|
སྡོམ་ཚིག
འབྱེད་སྡུད་སྐབས་སུ་རྗེས་འཇུག་བཅུར། ། རང་འདྲར་མ་ཡིག་སྦྱར་བ་དང༌། ། ད་དྲག་ཐོབ་མཐར་ཏམ་དང་སྦྱར།།ཞེསཔ་ལྟར་རོ། །
དྲི་ཚིག
༡ བོད་ལ་རྣམ་དབྱེ་བརྒྱད་ཡོད་པའི་དོན་གང༌།
༢ ཅི་ཞིག་ལ་རྣམ་དབྱེ་ཟེར།
༣ ཅི་ཞིག་ལ་སུམ་ཅུ་བ་ཟེར།
༤ མིང་ཙམ་བརྗོད་པ་ཅི་ལྟར་རྣམ་དབྱེར་སོང༌།
༥ རྣམ་དབྱེ་དང་པོའི་མཚན་ཉིད་ཤོད།
༦ རྫོགས་ཚིག་རྣམ་དབྱེ་དང་པོའི་ཕྲད་དངོས་ཨེ་ཡིན།
༧ རྣམ་དབྱེ་གཉིས་པར་མ་མཐའ་ཡང་ཆ་རྐྱེན་དུ་ལྡན་དགོས།
༨ ཅི་ཞིག་ལ་ལ་དོན་ཟེར།
༩ ལ་དོན་འཇུག་ཡུལ་གང་དག་ཡིན།
༡༠ ཅི་ཞིག་ལ་བྱ་བའི་ཡུལ་ཟེར།
༡༡ ཅི་ཞིག་ལ་བྱ་བ་ཟེར།
༡༢ ཅི་ཞིག་ལ་ལས་དང་བྱ་བ་ཟེར།
༡༣ བྱ་བའི་ཡུལ་དང་ལས་ཀྱི་དངོས་པོ་གཉིས་ཀྱི་ཁྱད་པར་ཤོད།
༡༤ བྱ་བའི་ཡུལ་དང་ལས་ཀྱི་དངོས་པོ་གཉིས་ཀའི་གང་ལ་ལ་དོན་སྦྱོར།
༡༥ ལས་སུ་བྱ་བར་དུས་གསུམ་གྱི་ཁྱད་པར་ཨེ་ཡོད།
༡༦ བྱ་བའི་ཡུལ་དང་བྱ་བ་བསྒྲུབ་པའི་ཡུལ་གཉིས་ཨེ་འདྲ།
༡༧ ལས་ལ་བྱ་ལས་བྱེད་ལས་གཉིས་ཞེས་པའི་ལས་གང༌།
༡༨ བྱ་བྱེད་ཐ་དད་མིན་གྱི་བྱ་ནི་གང༌།
༡༩ རྣམ་དབྱེ་གཉིས་པའི་མཚན་ཉིད་ཤོད།
༢༠ བྱེད་པ་པོ་དང་བྱེད་པ་གཉིས་ཨེ་འདྲ།
༢༡ རྣམ་དབྱེ་གསུམ་པར་མ་མཐའ་ཆ་རྐྱེན་དུ་ལྡན་དགོས།
༢༢ རྒྱུ་མཚན་སྟོན་པའི་ཕྲད་ཅི་ལྟ་བུ་ཡིན།
༢༣ རྣམ་དབྱེའི་ཕྲད་བརྩེགས་མ་སྦྱོར་ཨེ་རུང༌།
༢༤ བྱེད་འབྲེལ་གཉིས་ཀྱི་ཁྱད་པར་ཅི་ལྟར་འབྱེད།
༢༥ བྱེད་སྒྲ་སྐུལ་ཚིག་ལ་འཇུག་པ་ཨེ་ཡོད།
༢༦ བྱེད་སྒྲའི་མཚན་ཉིད་ཤོད།
༢༧ དགོས་ཆེད་དང་ལས་སུ་བྱ་བའི་ཁྱད་པར་འབྱེད་བྱེད་གང༌།
༢༨ དགོས་པ་ཡུལ་ལ་འཇུག་པ་ཇི་ལྟ་བུ།
༢༩ དགོས་པ་བྱ་བར་འཇུག་པ་ཇི་ལྟ་བུ།
༣༠ དགོས་པ་ལས་ལ་འཇུག་པ་ཇི་ལྟ་བུ།
༣༡ དགོས་ཆེད་ཀྱི་མཚན་ཉིད་ཤོད།
༣༢ ཅི་ཞིག་ལ་འབྲེལ་གཞི་དང་འབྲེལ་ཆོས་ཟེར།
༣༣ འབྲེལ་སྒྲ་མི་མཐུན་པའི་ཚིག་རྒྱན་ལ་འཇུག་པའི་དཔེར་བརྗོད་ཕྲིས།
༣༤ བྱེད་སྒྲའི་ཚབ་ཏུ་འབྲེལ་སྒྲ་འབྲི་བའི་སྐྱོན་ལ་ཇི་ལྟར་དཔྱད།
༣༥ འབྲེལ་སྒྲའི་མཚན་ཉིད་ཤོད།
༣༦ གནས་གཞིར་མ་མཐའ་ཆ་རྐྱེན་དུ་ཚང་དགོས།
༣༧ ཅི་ཞིག་ལ་རྟེན་གཞི་དང་བརྟེན་དངོས་ཟེར།
༣༨ རྣམ་དབྱེ་གཉིས་པ་དང་བདུན་པ་གཉིས་ཀྱི་འཁྲུལ་སོ་གང༌།
༣༩བླ་མ་ཁྲི་ལ་བཞུགས་དང་དབུས་སུ་བླ་མ་བཞུགས་གཉིས་ལ་དཔྱད་པ་ཐོངས།
༤༠ རྣམ་དབྱེ་བདུན་པའི་མཚན་ཉིད་ཤོད།
༤༡ འབྱེད་སྡུད་ཀྱི་དཔེ་བརྗོད་གཉིས་གཞི་གཅིག་ལ་འཇོག་དགོས།
དྲུག རྣམ་དབྱེ་ལྔ་བ་སོགས་བཤད་པ།
རྗེས་འཇུག་ཡི་གེ་བཅུ་བོ་ཡི། ། བཞི་བ་དགུ་བ་ལ་བཅུ་བ། ། སྦྱར་བ་འབྱུང་ཁུངས་གནས་ཡིན་ཏེ། །དགར་དང་སྡུད་པའང་དེ་བཞིན་ནོ། །
ཞེས་གསུངས་ཏེ། རྗེས་འཇུག་གི་ཡི་གེ་བཅུ་བོ་ཡི། གྲངས་བཞི་བ་ན་དང༌། དགུ་བ་ལ་ཡིག་གཉིས་ལ།བཅུ་བ་ས་ཡིག་སྦྱར་ཏེ། ནས་ལས་ཞེས་གྲུབ་པ་དེ་ནི། རྣམ་དབྱེ་ལྔ་བ་་འབྱུང་ཁུངས་ཀྱི་གནས་ལ་འཇུག་པ་ཡིན་ཏེ། ལོགས་སུ་དགར་བ་དང༌། ཕྱོགས་གཅིག་ཏུ་སྡུད་པ་ལའང་འབྱུང་ཁུངས་ལ་འཇུག་པ་དེ་བཞིན་དུ་འཇུག་པ་ཡིན་ནོ། །
དཔྱད་གཞི།
ཀུན་བཟང་དགོངས་རྒྱན་དུ།དེ་ཡང་རྣམ་དབྱེ་ལྔ་བ་ལ་འཇུག་པ་ནི། དཔེར་ན། རི་ནས་ཆུ་བྱུང༌།གནམ་ལས་ཆར་བབས། ས་ལས་མྱུ་གུ་སྨིན། རྟ་ལས་ལྷུངས། ཆོས་ནས་བཤད་ལྟ་བུ་འབྱུང་ཁུངས་གང་ནས་བྱུང་བ་སྟོན་པའོ། །
དགར་བ་ནི། རིགས་དང་བྱ་བ་ལ་སོགས་པའི་སྒོ་ནས་གཞན་ལས་ཁྱད་པར་དུ་བྱེད་པ་སྟེ། དཔེར་ན། སྐྱེ་བོ་ཐམས་ཅད་ཀྱི་ནང་ནས་རྒྱལ་བོའི་རིགས་ཕུལ་དུ་བྱུང་བའོ།།ལས་ཐམས་ཅད་ལས་ཡི་གེ་འབྲི་བ་ཁྱད་དུ་འཕགས་པའོ།།སྣམ་བུ་ལས་དར་གོས་རེག་བྱ་འཇམ་མོ།ལྷའི་ནང་ནས་རྡོ་རྗེ་རྩེ་བརྒྱ་འཛིན་པ་ནི་བརྒྱ་བྱིན་ནོ།།ལྟ་བུ་སྟེ། རིམ་པ་བཞིན་དུ་རིགས་དང༌། བྱ་བ་དང༌། ཡོན་ཏན་དང༌། རྫས་ཀྱི་སྒོ་ནས་བཀར་ཞིང་ཕྱོགས་གཅིག་ཏུ་བྱེད་པའོ།།
སྡུད་པ་ནི། གཟུགས་ནས་རྣམ་མཁྱེན་གྱི་བར་ལྟ་བུ་དང༌། སེ་ར་ནས་ལྷ་སའི་བར་ལྟ་བུའོ།།ལག་པ་བསྙལ་ནས་ཟས་ཟ་ལྟ་བུ་དང༌། དེ་ནས་ལྟ་བུ་མཚམས་སྦྱོར་ལ་ཡང་འཇུག་པ་ཡོད་དོ །འདི་དག་སྡུད་པ་ལ་ཡང་འཇུག་གོ །
འདིར་སྨྲ་སྒོ་ལས། སྡུད་པ་དག་དང་མཚམས་སྦྱོར་ནི། ནས་ལ་ཅུང་ཟད་ལྷག་པ་ཡིན། ཞེས་ནས་ཀྱི་སྒྲའི་འཇུག་པ་ཕལ་ཆེར་ལས་དང་མཐུན་ཡང༌། སྡུད་པ་དང་མཚམས་སྦྱོར་གཉིས་ལ། ལས་མི་འཇུག་ཅིང་ནས་འཇུག་པ།ནས་ཀྱི་འཇུག་པ་ལྷག་པར་བཤད་དོ། །
དེ་ཡང་དཔྱད་པར་བྱ་སྟེ། དེང་སང་གཟུགས་ལ་སོགས་པ། ཞེས་ལ་དང་སོགས་ཀྱི་བར་དུ་ཚེག་བར་མང་ངོ༌། །འོ་ན་དེའི་ལ་དེ་རྣམ་དབྱེ་སོགས་གང་ཡིན་འདྲིའོ། །གལ་ཏེ་རྣམ་དབྱེ་གཉིས་པ་དང་
བཞི་བ་དང་བདུན་པ་གང་རུང་ངོ་སྙམ་ན་ཡང་འཐད་པ་མ་ཡིན་ཏེ། གཟུགས་ལ་བྱས་པ་སོགས་དང༌།གཟུགས་ཀྱི་ཆེད་དུ་བྱས་པ་སོགས་ཀྱི་བྱ་བ་གང་ཡང་མི་སྟོན་པ་ཤིན་ཏུ་གསལ་ཞིང༌། སོགས་ཀྱི་སྒྲས་བསྟན་པའི་ཆོས་ཀྱང་གཟུགས་ལ་ཡོད་པ་སོགས་སུ་མི་སྟོན་པར་ཤིན་ཏུ་རྟོགས་སླ་བས། རྣམ་དབྱེ་དེ་གསུམ་གང་དུ་ཡང་མི་འཐད་དོ།།གཟུགས་ཀྱི་ངོ་བོ་ཉིད་དུ་མི་སྟོན་པས་དེ་ཉིད་ལ་མི་འཇུག་ཅིང། དུས་མི་སྟོན་པས་ཚེ་སྐབས་ཀྱང་མིན་ལ། སྟེ་སོགས་ལྷག་བཅས་ཀྱི་སྒྲའི་འཇུག་པ་དང་མི་མཐུན་པས་ལྷག་བཅས་ཀྱང་མིན་པ་དང༌། མཚམས་སྦྱོར་གྱི་སྒྲ་ཡིན་ན། དཔེར་ན། ལག་པ་བསྙལ་ནས་ཟན་ཟ། ཞེས་པ་ལ། ལག་པ་བསྙལ་ལ་ཟན་ཟ་ཞེས། ནས་ཀྱི་སྒྲ་དང་འཇུག་པ་གཅིག་པའི་ལ་ཡིག་ལྟ་བུ་དགོས་པ་ལས་དེ་ལྟ་བུ་མིན་པ་དང༌། རྒྱུ་མཚན་གཞན་གྱི་སྒོ་ནས་ཀྱང་མཚམས་སྦྱོར་གྱི་སྒྲར་མི་འཐད་དོ།།སྡུད་པ་ཡིན་ནོ་ཞེ་ན་ཡང་མི་འཐད་དེ། ལ་ཡིག་གཞུང་འདིར་སྡུད་པར་མ་བཤད་ཅིང༌། གོང་དུ། དགར་དང་སྡུད་པའང་དེ་བཞིན་ནོ།།ཞེས་ནས་ལས་གཉིས་ཐུན་མོང་དུ་སྡུད་པའི་དོན་ལ་འཇུག་པར་བཤད་པ་དང༌། སྔོན་གྱི་མདོ་རྒྱུད་བསྟན་བཅོས་ཀྱི་ཡིག་རྙེང་ཕལ་ཆེར་ལས་སོགས་པ་དང༌། ལས་སྩོགས་པ་ཞེས་པ་ཤ་སྟག་བྱུང༌། འདི་དག་སྡུད་པའི་སྐབས་སུ་ཡང་ལ་སོགས་པ་དང༌། ལ་སྩོགས་པ་ཞེས་ལ་དང་སའི་བར་ན་ཚེག་བར་མེད་པ་མཐའ་ཡས་པ་མཐོང་བས་ལས་སྒྲ་སྡུད་པའི་དོན་ལ་འཇུག་པ་ཉིད་འཐད་པའི་ཕྱིར་རོ།། 15/21 མདུན་ངོས། 上一页 13 14 15 16 17 18 下一页 尾页 |
