་ཆང་གི་དྲི་རོ་མ་ི་མངོན་པའི་དབང་དུ་བྱས་ནས་ནད་པས་ནི་ཞུན་མར་དང་འབྲུ་མར་ཆང་དང་འདྲེས་པ་བཏུང་བར་བྱ་བ་ཉིད་དོ་ཞེས་གསུངས་པ་ཡང་ཡོད་དོ། །ཁྱབ་པ་ཁས་བླངས་སོ། །འདོད་ན་འོད་ལྡན་ལས་འཕགས་པ་ཉེ་སྦས་ཀྱི་ནི་མྱོས་པར་འགྱུར་བའི་ཁུ་བ་བཅས་པའི་ཁ་ན་མ་ཐོ་བ་དང་བཅས་པ་ཡིན་ཡང་ཤིན་ཏུ་སྨད་པ་ཡིན་ཏེ་ཞེས་པ་དང་། མཛོད་འགྲེལ་ལས། ཇི་ལྟར་མྱོས་པར་འགྱུར་བ་འཐུང་བ་བཅས་པའི་ཁ་ན་མ་ཐོ་བ་ཡིན་པར་ཤེས་ཞེ་ན། རང་བཞིན་གྱི་ཁ་ན་མ་ཐོ་བའི་མཚན་ཉིད་མེད་པའི་ཕྱིར་རོ་ཞེས་བཤད་དོ། །སྒྲུབ་བྱེད་གཞིག་པ་ནི་བསླབ་པའི་གཞི་གང་ཞིག་རྐྱེན་ལ་ལྟོས་ཏེ་གནང་བ་ཡོད་པ་ལ་བཅས་པ་ཡིན་པས་ཁྱབ་ཀྱང་། གནང་བ་མེད་པ་ལ་རང་བཞིན་གྱི་ཁ་ན་མ་ཐོ་བ་ཡིན་པའི་ཁྱབ་པ་མེད་དེ། ཆང་འཐུང་བའི་ཁ་ན་མ་ཐོ་བ་བཞིན་ནོ། །ཆང་འཁུར་བར་བསྲེལ་བ་དང་ལུས་ལ་བྱུག་པར་གནང་བ་དེ་ཆང་གི་གཞི་ལ་གནང་བ་ཙམ་ཡིན་གྱི་ཆང་འཐུང་བའི་ངོ་བོ་གནང་བ་མ་ཡིན་ནོ། །གལ་ཏེ་གཞི་ལ་གནང་བས་ངོ་བོ་གནང་བའི་གོ་ཆོད་ན་ནི། དགེ་སློང་གིས་སྲོག་གཅོད་པ་གནང་བར་ཐལ། སེམས་ཅན་ལ་མཚོན་འདེབས་པ་གནང་བའི་ཕྱིར་ཏེ། གཏར་ཁ་བྱེད་པ་གནང་བའི་ཕྱིར་རོ་ཞེས་མགོ་མཚུངས་སོ། །ཁ་ཅིག་་་་་་སོག་ན་རེ། ལྟུང་བ་ཐམས་ཅད་སྡིག་པ་ཡིན་ལ། རྟེན་ཁྱིམ་པ་དང་ཐུན་མོང་དུ་སྡིག་ཏུ་འགྱུར་བ་དེ་རང་བཞིན་གྱི་ཁ་ན་མ་ཐོ་བ་ཡིན་ལ། རབ་ཏུ་བྱུང་བ་ཁོ་ན་ལ་སྡིག་ཏུ་འགྱུར་བ་དེ་བཅས་པའི་ཁ་ན་མ་ཐོ་བ་ཡིན་ནོ། །

༼༢༨༥༽

དེའང་བཅས་པའི་ཁ་ན་མ་ཐོ་བ་སྡིག་ཡིན་པར་ནི་ལུང་རིགས་གཉིས་ལས། ལུང་སྡེ་སྣོད་གསུམ་གས་གྲུབ་སྟེ། མདོ་སྡེ་གསེར་འོད་དམ་པ་ལས། རང་བཞིན་ཁ་ན་མ་ཐོ་དང་། །བཅས་པའི་སྡིག་པ་གང་བགྱིས་པ། །ཞེས་པ་དང་། ལྕི་ཡང་བསྟན་པའི་མདོ་ལས། ཉེས་བྱས་གཅིག་གིས་ཀྱང་རྒྱལ་ཆེན་རིགས་བཞིའི་ལྷའི་ཚེ་ཚད་དང་མཉམ་པར་དམྱལ་བར་སྐྱེ་བར་གསུངས་པ་དང་། འདུལ་བ་ལུང་རྣམ་འབྱེད་ལས་ཀྱང་། ཕྱི་དྲོའི་ཁ་ཟས་དང་ཆང་འཐུང་བའི་ལྟུང་བྱེད་ལ་སོགས་པ་བཅས་འགལ་རྣམས་ཀྱི་སྐབས་སུ།་་་་་བསྲེག་པར་བྱེད། འཚེད་པར་བྱེད། ལྟུང་བར་བྱེད་པའོ་ཞེས་གསུངས་པ་དང་། འོད་ལྡན་དུ། གཏམ་གྱི་གཞི་ཁུངས་སུ་དྲངས་ནས་ལྟུང་བ་ནི་རྣམ་པར་རིག་བྱེད་ཉིད་དང་གཟུགས་ཅན་ཉིད་དུ་བསྟན་པའི་ཕྱིར་ཞེས་བཤད་པས་ཀྱང་གྲུབ་སྟེ། ལྟུང་བ་གཟུགས་ཡིན་པ་དེ་ཡང་རིག་བྱེད་མ་ཡིན་པའི་གཟུགས་ཡིན་དགོས་ལ། རིག་བྱེད་མ་ཡིན་པའི་གཟུགས་ལུང་མ་བསྟན་མི་སྲིད་ཅིང་ལྟུང་བ་དགེ་བའི་གཟུགས་ཡིན་པ་མི་སྲིད་པས་ལྟུང་བ་མི་དགེ་བའི་གཟུགས་ཡིན་པར་གྲུབ་བོ།་་་་་རྣམ་རིག་མིན་པའི་གཟུགས་ལུང་མ་བསྟན་ཡིན་པ་མི་སྲིད་པ་དེ་གང་གིས་གྲུབ་ན། མཛོད་ལས་རྣམ་རིག་མིན་ལུང་བསྟན་མིན་མེད་ཅེས་གསུངས་པས་སོ། །མངོན་པ་མཛོད་ཀྱི་འགྲེལ་བཤད་ལས་ཀྱང་། བཅས་པའི་ཁ་ན་མ་ཐོ་བ་ནི་བཀག་པས་སྡིག་ཏུ་གྱུར་པ་སྟེ་ཞེས་པས་གྲུབ་ལ། རིགས་པས་ཀྱང་གྲུབ་སྟེ་བཅས་པ་རྣམས་མ་བསྲུངས་པ་ལ་སྡིག་པ་མི་འབྱུང་ན། བསྲུངས་པ་ལ་ཡང་བསོད་ནམས་མི་འབྱུང་བར་མགོ་མཚུངས་པར་འགྱུར་ཞེས་ཟེར་རོ། །དེ་དགག་པ་ལ་གཉིས་ཏེ་གནོད་བྱེད་བརྗོད་པ་དང་། སྒྲུབ་བྱེད་གཞིག་པའོ། །དང་པོ་ལ་བཞི་ལས། ལུང་གི་གནོད་བྱེད་ནི། གཅིག་ལས་འཕྲོས་པ་ལས་ཉེས་པ་གཉིས་ཏེ། མི་དགེ་བ་དང་ལུང་དུ་མ་བསྟན་པའོ་ཞེས་ལྟུང་བ་ལུང་མ་བསྟན་ཡོད་པར་གསུངས་པ་དང་འགལ་ལོ། །མཐའ་རྣམ་པར་བརྟག་ནས་དགག་པ་ནི།་་་་་མངོན་པ་གོང་འོག་གཉིས་ཀ་ལས། །མི་དགེ་བ་རིགས་བཞིར་གསུངས་པ་ལས། དོན་དམ་པའི་མི་དགེ་བ་ནི་འཁོར་བ་ཐམས་ཅད་དོན་དམ་པའི་མི་དགེ་བ་སྟེ། སྡུག་བསྔལ་དང་ཉོན་མོངས་པ་དང་ལས་མི་དགེ་བ་དང་ལས་ལུང་མ་བསྟན་དང་དགེ་བ་ཟག་བཅས་རྣམས་ཀྱང་དོན་དམ་པའི་མི་དགེ་བ་ཡིན་

༼༢༨༦༽

ནོ། །ངོ་བོ་ཉིད་ཀྱི་མི་དགེ་བ་ནི་ཞེ་སྡང་ལ་སོགས་པ་སྟེ། ངོ་བོ་ཉིད་ཀྱིས་མི་དགེ་བའི་ངོ་བོར་སྐྱེས་པའི་སེམས་བྱུང་རྣམས་ཡིན་ནོ། །མཚུངས་པར་ལྡན་པས་མི་དགེ་བ་ནི། སེམས་བྱུང་ཞེ་སྡང་དང་མཚུངས་པར་ལྡན་པའི་སེམས་ཀྱང་མཚུངས་པར་ལྡན་པས་མི་དགེ་བ་ཡིན་ལ། ཞེ་སྡང་དང་མཚུངས་ལྡན་དུ་སྐྱེས་པའི་ཚོར་བ་དང་སེམས་པ་ལ་སོགས་པ་སེམས་བྱུང་གཞན་རྣམས་ཀྱང་མཚུངས་པར་ལྡན་པས་མི་དགེ་བ་ཡིན་པ་ལྟ་བུའོ། །ཀུན་ནས་སློང་བའི་མི་དགེ་བ་ནི་ཞེ་སྡང་ལ་སོགས་པས་ཀུན་ནས་བསླང་བའི་ལུས་ངག་གི་བྱ་བ་རྣམས་ཏེ། ལུས་ཀྱི་ལས་བརྡེག་པ་ལ་སོགས་པ་དང་། ངག་གི་ལས་ཚིག་རྩུབ་མོ་སྨྲ་བ་ལ་སོགས་པ་རྣམས་ནི་ཀུན་ནས་བསླང་བའི་དབང་གིས་མི་དགེ་བ་ཡིན་ནོ། །དེ་ལྟར་ན་ལྟུང་བ་ཐམས་ཅད་དོན་དམ་པའི་མི་དགེ་བ་ཡིན་མོད་ཀྱི། སྐབས་འདིར་དོན་དམ་པའི་མི་དགེ་བ་ཡིན་མིན་དཔྱོད་པ་མ་ཡིན་གྱི། སྡིག་པ་མི་དགེ་བ་ཡིན་མིན་དཔྱོད་པའི་སྐབས་ཡིན་པས། ལྟུང་བ་ཐམས་ཅད་སྡིག་པ་མི་དགེ་བ་ཡིན་པར་མི་རིགས་ཏེ། ལུང་ལས་ལྟུང་བ་ལུང་མ་བསྟན་ཡོད་པར་གསུངས་པ་དང་འགལ་བའི་ཕྱིར་རོ། །སྡིག་པ་ཁྱབ་ཆེས་པར་ཐལ་བ་ནི།་་་་་ལུང་ལ་བརྟེན་པའི་རིགས་པའི་གནོད་བྱེད་ལ་གཉིས་ལས། གནོད་བྱེད་དང་པོ་ནི། དགྲ་བཅོམ་པ་ལ་སྡིག་པ་མི་དགེ་བ་འབྱུང་སྲིད་པར་ཐལ། བཅས་འགལ་གྱི་ལྟུང་བ་འབྱུང་སྲིད་པའི་ཕྱིར་རོ། །དེ་གང་གིས་གྲུབ་ན། གཏམ་གྱི་གཞི་ལས། བཙུན་པ་དགྲ་བཅོམ་པ་དག་དགེ་བའི་སེམས་ཀྱིས་ནོངས་པར་འགྱུར་རམ། ལུང་དུ་མ་བསྟན་པའི་སེམས་ཀྱིས་ནོངས་པར་འགྱུར། ཨུ་པ་ལི་དགྲ་བཅོམ་པ་ཉེས་པ་བྱེད་ན་ཐམས་ཅད་ཀྱང་ལུང་དུ་མི་སྟོན་པའི་སེམས་ཀྱིས་ཉེས་པར་འགྱུར་བ་ཞེས་བྱའོ་ཞེས་གསུངས་པས་སོ། །ཁྱབ་པ་མེད་ན་དམ་བཅའ་ཉམས་སོ། །འདོད་ན་་་་་་སྡིག་པ་ལས་རིང་དུ་སོང་བ། འཕགས་པ་དགྲ་བཅོམ་པ་ཡིན་པ་དང་འགལ་ལོ། །ལྟུང་བ་ཁྱབ་ཆེས་པར་ཐལ་བའི།་་་་་གནོད་བྱེད་གཉིས་པ་ནི་སོ་སོའི་སྐྱེ་བོའི་ཤེས་བཞིན་མ་ཡིན་པས་ཞུགས་པའི་ལྟུང་བ་ཆོས་ཅན། སྡིག་པ་ཡིན་པར་ཐལ། ལྟུང་བ་ཡིན་པའི་ཕྱིར་རོ། །ཁྱབ་པ་མེད་ན་ལྟུང་བ་ཐམས་ཅད་སྡིག་པ་ཡིན་པར་འདོད་པ་ཉམས་སོ། །འདོད་ན་གཏམ་གྱི་གཞི་ལས། སངས་རྒྱས་ཀྱི་བསྟན་

༼༢༨༧༽

པ་ལ་མ་བསམས་བཞིན་དུ་འདྲལ་བར་བྱེད་པ་ནི་ལུང་དུ་མ་བསྟན་པའོ་ཞེས་པ་དང་། ལུང་གཞི་ལས། ལུང་དུ་མ་བསྟན་པ་གང་ཞེ་ན། སངས་རྒྱས་ཀྱི་བསླབ་པ་བཅས་པ་དང་། དགེ་འདུན་གྱི་ཁྲིམས་སུ་བཅས་པ་ལ་ཆེད་དུ་མ་བསམས་པར་འདས་པ་གང་ཡིན་པ་དེ་ནི་ལུང་དུ་མ་བསྟན་པའོ་ཞེས་གསུངས་སོ། །གཉིས་པ་སྒྲུབ་བྱེད་གཞིག་པ་ནི་བཅས་པའི་ཁ་ན་མ་ཐོ་བ་སྡིག་པ་ཡིན་པར་བཤད་པ་ཐམས་ཅད་ཁྱད་གསོད་ལ་སོགས་པ་ཀུན་སློང་གློ་བུར་བ་དང་འབྲེལ་པ་ལ་དགོངས་པ་ཡིན་ཏེ། ལྕི་ཡང་བསྟན་པའི་མདོ་ལས། ཁྱད་དུ་གསོད་པའི་རྒྱུ་རྐྱེན་གྱིས། །ཚེ་ཡི་དུས་བྱས་ངན་འགྲོར་ལྟུང་། །ཞེས་པ་དང་། དེ་ཉིད་ལས་སངས་རྒྱས་ཀྱི་བཀའ་ཁྱད་དུ་བསད་ཅིང་ངོ་ཚ་བ་མེད་པ་དང་ཁྲེལ་མེད་པས་ཞུགས་ན་ཞེས་པ་དང་། མཛོད་ཀྱི་འགྲེལ་བཤད་་་་་་རྒྱལ་སྲས་མ། ལས་ཀྱང་བཅས་པའི་ཁ་ན་མ་ཐོ་བ་ནི་བཀག་པས་སྡིག་ཏུ་གྱུར་པ་སྟེ་ཞེས་པའི་རྒྱུ་མཚན་དུ། བཅོམ་ལྡན་འདས་ཀྱི་བསྟན་པ་ལ་མ་གུས་པའི་ཕྱིར་རོ་ཞེས་བཤད་པས་སོ། །དེའི་བསླབ་པ་ཁྱད་དུ་གསོད་ཅིང་་་་་་མེ་རེག་སོགས་ཀྱི། བཅས་པ་ལས་འདས་ན་ཁྱད་དུ་གསོད་པའི་ཆ་ནས་ཉེས་བྱས་གཞན་ཞིག་བསྐྱེད་ལ། ཁྱད་དུ་བསད་པའི་ཉེས་བྱས་དེ་རང་བཞིན་གྱི་ཁ་ན་མ་ཐོ་བ་ཡིན་པ་ལ་དགོངས་ནས་བཅས་པའི་ཁ་ན་མ་ཐོ་བ་སྡིག་ཡིན་པར་གསུངས་སོ། །ཞེ་སྡང་གིས་ས་རྐོ་བ་ལ་སོགས་པ་ལ་དེ་བཞིན་ནོ། །རིགས་པའི་སྒྲུབ་བྱེད་དེ་ཡང་མ་ངེས་ཏེ། བཅས་པ་མ་བསྲུངས་པ་ལ་སྡིག་པ་མི་འབྱུང་ཡང་བསྲུངས་པ་ལ་བསོད་ནམས་འབྱུང་ན་ཅི་འགལ་ཏེ། གཞན་དུ་ན་དུས་ཁྱད་པར་ཅན་ཚེས་བརྒྱད་དང་ཚེས་བཅོ་ལྔའི་ནུབ་མོ་ཆོས་བཤད་ཉན་བྱ་བར་བཅས་པ་ཆོས་ཅན། དེའི་ཚེ་ནད་པས་ཆོས་བཤད་ཉན་བྱས་པ་ལ་བསོད་ནམས་མི་འབྱུང་བར་ཐལ། དེའི་ཚེ་ནད་པས་ཆོས་བཤད་ཉན་མ་བྱས་པ་ལ་སྡིག་པ་མི་འབྱུང་བའི་ཕྱིར་ཏེ། ནད་པས་དེ་མ་བྱས་པ་ལ་ནི་ཉེས་པ་མེད་དེ་ཞེས་སོ། །གཞན་ཡང་དགེ་སློང་གིས་ཉིན་རེ་བཞིན་དུ་རྟག་པར་དགྲ་བཅོམ་པ་ལྔ་བརྒྱ་ལ་མཆོད་སྟོན་བྱས་ཀྱང་བསོད་ནམས་མི་འབྱུང་བར་ཐལ། ཉིན་རེ་བཞིན་དུ་དེ་ལྟར་མི་བྱེད་པའི་སྡིག་པ་མི་འབྱུང་བའི་ཕྱིར་རོ། །ཁྱབ་པ་མེད་ན་མ་བྱས་པ་ལ་སྡིག་པ་མི་འབྱུང་ན། བྱས་པ་ལ་ཡང་བསོད་ནམས་མི་འབྱུང་བར་མཚུངས་སོ་ཞེས་

༼༢༨༨༽

དམ་བཅས་པ་ཉམས་སོ། །གཉིས་པ་རང་ལུགས་བཞག་པ་ནི་བླ་མ་་་་་་ཤ་སྦས་སོགས། རྣམས་གསུང་མཐུན་པར། འདིར་ཁྱད་པར་གསུམ་ལས། རྒྱུའི་ཁྱད་པར་ནི། རྒྱུ་མི་དགེ་བས་ཀུན་ནས་བསླང་བའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རྒྱུ་དགེ་བའམ་ལུང་མ་བསྟན་གྱིས་ཀུན་ནས་བསླང་བའི་ལྟུང་བ་ནི་བཅས་པའི་ཁ་ན་མ་ཐོ་བ་སྟེ། གཏམ་གྱི་གཞི་ལས་དགེ་སློང་བའི་སེམས་དང་ལྡན་པས་ནོངས་པར་འགྱུར་རམ་མི་དགེ་བའི་སེམས་དང་ལུང་དུ་མི་སྟོན་པའི་སེམས་དང་ལྡན་པས་ནོངས་པར་འགྱུར། བཀའ་སྩལ་པ། དགེ་སློང་དགེ་བའི་སེམས་དང་མི་དགེ་བའི་སེམས་དང་ལུང་དུ་མི་སྟོན་པའི་སེམས་ཀྱིས་ཉེས་པར་འགྱུར་བ་ཡོད་དོ་ཞེས་གསུངས་སོ།་་་་་རྒྱ་དང་ཤ་མི་ཡར་སྟོད་པ་ལ་སོགས་པ་ནི་བཅས་པའི་ཁ་ན་མ་ཐོ་བ་རྣམས་ལུང་མ་བསྟན་ཡིན་པར་བཞེད་དོ། །ངོ་བའི་ཁྱད་པར་ནི་རང་གི་ངོ་བོ་མི་དགེ་བ་དང་བདག་གཅིག་པའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རང་གི་ངོ་བོ་ལུང་མ་བསྟན་དང་བདག་གཅིག་པའི་ལྟུང་བ་བཅས་པའི་ཁ་ན་མ་ཐོ་བ་སྟེ། གཏམ་གྱི་གཞི་ལས། ནོངས་པའི་དགེ་བ་ཞེས་བགྱིའམ། མི་དགེ་བ་ཞེས་བགྱི་འམ། ལུང་དུ་མི་སྟོན་པ་ཞེས་བགྱི། ཉེས་པ་མི་དགེ་བ་ཞེས་བྱ། ལུང་དུ་མ་བསྟན་པ་ཞེས་ཀྱང་བྱའོ་ཞེས་གསུངས་སོ། །འབྲས་བུའི་ཁྱད་པར་ནི། རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་པའི་ནུས་པ་དང་ལྡན་པའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་པའི་ནུས་པ་དང་མི་ལྡན་པའི་ལྟུང་བ་ནི་བཅས་པའི་ཁ་ན་མ་ཐོ་བ་སྟེ། གཏམ་གྱི་གཞི་ལས། ནོངས་པ་རྣམ་པར་སྨིན་པ་ཞེས་བགྱིའམ་རྣམ་པར་སྨིན་པ་ཞེས་ཀྱང་བྱ། རྣམ་པར་མི་སྨིན་པ་ཞེས་ཀྱང་བྱའོ་ཞེས་གསུངས་པས་ཤེས་སོ་ཞེས་གསུང་ངོ་། །དེ་རྣམས་ལ་ཡང་རྣམ་པར་དཔྱད་པར་བྱ་སྟེ། རྒྱུའི་ཁྱད་པར་ལ་རྣམ་པར་དཔྱད་ན་གལ་ཏེ་བཅས་ལྡན་དགེ་སློང་གིས་དགེ་བའི་སེམས་ཀྱིས་ཀུན་ནས་བསླངས་ནས་མ་བསད་པ་ཆོས་ཅན། སྡིག་པ་མཚམས་མེད་ཅན་གྱི་ལྟུང་བ་འབྱུང་བ་ཁེགས་པར་ཐལ། དགེ་བའི་སེམས་ཀྱིས་ཀུན་ནས་བསླང་བ་ཡིན་པའི་ཕྱིར་རོ། །ཁྱབ་པ་མེད་ན། དགེ་བས་ཀུན་ནས་བསླང་བའི་ལྟུང་བ་དེ་བཅས་པའི་ཁ་ན་མ་ཐོ་བ་ཡིན་པར་འདོད་པ་ཉམས་སོ། །འདོད་ན་གཏམ་གྱི་གཞི་ལས། དགེ་སློང་

༼༢༨༩༽

གིས་དགེ་བའི་སེམས་ཀྱིས་མ་སྲོག་དང་ཕྲལ་ན་ཕམ་པའི་ཉེས་པར་ཡང་འགྱུར་ལ། མཚམས་མེད་པའི་ལས་སུ་ཡང་འགྱུར་བ་ཡོད་དེ། འདི་ལྟར་དགེ་སློང་གི་མ་ཞིག་ནད་བུ་ཅན་ཡུན་རིང་ཞིག་ནས་སྡུག་བསྔལ་གྱིས་དྲག་ཏུ་གཟིར་ཅིང་། གནོད་པ་ཆེར་གྱུར་པ་མྱོང་བ་དེ་ལ་སྙིང་རྗེའི་བསམ་པ་དེ་ལྟ་བུའི་རྐྱེན་གྱིས་མ་སྲོག་དང་ཕྲལ་ན་ཕམ་པའི་ཉེས་པར་ཡང་འགྱུར་ལ། མཚམས་མེད་པའི་ལས་སུའང་འགྱུར་རོ་ཞེས་གསུངས་ལ། དེ་ནི་དྲི་བ་རྒྱ་ཆེ་འགྲེལ་པ་ལས་ཀྱང་བཤད་དོ། །དེ་ལྟར་མ་བསད་པའི་སྡིག་པ་མཚམས་མེད་འབྱུང་བ་ནི་མཛོད་ལས། ཀུན་སློང་ལ་རབ་ཏུ་འཇུག་བྱེད་དང་རྗེས་སུ་འཇུག་བྱེད་གཉིས་སུ་གསུངས་པས་འདིར་རབ་ཏུ་འཇུག་བྱེད་སྙིང་རྗེའི་བསམ་པས་ཀུན་ནས་བསླང་ཡང་། རྗེས་སུ་འཇུག་བྱེད་ནི་ཉན་ཐོས་ཀྱི་ལུགས་ཀྱིས་སྲོག་གཅོད་འདོད་དེ་མི་དགེ་བའི་བསམ་པ་ཡིན་པས། སྐབས་འདིར་དངོས་ཀྱི་ཀུན་སློང་མ་གསོད་པར་འདོད་པའི་བསམ་པས་ཀུན་ནས་བསླང་སྟེ་མ་བསད་པ་ཡིན་པས་སྡིག་པ་མཚམས་མེད་འབྱུང་བའོ། །ངོ་བོའི་་་་་་ཟག་བཅས་ཀྱི་དགེ་བས་ཀུན་ནས་བསླང་བའི་ལྟུང་བ་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པར་ཐལ། དོན་དམ་པའི་མི་དགེ་བས་ཀུན་ནས་བསླང་བའི་ལྟུང་བ་ཡིན་པའི་ཕྱིར་རོ། །རྟགས་མ་གྲུབ་ན་དགེ་བ་ཟག་བཅས་ཐམས་ཅད་དོན་དམ་པའི་མི་དགེ་བ་ཡིན་པར་འགལ་ཞིང་ཁྱབ་པ་མ་གྲུབ་པའི་འདོད་ན་དམ་བཅའ་བུད་དོ། ཁྱད་པར་ལ་རྣམ་པར་དཔྱད་ན་བཅས་པའི་ཁ་ན་མ་ཐོ་བ་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པར་ཐལ། རང་གི་ངོ་བོ་མི་དགེ་བ་དང་བདག་གཅིག་པའི་ལྟུང་བ་ཡིན་པའི་ཕྱིར་ཏེ། རང་གི་ངོ་བོ་དོན་དམ་པའི་མི་དགེ་བ་དང་བདག་གཅིག་པའི་ལྟུང་བ་ཡིན་པའི་ཕྱིར་རོ་སྙམ་མོ། །མདོར་་་་་་འདིར་བླ་མ་རྣམས་ཀྱི་གསུང་བགྲོས་གཞིར་བྱས་ནས་ཚིག་ཅུང་ཟད་ཁ་བཀང་སྟེ་བརྗོད་པར་བྱའོ། ན་ཁ་ན་མ་ཐོ་བ་འདི་གཉིས་ཀྱི་རྒྱུའི་ཁྱད་པར་ནི་དངོས་་་་་་དོན་དམ་པའི་མི་དགེ་བ་དང་ལས་མི་དགེ་བ་ནི་ཁྱབ་ཆེ་ཆུང་ཐ་དད་པར་ཤེས་པར་བྱའོ། ཀྱི་ཀུན་སློང་ལས་མི་དགེ་བའི་བསམ་པས་ཀུན་ནས་བསླང་བའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། དངོས་ཀྱི་ཀུན་སློང་དེ་དགེ་བའམ་ལུང་མ་བསྟན་གྱི་བསམ་པས་ཀུན་ནས་བསླང་བའི་ལྟུང་བ་ནི་བཅས་པའི་ཁ་ན་མ་ཐོ་བ་ཡིན་ནོ། །འདི་གཉིས་ཀྱི་ངོ་བོའི་ཁྱད་པར་ནི་བཅས་

༼༢༩༠༽

པའི་ཁ་ན་མ་ཐོ་བ་རྣམས་དོན་དམ་པའི་མི་དགེ་བ་དང་ངོ་བོ་གཅིག་ཀྱང་ལས་མི་དགེ་བ་དང་ངོ་བོ་གཅིག་པ་ནི་མ་ཡིན་ནོ་ཞེས་གོ་བར་བྱས་ལ། ལས་མི་དགེ་བ་དང་ངོ་བོ་གཅིག་པའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། ལས་ལུང་མ་བསྟན་དང་ངོ་བོ་གཅིག་པའི་ལྟུང་བ་ནི་བཅས་པའི་ཁ་ན་མ་ཐོ་བ་ཡིན་ནོ། །འདི་གཉིས་ཀྱི་འབྲས་བུའི་ཁྱད་པར་ནི་རང་གི་ངོ་བོའི་ཆ་ནས་རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་པའི་ནུས་པ་ཡོད་པའི་ལྟུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ལ། རང་གི་ངོ་བོའི་ཆ་ནས་རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་པའི་ནུས་པ་མེད་པའི་ལྟུང་བ་ནི་བཅས་པའི་ཁ་ན་མ་ཐོ་བ་ཡིན་ནོ། །དེ་རྣམས་ཀྱི་ལུང་ནི་གཏམ་གྱི་གཞི་ལས་གསུངས་པ་གོང་དུ་བཤད་ཟིན་ཏོ། །གསུམ་པ་རྩོད་པ་སྤང་བ་ནི་རྩོད་པ་བཞི་ལས། དང་པོ་ནི། བཅས་པའི་ཁ་ན་མ་ཐོ་བ་ཆོས་ཅན། སྡིག་པ་མི་དགེ་བ་ཡིན་མི་སྲིད་དུ་ཐལ། ལུང་མ་བསྟན་ཡིན་པའི་ཕྱིར་རོ། །རྟགས་བསལ་ཁས་བླངས་སོ། །འདོད་ན་གསེར་འོད་དམ་པ་ལས། བཅས་པའི་སྡིག་པ་གང་བགྱིས་པ། །ཞེས་གསུངས་པ་དང་། མཛོད་ཀྱི་འགྲེལ་བཤད་ལས། བཅས་པའི་ཁ་ན་མ་ཐོ་བ་ནི་བཀག་པས་སྡིག་ཏུ་གྱུར་པ་སྟེ་ཞེས་བཤད་པ་དང་འགལ་ཞེ་ན། དེ་དག་ནི་ཁྱད་གསོད་ལ་སོགས་པ་ཀུན་སློང་གློ་བུར་བ་དང་འབྲེལ་བ་ལ་དགོངས་པ་ཡིན་ནོ། །ཞེས་དེ་ལྟར་དགོངས་པའི་སྒྲུབ་བྱེད་ལུང་འདྲེན་དང་བཅས་པ་གོང་དུ་བཤད་ཟིན་ཏོ། །རྩོད་པ་གཉིས་པ། འདི་སྐད་དུ། དགེ་སློང་གིས་ཆང་འཐུང་བའི་ལྟུང་བ་ཆོས་ཅན། བཅས་པའི་ཁ་ན་མ་ཐོ་བ་མ་ཡིན་པར་ཐལ། རྣམ་སྨིན་ཡིད་དུ་མི་འོང་བ་འབྱིན་པའི་ནུས་པ་དང་ལྡན་པའི་ཕྱིར་ཏེ། མདོ་དྲན་པ་ཉེར་གཞག་ལས། བདག་ལ་འདི་ཡིས་མི་གནོད་ཅེས། །བློ་ལྡན་ཆང་ལ་ཡིད་མ་རྟོན། །མྱོང་ཚེ་བསིལ་ཡང་རྣམ་སྨིན་ཚ། །ཆང་གིས་དམྱལ་བར་འགྲོ་བར་བྱེད། །ཅེས་གསུངས་པས་རྟགས་ལུང་གིས་གྲུབ་ཅིང་ཁྱབ་པ་ཁས་བླངས་སོ། །འདོད་ན་འོད་ལྡན་ལས། འཕགས་པ་ཉེ་སྦས་ཀྱིས་ནི་མྱོས་པར་འགྱུར་བའི་ཁུ་བ་བཅས་པའི་ཁ་ན་མ་ཐོ་བ་དང་བཅས་པ་ཡིན་ཡང་། ཤིན་ཏུ་སྨད་པ་ཡིན་ཏེ་ཞེས་བཤད་དོ་ཞེ་ན། མཛོད་འགྲེལ་ལས། ཉན་ཐོས་འདུལ་བ་པ་རྣམས་ནི་ཆང་འཐུང་བའི་ལྟུང་བ་རང་བཞིན་གྱི་ཁ་ན་མ་ཐོ་བར་འདོད་ལ། ཉན་ཐོས་མངོན་

༼༢༩༡༽

པ་བ་རྣམས་ནི་ཆང་འཐུང་བའི་ལྟུང་བ་བཅས་པའི་ཁ་ན་མ་ཐོ་བར་འདོད་ཅེས་བཤད་ནས། ཆང་འཐུངས་པའི་རྣམ་སྨིན་་་་་་སངས་རྒྱས་ཀྱིས་གསུངས་པ་རྣམས་ཀྱི་དགོངས་པ་ཉན་ཐོས་མངོན་པ་བས་བླངས་པ་ལྟར་ན། མཛོད་འགྲེལ་ལས། ཧ་ཅང་ཀུན་ཏུ་བསྟེན་པས་ངན་འགྲོར་འགྲོ་བར་གསུངས་པ་ནི་དེའི་ཞར་ལ་མི་དགེ་བའི་རྒྱུན་ཡང་དང་ཡང་དུ་འཇུག་པས་ངན་སོང་བའི་ལས་འཕེན་པའམ་འཇུག་པ་ཐོབ་པའི་ཕྱིར་རོ་ཞེས་བཤད་དོ། །ཡང་མདོ་རྩ་འགྲེལ་དང་འོད་ལྡན་རྩ་འགྲེལ་ལ་སོགས་པ་འདུལ་བའི་བསྟན་བཅོས་རྣམས་ཀྱང་ཆང་གི་སྐབས་འདིར་ཉན་ཐོས་མངོན་པ་བའི་རྗེས་སུ་འབྲངས་པ་སྟེ། ཆང་་་་་་མདོ་རྩ་འགྲེལ་ལ་སོགས་པ་བསྟན་བཅོས་དེ་རྣམས་ལས། འཐུངས་པའི་ལྟུང་བ་བཅས་པའི་ཁ་ན་མ་ཐོ་བ་ཡིན་པར་གསུངས་པའི་ཕྱིར་རོ། །གལ་ཏེ་ཆང་འཐུངས་པ་ལ་རང་བཞིན་གྱིས་སྡིག་པ་འབྱུང་ན་ནི། ལེགས་འོངས་འཕགས་པ་དགྲ་བཅོམ་པ་ཆང་གིས་མྱོས་པར་གྱུར་པ་དང་འགལ་ལོ་སྙམ་མོ། །རྩོད་པ་གསུམ་པ་འདི་སྐད་དུ། བྱེ་བྲག་སྨ་བའི་གྲུབ་མཐའ་ལྟར་ན། འབྲས་བུ་མཐོང་ཆོས་ལ་འབྱུང་བའི་རང་བཞིན་གྱི་ཁ་ན་མ་ཐོ་བ་ཆོས་ཅན། རང་བཞིན་གྱི་ཁ་ན་མ་ཐོ་བ་མ་ཡིན་པར་ཐལ། ཚེ་ཕྱི་མ་ཕན་ཆད་དུ་རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་པའི་ནུས་པ་དང་མི་ལྡན་པའི་ཕྱིར་རོ། །ཁྱབ་པ་ཁས་བླངས་པས་གྲུབ་ཅིང་། གཏན་ཚིགས་ནི་མཛོད་འགྲེལ་ལས། བྱེ་བྲག་སྨྲ་བ་རྣམས་ནི་འབྲས་བུ་མཐོང་ཆོས་ལ་འབྱུང་བའི་ལས་ལ་ཚེ་ཕྱི་མ་ཕན་ཆད་དུ་རྣམ་སྨིན་གྱི་འབྲས་བུ་མེད་པར་འདོད་པར་བཤད་པས་གྲུབ་བོ་ཞེ་ན། མཛོད་འགྲེལ་ལས། བྱེ་བྲག་སྨྲ་བ་ལས།གཞན་དག་ན་རེ། མཐོང་ཆོས་འབྱུང་བའི་སྡིག་པ་ཆེས་སྟོབས་དང་ལྡན་པའི་འབྲས་བུ་མཐོ་རིས་ཀྱི་སྡུག་བསྔལ་ཙམ་དུ་ཟད་པར་མི་རིགས་པས། མཐོང་ཆོས་འབྱུང་བའི་སྡིག་པའི་རྣམ་སྨིན་ཚེ་རབས་གཞན་དག་ནའང་ཡོད་དོ་ཞེས་ཟེར་རོ་ཞེས་དོན་དེ་ལྟར་་་་་་མདོ་སྡེ་པས། བཤད་དེ་དེ་ལྟར་ཡིན་ངེས་སོ།་་་་་མཐོང་བའི་ཆོས་ལ་མྱོང་བར་འགྱུར་ཏེ་ཞེས་གསུངས་པ་ནི། མཛོད་འགྲེལ་དུ་མདོ་སྡེ་པའི་ལུགས་བརྗོད་པ་ལ་རྩོམ་པའི་དབང་གིས་མིང་དེ་རྣམས་རྣམ་པར་བཞག་གོ་ཞེས་བཤད་

༼༢༩༢༽

དོ། །རྩོད་པ་བཞི་པ་འདི་སྐད་དུ། ཚེ་འདི་ཉིད་ལ་དགྲ་བཅོམ་པར་འགྱུར་བའི་ཉ་པ་ལྔ་བརྒྱ་པོ་འམ་འཆར་ཀ་ལྟ་བུ་སྲིད་པ་ཐ་མ་པས་སྲོག་བཅད་པའི་ཁ་ན་མ་ཐོ་བ་ཆོས་ཅན། རང་བཞིན་གྱི་ཁ་ན་མ་ཐོ་བ་མ་ཡིན་པར་ཐལ། ཚེ་ཕྱི་མ་ཕན་ཆད་དུ་རྣམ་པར་སྨིན་པའི་འབྲས་བུ་ཡིད་དུ་མི་འོང་བ་འབྱིན་མི་སྲིད་པའི་ཕྱིར་ཏེ་དགྲ་བཅོམ་ཐོབ་ནས་སྐྱེ་བ་ཕྱིས་མི་ལེན་པའི་ཕྱིར་རོ། །འདོད་ན་ཊཱི་ཀ་ལས་སྲོག་གཅོད་པ་ལ་སོགས་པ་རང་བཞིན་གྱི་ཁ་ན་མ་ཐོ་བ་ཞེས་གསུངས་སོ་ཞེ་ན། སྲིད་པ་ཐ་མ་པས་བྱས་པའི་སྡིག་ལྟུང་ལ་ལས་ཀྱི་ངོ་བོའི་ཆ་ནས་རྣམ་སྨིན་འབྱིན་པའི་ནུས་པ་ཡོད་ཀྱང་གཉེན་པོས་དག་པར་བྱས་པ་ལ་སོགས་པའི་ཁྱད་པར་གྱིས་རྣམ་སྨིན་གྱི་འབྲས་བུ་མི་འབྱིན་པའོ། །བཞི་པ་འཕྲོས་པའི་དོན་ནི་དགེ་སློང་གཅིག་གིས་དུད་འགྲོ་གཅིག་བསད་ན་སྲོག་གཅད་པའི་སྡིག་པ་དེ་དང་དུད་འགྲོ་གསོད་པའི་ལྟུང་བྱེད་དེ་ངོ་བོ་གཅིག་གམ་ཐ་དད། མདོར་ན་རང་བཞིན་གྱི་ཁ་ན་མ་ཐོ་བ་རང་རང་གི་སྡིག་ལྟུང་ངོ་བོ་གཅིག་གམ་ཐ་དད་ཅེས་འདྲི་ན་འདི་ལ་གསུམ་མོ། །གཞན་ལུགས་དགག་པ་དང་། རང་ལུགས་བཞག་པ་དང་། རྩོད་པ་སྤང་བའོ། །དང་པོ་ཁ་ཅིག་་་་་་རྒྱ། ན་རེ། རང་བཞིན་གྱི་ཁ་ན་མ་ཐོ་བའི་སྡིག་ལྟུང་གཉིས་ངོ་བོ་ཤིན་ཏུ་ཐ་དད་དེ། སྐྱེད་པར་བྱེད་པའི་རྟེན་ཐ་དད་པའི་ཕྱིར་དང་། རྒྱུ་ཐ་དད་པའི་ཕྱིར་དང་། དག་བྱེད་གཉེན་པོ་ཐ་དད་པའི་ཕྱིར་རོ། །དེ་ཡང་སྡིག་པ་ནི་རྟེན་ཁྱིམ་པ་ལ་ཡང་བསྐྱེད་ཅིང་ལྟུང་བ་ནི་རབ་བྱུང་ཁོ་ན་ལ་བསྐྱེད་པའི་ཕྱིར་དང་། སྡིག་པ་ནི་དངོས་པོའི་སྟོབས་ལས་བྱུང་ཞིང་ལྟུང་བ་ནི་བཅས་པའི་སྟོབས་ལས་བྱུང་བའི་ཕྱིར་དང་། སྡིག་པ་ནི་སྟོབས་བཞིའི་བཤགས་པས་དག་པར་བྱེད་ཅིང་ལྟུང་བ་ནི་མིང་རིགས་བརྗོད་པའི་ཕྱིར་བཅོས་ཀྱིས་དག་པར་བྱེད་པའི་ཕྱིར་རོ་ཞེས་ཟེར་རོ། །དེ་དགག་པ་ལ་གཉིས་ཏེ། གནོད་བྱེད་བརྗོད་པ་དང་སྒྲུབ་བྱེད་དག་གཞིག་པའོ། །དང་པོ་ནི་གཏམ་གྱི་གཞི་ལས་ཉེས་པ་མི་དགེ་བ་ཞེས་བྱ་ཞེས་ལྟུང་བ་དང་མི་དགེ་བ་ངོ་བོ་གཅིག་ཏུ་བཤད་པ་དང་འགལ་ལོ། །ལུང་ལ་བརྟེན་པའི་རིགས་པའི་གནོད་བྱེད་གསུམ་ལས། དང་པོ་ནི་རང་བཞིན་གྱི་ཁ་ན་མ་ཐོ་བའི་ལྟུང་བ་ཐམས་ཅད་ཆོས་ཅན། ལུང་མ་བསྟན་ཡིན་པར་ཐལ། དགེ་བ་ནི་མ་

༼༢༩༣༽

ཡིན་ཞིང་སྡིག་པ་མི་དགེ་བ་ལས་ངོ་བོ་ཐ་དད་ཡིན་པའི་ཕྱིར་རོ། །རྟགས་ཟུར་སྔ་མ་ནི་ལྟུང་བ་ཡིན་པས་གྲུབ་ཅིང་། རྟགས་ཟུར་ཕྱི་མ་ནི་ཁས་བླངས་པས་གྲུབ་བོ། །དགེ་བ་ནི་མ་ཡིན་ཞིང་སྡིག་པ་མི་དགེ་བ་ལས་ངོ་བོ་ཐ་དད་ན་ལུང་མ་བསྟན་ཡིན་པ་ལས་འོས་མེད་པའི་ཕྱིར་ན་ཁྱབ་པ་གྲུབ་བོ། །འདོད་ན་ལུང་ལས། ཉེས་པ་མི་དགེ་བ་ཞེས་བྱ་ཞེས་གསུངས་སོ། །གནོད་བྱེད་གཉིས་པ་ནི་བཅས་ལྡན་དགེ་སློང་གཅིག་ཁོ་ནས་སྲོག་ཆགས་གཅིག་བསད་པའི་ལས་ཀྱི་དངོས་གཞི་དེ་ཆོས་ཅན། སྲོག་བཅད་པའི་ལས་ཀྱི་དངོས་གཞི་གཉིས་ཡིན་པ་སྲིད་པར་ཐལ། སྲོག་བཅད་པའི་སྡིག་པའི་དངོས་གཞི་དང་ལྟུང་བའི་དངོས་གཞི་གཉིས་ངོ་བོ་ཐ་དད་ཡིན་པའི་ཕྱིར་རོ། །རྟགས་དང་ཁྱབ་པ་མ་གྲུབ་ན་སྡིག་ལྟུང་ངོ་བོ་ཐ་དད་པའི་དམ་བཅའ་ཉམས་ལ། འདོད་ན་ལུང་རྣམ་འབྱེད་ཀྱི་འགྲེལ་པ་ལས་སྲོག་ཆགས་གཅིག་བསད་པ་ལ་ལས་ཀྱི་དངོས་གཞི་གཉིས་མི་སྲིད་པའི་ཕྱིར་ཞེས་གསོད་བྱེད་གཅིག་གིས་སྲོག་ཆགས་གཅིག་བསད་པ་ལ་ལས་ཀྱི་དངོས་གཞི་གཉིས་མི་སྲིད་པར་གསུངས་སོ། །གནོད་བྱེད་གསུམ་པ་ནི་རང་བཞིན་གྱི་ཁ་ན་མ་ཐོ་བ་ཆོས་ཅན། ལྟུང་བ་ཕྱིར་བཅོས་བྱས་པས་སྡིག་པ་མི་འདག་པར་ཐལ། ལྟུང་བ་དང་སྡིག་པ་ངོ་བོ་ཐ་དད་པའི་ཕྱིར་རོ། །ངོ་བོ་ཐ་དད་ན་གཅིག་ལ་གནོད་པ་བྱས་པས་ཐ་དད་གཞན་ལ་གནོད་པར་མ་ངེས་ཏེ་རྟ་བསད་པས་གླང་པོ་ལ་མི་གནོད་པ་བཞིན་ཞེས་གསུང་ངོ་། །འདོད་ན་ལུང་གཞི་དང་ཀརྨ་ཤ་ཏཾ་ལས་ལྷག་མའི་དབྱུང་བ་མ་བྱས་པའི་སྐབས་སུ། ཁྱེད་ཀྱི་འགྲོ་བ་ནི་གཉིས་ཏེ། སེམས་ཅན་དམྱལ་བ་པའམ་དུད་འགྲོའོ་ཞེས་གསུངས་ལ། དབྱུང་བ་བྱས་པའི་སྐབས་སུ། ཁྱེད་ཀྱིས་འགྲོ་བ་ནི་གཉིས་ཏེ་ལྷའམ་མིའོ་ཞེས་གསུངས་པ་དང་འགལ་ལོ། །སྒྲུབ་བྱེད་གཞིག་པ་ནི། ཁྱེད་ཀྱིས་བཀོད་པའི་སྒྲུབ་བྱེད་གསུམ་ཆར་མ་གྲུབ་སྟེ། རྟེན་བཅས་ལྡན་དགེ་སློང་གཅིག་གི་དབང་དུ་བྱས་པ་ཡིན་ལ། དངོས་པོའི་སྟོབས་དེ་ཉིད་ལ་ཐ་མི་དད་དུ་བཅས་ཤིང་། ལྟུང་བ་ཕྱིར་བཅོས་ལ་སྟོབས་བཞི་ཚང་ལུགས་འོག་ཏུ་འཆད་དོ། །གཉིས་པ་རང་ལུགས་བཞག་པ་ནི། བཅས་ལྡན་དགེ་སློང་གཅིག་གིས་དུད་འགྲོ་སེར་ཟལ་གཅིག་བསད་པ་ལྟ་བུ། རང་བཞིན་གྱི་ཁ་ན་མ་ཐོ་བ་རང་རང་གི་སྡིག་ལྟུང་ངོ་བོ་གཅིག་ལ་ལྡོག་པ་ཐ་དད་པ་ཡིན་

༼༢༩༤༽

ཏེ། རྣམ་སྨིན་ཡིད་དུ་མི་འོང་བ་བྱིན་ནུས་ཀྱི་ལྡོག་པ་ནས་སྡིག་པ་ཡིན་ལ། བཅས་པ་ལས་འདས་པའི་ལྡོག་པ་ནས་ལྟུང་བ་སྟེ། དེ་གཉིས་ཀྱང་དུད་འགྲོ་སེར་ཟལ་བསད་པའི་ལས་སུ་ངོ་བོ་གཅིག་པ་ལྟ་བུའོ། །དེ་བཞིན་དུ་རང་བཞིན་གྱི་ཁ་ན་མ་ཐོ་བ་ཐམས་ཅད་ཀྱི་སྐབས་སུ་རང་རང་གི་སྡིག་ལྟུང་ངོ་བོ་གཅིག་གོ་་་་་།ངོ་བོ་གཅིག་པའི་ལུང་ནི་གཏམ་གྱི་གཞི་ལས་ཉེས་པ་མི་དགེ་བ་ཞེས་བྱ་ཞེས་གསུངས་སོ། །གསུམ་པ་རྩོད་པ་སྤང་བ་ནི། རྩོད་པ་གསུམ་ལས། དང་པོ་ནི། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ལ་སྡིག་པ་མཚམས་མེད་འབྱུང་ཞིང་ལྟུང་བ་སྦོམ་པོ་བྱུང་བ་ན་ལྟུང་བ་སྦོམ་པོའི་་་་་་མིང་རིགས་བརྗོད་པས། བཤགས་བསྡམས་ཚུལ་བཞིན་དུ་བྱས་པ་ཉིད་ཆོས་ཅན། ལྟུང་བ་སྦོམ་པོ་དེ་དང་ངོ་བོ་གཅིག་པའི་སྡིག་པ་མཚམས་མེད་དེ་དག་པར་ཐལ། ལྟུང་བ་སྦོམ་པོ་དེ་དག་པའི་ཕྱིར་རོ། །རྟགས་གཞུང་གིས་གྲུབ་སྟེ། མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ་ཞེས་གསུངས་པས་སོ། །ཁྱབ་པ་མེད་ན་སྡིག་ལྟུང་དེ་གཉིས་ངོ་བོ་གཅིག་ཡིན་པ་ཉམས་སོ། །འདོད་ན་ཆོས་ཅན་སྔར་བཞིན་སྡིག་པ་མཚམས་མེད་ཀྱིས་སྡོམ་པ་སྐྱེ་བ་ལ་བར་དུ་གཅོད་པ་ལས་གྲོལ་བར་ཐལ། སྡིག་པ་མཚམས་མེད་ལས་གྲོལ་བའི་ཕྱིར་རོ། །འདོད་ན་འདི་ལ་སྐྱེ་བའི་ཆོས་ཉིད་མེད་པར་ཡང་འདྲའོ་ཞེས་ཚེ་དེ་ལ་གྲོལ་བའི་སྐབས་མེད་དུ་བཤད་པ་དང་འགལ་ལ། སྤྱིར་བསྟན་གྱི་ཊཱི་ཀ་ལས་ཕ་མ་བསད་པ་ལ་སོགས་པ་་་་་་གང་ཟག་དེའི་རྒྱུད་ལ་སྡོམ་པ་སྐྱེ་བའི། གཏན་གྱི་བར་ཆད་དང་ལྡན་པ་ཞེས་བཤད་དོ། །ཞེ་ན་ཐལ་འགྱུར་དང་པོ་འདོད་ཅིང་། ཐལ་འགྱུར་གཉིས་པའི་རྟགས་ལ་བརྟག་སྟེ། ལྟུང་བ་སྦོམ་པོ་དང་ངོ་བོ་གཅིག་པའི་སྡིག་པ་མཚམས་མེད་དེ་ལས་གྲོལ་བའི་ཕྱིར་ཞེས་ཟེར་རམ། སྡིག་པ་མཚམས་མེད་ཀྱི་རྒྱུན་སྐད་ཅིག་གཉིས་པ་ཕན་ཆད་ཀྱི་མཚམས་མེད་དེ་ལས་གྲོལ་བའི་ཕྱིར་ཟེར། དང་པོ་ལྟར་ན་ཁྱབ་པ་མེད་ཅིང་། གཉིས་པ་ལྟར་ན་རྟགས་མ་གྲུབ་བོ། །འོ་ན་སྡིག་ལྟུང་ངོ་བོ་གཅིག་ཡིན་པ་ཉམས་སོ་ཞེ་ན་མ་ཡིན་ཏེ། དཔེར་ན་་་་་་ཟངས་བུམ་དང་ཟངས་རྫས་གཅིག་ཀྱང་ཟངས་བུམ་པ་ཤིག་པ་ན་ཟངས་ཀྱི་རང་བཞིན་མི་དོར་བར་རྒྱུན་གནས་པ་ལྟར་སྦོམ་པོ་དེ་མཚམས་མེད་དང་རྫས་གཅིག་ཀྱང་དེ་བཤགས་པ་ན་མཚམས་མེད་ཀྱི་རང་བཞིན་གྱི་རྒྱུན་མི་དོར་བར་གནས་པའོ། །གཞན་ཡང་། ཚད་མ་རྣམ་ངེས་ལས། ལྕགས་ཀྱི་གོང་བུ་ཡང་མེད་པ་འབྲེལ་བ་

 5/6    མདུན་ངོས། 上一页 3 4 5 6 下一页 尾页