གསུམ། སྤྱི་སྒྲ་བཤད་པ།
མིང་གང་རུང་བའི་དང་པོ་རུ། ། དང་པོ་ལ་ནི་གཉིས་པ་སྦྱར། ། སྤྱི་ལ་ཁྱབ་པ་ཉིད་དུ་འགྱུར། །
ཞེས་གསུངས་ཏེ། མིང་གང་ཡང་རུང་བའི་དང་པོ་སྟེ་ཐོག་མ་རུ། རྗེས་འཇུག་ཡི་གེ་དང་པོ་ག་ལ། གཉིས་པ་ང་སྦྱར་བས། གང་ཞེས་གྲུབ་པ་དེ་ནི། སྤྱི་ལ་ཁྱབ་པའི་སྒྲ་ཉིད་དུ་འགྱུར་ཞེས་སོ། །
དཔྱད་གཞི།
ལེགས་བཤད་ལྗོན་པའི་དབང་བོ་ལས། ཅི་ཇི་སུ་གང་སྤྱི་སྒྲ་སྟེ། །ཞིག་སྟེ་སླད་འདྲ་ཕྱིར་ལ་ཅི། །སྙེད་སྲིད་ལྟར་བཞིན་སྐད་ལ་ཇི། །སུ་ནི་གང་ཟག་གང་ཀུན་ལའོ། །ཞེས་པ་ལྟར་དོན་གྱི་རིགས་དང་ཚོགས་པ་ལ་སོགས་པ་སོ་སོའི་དམིགས་མ་བཟུང་བར། མཐའ་དག་ལ་ཁྱབ་པར་བརྗོད་པའི་སྤྱི་སྒྲ་ལ་རྩ་བར་དངོས་སུ་བསྟན་པའི་ཕྲད་གང་དང། དོན་གྱིས་ཐོབ་པ་ཅི་ཇི་སུ་ནམ་བཅས་ལྔ་ཡོད་པ་དོན་གྱི་སྦྱོར་ཚུལ་ལ་ཁྱབ་ཆེ་ཆུང་ཡོད་དེ། དོན་གྱི་ངོ་བོ་ཙམ་དྲི་བ་ལ་ཅི་སྦྱོར་བ། དཔེར་ན། ཅི་ཞིག ཅི་སྟེ། ཅི་སླད༌། ཅི་ཙམ། ཅི་ཕྱིར་ལྟ་བུ་དང༌། དོན་གྱི་ཁྱད་པར་ཕྱེ་ནས་དྲི་བ་ལ་ཇི་སྦྱོར་བ་ནི། ཇི་སྙེད། ཇི་སྲིད། ཇི་ལྟར། ཇི་བཞིན། ཇི་སྐད་ལྟ་བུ་རྣམས་དང༌། སུ་ནི་གང་ཟག་གི་དོན་ཁོ་ནར་སྦྱོར་བ། དེ་སུ་རེད། སུས་བྱིན།འདི་བ་སུ་ཚང་རེད་ལྟ་བུ་དང༌། དུས་སྟོན་པ་ལ་ནམ་སྒྲ་སྦྱོར་བ་ནི། ནམ་ཐོན། དུས་ཚོད་ནམ་ལ།བསྐལ་བ་ནམ་ཞིག་གི་ཚེ་ལྟ་བུར་དྲི་བར་ཅི་དང༌། དཔེ་ལ་ཇི། གང་ཟག་ལ་སུ། དུས་ལ་ནམ་སྒྲ་སྦྱོར་བས་ཕྲད་དེ་བཞི་དོན་བྱེ་བྲག་པ་རེ་ལ་མ་གཏོགས་མི་འཇུག་པས་ཁྱབ་ཆུང་ལ། གང་སྒྲ་བྱེ་བྲག་མེད་པར་དོན་དེ་རྣམས་ལ་སྦྱོར་བས་ཁྱབ་ཆེའོ།།
སྤྱི་སྒྲ་ཐོག་མར་སྦྱོར་བ་ནི་གཙོ་ཆེ་བའི་དོན་ལ་དགོངས་ཀྱི་མིང་མཐར་སྦྱོར་བའང་ཡོད་དོ།
ཀུན་བཟང་དགོངས་རྒྱན་དུ།སྤྱི་ལ་ཁྱབ་པ་ནི། དོན་གྱི་རིགས་དང་ཚོགས་པ་ལ་སོགས་པ་སོ་སོའི་དམིགས་མ་བཟུང་བར།མཐའ་དག་ལ་ཁྱབ་པར་སྤྱིར་བརྗོད་པའོ། ། དཔེར་ན། གང་ལ་ཡོན་ཏན་མཆོག་མངའ་བའི། །དཀོན་མཆོག་དེ་ཞེས་པ་ལྟ་བུ། ཐོག་མར་རིགས་སོགས་ཀྱི་གཞི་གང་ཡང་མ་བརྗོད་པར་མཐའ་དག་ལ་ཁྱབ་པ་གང་ཞེས་སྤྱིར་སྨོས་ནས།ཕྱིས་ཡོན་ཏན་གྱི་ཁྱད་པར་སོགས་ཀྱིས་ཁྱད་པར་དུ་བྱས་ནས་དེ་ཞེས་དམིགས་འཛིན་པ་དང༌། ལྟོ་ལྡིར་བ་དང༌། ཞབས་ཞུམ་པ་དང་ཆུ་འཁྱོར་བའི་དོན་བྱེད་ནུས་པ་གང་ཡིན་པ་དེ་ནི་བུམ་པའོ། །ལྟ་བུ་རིགས་ཅན་མཐའ་དག་ལ་ཁྱབ་པའི་རིགས་ཀྱི་སྤྱི་ཙམ་བརྗོད་པ་དང༌། རབ་ཏུ་བྱུང་བ་འདི་དག་ལས། མཁས་པ་ནི་གང་ཡིན། བཙུན་པ་ནི་གང་ཡིན། ལྟ་བུ་དོན་གྱི་སྤྱིའམ་ཚོགས་པ་བཀོད་ནས། མཁས་པ་སོགས་ཀྱི་ཡོན་ཏན་དང་ལྡན་པ་གཞི་གཅིག་ཏུ་མ་ཕེབས་པར་སྤྱིར་དྲི་བ་དང༌། ཐེ་ཚོམ་དང་གདམ་ང་བྱེད་པའི་ཚེ་བརྗོད་ཅིང༌། སྤྱིར་བརྗོད་པ་དེ་ཉིད་བྱེ་བྲག་ལ་ཡང་གདོན་མི་ཟ་བར་སྙེག་གོ །
སྤྱི་སྒྲ་དང་དྲི་བའི་གོ་དོན། སྤྱི་སྒྲ་ནི་བྱེ་བྲག་གི་ཚིག་ཟིན་མེད་པར་སྤྱིའི་དོན་ལ་འཇུག་པའི་སྒྲ་ཡིན་ཏེ།དཔེར་ན། ང་ཚོས་རིག་གནས་གང་ཡིན་རུང་སློབ་དགོས་ལྟ་བུ་བྱེ་བྲག་དངོས་བསྟན་མེད་པར་རིག་གནས་སྤྱི་ལ་རིས་མེད་དུ་སློབ་དགོས་པར་གོ་བའོ།།དེ་བཞིན། ས་ཆ་གང་ཡིན་རང་གི་ཡུལ་དང་འདྲ། །སློབ་གྲོགས་སུ་ཡིན་རང་གི་སྤུན་དུ་བལྟ། །ལས་དོན་ཅི་ཡོད་རང་གི་དོན་དང་མཚུངས། །ཇི་ལྟ་ཇི་སྙེད་ཐམས་ཅད་ཆོས་སུ་ཤེས། །ནམ་ཡང་གཞན་དོན་འབའ་ཞིག་དོན་དུ་གཉེར། །ལྟ་བུའོ། །
དྲི་བ་ནི་རང་ལ་མི་གསལ་བ་གཞན་པར་འདྲི་བ་སྟེ། དཔེར་ན། ཁྱོད་གང་གི་མི་ཡིན། མི་འདི་སུ་རེད། མིང་ལ་ཅི་ཟེར། རང་དགར་སྡོད་པ་ཅི་ཞིག་ཡིན། དུས་ཡུན་ཅི་ཙམ་དུ་སློབ་སྦྱོང་བྱས་པ་ཡིན། ལྟ་བུའོ། །
དྲི་བའི་ཅི་དང་དཔེ་ཡི་ཇི་གཉིས་ཀྱི་ཁྱད་པར།
ཕ་རོལ་པོ་ལ་ཐད་ཀར་དྲི་བ་ཅ་རིལ་གྱི་ཅི་འབྲི་བ་དང༌། དཔེ་ཇི་ལྟ་བུའི་སྒོ་ནས་མཚོན་པ་ལ་ཇ་ཟེད་ཀྱི་ཇི་སྦྱོརདགོས། དེ་ཡང་སྒྲ་ནི་བརྗོད་འདོད་རྗེས་འབྲང་ཕྱིར་ཞེས་པ་ལྟར་གཙོ་བོ་རྗོད་པ་པོའི་བསམ་དོན་རག་ལས་སོ།།
དེ་ལྟར་ཡང་སྨྲ་སྒོར།ཅི་ལ་སོགས་པ་དེ་བཞིན་ཏེ། །ཁྱབ་པ་སྐབས་ཀྱིས་བརྩི་བར་བྱ། །ཞེས་སོ། །
སྡོམ་ཚིག
གང་སུ་ཅི་ཇི་སྤྱི་སྒྲ་སྟེ། །གང་ཟག་ལ་ནི་སུ་འཐོབ་ཅིང། །
དྲི་བར་ཅི་དང་དཔེ་ལ་ཇི། །ཞིག་སྟེ་སླད་འདྲ་ཕྱིར་ལ་ཅི། །
སྙེད་སྲིད་ལྟར་བཞིན་སྐད་ལ་ཇི། །གྲངས་ལ་དུ་དང་དུས་ལ་ནམ། །
གཉིས་ཀྱང་སྤྱི་སྒྲར་འཇུག་གོ་ཟེར།།གང་ནི་ཁྱད་མེད་ཀུན་ལ་འཇུག །
བཞི། བདག་སྒྲ་བཤད་པ།
གང་མིང་གི་ནི་མ་མཐའ་ན། །པུ་ལིདྒ་ཡི་སྒྲ་མེད་པ། །དེ་ལ་པུ་ལིདྒ་སྦྱར་ན། །བདག་པོའི་སར་ནི་ཤེས་པར་བྱ། །
ཞེས་གསུངས་ཏེ། གང་ཡང་རུང་བའི་མིང་གི་མཐའ་ན། པུ་ལིདྒ་སྟེ་པུ་རུ་ཥ་སྐྱེས་པ་དང༌། ལིདྒ་རྟགས་ཡིན་པས། པུ་རུ་ཥའི་རུ་དང་ཥ་ཕྱིས་ནས། པུ་ལིདྒར་བསྡུས་པ་ནི། སྐྱེས་པའི་རྟགས་སམ་ཕོ་རྟགས་ཞེས་པའོ། །རྟགས་དེ་ནི་པ་བ་པོ་ཅན་རྣམས་སོ། །རྟགས་དེ་རྣམས་མེད་པ་ལ་པ་པོ་བ་བོ་མ་མོ་རྣམས་སྦྱརན་བདག་པོའི་སྒྲ་ཡིན་པ་ཤེས་པར་བྱའོ། །
ཡང་ན་དངུལ་ཆུ་རིན་པོ་ཆེས། པུ་ཞེས་པ་པ་སྡེ་དང༌། ལིང་ག་ཞེས་པ་རྟགས་ཏེ། པ་སྡེ་ནས་འབྱུང་བའི་ཕོ་རྟགས་པ་དང་མོ་རྟགས་མ་དང༌། མ་ནིང་གི་རྟགས་བ་གསུམ་གྱི་སྒྲ་སྔར་མེད་པ་་ལ་གསར་དུ་པུ་ལིང་གའི་སྒྲ་གསུམ་པོ་གང་རུང་སྦྱར་བ་ན། དེ་ནི་བདག་པོའི་དོན་གསལ་བར་བྱེད་པའི་སར་ཤེས་པར་བྱ་ཞེས་པ་སྡེ་ལ་འགྲེལ་བ་ལྟར་རོ།།
བ་བོ་མ་མོ་སོགས་ཀྱང་བདག་སྒྲ་ལ་འཇུག་པའི་རྒྱུ་མཚན་ལ་རྩ་ཚིག་ཏུ། པུ་ལིདྒ་ཡི་སྒྲ་ཞེས་པའི་པུ་ནི་པ་སྡེར་གོ་བ་སྟེ། སྒྲ་མདོར།ཨུཏ་ཀྱི་སྡེ་དང་བཅས་པལོ །ཞེས་སྡེ་བའི་ཐོག་མའི་ཡི་གེར་ཞབས་ཀྱུ་སྦྱར་བ་སྡེ་བ་དེ་མཚོན་པ་སྟེ། ཀུ་ཙུ་ཌུ་ཏུ་པུ་སྡེ་བ་རྣམས་སོ། །ཞེས་པ་ལྟར་འགྲེལ་ན་ལེགས།
དཔྱད་གཞི།
སི་ཏུ་པཎ་ཆེན་ནས་ལིང་གའི་སྒྲ་ནི་བདག་པོའི་དོན་སྟོན་པར་བྱེད་པའི་པ་དང་པོའི་སྒྲ་གཉིས་ཁོ་ན་ཡིན་ལ་ཕྲད་རང་དབང་ཅན་དུ་བཞེད་པ་དང༌། སྐབས་འདིར་འགྲེལ་བྱེད་ཁ་ཅིག་གིས། བ། ཅན།
ལྡན་རྣམས་ཀྱང་པུ་ལིང་གའི་སྒྲར་འདོད་པར་སྣང་བ་འཐད་པར་མ་མཐོང་སྟེ། དེ་དག་ལ་བཤད་མ་ཐག་པ་ལྟར་གྱི་པུ་ལིང་གའི་སྒྲ་འཇུག་པའི་རྒྱུ་མཚན་མེད་པའི་ཕྱིར་དང༌། ཅན་ལྡན་གྱི་སྒྲ་གཉིས་གང་ཞིག་གང་ལཡོད་པ་སྟོན་པའི་ཆ་ནས་བདག་སྒྲ་དང་མཚུངས་པ་ཡོད་ཀྱང༌། དེ་དག་བེམ་པོ་ལའང་འཇུག་པས་བདག་སྒྲར་མ་ངེས་པའི་ཕྱིར་དང༌། བ་ཡིག་ནི་པུ་ལིང་གའི་སྒྲ་དངོས་སུ་འགྱུར་བ་ལྟ་ཅི་སྨོས། སྤྱིར་བདག་པོ་སྟོན་བྱེད་ཙམ་དུའང་མི་འཇུག་པའི་ཕྱིར་རོ། །ཞེས་སོགས་གསུངས་ཏེ། སི་ཏུ་པཎ་ཆེན་གྱིས་པ་པོ་གཉིས་ཁོ་ན་
མ་གཏོགས། བ་བོ་དང་མ་མོ།ཅན་ལྡན་མཁན་སོགས་ཀྱི་སྒྲ་གང་ཡང་བདག་སྒྲར་མི་འདོད་དོ།།
གཞན་ཡང། གཞུང་འདིར་མིང་གཞི་རྐྱང་བའི་སྒྲ་གཙོ་བོར་གྱུར་པའི་ཕྲད་བདག་སྒྲ་ཙམ་ལས་མ་གསུངས། ཞེས་པའི་དམ་བཅའ་མཛད་ཡོད་པ་ནི་ཐོན་མིའི་དགོངས་པ་དངོས་ལ་རེག་པའི་མཁས་པ་ཆེན་པོའི་ལེགས་བཤད་ཡིན་ནོ །
ཀུན་བཟང་དགོངས་རྒྱན་དུ།བདག་སྒྲ་མེད་པ་དཔེར་ན། རྟ། གསེར།སེ་ར། ལྷ་ས། སྨ་ར།བུམ་པ། ཀ་བ་ལ་སོགས་པའོ།།དེ་དག་ལ་པ་བ་པོ་ཅན་གང་ཡང་རུང་བ་སྦྱར་བས། རྟ། གསེར།སེ་ར།ལྷ་ས། སྨ་ར་ཅན། ཀ་བ། བུམ་པ། མྱོང་བ། བློ་ལྡན་ལ་སོགས་པ་རང་རང་གི་བདག་པོའམ་རང་ཉིད་གང་ལ་ལྡན་པའི་གཞི་སྟོན་པའི་སྒྲའོ།།བུམ་པ་དང༌། ཀ་བ་ལྟ་བུའི་པ་དང་བ་ནི། རང་མིང་གི་ཆ་ཤས་སུ་ཐོག་མ་ནས་གྲུབ་པས་བདག་པོའི་སྒྲ་མིན་པ་ནི། པུ་ལིདྒ་ཡི་སྒྲ་མེད་པ། །ཞེས་གསུངས་པ་ཉིད་ཀྱིས་ཤེས་སོ། །དེ་ལྟར་པ་བ་པོ་ཅན་གྱི་སྒྲ་ནི་བདག་པོའམ་ལྡན་པའི་དོན་དུ་སྦྱོར་ཞིང༌། དེའི་སར་ནི་ཤེས་
པར་བྱའོ།།དེ་ལྟར་ཡང་སྨྲ་སྒོ་ལས།པ་བ་ཅན་ནི་བདག་པོའམ། །ལྡན་པའི་དོན་དུ་སྦྱར་བར་བྱ། །ཞེས་སོ། །
བདག་སྒྲ་དང༌། མིང་གི་ཆ་ཤས་ཀྱི་པ་བའི་ཁྱད་པརནི་གང་ཡང་རུང་བའི་མིང་གི་མ་མཐའ་ན་པ་པོ་བ་བོ་མ་མོ་སོགས་པུ་ལིང་གའི་སྒྲ་སྔར་མེད་པ། དཔེར་ན། རྟ་དང༌། ཡོན་ཏན། ལྷ་ས། སྒྲུབ་པ།
ཙོང་ཁ་ལྟ་བུར་པ་པོ་སོགས་ཀྱི་སྒྲ་གསར་དུ་སྦྱར་བས། རྟ་བ། ཡོན་ཏན་པ། ལྷ་ས་བ། སྒྲུབ་པ་པོ། ཙོང་ཁ་བ་སོགས་རང་ཉིད་གང་ལ་དབང་བའམ་གང་ལ་ལྡན་པའི་དོན་སྟོན་པ་ནི་བདག་སྒྲ་དང༌། མིང་གི་ཆ་ཤས་ཏེ་ཐོག་མ་ཉིད་ནས་མིང་གང་འགྲུབ་བྱེད་ཀྱི་ཆ་ཤས་སུ་གྱུར་པ་དང་པོ་ལྟ་བུའོ།།གལ་ཏེ་ཆ་ཤས་དེ་སོ་སོར་བསལ་ན་མིང་དེ་བརྗོད་དོན་གསལ་བར་བྱེད་པའི་ནུས་པ་དང་བྲལ་བ་ནི་མིང་གི་ཆ་ཤས་སུ་གྱུར་པའི་པ་བ་སོགས་ཡིན་པས།སུམ་ཅུ་བའི་གཞུང་འདིར་བདག་སྒྲ་བསྟན་པའི་ཤུགས་ལ་མིང་གི་ཆ་ཤས་སུ་གྱུར་པའི་པ་པོ་བ་བོ་མ་མོ་དང་མིང་མཐའི་པ་བ་སོགས་ཀྱང་ཤེས་དགོས་པ་ཡིན་ནོ།།
སྔོན་གྱི་མཁས་པ་ཆེན་པོས་མཛད་པའི་བསྟན་བཅོས་རྣམས་སུ། སྟོང་པ། རྐང་པ། བཟང་བོ།དཀར་པོ་སོགས་ཡོད་པ་དམིགས་གསལ་ཡིན་ཟེར་ཡང་དམིགས་གསལ་གཏོང་དགོས་པའི་རྒྱུ་མཚན་སུར་ཡང་བཤད་རྒྱུ་མེད་དོ། །ཚད་མར་འཛིན་པའི་བསྟན་བཅོས་སོགས་ན་ཡང༌། ག་ད་བ་ས་ན་མ་པ། །ང་འ་ར་ལ་མཐའ་མེད་བྱ། །ཞེས་པའི་པ་བ་སོགས་ཐོབ་ཐང་ལྟར་སྦྱར་མེད་པ་ནི་ཐམས་ཅད་རྩོམ་པ་པོའི་དགོངས་པ་དངོས་ཡིན་པའི་ངེས་པ་མེད་དེ། ཡི་གེ་བ་དང་པར་ཞུས་པ་དག་གི་འདོད་པའི་དབང་དུ་སོང་བ་ཡོད་སྲིད། དེ་བས་མ་དག་རྒྱུན་འབྱམས་སུ་སོང་བས་ད་ལྟའི་རྩོམ་ཡིག་རྣམས་སུ་པ་ཚོགས་བརྒྱབ་ཡོད་པ་དོར་ནས་མིང་གི་ཆ་ཤས་ཀྱི་པ་བ་སོགས་རང་སོར་འཇོག་པ་དང༌། བདག་སྒྲ་དང་མིང་མཐའི་པ་བ་ཐམས་ཅད་ཐོབ་ཐང་ལྟར་སྦྱར་ན་ལེགས་སོ། །
མིང་ལ་མིང་གི་ཆ་ཤས་དང་མིང་མཐའ་གཉིས་ཀྱི་ཁྱད་པར་ཡོད་དེ། དཔེར་ན། སྐྱེས་པ། དང་པོ།དར་བ། བཟོ་བོ། རི་མ། རི་མོ་ལྟ་བུའི་པ་སོགས་བསྡུས་ཏེ་སྐྱེས་དང་དར་བཟོ་རི་སོགས་ཀྱིས་གོང་གི་དོན་རྣམས་སྟོན་མི་ཐུབ་པར་འགྱུར་བའི་རིགས་ལ་མིང་གི་ཆ་ཤས་ཟེར་བ་དང༌། གཉིས་པ། གསུམ་པ། བཞི་བ། རི་བོ།འོ་མ། འབྲི་མོ་ལྟ་བུའི་པ་སོགས་བསྡུས་ཀྱང་མིང་དོན་གོ་ཐུབ་པ་ཅན་ལ་མིང་མཐའ་ཟེར་བའོ། །
གཞན་ཡང་ཆོས་དང་ཆོས་ཅན་གྱི་སྒྲ་སོགས་མང་ཡང་འདིར་བདག་སྒྲ་དང་མིང་གི་ཁྱད་པར་མཚོན་བྱེད་ཀྱི་དཔེར་བརྗོད་ཙམ་འགོད་ན།
བདག་སྒྲའི་པ་ཡིག འབྲོག་པ། ལས་བྱེད་པ། གསོལ་ཐབ་པ། ཤིང་བརྐོས་པ། བཙུན་པ།ལམ་པ། སྐྱེས་པ། མཁས་པ། ཡོན་ཏན་པ།
མིང་གི་པ་ཡིག ཐག་པ། སྐུད་པ། བཅིབ་པ། མུན་པ། ནོམ་པ། ཐོད་པ། རྣམ་པ།
བདག་སྒྲའི་པོ་ཡིག ཕྱུག་པོ།མེད་པོ། གཡོག་པོ། དཔོན་པོ། གྲོགས་པོ།གཏུམ་པོ། བླུན་པོ། མགྲོནཔོ། བློནཔོ།
|